Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…
ni 17.10.2017 (thawhlehni)

PANDAL HLANNA HUN HMANG :
Pathianni zan Dar 8:30 khan 71st YMA General Conference hmanna tur Pandal "Zokhawpui Rûn" tia vuah chu Pathian hnena hlan a ni ta.
Pandal Pathian hnena hlanna inkhawm hi Pu H. Laltuliana, General Conference Organising Committee Chairman in kaihruaiin, Pastor H. Lalnunmawia, Ruantlang pastor bial vawngtu chuan Pathian hnenah a hlan a, he hun hmangtu zawng zawng ten a huhova tawngtai rualna an nei bawk. He hun hi Champhai Deputy Commissioner Pu Vanlalngaihsaka leh Sub-Hqrs YMA hruaitute, Champhai Zotlang khawtlang hruaitute leh Veng chhung leh branch pawn mi 700 velin an hmanpui a ni.
Organising Committee Secretary Pu Lalzahawma Varte in a report danin Pandal hi a dung 190 ft niin a vang 160 ft. a zau a ni a. Conference thleng tur hian Champhai Zotlang khua chu theihtawpin a inbuatsaih a, mikhual lokal zawng zawngte Champhai Zotlang khua a thleng vek turin a ngen a, Champhai Zotlang khua chu a theihna chinah a inpeih fel tawh tih a sawi bawk. Naktuk atanga ni 19 zan thleng YMA GEN.CONF.vawi 71 na hi neih a ni dawn a. Vawiin khan Champhai Bawrhsap Pu Vanlalngaihsaka leh a Staff te chuan Pandal chhehvel a la zawh fel loh awm te chu hnatlangin an zawhpui a, Pandal tual lei nem lai te chu kal a awlsam zawkna atan leirawhchan an rem bakah tihfai ngai awm apiang te an tifai a ni.

DAWR RAWK :
Inrinni zan atanga Pathianni inkar khan Ever Shine dawr Champhai Vengthlang a mi chu tu tih hriat loh ten an rawk.
He dawr Pu Lalrinchhana dawr niin Jeans bakah hmeichhia leh mipa thawmhnaw chi hrang hrang zawrh a ni a, misual tu tih hriat loh te chuan dawr kalhna tala chu tichhia in a chhungah an lut a, dawr chhunga thawmhnaw dah chi hrang hrangte chu Hanger chawpa la in an tlanbo zui a, thawmhnaw an lak te hi Cheng 70000 man vel bawr a ni. Nimin zingah dawr hawng tur chuan dawr hi rawk a ni tih a hre chauh a, FIR thehlut nghal in Champhai Police te chuan misual zawn hna hi an thawk nghal a ni. Tunlai hian Champhai khawpuia sumdawnna hmun Champhai Vengthlanga dawr rawk thawm a awm leh avangin Vengthlang Branch YMA te chuan duty an insiam nia thudawn a ni.

KUT SIL NI HMANG :
Champhai PHE WATSAN Division leh District SSA Mission tangkawpte bultumin nimin khan Champhai Government Model Primary School II-ah Global Hand Washing Day hman a niin, Champhai Watsan Division EE & District Swachh Bharat Mission (Gramin) Member Secretary Er. J. Kapkima chuan he hun hi a kaihhruai.
He hun hmanpuitu Champhai District Reproductive & Child Health Officer (DRCHO) Dr. Benjamin Lalruatdika chuan kuminah Global Hand Washing Day in Sunday ni a thut vanga niminah hman anih thu a tarlang hmasa a. Faina leh thianghlimna-in hriselna a kentel vangin pawnlam atanga mihring taksa tichhe theitu natna hrik kaichhawnna ber pakhat chu kan kutphah bawr hi a ni tih sawiin, kan chetvelna-ah kut hi leklam ber anih vangin pawnlam atanga natna hri kan kai thin 50% chu kut atanga kaichhawn anih vangin fai taka vawn thianghlim anih reng theih nan khawvel mithiamten Global Hand Washing Day hi an rawt chhuak ta a ni a ti a. Hun tlemte hmanga fai taka kutsil dan thiam hi a pawimawhin, a zing thei ang ber kut silfai a pawimawh thu leh kutphah fai-in natna tam tak kan kai theih tur a pumpelh theih thu a sawi bawk.
Global Hand Whashing Day hmanna-ah hian Champhai Sub-Centre Health Worker Pi Lalramlawmi chuan hun reilote chhunga kut fai taka sil fai dan zirlai naupangte a zirtir bakah a takin a lantir a. Zirlai naupangte hian zirtirna an dawn angin a hohovin kut an silfai nghal bawk.

NI NGEIA HRIAT MAN :
Pathian ni zing dar 01:00am vel khan Mizoram Police Champhai leh DSB tangkawpte chuan Heroin ni ngeia hriat leh a neitu an man.
Mizoram Police Champhai leh DSB tangkawpte hian Mobile Checking Mualkawi ah neiin, Mualkawiah ah chuan Sumo pakhat MZ-01/K-8668, Zokhawthar atanga Champhai lam rawn pan mek atangin Brown Powder, Heroin ni ngeia rin Polythene dum pakhat chhunga sahbawn bawm 10 chhunga dah chu a neitu Lapanliani d/o Lalnunmawia(L), Chawngte, Lawngtlai District, Tuna Zokhawthar, Champhai khawsa mek nia insawi kut atanga man a ni a, Champhai Police te thil man hi Gram 150.08 a ril niin An thil man hlutzawng hi Nuai 5 man hu a ni. Lalpanliani hi ND&PS Act hnuaiah thubuai siam sak niin nimin khan Champhai District Jail-ah dah luh nghal a ni.

CHENNA IN SIAMTHAT SAK ;
Nimin khan Vaiphai Branch YMA leh VC te chuan chungkaw harsa chenna in an thawm that sak.
Vaiphai Branch YMA leh VC te chuan Tv. Vanlalbiaka te chhung chu chhungkaw harsat avanga in leh lo enkawl hlei thei lova an awm avangin nimin khan hnatlangin an chenna in an thawm that sak a, chhungtin hnen atangin pawisa leh buhfai an remchan ang ang an khawn sak bawk a ni. Vanlalbiaka nu hi kum 70 niin a mit a del tawh a, a farnu hi rualbanlo niin mahnia zun ek thiar mumal thei lo a ni bawk a. A nu leh a farnu enkawlin lo lam eizawnna a chhunzawm theih tawh loh avangin Vaphai khawtlang chuan an chhungkua khai chhuak tur hian hma an la ta
a ni.
Nimim a Vanlalbiaka te in thuam tha pah hian, an vawk in tur leh ar in tur an siam sak nghal a. Mipui thawhlawm pawisa tlingkhawm hmangin vawk leh ar an vulh tur an lei sak nghal dawn a.
Hnatlangah hian mi 104 an thawk chhuak a ni.

MALSAWM RUAH TLA THA :
September thla chhung khan Champhai District-ah ruahtui 330.5 mm a tla
Kumin chhung hian Champhai District ah ruahtui tlak tlem ber tum hi January thla niin Champhai in ruah a dawn lova, July thla kha a tlak tam ber tum la ni in 423.3 mm a tla a, kumin chhung hian Champhai District hian ruahtui 2073.5 mm dawng tawh a, chawhrualin thlatin ruahtui 259.2 tla ziah ang a ni.
Kum 8 kal ta chhung hian kum 2010 kha September thla a ruahtui tlak tam ber tum niin 480.07 mm a tla a, kum 2011 kha a tlak tlem ber tum niin 186.97 mm a tla ve thung a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Sermon

Ringtute Hi Khawvel Eng Kan Ni
Chang thlan : Matthaia 5 : 14 - 16
Eng tel lo chuan khawvela nunna neite hi an dam khawchhuak thei lo. Eng hmanga chaw siam thei chauh vek an ni. Thil, a nihna ang taka kan hmuh fiah theihnan pawh eng a ngai a, eng awm lohna ah chuan kan chetvelna pawh a buai zo vek a nih hi. Thimah chuan kawng kan hmu thei lo va, hlauhawm leh hlauhawm lo kan thliar thei lo va, kan mit kan chhawr tangkai thei hek lo. Eng tel lo chuan kan khawsa thei lo a ni
Khawvel Eng - Isua : Isua hi khawvel eng a nih thu Johana 1:9, 8:12 ah te kan hmu. Isua tel lova khawvela nun kan hman chhung chuan thimah kan cheng tihna a ni. Nuamsa takin awm mah ila, Kawng leh Thutak leh Nunna Isua kan neih loh chuan kawngbo kan ni tho. Kan hlawhtlinna te, ropuina leh hmingthatna te pawhin kan damchhung bak a daih lo. Tin, kan nunna atana tha leh tha lo pawh kan finna atangin kan teh ang a, a dik zik tluak chuang lo . Kan hlimna leh lawmna pawh hian tawp chin a nei a, lungngaihn…