Skip to main content

CHAMPHAI ṬHALAI PAWL THUCHHUAH

CHAMPHAI ṬHALAI PAWL THUCHHUAH :
Champhai Ṭhalai Pawl ten Champhai Damdawiin Solar Plant chhia siam tha tura Mizoram Sawrkar vawi li lai a ngen hnuah an lehkha No. B. 11013/99/2012/SOLAR/DHME (PP) 252 a chhanna kan hmu hi kan lawm hle a.

Champhai Damdawiin Solar Plant siam that nan hian Zoram Energy Development Agency (ZEDA) hnenah a sum mamawh zat tur ruahmanna siam tirin Champhai Damdawiin Solar Plant siam that nan sum tam tak sen ngai lova Rs. 3,30,792 chauh sen a ngai lehzel tih ZEDA lehkha No.T.11082/01/2018-ZEDA in Mizoram Sawrkar an hriattir leh hi lawmawm kan ti takzet a.

Champhai Ṭhalai Pawl chuan August thla chhunga siamtha ngei turin Mizoram Sawrkar hnuaia Hospital & Medical Education, Aizawl chu a phutin a ngen tak meuh meuh a. Champhai Ṭhalai Pawl    huntiam August thla chhunga hmalakna a hmulo a nih chuan Champhai Ṭhalai Pawl chuan a remhriat angin hma ala dawn a. Engpawh lo thlengse Champhai Ṭhalai Pawl in mawh a phur lo ang.

Tin, Trauma sak mek Sawrkarin nikum 2018…
ni 22.12.2017 (zirtawpni) 

ṬANPUINA HLAN :
Mizoram Journalists' Asoociation Champhai District chuan Champhai khawpui chhunga Home hrang hrang leh Champhai District Hospital Poor Fund atan nimin khan tanpuina sumfai a hlan.
MJA Champhai District memberten tanpuina an pekte hi Grace Receiver Home,  Genesareth Gospel Home, Immanuel After Care,  Metakhen leh Thutak Nunpuitu Team Champhai niin, tanpuina sumfai Cheng sangkhat theuh a hlan bakah Champhai District Hospital Poor Fund atan Cheng sanghnih an hlan nghal bawk.
Nimin chawhnu khan DIPRO Staff leh MJA Champhaite chuan Joint Advance Krismass leh MJA Member thar lawmpuina hun an hmang.
He hun hi I&PR Auditorium CHANEM Building ah neih niin Dr Lallawmkima DIPRO Champhai chuan kaihhruaiin chanchinbu mite chu mipuite tana hnathawk leh rawngbawltu pawimawh tak an ni a, an sukthlek mipuiin an thlir ber anih avangin fimkhur taka hnathawk turin a chah a, Mipui leh Ram tana hna tha taka an thawh zel theihna turin duhsakna an hlan bawk.
He hunah hian Pu C Lalhnunpuia MJA President pawhin thusawiin Chanchinbumite leh I&PR chu inhne tlat tur leh thawkho tlat tur an ni tih tarlangin Vawiina thawhhona tha tak an neih theihna tur hun an siam chu lawmthu a sawi bawk.
He hunah hian MJA member thar Jacob Lalnunhlima LCN News Editor hnenah DIPRO & Staff te chuan lawmpuina thilpek an hlan a, member thar Jacob Lalnunhlima hnen atangin thusawi ngaithlak a ni a, Pi Zothanpuiin lawmthusawiin he hun hi a khara zanriah an ei ho nghal a ni.

OFFICER'S CLUB CHE CHHUAK:
Nimin khan Champhai Officer's Club te chuan Champhai Bawrhsap Pu Vanlalngaihsaka hovin Home, Damdawi In leh Jail ah te Krismas thilpek an hlan.
Ni 12 khan Chief Minister Discretion Fund atanga Cheng 19,700 Champhai in a dawn leh DC in cheng 9000 a pek te, Champhai Officers Club in an thawhkhawm cheng 11,300 te hmangin vawiin khan Champhai Bawrhsap Pu Vanlalngaihsaka hovin Home hrang hrang, District Hospital leh District Jail ah te Krismas Present atan an hlan a, Home hrang hrang pasarih ah te pek niin TNT ah cheng 6000, Rose Children Home, Metakhen, Emmanuel After Care Centre, Grace Recievers' Home, Genesareth Gospel Home leh Observation Home ah te cheng 4000 theuh an hlan a, Champhai District Hospital leh Champhai District Jail ah te cheng 4500 ve ve hlanin hmun hrang hrang pakua ah te Krismas thilpek hi hlan a ni a, cheng 40,000 an seng a ni.
Hei bakah hian Gospel Singer Ministry te chuan kar hmasaa Charity Concert an neih atanga an sum hmuh chhuah atangin veng leh khaw hrang hranga mi 12 te hnenah tanpuina an pe chhuak a. Vengthlang VC te pawhin kum 2016-17 chhunga MGNREGS leh mizoram Finance Commission hnuaia VC hnathawk tha lawmman pakhatnaa pawisa fai an dawnte chu an veng huam chhunga tanpui ngai nia an hriatte hnenah Krismas thilpek atan an hlan a. New Champhai Branch YMA te pawhin Krimas thilpek atan an huam chhunga Kohhran hrang hrang: Presbyterian, ZBC, AG, 7th Day, Pisgah 7th Day Adventist te bakah MZ Home TNT Champhai leh Immanueal After Care Centre te hnenah pawisa fai an lo hlan tawh bawk a ni.

SYMA CHHIAT TAWKTE TAN :
Nimin khan Sub Hqrs YMA chuan SEC in a lo rel tawh angin khuarel chhiatna tawk te hnenah tanpuina sum a hlan.
He hun hi Pu PC Lalrawnliana Secretary sub Hqrs YMA chuan kaibruaiin Pu C. Laltanpuia, Disaster Chairman chuan hunserh a hman hnuah chhiat rupna tawk te hnenah hian tanpuina thil an hlan chhunzawm nghal a, Pu Sangrimawia, Vengsang hnenah cheng 60000 hlan a ni a, Pu H. Thangkhuma Hmunhmeltha hnen ah cheng 20000, Pu T. Vanlalhruaia Ruantlang hnenah cheng 10000, Pu Hranghmingthanga, Electric hnenah cheng 20000 leh Pi Lalthanpuii Electric Veng hnenah cheng 20000 hlan a ni a, heng khuarel chhiat na tawk te chhungkaw 5 hnenah hian cheng 1,30,000 hlan a ni. Heng tanpuina sum hlan te hi Cenrral YMA atanga Disaster Fund an dawn atanga pek an ni.

A THLAWNIN SERVICE:
Krismas thilpek atan Pu Gindeihpianga chuan a autorickshaw chu a thlawnin a service tir.
Bethel Auto-rickshaw stand-a ding, Mz 04 A 0065, Genesis tih inziak, Pu Gindeihpianga, Champhai Bethel veng ta he auto rickhaw hi vawiin khan zing dar 9 atanga chawhnu dar 2 thleng phurh man awm lovin a hmangtute chu Champhai khawpui chhunga an duhna hmunah a dah a ni. A auto rickshaw-ah hian "Champhai khawpui chhungah a thlawnin ka lo phur ang che. Krismas present atan lo chuang ve ta che tih a tar a ni. Auto rickshaw hi a thlawna a service chhung hian awl a nei hman mang lova, a hmangtute chuan an lawmthu leh, Krismas thilpek atana a thlawna a service chu fakawm an tih thu an sawi.

Comments