Skip to main content

Chemte hmanga mi beitu Court in achungthu rel

Nimin khan H. Lalhmunsiama S/o H. Zohminga, Zawlbuk Venghnuai chu Addl. Sessions Judge, Special Judge ni bawk R. Vanlalena chuan Kum 7 chhung hrehawm taka jail tang tur leh pawisa Cheng 5,000/-chawi turin a hrem a. Pawisa chawi tur hi a pe thei lo a nih chuan Kum 1 dang Jail a tan belh leh ang. Thu dawn danin, Ni 12.11.2014 chhun dar 12 vel khan Lalkhawngaihi D/o R.Lalzuala, Zawlbuk Veng, Biate khua chu anu damlo awmpuiin inah a awma hetihlai hian  a pa R.Lalzuala chu hna thawkin a chhuak a. Chhunlai takah chuan H.Lalhmunsiama S/o H.Zohminga, Zawlbuk Venghnuai, Biate khua a awm hi rawn lut ve in ngawi rengin a thu ve a. Chutia H. Lalhmunsiama hian Lalkhawngaihi hi man thutin a nghawngah a rek bet a,  chawhmeh channa chemte in a nghawnga zai a tum ta mai a. Mahse Lalkhawngaihi hi lo inveng ve in leh, a nu leh a nu thiannu ten lo chhan vatin, an thawmah midang an rawn tlan lut ve nghal a. Mipa dang lo tlan lut ve te chuan H.Lalhmunsiama chu man betin a chemte ken pawh an laksak ta a, n…
ni 8.8.2017 (thawhlehni)

DISTRICT PAWN PLAYER TE NEN VOLLEYBALL BENG DAWN :
CDVA buatsaih Independence Day Volleyball Tournament chu vawiin atangin Kahrawt Field ah tan a ni dawn ta. CDVA chuan Club pakhat tan District pawn player pakhat theuh lak a phal avangin he tournamentah hian Mizoram player tha an fuan khawm dawn a. Mipa Team 19 leh Hmeichhe team 7 te an inlan dawn a ni. Mipa Pool A ah MZ Home Team 1, Tuipui, TBC leh Dinchhungi Volleyball Club te an awm a Pool B ah Vengthlang North, Zion Veng, Champhai Higher Secondary School leh  Khawhai te an awm. Pool C ah PC Lalsangliana Memorial Volleyball Club, Sazep; Bethelians, Govt Champhai College leh Zokhawthar te an awm a. Pool D ah Tlangsam Volleyball Club, MZ Home ll, Ruantlang GSA, Ngopa leh New Chalrang te an awm bawk. Hmeichhe lamah Pool A-ah Dungtlang, Vengthlang North, Forever Young leh Ruantlang te an awm a. Pool B ah PC Lalsangliana Memorial Volleyball Club, Comet leh Khuangleng te an awm bawk ani.

NAUPANG VANNEI ZAWNG:
Nimin khan North East United Academy-a lut tur selection Chhangphut Field ah neih a ni. Selection hi North East United leh MPL Club Dinthar te tangkawp chuan Champhaiah rawn kalchilhin Trial an neih pui a. North East United atangin mi 3 leh Dinthar FC atangin mi 1 te chuan selection hi an nei a. Kum 2001 2004 a piang te tan selection trial hi neih a ni a, nimina thlan chhuah te hian North East United Academy an zawm nghal dawn a ni. Champhai District chhung hmun hrang hrang atanga kalkhawm naupang 500 vel zet te chuan Selection Trial hi an nei a. He hun hi ISL atana Champhai District atanga tel Lalruatthara, Chhawnkima, Robert Lalthlamuana te chuan an telpui a ni. Hetihlai hian CDFA chuan nimin khan Champhai District atanga lSL khel tur Lalruatthara, Hmunhmeltha leh Lalchhawnkima, Kanan Vengte chu zanriah an kilpui bawk a ni.

ZAI HMANGIN TANPUINA;
MZI hqrs Champhai-in Mizoram chhunga tuilian leh leimin tuarte tanpuina tura tun hnaia Champhai khawpui chhunga Charity Concert a buatsaihah khan Rs. 34,089 hmuh niin, MZI Gen. hqrs. Aizawlah thehluh a ni a. Tanpuina petute chungah MZI Hqrs Champhai chuan lawmthu an sawi a ni.

KHAWCHHAK ATANGIN NI CHAUH A THA BIKLO:
Nimin khan Mizorama tuilian tuarte tanpuina tur buhfai chu Myanmar atanga rawn thlenpui a ni. Buhfai hi quintals 50 niin nimin tlai khan YMA Sub-hqrs Champhai Office rawn thlenpui a ni a, heng buhfaite hi Mizoram Tuilian tuarte tanpuina atana Myanmar Zohnahthlakte khawn khawm niin, vawiin hian a hmaa pawisa fai an khawn tawhte nen YMA kutah an hlan dawn a. Buhfai hi Myanmar atangin mi 20 velin Champhaiah hian an rawn thlen a ni.

DISTRICT NGIAT AVANGIN NUAR DAWN:
Khawzawl District Implementation Demand Committee chuan nimin khan Khawzawl SDO (Civil) hnenah Iehkha thehlut in, Mizoram sawrkar-in Khawzawl District-a a lo puan tawh, vawiin thlenga ala function lo chu function thuai se an duh thu an sawi a. Tunkar Inrinni ralhma a a function loh chuan karleh Thawhtanni zing dar 5:00 atanga tlai dar 5:00 thlengin Khawzawlah Total Bandh huaihawt an tum thu an sawi bawk.

MIHRING 11 MAN:
July thla chhung khan Excise & Narcotics Dept. ah Case 26 ziah luh a ni a. MLPC Act hnuaiah Case 14 ziah luh niin Rakzu 891 ltrs man a ni a, Zu bilh lai 32, Sap Zu 2, Beer 12 can, Zu Bel 9, Zu phurhna Motor 2 te man niin mihring-11 man an ni bawk. ND&PS Act hnuaiah Heroin No. 480.86 grams man ani a, Ganja pawh man niin Case 12 ziahluh a ni a,  mihring 12 man a ni bawk.

FOOTBALL INELNA KALPUI ZEL:
Independence Day Football Tournament chu nimin chawlh lailawk a nih hnuah vawiin hian Chhangphut Field-ah khelh chhunzawm leh ani dawn. Vawiin hian Match thum a awm ang a, inkheh hmasa ber dar 11:00ah FC Vengthlang North leh Vengthlang FC an inkhel ang a. Inkhel vawihnihnaah Hnahlan Vengthlang leh Champhai United an inkhel ang a. Inkhel hnuhnung berah Rabung Zone leh Vengsang FC te an inkhel bawk ang.

Petrol : Free Sale  (63.79)
Diesel : Sem rual  (54.99) 

Comments