Skip to main content

Champhai Tualchhung Chanchinthar

ADDL. CEO HOVIN VOTE CHHIAR TURA INBUATSAIHNA ENFIAH :Nimin khan  Additional Chief Electoral Officer Pu Krishna Mohan Uppu IAS   chuan  Champhai a rawn tlawh a, May Ni 23, 2019 a Lok Sabha inthlanpui vote tla  chhiarna tura inpuahchahna kalpui mek a rawn enfiah a ni.
Champhai District Election Officer Dr Naveen Aggarwal, IAS chuan inpuahchahna hrang hrangte NICConference Hall-ah powerpoint presentation hmangin   a sawi fiah a. Counting Center puahchah leh peihfel dante, Vote chhiar tur ruatna leh training pek tawh dante leh inbiakpawhna tur atana ruahmanna siamte a hrilhfiah a. CEO team ten Vote chhiar huna round tin report pekna tura duan Suvidha Counting Application hrilhfiahna an nei bawk a ni. Chawhnu lamah CEO Team-te hian EVM Strong Room leh  Vote chhiarna tura ruat Counting Hall pangate  an tlawh kuala, heng  an tlawh kualna hmunahte hian District Election Officer Dr Naveen Aggarwal, Champhai SP Pu Lalthiamsanga Sailo leh  District Election Official-ten an tawiawm a, ruahmanna …
ni 13.1.2018 (inrinni) 

DISTRICT DANG LA  NEIH LOH CHAMPHAI AH:
Nimin chawhma dar 10:30 khan Awmpui Veng, Vengthlang ah Pu Ramchullova, Chairman,  Champhai District NGO Coordination Commitee chuan Champhai mipuiten hlawk taka an hman theih turin Airtel 4G hi a hawng.
Tunah hian Champhai khaw chhungah hian Airtel tower hi 10 awm mekin Kanan
veng leh Assam Riffle bula tower tih lohah chuan 4G hi dahkim ani tawh a. Hetia official taka hawn anih hi chuan signal lam complain te pawh tun aia ngaihsak a hlawh tawh ngei beisei a ni a. Karleh lam hian Engineer ten signal chhiatna lai bik siamthat hna tlem an la thawk leh ang. 
Airtel hian 4G an hawn atang hian an customer te 4g simcard la hmang lo tan an office ah engtik lai pawhin a upgrade tir theih reng a. Tin, Call, sms, roaming leh Nitin 1gb internet pack chhawm topup pawh Rs199 (28days), Rs399(70days) , Rs 448 (82days)  leh Rs509 (91days ten thun tur a awm ta e.
 Customer 4g handset la nei lo tan Wifi Dongle Rs1500 man lek a awm bawk a, chumi hmang chuan Khawl 10 laiin 4g internet a hman theih Bawk ani.


INHLANTHARNA HUN HMAN A NI :
Nimin khan YMA Sub-Headquarters Champhai Hall, Tlangrawt-ah Kum 2018-chhunga YMA Sub' Hqrs Thuthmun Branch hruaitute leh SEC member-ta inhlantharna hun hman a ni.
He hun hi F. Lalrinmuana, Vice President chuan kaihruaiin, PC. Lalrawnliana chuan report leh YMA hruaitute inhmelhriattirna a nei a. Branch YMA hruaitute hi Pastor Lalnunmawia Pachuau, Kanan
Pastor Bial vawngtu chuan Pathian hnena hlanna hun a hmanga; H. Lianruma, Electric Veng chuan fuihna thu a sawiin hruaitu thlan tharte chu YMA motto, thuvawn leh thu thIungte hre reng tur leh vawng nung reng tur te, ruihtheih thil  laka fihlim tur te, mahni awmna Kohhran thu haw lam leh kal lam hre phak ni turte leh, YMA correspondent ngai pawimawh turin a chah a ni. Nimin YMA  Branch hruaitu inhlantharna ah hian Branch hruaitute an kal tha hle.
Nimin vek khan YMA Sub hqrs Executive member te leh Group hrang hrang hruaitute chu YMA Sub Hqrs Office ah Extended meeting neiin 2018 YMA Sub Hqtrs YMA, Conference Mimbung-a neih tur chu a hun leh nite ruatin an thukhawm a. Conference hun atan Ni 20-22. March, 2018 an ruat bawk a ni.

ADDL SP THLAHNA HUN HMANG :
Champhai Addl SP VL Lura Hauzel, MPS chuan Champhai Police-ta chu an hlawh mila khawsak thiam tur leh, duhamna Iaka fihlim turin a chah a. Mi hausa leh sum tam tak nei aiin miretheiten an manganna an rawn thlen chu ngai ngaimawh a; anmahni tanpuina mamawhtute chu ngaihthah lo turin a chah.
Nimin khan Lawngtlai Addl SP hna chelh tura insawn tur Champhai Addl SP VL Lura Hauzel thlahna hun hi Champhai Police Station Conference Hall-ah neih a ni a. Thlahna hun hi C.Laibiaksiami, MPS SDPO Champhai chuan kaihruaiin Samuel Zirthansanga, CO Salvation Army, Champhai Corps chuan Pathian hnena inhlanna hun a hman hnuah kalkhawmte, atangin thusawi ngaihthlak a ni. VL Lura Hauzel, Addl. SP chuan Champhai Police te'n thawh hona tha tak an nei thin chu lawmawm a tih thu sawiin hmalakna tura duan thinte a thawhpuite'n tha taka an tawiawm thin avanga hlawhtlinna an chan thin thu a sawi a. Champhai a chhuahsan hnuah pawh Champhai mipui tana theihtawp chhuah zel turin Police Dept a Branch hrang hrangte chu a ngen a, sawisel kai Io thei ang bera hna thawk turin a chah bawk. Police hmalaknaa Champhai mipui tawiawmnaah pawh lawmthu sawiin Champhai chu atan hmun chhinchhiah tlak leh a hriatreng tawh tur thu sawiin, thil tisualtute dan anga hrem an nih theihna turin Police Dept thawhpui zel turin a sawm a ni.
VL Lura Hauzel hi Champhai ah hian vawithum lai a rawn awm tawh a. SSA ah te, SDPO leh Addl. SP te in a rawn awm a. Kum 2015 khan Addl. SP hna hi a rawn zawm a, kum 3 leh a chanve a thawh hnuah Lawngtlai District ah sawn a ni ta a ni. Thlahna hunah hian MJA, COC, Forest Dept. te chuan telpuiin ngaihhruina thilpek an hlan a, tlaiah thlahna chawhlui an kil ho nghal.
IN SAWM VELAH CURRENT KAL:
Kum 3 kalta vela Hnahlan khuaa naupang pakhatin nunna a lo chan tawhna ang deuhin tunlai hian Hnahlan Tlangnuam Veng Pi Rovi Tuikhur bul In 10 vel huam chhunga In Chung, pal (GI Wire), lirthei dingah te electric current a kal a. P&E Department lam pawh hrilhhriat tawh niin, an enflah tawh a. A chhan leh nihna dik tak hi finfiah maitheih ala nilo niin thu kan dawng.

HRUAITU THLANG :
 Niminpiah khan Champhai Taxi Owners' Assn chuan LAD Picnic Spot-ah General Assembly neiin, kum 2018 atana an hruaitu thar an thlang. CTOA hruaitu atan hian President-:ah V. Laldinthara, Vengthlang, Vice President: Vanlaltluanga, Vengthlang; Secy: Tv Lalthuammawia, Vengsang; Asst Secy: H.Lalchhanhima, Venglai; Treasurer: Tv Andrew Laldinpuia, Venglai leh Fin Secy-ah Rodinpuia, Kahrawt te an thlang. 

ZIRCHIANG DAWN :
NEDP kaltlanga I&PR Deptt. ruahman angin karleh Thawhtanni atanga Inrinni thleng khian MJ A Champhai District member tan Kaladan Multi-Modal Transit Transport Project tlawh leh zirchiang turin Press Study Tour neih ani dawn a. Hei vang hian karleh Thawhlehni atanga Inrinni thleng khian Champhai leh Khawzawl Chanchinbu chawlh a ni ang.

Comments