Skip to main content

Champhai - Tualchhung Chanchinthar ni 19.5.2018 (inrinni)

TLAIZAWNG PHUN RUNPUI KALPUI TAN A NI TA :
Nimin khan Champhai leh a chheh vel hmun hrang hranga Tlaizawng phun runpui, Project Tlaizawng chu kalpui tan ani.
Champhai Nature Conservancy (CNC) leh Environment & Forest Change Dept. te tangkawpa buatsaih Project Tlaizawng hawnna hi CHANEM tualah neih a ni a. He hun hi Lalrammawii Chawngthu, President, CNC(www.champhai.net)  chuan a kaihruai a. C. Lalbiaka, Champhai DFO chuan a hmanpui a ni. DFO chuan thusawiin, India rama thing awm zawng zawng hi insem ta ila, mi pakhatin 28 vel zel kan chang thei a, khawvel ram dangte nena khaikhin chuan thing kan nei tlem hle a ni, a ti a. Mizoram pawh hi thing ngah tak angin lang mah ila State Forest Report tarlan danin kum 2015-2017 khan ramngaw km 531 bial kan hloh tawh a, a hmaa ramngaw 93% nei thin khan 8.7% chiah kan nei tawh  ani, tiin ramngaw chereu chhan ber chu ramkang leh kan loneih dan kalphung fuhlo vang a nih thu a sawi.
DFO chuan ramngaw humhalh tura hmalakna lian tham tak tak a lo awm …
ni 8.1.2018 (thawhṭanni) 

KHAWCHHAK TLANGDUNGIN HARSATNA TAWK MEK :
Saitual Substation a mi 132/33kv Power Transformer chu  zirtawpni khan a chhiat avangin Champhai tlang dungin Power an dawng thei lova, Bukpui kal tlangin 33kv dawngin Bukpui Transformer kal tlangin Power tlem te Khawchhak tlangdung bakah Saitual tlangdung thleng  in sem rual a ni a, Power ah harsatna lian tak khawchhak tlangdungin an tawk mek a,  a bikin Power mamawh san lai ah phei chuan Khawchhak tlangdung (Champhai, Khawzawl leh Saitual tlangdung) hian 12 MW an mamawh laiin 2MW chauh an insem kual a ngai thin a.  Zan rei leh chhun lamah chuan theih tawp chhuah a hmun dang a Power hman tlem lai chuh hram hram a Power hi a theih chin chin semchhuah thin tum a ni a.
Power & Electricity Department chuan vawiin khan thuchhuah siamin harsatna sutkian dan tur hi chak takin ruahmanna an siam mek tih an sawi  a, he transformer chhia hi a thlakna tur ngaituah mek a ni a, hemi chhung hian Serchhip lam atangin Electric Supply hi pek kual lailawk dan ruahman a nih thu an sawi a, Mizoram khawchhak lam zawngin electric duh khawp an hmu thei lova, in en chhawk a ngaih dawn avangin mipuite hriatthiamna an ngen a ni.

KEILUNGLIAH KHUAH A NI DAWN TA :
Inrinni khan Champhai Bialtu MLA Pu TT. Zothansanga'n Champhai MJA Press Club-ah Press Conference neiin,  Champhai Keilungliah Tui khuah dan tur chungchang sawifiahna a nei.
Non-Lapsable Central Pool of Resources (NLCPR) sum cheng vbc 19 leh nuai 88 hmanga Champhai Keilungliah Lui khuah tur chungchangah Pu TT. Zothansanga chuan PHE Department bultum a hmalak anih thu leh heta tana sum hman tur hi Sorkar laipui in a rawn pek fel tawh thu a tarlan bakah he tui khuah hi leilet zawl thlai chawmna tura tui dahkhawlna anih dawn thu te,  Champhai Boruak ro lutuk ti-hnawngtu tura duan anih dan te, hunawl a mipui intihhlimna leh hahchawlhna anih dawn thu te, Champhai khawpui cheina pakhat anih dawn thu leh Sangha khawina hmun anih dawn thu te a sawi a.
Keilungliah lui hi Hmartawnvunga kai-ah khuah anih tur thu MLA Pu TT. Zothansanga chuan sawiin,  tuikhuah bang san zawng hi Meter 22 tur a ruahhman a ni a, Meter 4 a sanga khuah belh leh theih tura duan a niin, Tuikhuahna bang chhah zawng hi Meter 14 a ni dawn a.  Tuikhuah kotlang Meter 4 a zau-ah hian lirthei tlan tlang theih tura siam tur a ni a.  He tuikhuah hian ram Sq meter Nuai 35 a chim dawn bakah tui Cubic meter Nuai 24 tling thei tura duan a ni bawk.
Tuikhuah hualchhuak hian kawngpui Meter 4 a zau laih tur a ni a, Survey and investigation atan  cheng Nuai 10 chu chawpchilh a hmang nghal theih turin pekfel anih tawh bakah tun sorkar kum kal mek chhung hian Tender pawh koh tum anih thu leh he tuikhuah hnathawh hi kum thum (chhunga zawhfel tum anih thu Pu TT Zothansang chuan a tarlang bawk. 
He tuikhuah project sulsutu Champhai PHED WATSAN Circle SE Pu Lalrammawia bakah Champhai North Block I Congress hruaituten MLA hi an tawiawm a ni.

PAWL PAHNIH INTIH THIAMLOH AVANGIN MOTOR DANG:
Champhai-a bungraw phurtute intelkhawm Champhai Transport Union (CTU) leh Zokhawthar to Champhai Transport workers Union (ZCT&WU) inkarah inhmuhthiamlohna a awm avangin nimin khan CTU member-te chuan Zokhawthar atanga rawn lut Bungraw phur motor engemawzat Ruantlang Champhai-ah din tir an ni.
Thudawn danin, Hun hmasa lamah CTU hian Foreign atanga Zokhawthar Border leh Mizoram hmun hrang hranga bungraw phurh luh chu member motor seniority-a kalpui thin a ni a. Hei hi CTU member inkarah duh lo tu an awm avangin CTU atang hian Export and IMport Union (EXIM) leh Champhai Import & Transport Union (CIETU) a piangta ni a sawi a ni a. CTU thil kalpui dan duh loh avanga complaint thehluh a nih avang hian nikum khan Bungraw phurh chungchangah hian EXIM chu mawhphurhna hlan a ni ta a ni.
Hetih lai hian  Zokhawthar to Champhai Transport workers Union (ZCT &WU) te chuan Zokhawthar-a Bungraw phur motor atanga Membership Fee Rs. 1000 an phut chu CTU hian ngaithiam ta loin an duhlohna entirnan nimin khan motor 5 chu Ruantlang Champhaiah an dang ta a. Heng motor te hi nizan hmasa dar 6:30 khan chhuah an ni a, heng bungraw phurtute intelkhawm hrang hrang te hian inremsiamna dang an nei lo a nih chuan CTU hian Bungraw phur motor te hi dan chhunzawm an tum tih an sawi a ni.

FAINA PAWIMAWH ZIA ZIRLAIAH ZIRTIRNA :
Khawbung WATSAN Sub-Division PHE Department te chuan lnrinni khan Tuipuiral Zirlai Pawl Conference-a palai kalte hnenah Swachh Bharat Awareness Campaign an nei.
Faina Campaign hi TZP President thar K. Lalnunzama'n kaihruaiin, C. Lalchawimawia, SDO, Khawbung WATSAN SubDivision chuan faina chungchang a zirtir a. Zirlaite chu Tuipuiral tlangdung faina kawngah an pawimawh hle a, an 'thu leh hla' chu nu leh pa, zirna lam ngaihsak lo pawhin an bengkhawn, dik tura an ngaih, zawm tlak ni a an hriat avangin zirlaite chu a taka faina kawnga an chet chhuah mai bakah faina chungchang midang zirtir tur leh titi-na lamah pawh sawi tam turin a chah a. Hemi hnu hian Faina kawng zawh leh khawlai bawlhhlawh chhar fai hnatlang an nei chhunzawm a ni. Chhun lamah Khuangthing Students' Union ten Silver Jubilee an lawmnaah Swachh Bharat Awareness Campaign neih nghal a ni bawk. He Faina Campaign hi Bialtu MLA T. Sangkunga'n tawiawmin, Zirlai Pawl Silver Jubilee lungphun a hawng nghal bawk a ni. 

SANGHAL SA KUMTHAR RUAI ATAN HMANG:
     Champhai District Wildlife Control Unit hnen atanga thu dawn danin North East Diltlang khua a UPC (NEI) chuan kumin kumthar ruai atan Sanghal sa an theh a.  Hemi chungchangah hian Champhai District Wildlife Crime Control Unit chuan a ngai thutak hle a.  Atul anga hmalak an tum thu dawn anih bakah Mizoram ASEP pawh hriattir an ni tawh bawk.
     Pu C. Lalhnunpuia, President Champhai District MJA-in North East Diltlang a UPC (NEI) Kohhran member a biak danin,  NE Diltlangah hian UPC Kohhran chhungkua 15 vel an awm thu leh Hnahlan nena an ram inri-na (Zo-ram)ah Sanghal Tlaw pahnih (2) an chhar a.  Chu Sanghal sa chu kumthar ruai atan ni 1.1.2018  khan an theh a ni.  NE Diltlang hi in 75 vel niin,  Champhai hmarlam,  Champhai atanga Km 60 vel a hla a ni a.
     Nikum khan Kawlbem khua Evangelical Baptist Church (EBC) Kohhran ten hunpui ruai tur ramsa zawngin an ramchhuak a.  An kut sa zawng hi  hlawhtling lovin,  Ramsa kap lo mahse,  an ram vahna hmanrua (Silai) chu Champhai District Wildlife Crime Control Unit-in manin,  alo hren sak tawh bawk a ni.

CHAMPHAI TLANGVAL IN DAWNG :
Chess khawvel a rorelna sang ber leh thunei ber FIDA hnen atangin nikum December thla khan Certificate mizo pali ten an dawng a. Chung zingah chuan Chess hmanga vawi tam tak Champhai lo ti hmingthatu leh Mizoram No. 1 nihna pawh lo hauh tu Pu Lallianmanga hnenah NSA as National Instructor hlan a ni. 



Comments

Popular posts from this blog

Champhai - Tualchhung Chanchinthar ni 15.5.2018 (thawhlehni)

CHAMPHAI LEILET ZAWLA KUDAM LEH IN SA THIAH LOH CHHAN ZAWT :
Champhai Task Force te hmalakna kal zelah phaizawla kudam sa te chu thiahsak an nih lohna tur chhan leh vang sawifiah tura hriattir an ni.
Champhai leilet zawl hi Sawrkar dan dinglai angin loneih leh a kaihhnawih atan chauhva hman theih a ni a. Hetiang tur hian LSC leh ram pass pawh pek chhuah a ni a, hei vang hian Kudam sa lo tur leh a sa tawhte pawh thiat tura thupek chhuah a ni a, sa lai te pawh a hmuna kal chilh a tihtawp tir an ni tawh a. APril thla chhung a hriat vek tura tih an ni a, tun dinhmunah thiat emaw thiahsak engmah ala awm lova, thudawn danin heng kudam neitute hnenah hian hriattirna tawp ber pek a ni tawh a. Thiahsak an la nih loh chhan chu Kudam neitute hi COurt lam thu ngaihchan vang leh ni 8 khan Kudam neitute chu Dan ang thlapa thiahsak lo a nih chuan anmahni a thiat tura tih an ni a. Lehkha hi an dawng vek tih finfiah a ni a, lehkha an pek atanga ni 15 hmaa sawi tur nei silova, kudam thiat lo te chu thiah…

Champhai - Tualchhung Chanchinthar ni 17.5.2018 (ningani)

VANTLANG SIKUL - CHAWNCHHIM HSS :
Vantlang zirna In, Chawnchhim Higher Secondary School din tura hmalak mekah a tula ngte tihfel thawkhat tawh a ni.
Chawnchhim Higher Secondary School hi Champhai khawpui chhunga Higher Secindary  School indaih lohna avanga khawtlang hruaitu hrang hrangte leh tlawmngaipawl intel khawmin an din a ni a. HIgh School atanga pawl 10 passed chhuak ten Sawrkar sikul a Admission an hmuh vek theih loh avang te, veng chuan hnuai lam tana sikul panna hla lutuk vangte leh khawtlnga zirna boruak nasa zawk a awm theihna tura din a ni, Sikul hi khawtlang mipuiin an din a nih avangin khawtlang hruaitu kal khawm chuan Monthly Fee lak loh nise an ti a. Admission fee erawh Rs. 1000 a ni ang. Admission hi tunah Bethel Br. YMA in ah kalpui mek a ni a, Ziritrtu leh Staff  dang ten admission hi an buapui mek ani. Class tanna tur hmun pawh rei lote ah peih fel thuai a ni dawn a, Bethel veng huam chhungah Class hi tan tur a ni. Subject lak theihte chu ENglish, Mizo, Pol. Science…

Champhai - Tualchhung Chanchinthar ni 16.5.2018 (nilaini)

MAXI CAB SERVICE TURAH LA INREM THEI LO :
Champhai to ZOkhawthar Maxi Cab Welfare te chu Ruantlang daiah an la duty chhunzawm zel.
Champhai District Transport Officer in CHamphai ti Zokhawthar Maxi Cab  Welfare chu Rs. 100 a tlan tura a tih hnuah Rs. 100 a tlan chu a theih ngang loh avangin Sunday zan khan Champhai to Zokhawthar Maxi Cab  Welfare te chu thukhawmin an awm dan tur an rel a. He an thutkhawmah hian Rs. 130 a tawlh hniam nise tiin an rate  Rs. 150 atangin an tawlh hniam a, Zokhawthar lam leh STO te pawh he an tlan theihna tura an suan Rs. 130 hi an sawipui tawh a, nimin khan Zokhawthar lam pawh thukhawm ve nghal in Champhai To Zokhawthar Maxi Cab  Welfare te thutlukna Rs. 130 chu an pawm theih leh theih loh an sawi ho a, an pawm thei a nih chuan a pangngaiin Champhai to Zokhawthar Maxi Cab Welfare te hi Zokhawthar ah an Service leh nghal ang a, an pawm theilo a nih erawh chuan Ruantlang dai ah Duty chhunzawm zel an la tum niin thudawn a ni.
Hetihlai hian Zokhawthar Joint Meet…