Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…
ni 19.1.2018 (zirtawpni) 

KAWNG CHHIA KAWNG ZAWH:
         Nimin  khan Mizo National Front Champhai North Block-1 te chuan Congress sawrkar a eirawngbawlna GAS harsa lutuk leh Champhai - Aizawl kawngpui chhe lutuk avanga mipui thlavang hauh na'n kawng an zawh.
      Kawng zawh hi Dawrkaikawn atanga zawh tanin Vengthlang YMA Run bul thleng kawng hi an zawh a, Dawrkaikawnah leh Vengthlang YMA Run bulah te thusawina hun hman a ni. MNF Champhai North Block 1 te chuan Resolution siamin kawngchhe lutuk avang leh GAS harsat em avanga punkhawm a ngai ta hial chu pawi a tih thu a sawi a, Champhai mipuite'n chak kan lakna ber kan kawngpui hi hun rei tak chhung ngaisak a ni tawh lova, kal hleih theih loh khawpin kawng a chhe tawh a, lungtum te hnawh in kal theih a ni hram hram chauh tawh a ni a ti a, CM hian helicopter hmanga kawng chhia te thlawh khum mai mai lova, a taka kawngpui hi rawn zawh ve a, a chhiat zia hi rawn hmuh ve tur leh tun thal chhung ngei a kawngpui tha min siamsak turin MNF chuan sawrkar a ngen thu an tarlang a ni.
        Gas harsatna chhungchang sawilangin nikum May thlaa dawng te kha kuminah hian a dawng hmasa pawl an ni leh chauh dawn a ni a ti a, Gas a mipuite'n harsatna an tawh mek hi chinfelsak tura an duh thu an tarlang bawk. Gas lak tur awm theih loh avangin kan thing leh mau te kan tuah zo tep tawh a ni an ti a, kum 2017 chhung khan point tinah vawi hnih theuh bak sem a ni lova, a thlawna sem tur pawh ni lo a leia lei tur tal hi chu min pe rawh se tiin sawrkar an phut thu an tarlang a ni. Hetiang taka Champhai in harsatna a tawk a, sum tam tak senga meihawl hmanga chhungkaw tam zawkin eirawng an bawl mek laia mipui aiawh tura mipuite thlan tlin MLA te pahnih an ngawi tlat chu pawi an tih thu an tarlang a, Champhai mipuite'n Gas hnianghnar taka gas an neih theihna atana hma chak taka la turin MLA pahnih te an phut tih an tarlang tel bawk.

LEHKHABU TLANGZARH :
        Nimin khan Pu H Liankapa lehkhabu ziah Chawnchhim tih chu Pu C Lalhnunpuia MJA Champhai District President chuan a tlangzarh.
         Tlangzarh inkhawm hi Champhai Academy of letters huaihawt niin Pu C Lalmuansanga ChamphaiAcademy of Letters President chuan kaihruaiin Kum 80 chuang miin lehkhabu tha tak ala ziak thei chu thalaite tan chona nasa tak a ni a ti a.  lehkhabu tlangzarh tur hi kartin awm thei si tih hi Champhai Academy of letters duhthusam a ni a, ziak mite'n tan kan lak zel a ngai a ni a ti bawk.
           Pu Hnunpuia, Champhai chanchin chhuichhuahna tur lekhabu rotling tak kan nei hi thil lawmawm leh mellung pawimawh tak a ni a, zirlaite tan pawh zir tham a ni ati a.
           Ziaka thil kan dahthat loh avangin thil chhui kawngah buaina kan tawk thin a, vawiina kan lehkhabu tlangzarh hi kum aliam tam poh leh a hlutna kan hmuh zel a dawn a ni a ti a. Champhai atanga lehkhabu tha tak tak a chhuah zel theihna turin Academy of letters tang leh zual turin a chah bawk.
        Mifing tih tur nisi lo, tangkaina leh hmasawnna tur ni ni lova a kheuhbeuh zawnga intifing kan awm thin hi kan than mawh bawk a ni a, chawimawi phute chawimawi hi kan tih tur a ni tih kan hriat thar leh a ngai a ni a ti bawk.
          Pu H Liankapa lehkhabu ziah Chawnchhim tih chu chhiartute ti beng vartu leh Ruihhlo ngai leh mi nun tleu ten lei rem an rah theihna tura thil tangkai tak a nih theihna turin duhsakna a hlan bawk.
         Pu H Liankapa lehkhabu ziah Chawchhim ah hiah Champhai chanchin ngaihnawm tak tak tarlan niin lehkhabu hralhnaa a hlawna te hi ruihhlo ngai leh riangvaite tana hman tur a ni dawn a. Vawiina tlangzarh inkhawma kalte hnenah lehkhabu hi a man chanvea hralh niin Lekhabu dawrah Cheng 200 in lei theihin a awm dawn a ni.
        Nimin tlangzarh inkhawmah hian Pu Lalnunmawia Govt Champhai College Principal, Ramengmawia Champhai Academy of Letters Vice President leh Lehkhabu ziaktu Pu Liankapa te hnen atangin thusawi ngaihthlak a ni bawk. He lehkhabu atanga sum hmuhchhuahte hi a ziaktu hian ruihhlo ngai leh nun tleu tawh ten leirem an rah leh theihna tura hman a tum a ni.

THISEN THISEN  :
          Champhai Vengthlang Branch KTP ten an Diamond Jubilee lawmna puala ni 60 chhung midang tana inpek an kalpui mekah nimin khan District Hospital Blood bank-a dah tur thisen an pe.
          Blood donation camp neih pual hian hunserh tawi hman a ni a, Pu R.Laltanpuia, Vengthlang Branch KTP Asst Leader chuan a kaihhruai a. Dr Zatluanga, Blood Bank officer chuan thu sawiin, Champhai District Hospital Blood bank-a dah tura tlawmngai pawl leh kohhran thalaiten a thlawna thisen an pe thin chu lawmawm a tih thu leh, hei hi blood bank-a thisen dahkhawl tur hnar pawimawh tak a nih thu a sawi a. Champhai district Hospital chu damdawi in changtlung tak ni chho mekin thisen mamawh damlo enkawl tur an pung zel a, hei bakah hian Champhaia private hospital pahnihten blood bank hi an tawm bawk avangin thisen mamawhna hi a sang hle a ni, tiin, YMA in routine siama thisen pek hun a siam chu a tangkai hle a, chumi rual chuan emergency-a hman turin thisen pek erawh a ngai reng a ni, a ti a, thalaite chu a thlawna thisen pek kawngah thahnemngai zel turin a chah a ni.
         Nimin blood donation campaign-ah hian Vengthlang Branch KTP te hian thisen unit 52 an pe a, a petute hi mipa 36 leh hmeichhia 16 an ni a, Blood bank a thawkten Vengthlang Kohhran Centenary Hall-ah kalchilhin an laksak a ni. Hei bakah hian nimin khan ni 60 chhung midang tana inpek hnuaiah hian Vengthlang Branch KTP hian memberte-a thawmhnaw hlui a khawn khawm chu Tualchenga sem turin Tualcheng Branch KTP kutah a hlan tawh bawk a ni.

RUIHHLO MAN :
        Nimin khan Champhai Excise & Narcotics Dept te chuan Heroin Hawng 4 leh a neitu nia rin an man.
          Nimin chawhma dar 11 khan Champhai Excise & narcotics Dept te chuan  Zokhawthar atanga rawn phurh Heroin Hawng 4 (Gram 52.9) leh a neitu nia rin Lalrinfeli kum 37 d/o Zasiama (L) Aizawl Zuangtui a khawsa nia insawi chu an man a, Lalrinfeli hi Zokhawthar sumo ah chuangin Mualkawi daiah Champhai Excise & Narcotics Dept te hian an lo man ta a ni. Heroin an man zat hlut zawng hi tualchhunga rate-a chhutin Cheng nuai 2 man hu vel a ni. Lalrinfeli hi ND&PS Act hnuaiah thubuai siam sak niin Court-a hruai anih hnuah Champhai District Jail-ah dah luh a ni ang.

CTU INTHLANG:


        Nimin  khan Champhai District Border Trade Transport Union (CTU) te chuan kum 2018 atanga 2019 chhunga an hruaitu thar an thlang.
         CTU hruaitu thar thlanna hi MJA Press Club-ah neih a ni a, President atan Pu Lalmuanpuia, Vengthlang North; Vice President: Pu Lalramthara, Electric Veng; Secy: Pu C.Hrangmanthanga, Vengthlang; Asst Secy: Pu H.Zathanga, Vengthlang; Treasurer: Pu K.Lalhmingliana, Venglai leh Fin Secy ah Pu R.Laltlangmawia, Vengthlang te an thlang a. Inthlan hi MJA ten an neihpui a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Sermon

Ringtute Hi Khawvel Eng Kan Ni
Chang thlan : Matthaia 5 : 14 - 16
Eng tel lo chuan khawvela nunna neite hi an dam khawchhuak thei lo. Eng hmanga chaw siam thei chauh vek an ni. Thil, a nihna ang taka kan hmuh fiah theihnan pawh eng a ngai a, eng awm lohna ah chuan kan chetvelna pawh a buai zo vek a nih hi. Thimah chuan kawng kan hmu thei lo va, hlauhawm leh hlauhawm lo kan thliar thei lo va, kan mit kan chhawr tangkai thei hek lo. Eng tel lo chuan kan khawsa thei lo a ni
Khawvel Eng - Isua : Isua hi khawvel eng a nih thu Johana 1:9, 8:12 ah te kan hmu. Isua tel lova khawvela nun kan hman chhung chuan thimah kan cheng tihna a ni. Nuamsa takin awm mah ila, Kawng leh Thutak leh Nunna Isua kan neih loh chuan kawngbo kan ni tho. Kan hlawhtlinna te, ropuina leh hmingthatna te pawhin kan damchhung bak a daih lo. Tin, kan nunna atana tha leh tha lo pawh kan finna atangin kan teh ang a, a dik zik tluak chuang lo . Kan hlimna leh lawmna pawh hian tawp chin a nei a, lungngaihn…