Skip to main content

ONLINE APPLICATION CHUNGCHANG ZIRHO

ONLINE APPLICATION CHUNGCHANG ZIRHO : Nimin khan DEO hnuaia zirna in hrang hranga zirtir tute tan Scheme thar Online Application of Scholarship Scheme chungchang Govt Champhai College Multipurpose Hall-ah zirho a ni. Pu P. Lalhmingliana, Principal, Govt. Champhai College chuan tun hma chuan scholarship ti turin awlsam takin a tih theih mai thin a, khawvel changkang zelah tunlaiah chuan tun hma ang mai maia tih theih a ni tawh lova, Online-a Scholarship form dah khah a ngaih tawh avangin Computer leh Online a tih theih hrang hrang te hi kan thiam a ngai a ni a ti a, la hmang thiam lo te pawh intuaihriam zel a, Internet hmanga tih theih hrang hrang te hi thiam vek tum turin zirtirtu kalkhawm te chu a chah a, mi inzir peih te tan thiam theih loh hi a awm tak tak lova, kum upa lam tawh tan pawh zir peih phawt chuan thiam theih a nih thu sawiin Seminar chu a hawng a ni. Mizoram Scholarship Board Secretary Pu JH. Zoremthanga chuan, Scholarship chu naupang harsa zawkte tanpuina anih avangin …
ni 28.9.2017 (ningani)

POLITICIAN-TE INRAWLH THEIHNA A HNA DIL DUK DUK HI A CHANGKANGLO :
World Ozone Day chu nimin khan Govt GM Higher Secondary School-ah hman a ni.
Kumin World Ozone Day thupui atan hian 'Caring for all life under the sun" tih hman a ni a. He hun hi Govt GMHSS Principal K Pazawna’n kaihruaiin Champhai DFO C. Lalbiaka IFS, chuan thu sawiin Ozone layer hi boruak chikhat hlauhawm tak laka kan chenna Lei vengtu a ni a, ni Zungzam sa tak leh hlauhawm chi Ultra Violet Radiation (UV-B) ten kan awmna Lei a lo thleng tur dangin lei leh a chhunga cheng nunna neite min venghimtu a ni a, Ozone layer hi awm lo se la chuan kan khawvel hi nunna neite tan damkhawchhuah ngaihna a awm lo ani, ati. Khawvel hmun hrang hrangah Ozone layer hian pan lam a pan zel a, mihring hriselnaah nghawng nasa tak neiin natna chi hrang hrang a ti pungin natna inkaichhawn a awlsam phah hle a ni, a ti a. Ozone hi Pathianin a awmna tura a siama a awm loh chuan thil hlauhawm tak anih rualin a awmna tur dik taka a awm chuan Ni zungzam hlauh awm lokal hip raltu a nih avangin nunna nei zawng zawngte tan thil tangkai tak a ni, a ti bawk.
Ozone layer pawp hian kan ram a nghawng phak lo niin kan ngai palh ang tih hi thil hlauhawm tak a ni a. Khawvel hmun danga miten a nghawng an tuar chuan Khawvel pakhata cheng kan nih avangin kan chungah pawh a lo thleng thei a ni tih hriain kan tan thil tangkai tak leh pawimawh tak ni si hi a chhiat lohna turin theihtawp kan chhuah a ngai a ni, a ti. Ozone layer venhim hi kan za vaia kan mawhphurhna a ni tih hriain a pawimawhzia hi kan tlangaupui a tul thu sawiin, a la hre ve lote hneha hrilh zel turin zirlai kalkhawmte chu a ngen a. Ramngaw ven him hi kan zavaia kan mawhphurhna a ni tih hrereng turin a chah bawk. World Ozone day hi September 27 ni mah se, Holiday anih avangin nimina hman a nih tih a tarlang tel bawk. Champhai DFO C.Lalbiaka IFS, chuan zirlaite chu tum mumal tak neia lehkhazir turin a chah a, Central service ah Mizote kan tlem tawh em em a, Mizote a tam thei ang ber central servicea kan luh theihna turin zirlaite chuan theihna an nei tih hriaa theihtawp chhuah turin a chah a. Politician-te inrawlh theihna hna dil duk duk hi a changkang tawk lova, ziak ngei a tlin theihna hna dil zawk tura theihtawp chhuahturin a ngen bawk. He hun hi Thanliana Hauhnar, R0 Champhai in lawmthu sawiin a khar a ni.

ROLLING SHUTTER CONTROL THEIH SIAMCHHUAK :
Nimin chawhma khan  Beijing Bend, Champhai  Jail Veng-ah Rolling Shutter Controlling Machine Demonstration Programme hman a ni a. He hun hi Champhai DC Pu Vanlalngaihsaka, IAS chuan hmanpuiin  Rolling Shutter Controlling Machine  chu mipui ten tangkai taka an  hman theih turin a hawng a ni.
Champhai DC Pu Vanlalngaihsaka IAS chuan khawtlang tana mi inpe ten rilru leh ngaihtuahna senga midang te tana malsawmna ni tura hna an thawk thin chu lawmawm a tih thu a sawi a. Mi tute pawh  hian ngaihtuah theihna fim tak Pathianin min pek hi kan chhawr tangkaia kan hman tangkai phawt chuan mi ropui takah kan chhuak thei a ni ti bawk.
He hun hi Er. Lalrammawia SE, PHE chuan kaihruaiin mi tute pawh hian thil danglam bik tichhuak tur hian theihna kan nei vek a ni, a ti a, kan rilru kan sen tawk thin loh avangin ti thei lo angah kan inngai mai thin a, ti thei tura rilru seng tak tak thin te chuan hlawhtlinna an hmu thin a ni, a ti. Pu Zoramchhana hnen atangin Rooling Shutter control theih siamchhuah a nih dan leh siamchhuak tura a beihna kawng hrang hrang te ngaihthlak a ni a. Mizoram Science Technology & Innovation Council lama hotute hnen atangin thusawi ngaihthlak a ni a. Pu Lalthanmawia Bolchhim, President District Promoters Club, Champhaiin lawmthu sawina neiin hun hi a khar a ni.
Rolling Shutter Controlling Machine siamtu Pu Zoramchhana hian Tui Pump khawl control-na a lo siam chhuak tawh a, mipui ten an chhawr tangkai hle a ni. Tuna Rolling Shutter Controlling machine a siam chhuah  hi siam a nih theihna atan Mizoram Science Technology & Innovation Council (MISTIC) chuan thawhpuiin Rs 1,97,000 laiin an tanpui a. Tanpuina sum hmang hian Rolling Shutter Controlling Machine siamna atana hmanraw mamawhte leikhawm anih hnuah September ni 5 khan a siam zo thei ta a ni. A thil siam chhuah hi a duh apiang tana order theih turin ruahmanna siam mek a ni a, a man tur hi a to berah Rs 15,000 man tura ruahman a ni.

PARKING FEE KHAWN DAN TUR REL:
Ni 26.9.2017 (Thawhlehni) chawhnu khan Champhai DC Pu Vanlalngaihsaka hovin DC Conference Hall-ah Champhai town area chhunga parking area siam dan tur leh parking fee khawn dan tur chungchang rel a ni.
Meeting chuan Champhai khawpuiah lirthei a lo pung zela, traffic management mumal leh changtlung zawk neih a tul tawh thu a tarlang a.  Hmalakna atan parking area thar Champhai khawchhung hmun  hrang hrang; Awmpui phei, Bethel, Vengthlang leh Tuipui Bazarahte felfai taka siam nise hengah te hian rate awmsa hmangin parking fee mumal taka khawn thin nise a ti a. District Transport Officer (DTO)  kaihhhruaina hnuaiah a tul angte lo zirchianga bawhzui nise tiin a rel bawk a ni.
Meeting-ah hian Champhai khawpui chhunga sawrkar hotute, Khawtlang hruaitute, Village council aiawhte leh lirthei neitu aiawhte an tel a ni.
 
FOOTBALL TOURNAMENT :
Nimin khan Vanbawia Memorial 2nd Div Football Tournament chu khelh chhunzawm leh niin, Pool Match khelh zawh a ni. Nimin inkhel hmasa berah, Vengthar FC chuan Bethel FC  chu 5-0 in an hneh a, inkhel vawi 2-naah Venglai FC in Kahrawt FC chu 1-0 in an hneh. lnkhel vawi 3-naah New Champhai FC chuan FC Tlangsam chu 3-1 in an hneh bawk. Inkhel hnuhnung berah Kanan FC chuan si hnih faiin Zote FC an hneh a ni. Vawiin inkhelh chawlh lailawk a ni ang a, naktutah Quarter finaI khelh tan a ni ang.

Comments