Skip to main content

CHAMPHAI AH TB VEI MI 68 AWM MEK

CHAMPHAI AH TB VEI MI 68 AWM MEK: Nimin khan District TB Centre, Champhai District buatsaihin Press Club-ah Journalist-te tan Revised National TB Control Programme chungchang zirho a ni a, he hunah hian Champhai District-ah TB vei, damdawi ei zo duhlo mi 5 an awm tih tarlan a ni. He hun hi C.Lahnunpuia, MJA Champhai District President chuan a kaihhruai a, Dr R.Lallianmawia, District TB Officer chuan Revised National Tuberculosis Control Programme chu Health Dept in Programmea kalpui tam tak zinga mi a nih thu leh District TB Centre inrelbawl dan a sawi a. TB natna chu khawvelin a la buaipui chhunzáwm zel a, kum 2030 ah chuan he natna hi umbo hman tum a ni, tih sawiin, India ram chuan kum 2025-ah umbo a tum thung, a ti a. TB natna chu khuh leh hahchhiau  atanga  boruaka  leng  chu  inkaichhawnna a ni a. He natna hi India ramah chuan puitling zaa 40 in an nei tura ngaih a ni, tih a sawi a. TB-ah  hian chi hnih, chuap leh chuap pawna mi a awm a, chuap TB chu inkaichhawn awlsam leh a tlan…
ni 18.1.2018 (nilaini) 

SCHOOL NAUPANG  PWD:
         Khawzawl leh Aizawl inkar kawngpui, Khawzawl atanga Km. 1 vela hla Phaisen bul kawngpui chhe lutuk chu vawiin khan Khawzawl Higher Secondary School NSS te chuan hnatlangin an siam tha.
         Phaisen bul kawngpui hi khawchhak lam khuaten Aizawl an panna kawng pawimawh tak a ni a, nikum YMA General Conference neih dawn khan PWD Highway chuan kawng chhe laite hi lung leh lei nen an lo hnawhkhat tawh a. Nikuma PWD Highway in kawngchhe zual lai, harsatna tawk lova lirtheite tlan theih tura an chei that lai hian Khawzawl Higher Secondary School zirlaite chuan hnatlangin kawng siam hna hi an lo pui tawh a ni.
          Kawngpui hi a chhiat leh tawh avangin khualzin phur Motor te chuan harsatna an tawk chho leh mek a. Khawzawl leh Champhai atanga Aizawl pan tur khualzin phur Motor te chu kawngchhe laiah hian tum 4 vel zet chu an tlan theih loh vanga ding khawmin, khualzinte leh Driver ten a bulhnaia lung chhar khawmin kawng khuar nasa zualah te an vawm khawm a, hemi hnu hian an tlan chhuak theih chauh a. Khualzin phur Motor thenkhat phei chu helai kawng chhia an buaipuinaah darkar 2 chuang an din phah a ni.
         Hnatlangah hian Khawzawl Higher Secondary School a Class XI leh XII, Arts Subject la zirlaite leh zirtirtu, an vaiin mi 204 an thawk chhuak a, zirlaite leh zirtirtute hi an Principal Pu Joseph Zonunmawia chuan a ho a ni.

BUNGRUA PHUR DANG:
        Champhai District Border Trade Transport Union leh a thawhpui pawl hrang hrangten niminpiah atanga Zokhawthar leh Champhai inkar foreign bungraw phurh luh an dan chah chu vawiin lamah kalpui chhunzawm leh a ni.
        Champhai District Border Trade Transport Union (CTU) chuan Zokhawthar-Champhai Transport & Workers Union Zokhawthar-Champhai bungraw phurh chungchanga hleihluat taka thu neihna an in pek chu tha ati lova an duh loh lantirnan nimin atang khan Zokhawthar atanga bungraw lo kal reng reng chu an dang a, Zokhawthar nen a inremna a awm hma loh chu tiam chin awm lova dan an tum a ni.
         Nimin lamah CTU member te bakah an thawhpui Zokhawthar kaltlanga sumdawnna khawihtu pawl hrang hrangte chuan Mualkawi daiah duty-in bungraw Champhai lam panpui tur bungruate chu uluk taka endik a ni a, nimin atang khan Zokhawthar atanga Champhaia bungraw lut hi a awm lem lo a ni. CTU leh ZCT & WU te hian inbiakna an nei tawh a, he thu buatsaih thleng hian inremna erawh an la nei lo thung.

LIRTHEI 76 ZIAKLUT:
          Kumhlui December thla khan Champhai District Transport Office-ah lirthei 76 ziahluh thar a ni.
         Lirthei registration tih thar zinga 45 te hi two wheeler an ni a, auto rickshaw 3, maxicab 1, bolero leh gypsy lam chi 1, taxi 3, truck leh lorry 16 te ziahluh thar a ni. Lirthei registration pek chhuah hnuhnun ber chu MZ 04 A 0870 a ni.
        DTO hian thla hmasa khan chhiah chi hrang hrang atangin cheng nuai 13 sing 2 sang 8105 a hmu bawk a, hengte hi passenger phur lirthei atangin cheng 45,041; bungraw phur lirthei atangin cheng 1,53,977; road tax atangin cheng nuai 6,35,157 leh MV fees atangin cheng nuai 4,93,930 te an ni.

LUAHLOH RUN TLAWH:
          Champhai dist NGO CC hruaitu ten Tlangsam Politechnic building an tlawh a, he mi rual hian Tlangsam road chhe zual lai te an en nghal.
          NGO CC hruaitute chuan building structure leh electric wiring a tha thawkhatah an ngai a, a sakna bungraw thenkhat erawh tha tawk lo hlea an hriat thu an sawi a. Kuthlei avanga building tihchhiat thahnem tak a awm chu pawi an tih thu an tarlang tel bawk. Hei bakah hian
         Tlangsam panna kawng chhe lutuk chu uluk taka repairing titur in PWD SDO chu an ngen a, SDO inhuamnaah Dist NGO CC lawmthu an sawi.

TLAWH KUAL:
          Kar hmasa khan MZP Hrqs Champhai chuan khawpui chhunga studycamp hrang hrang tlawh kualin an thingpui lumna tur Chini, bawnghnute leh thingpui fe an pe.
          He hunah hian MZP hruaitute chuan fuihna thu sawiin Mizo zirlaite chu ngaihsan tur dik ngaihsanna chang hria a, ruihhlo, damdawi leh sawrkar phalloh tawlh vanga hausakna aia rim taka thawka hausak tum turin an fuih a, zirna sang zawk zira ram leh khawtlang tana chhenfakawm nih tum turin an chah a. 
          Ram leh hnam himna ngai pawimawha hnamdang nupui pasal a nei lo tur leh Kawng engkimah mizo hnam a him em tih thlir tel fo tur te. Champhaia sumdawnna bul intan mekah mahni hnam phatsana hnamdang thawhpui duhtute ngaihnepna chang hre turin zirlaite an fuih bawk
          MZP hruaitute hi camp siamtuten lo dawngsawngin inkhawmna hun tha tak an nei bawk a, zirlai ten exam an hmachhawn chho dawn avangin thataka an zir theihnan khawtlang ah zirlaite ti buai zawng a bengchheng siam lo turin mitinte an ngen nghal bawk a ni.

KAHRAWT FIELD-AH :
          Vawiin hian Govt Middle School te tan District Level Science Exhibition chu Kahrawt Field-ah neih a ni dawn a, Pu C.Lalbiakzauva, SDEO chuan a hawng ang.

CHAMPHAI ATANGIN MI PAHNIH:
           Eastern India Science Fair vawi 42na Jan 9-13 a BITM, Kolkata a neihah Champhai atangin mi pahnih an tel.
           He intihsiaknaah hian Mizoram aiawh turin SCERT chuan science lama activities nei tha te a thlang chhuak thin a, Champhai atangin Bethel Mission School zirlai 2 leh guide teacher 1 te an kal a, zirlaite hi
R. Lalrinmawii D/o Ramtharnghaka leh
CL Kimteii D/o Zelkhangoa te an ni a. An model hi Pythagorean triplets in head tih leh Four Vertices Problem an ni.
          Guide teacher Isaac Lalengkima hian Best Guide teacher award a la bawk a ni.

NI 8 BALL PET TAWH :
         Champhai District Football Assn buatsaih Republic Day football ni 8-na chu nimin khan khelh zawh a ni.
         Nimin khan second division match hnih leh first division match 1 te khelh leh a ni a. Inkhel hmasa berah Kahrawt chuan si khat faiin Dinthar an hneh a, Venglai chuan si sarih faiin Ngaizawl an hneh bawk. 1st division match-ah Bethel FC chuan 6-1 in Vengthlang FC an hneh ve bawk a ni.
          Vawiin hian match li a awm ang a, second division-ah Kanan leh New Champhai te intum hmasa berin Dinthar leh TMFC Melbuk te an inkhel ang a, Vengsang leh ZOFEC te bakah 1st Division-ah Bethel leh Mualkawi te an inkhel ang.

Comments