Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai Tualchhung Chanchinthar ni 16.2.2018 (zirtawpni)

GAS LOTHLENG TAN :
Tunkar chhung in Champhai Mizofed LPG ah Gas Trip 2 a lo thleng tawhin a hnuhnung zawk hi niminpiah khan alo thleng. Tarlan tawh angin Trip khatahhian Gas bur 300 vel bawr phurh thin a ni a. tunkar chhungin Champhai ah Bur 600 vel bawr alo thleng tawh a, vawiina rawn thleng turin kawngah Trip khat a thang mek bawk ani.
Hetihlai hian Champhai Bawrhsap Pu Vanlalngaihsaka leh NGO (YMA, MHIP, MZP) leh VC te hmalaknaa Gas phurh pawh nimin khan Trip khat rawn phurh thlen a ni a, heng rawn phurh thlen te hi a man pangngai aia Rs. 40 a sangin hralh chhuah a ni thung a. Thuleh awm hma chuan chhum lo chat lovin Champhai Bawrhsap, NGO leh VC te hmalakna angin Gas phur tur hi an hire zel dawn niin thudawn a ni.

KIWI CHINGTUTE HLAWHTLIN NGEI BEISEI :
Khawzawl Horitculture Divisin chuan Chawngtlai Bualpui rama KIWI chingtute chu an inlungrualna leh an thawhrimna avangin an hlawhtlinngei an beisei tih an sawi.
Chawngtlai Bualpui ramah hian Chawngtlai khua chhungkaw 35 chuan Chawngtlai Bualpui rama Compact Area ah tin 30 aia zau Kiwi huan an siam a. Mission for Integrated Development of Horticulture hnuaiah kum 2015-2016 atanga hma la tanin loneituten Kiwi huan an siamna tura bul an tanna tur sum chu Khawzawl HOrticulture Division in an tumsak bakah chhungkaw 35 in an rin tawm tur Community Tanky 2 an siamsak a. MGNREGS nen tangkawpin Compact Area chhungah hian Link Road an lai chhuak vek a ni. Kiwi hi chin/phun atanga kum 4 hnuah chauh a rah avangin loneitute hian Kiwi rah hun nghahnan Sapthei an ching a, Sapthei hi Kiwi rah dawnah an thianfai ve leh dawn a ni.
Niminpiah khan Khawzawl HOrticulture Division chuan Kiwi chingtu mi 35 te tan hian Chawngtlai Bualpui ramah hian Training an pe a. Training tan hma hian Khawzawl DHO Pu F. Lalthlamuana chuan Training kamkeuna neiin, Chawngtlai Bualpui rama Kiwi chingtute inpekna leh thawhrimna chu dakawm a tih thu leh inlungrualna tha tak an neih avangin hlawhtlinna pawh an hmuh ngei a beisei thu a sawi a. Training a an zirte chu ahlawkpui ngei tum tura chahin, harsatna leh hriat duh an nei a nih chuan Training naah chauh ni lovin, anmahni pui turin Horticultre Department mithiamte chu an inhawng reng tih a sawi a ni.
Training ah hian HEO Pu Jacob Lalmalsawma chuan Kiwi enkawlnaa hriat tur pawimawh hrang hrangte chu loneitute hi a zirtir a. Training hi Kiwi huanah leh Meeting Hall kawtah neiin a theih ang ang chu Parctical in an ti nghal a. Kiwi enkawl dan bakah hian Drip Irrigation chungchangah Training an pe tel a ni. Training hi ADHO Pu C. Zosangliana chuan a khar a ni.

CHAMPHAI BAZARAH CHAWHMEH HRALH KAL :
TUnlai hian chawhmeh Bazarah antam, tomato leh parbawr hralh akal hle.
Chawhmeh zuartute chuan tunlai hian chawhmeh kal ber thin chingit chu lak tur a awm tawh loh avangin antam, tomato eh parbawrte hi a kal hle niin an tarlang a, tunah hian antam hi tel khat Rs. 20 zela hralh a ni a, tomato hi kg ah Rs. 60 a hralh niin parbawr hi kg ah Rs. 60 bawka hralh mek ani. Alu erawh chuan vanlai a nei meuh lov, tunah hian kg ah Rs. 25 a hralh a ni tlangpui a ni.

NLUP AR SEM DAWN :
Vawiin hian AH&Vety Dept Champhai chuan NLUP Ar vulh thlangtute hnenah NLUP 3rd & 4th Phase an sem dawn.
NLUP 3rd leh 4th Phase semna hi AH&Vety Complex Champhai ah neih a ni dawn a. Chawhma dar 11 atangin sem tan a ni ang. NLUP ar vulh thlangtu Champhai Centre huamchhunga Veng 19 atangin chhungkaw 290 te hnenah sem a ni dawn a, mi 1 tan Arte 50 zel sem ani ang a, Arte 14500 sem chhuah a ni bawk ang.

KAWNG KHAR DAWN :
Champhai District Sub-Divisional Magistrate Pu Pachhunga chuan Pu TTa Road , PHE Office leh Aizawl Road inkar chu PWD ten an siam that dawn avangin February ni 15 atanga February ni 24 chhung lirthei engchimah tlan phal lohna thu pek a chhuah a, thupek zawm lo te cu IPC Sec 188 hmanga hrem an ni dawn a ni.

Comments

Lungendidi said…
Gas thleng ve thei ta chu a va lawmawm em..NGO, VC leh DC te hmalakna a ropui..a thlen chhunzawm zel beisei ang..