Skip to main content

MIPUITE TAN DAMDAWI MANTLAWM

MIPUITE TAN DAMDAWI MANTLAWM : Mipuiten man tlawm zawka Damdawi an lei atheihna tura Sorkar laipuiin ruahmanna a siam, Pradhan Mantri Bhartiya Jan Aushadhi Kendra (PMBJAK) hmanga Champhai District tana Champhai Town Multipurpose Cooperative Society (CTM-PACS)-in Generic Drugs Store a siam chu nimin zing khan Champhai District Senior Medical Officer Dr. R. Lallianmawia'n a hawng. Champhai Vengthlang Pu Chalbawia Building-a CTM-PACS Variety Store sira he Generic Drugs Store hawnna hun hi PACS Chairman HS Vanlalfakzuala'n kaihruaiin, Senior Medical Officer Dr R. Lallianmawia chuan, Sorkar laipui ruahmanna anga Champhai District mipuiten man tlawm zawka Damdawi an lei theihna tura Generic Drugs Store hawn a ni ta chu lawmawm a tih thu a sawi a. 'Nang malsawmna ni ang che' tih thupui a hmangtu Champhai Town Multipurpose Co-operative Society-in hetiang Dawr a hawng hi thil inhmeh tak leh mipui tana vanneihna rahbi thar a ni, a ti. SMO Dr. R.Lallianmawia chuan Generic Drugs S…
ni 3.10.2017 (zirtawpni)

MCTA ANNUAL GENERAL CONFERENCE VAWI 39-NA HMANG :
Mizoram College Teachers Association (MCTA) Annual General Conference vawi 39-na chu nimin chawhma dar 10 khan Govt Champhai College Multipurpose Hall-ah tan a ni a. He hunah hian Higher and Technical Education changtu Minister Pu R.Romawia chu khuallian a ni a. Govt. Champhai College-a RUSA  building thar sak zawh chu a hawng nghal bawk a ni.
Khuallian Pu R.Romawia chuan zirtirtu leh zirlai tha leh thiamte chu ram leh hnam tana rohlu an ni, a ti a. College Zirtirtu intelkhawm ten Conference hun tha tak an nei thei chu a lawmpui thu a sawi a. Sawrkar  leh MCTA ten thawhhona tha tak an nei chu fakawm tiin ram leh hnam tana thawhdunna kawngah rah tha tak a chhuah a beisei thu a sawi a. College zirtirtu indaihlohna chu sawrkar pawhin a hriatpui thu leh mamawh zualte phuhruk anih theih nan hmalak mek zel a ni, a ti a. Contract teacher leh part time teacher-te pawh lak anih theih nan tan lak a ni, a ti bawk a. College zirtirtute chu indaihlo hle chunga result tha tak an nei thei chu fakawm a tih thu a sawi a. Zirlai ram leh hnam tana chhhawrtlak leh innghahna tlak chherchhuah kawngah nasa leh zuala tan la turin college zirtirtute chu a chah a. Minister chuan College-a
Library changtlung tak leh thawktu an awm chu thiamna zir kawngah a tul hle a ni tiin hemi atan hian hmalak anih thu a sawi a. RUSA scheme hnuaiah College hrang hrangahte hmasawnna ruhrel hmuh theihin a awm thu tarlangin tun thlenga RUSA kaltlanga  sum hmun tawh chu cheng vaibelchhe 80.8 a ni, a ti a. NEDP kaltlangin College-te mamawh zual phuhruk nan cheng nuai sang khat dah a nih thu a sawi a. Central lam atanga College tana fund lokalte chu felfai leh dik taka hman thin a ni, a ti a. Khuallian chuan zirtirtu kalkhawmte chu ram leh hnam hmasawnna atan a thawhpuiah sawmin Conference hun hlimawm leh hlawkpuiawm tak hmang turin duhsakna a hlan nghal bawk a ni.
MCTA Annual Conference programme hi Pu H. Lalnunmawia, Vice President, MCTA-in a kaihruai a. Dr. P.L Ramliana, President, MCTA-in kalkhawnmte lawmna thu a sawi a. Pawl chungchanga report Dr. C.Lallremruata hnen atanga nghaihthlak a ni a. Member thi ralna hun hman ani a. He hunah hian Pu Lalnunmawia, Principal, Govt. Champhai College pawhin thu a sawi a. Pu Samuel Laltlanzaua, Secretary i/c Organization, MCTA in lawmthu sawina neiin hun a khar a ni. Chawhnu lamah rorelna leh pawl hruaitu thar thlanna hun neih a ni.
MCTA hi September ni 7, 1979-a din a ni a. Hemi hnuaiah hian College hrang hrang / branch 23-an awm mek a ni. MCTA data in a tarlan dan chuan tun dinhmunah Mizoram College zirtirtu hi an vaiin 632 an ni a. Hemi zinga za zela 32.43 hi Assistant Professor rank an ni a; za zela 65 chu Associate Professor rank niin abak za zela 2.21 vel chu Professor rank an ni a. College zirtirtu hna za zela 19.46 chu hnawhkhah lohin a awm mek a. Contract leh part time zirtirtu 215 an awm mek bawk a ni.
Programme zawh hnu hian Minister chuan Champhai Tlangsama Polytechnic chu a hmunah kalin a enfiah a. Tangkai taka hman anih ngei theih nana hmalak a tum thu a sawi a. Minister hi khawtlang hruaitu ten  lo dawngsawngin khawtlang mamawh a hnena an thlen te chu lo enzui sak a tum thu a sawi a . Hemi hnu hian New Champhai hmuna Land Revenue and Settlement Office hmunhma chu tlawh lehin an harsatna te chu lo enzui sak a tum thu a sawi a ni. He hunah hian Minister hi Pu Ramhmangaiha Ralte, Joint. Director (Administration) H&TE Dept, Dr. Lallawmkima, DIPRO Champhai, Pu Lalnunmawia, Principal Govt. Champhai College ten an tawiawm a ni.

VAWK VULHTUTE TAN HMASAWNNA :
Mizoram hmun dang rualin nimin chawhma khan Champhai Kahrawt YMA Hall-ah Champhai District AH & Vety Department-te chuan Launching Programme of Deworming in Pigs tih  hun an hmang a. He hun hi Champhai DC Pu Vanlalngaihsaka chuan khuallian niin a hmanpui a ni.
He hun hi Dr Zohmingthangi Champhai District AH & Vety, Officer chuan kaihhruaiin programme hman chhan a sawifiah a. Rulhut laka Vawk venna programme ( Deworming in Pigs Programme ) chu National Livestock Mission hnuaia Sub -Mission pakhat anih tarlangin hei hi India hmarchhaka awm vawk vulhtute  tana  vawk vulhna kawnga hmasawnna  programme a ni, a ti a.  Hemi hmalakna hmang  hian Vawk vulhte hri danna hmanga venhim leh hriselna tha zawk an neih theihna turin a note an nih lai atanga uluk taka Rulhut an pai lohna tura hmalaknate a huam a ni, a ti bawk.
Khuallian Champhai DC Pu Vanlalngaihsaka chuan thusawiin Mizote chu  pipute hun atang tawha vawk vulh thin hnam kan nih thu a sawi a. In tinin vawk kan vulh thin avangin vawk nen kan inhnimhnaiin kan inkungkaih tha hle a ni a ti a. Vawksa ei nasa hnam kan nih a vangin  vawksa hrisel leh thianghlim kan thar chhuah theihna  turin a vulhtute pawhin mithiamten a enkawl dan an sawi anga kan enkawl a ngai a ni, a ti a. Sawrkar hmalakna pawimawh tak NLUP Flagship programme hnuaiah mi tam takin vawk vulh an thlan thu tarlangin a enkawl leh thar chhuah kawngah mawhphurhna kan hlen a ngai a ni, a ti bawk.
Central Sawrkara Department of Animal Husbandry, Dairying & Fisheries, Ministry of Agriculture Farmers Welfare atanga Fund dawn angin he hun hi Mizoram District tinah kalpui a ni a. Vawk vulhtute hnenah a thlawnin Rulhut hlo pek an ni bawk. National Livestock Mission hnuaia Sub-Mission pakhat chu Pig Development in the North Eastern Region tih a ni a, hemi  hnuaia component pakhat Health Cover-in a tum ber chu hri danna hmanga Vawk pul hri (Classical Swine Fever) leh Vawk ke leh ka natna (FMD) laka vawk venhim a ni a. Heng bakah hian vawk note rulhut laka an fihlimna tura hmalaknate a huam bawk a ni.
He hunah hian Dr B Lallawmsanga hnen atangin Rulhut hlo pek pawimawhna ngaihthlak a ni a, Dr TC Lalthanzauva'n lawmthu sawiin he hun hi a khar a ni.

THUPEK CHHUAH :
Champhai khawpui chhungah lirthei leh mihring che vel a awlsam zawk nan leh him tlan theih nan 133 CrPc 1973, Sec-I, Sub-Section-in thuneihna a pek angin Pu Pachhunga, Sub-Divisioal Magistrate chuan a hnuaia mi ang hian khapna thupek a chhuah a ni.
1.    Insakna bungrua leh inthiahna chak hlui etc phalna nei lovin vantlang kawngpui sirah tumahin an dah tur a ni lo.
2.    Motor hlui leh Motor chhia vantlang kawngpui sirah tumahin an dah tur a ni lo.
3.    Motor kawng dalin eng thil mah dah loh tur anih bakah kawng dalin eng thil mah tih loh tur.
Khapna thupek hi November ni 1, 2017 a chhuah niin thupek chhuah atanga thla hnih chhung a huam ang. Khapna thupek zawm lote chu Section 188 IPC hmanga hrem theih an ni ang.

POLYTECHNIC TANGKAI TAKA HMAN ANIH THEIH NAN HMALAK TUM:
Champhai tlawha lokal Higher & Technical Education Minister R. Romawia chuan nimin chawhnu lam khan Tlangsama Polytechnic chu a hmunah kalin a enfiah a tangkai taka hman a nih ngei theih nana hmalak atum thu a sawi a. Minister hi khawtlang hruaituten lo dawngsawngin khawtlang mamawh a hnena an thlen te chu lo enzui sak atum thu a sawi a. Hemi hnu hian New Champhai-a Land Revenue and Settlement Office hmunhma chu tlawh lehin anharsatna te chu lo enzui sak a tum thu a sawi a ni. He hunah hian Minister hi Ramhmangaiha Ralte, Joint Director (Administration) H&TE Dept, Dr Lallawmkima, DIPRO Champhai, Lalnunmawia, Principal Govt. Champhai College ten an tawiawm a ni.

LEHKHABU TLANGZARH :
Badminton khel tinte tana lehkhabu tha leh rotling Pu Paul Zakhuma, Champhai Vengthlang ziah Badminton Dante (The Laws of Badminton, 2017) tih chu nizan khan CDBA President Pu Lalnunmawia'n a tlangzarh. He tlangzarh inkhawmah hian sawm bikte nen Hotel Hranga hun an hmang ho a ni.

TUIALHTHEI DINHMUN 
Petrol : Sem rual  (66.38)
Diesel : Service Tanky  (56.28)

Comments