Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai Tualchhung Chanchinthar ni 17.2.2018 (Inrinni)

RAMNGAW TICHEREU VANGIN SIK LEH SA INTHLAK NASA :
Nimin khan Mizoram sik leh sa inlum leh dan inzirtirna hun chu Govt. Champhai College ah neih a ni a. Lalnunmawia, Principal Govt. CHamphai College chuan kaihruaiin kalkhawm zirlai te chu chibai a buk a, resource person te inhmelhriat tirna a nei zui nghal.
He hunah hian Dr James Lalnunzira leh Lalthanpuia, Project Scientist, Mizoram State CLimate Change Cell. MISTIC te chu resource person niin an ni hnen atang hian thusawi ngaihthlak a ni a. Mizoram Science Technology and Innovation COuncil hian kan rama sik leh sa in thlak danglam hian a chhe lam zawnga nghawng a neih lohna tura hmalak hi a tum ber a nih thu an tarlang.
Sik leh sa hi khuarel thil avangin a inthlak thin a, nimahse tunah chuan a chhunga cheng mihring te hian kan zir tawk loh avangin sik leh sa inthlak dan hi a danglam tawh hle a. Tun hma aiin a lum hle tawh tih an tarlang a, mihringten thing kan suat nasat luat avang leh ram kan hal nasa lutuk avangin kan ram boruak hi a chhe hle tawh tih an sawi. Kum 1850 atanga kum 1950 inkar vel kha chuan -5 degree atanga -2 degree a nih laiin kum 2000 hnu lamah chuan kan ram mai nilo, khawvel hi 4 degree akai thuak tawh niin an tarlang bawk.
Kum 10 danah 3.4% velin cur hi a tui ral zel tih tarlangin, khawlum zel avanga vur tlang tui zel chuan tuifinriat chim chin a tisang zel a, mihringte tan tunang renga a awm a nih chuan ala pawi theih tur thu te, kan ram tih chereu avanga khawlum zel dan te, mihringten kan mamawh boruak thianghlim a chhiat zel dan te an sawi a. Tunang zel a kan ram ngaw te kan tichereu zel a nih chuan tun atanga kum 50 lo awm tura kan ram chhiat dan tur leh chhenna tlak loh khawpa khawkhen dan tur leh kan control that loh chuan khaw vawtr pawh nasa taka apun tur thu te an sawi tel bawk.
Khawlum leh khawvawt mai piahlamah cyclone leh tuilian te kan ram hian ala tuar fo tur thu te, ram danga khawlum vang leh khaw vawt vanga nunna chan tam tak an awm thin ang hian kan ram pawh hian nunna tam tak kan la chan thei dawn a ni, an  ti a. Natna hlauhawm tak tak kan ramin ala hmelhriat ngai loh chi hrang hrang hi kan ram kan enkawl that loh chuan kan la hmachhawn dawn tih antarlang a. THingphun uar a, motor a kal tlemhret hretin, boruak tichhe thei tu plastic leh a kaihhnawih hal te hi kan bansan chuan, heng kum 50 hnulama kan ramin a tuar tur chhiatna hrang hrangte hi pumpelh theih a la ni tih an sawi tel bawk.

NHM CAMPAIGN :
National Health Mission, Champhai District huaihawtin nimin khan Khawbung Zawlbukah VISHWAS Campaign neih a ni.
VISHWAS Campaign ahhian Khawbung RD Block huamchhunga AHSHA leh VC te hnenah zirtirna pek an ni a. Village based Innitiative to Synergise Health, Water and Sanitation(VISHWAS) chungchang hi DPM C. Lalramengi leh ASHA Coordinator C. Lalchungnungi ten zirtirna an pein khawtina ASHA leh VC ten an hmalak dan tur an hrilhfiah nghal bawk.NHM Champhai DIstrict chuan an huamchhunga ASHA te chu hmun thumah training neihpuiin Khawzawl leh Champhai ah nei tawhin nimin khan Khawbungah nei lehin zawh fel a ni.

NLUP SEMNA HUN HMANG :
Nimin chawhma khan AH &Vety Department buatsaihin District AH & Vety Office tualah  Champhai ‘N’ leh ‘S’ Cluster huamchhunga NLUP 3rd & 4th Phase hnuaia Ar vulh thlangtu mi 290-te hnenah Arte sem niin, mi pakhat hnenah Arte 50 theuh sem chhuah a ni. Vawiina Arte semchhuah zawng zawng hi avaiin 14,500 a ni.
Semna pual Programme tawi buatsaihah District AH&Vety Officer Dr.M.Zohmingthangi chuan thusawiin sawrkar flagship programme NLUP hnuaia Arvulhtute zingah hlawhtlinpui  report tur an awm mumal thin lo chu inenleta,  insimthatna atan hmang turin kalkhawmte chu a chah a. NLUP dawngtute chu sawrkar programme tih hlawhtlinna mai a ngai lova eizawnna ngelnghet neih theihna tura sawrkar duan programme a ni tih hre thar leh turin a chah a. Broiler  chu Ar thangduang leh ei tling hma tak,  Mizote mizia nena inmil tak anih thu a sawi a.
Dr M. Zohmingthangi chuan Mizoram District hrang hrang leh Block-ah te NLUP Exibition  neih anih dawn thu a sawi a, Champhai District-a neih anih ve huna pholan theih tura Ar lo vulh a, a sate pawh exhibition-a zuar thei tura tan la turin Beneficiary-te chu a sawm a. Ar te chu thil nung ve tho an nih angin hmangaih taka enkawl angaih thu a sawi a. Tunlai thiamna leh khawsak sang zelah sa ei avangin mihring hriselnaah nghawng thalo nasa tak a awm thina, sa hrisel thar chhuah kawngah tan lak thar a tul hle a ni, a ti a. Thenawmte Ranin a ngeih avanga damdawi lo pek ve mai thin hi tih hauh loh tur a ni, a ti a. Broiler tui in tura antibiotics abik takin Tetracycline pek thin chu thil tul lo leh pawi tak a ni, a ti a. Heng bakah hian thin lian damdawi pek reng thin chu insen thlawnna mai a ni a, mithiamte chawh lohah chuan pek loh  tur a ni, a ti a. Beneficiary-te chu Ar leh a chaw an dawnah duh tawk mai lova bul tanna a ni tih hria a, tuna dawn an hralh zawh hnuah pawh a dang lei belh zel turin a ti a. Ar vulh chu eizawnna tling anih avangin chhunzawm zel turin a chah nghal bawk a ni.
AH & Vety Department, Champhai District chuan tunlai hian District hmun hrang hrangah NLUP hnuaiah Vawk chaw leh Ar chaw an sem mek zel a ni. NLUP hnuaia hmalakna hrang hranga Village Level NLUP Committee (VLNC) te tawiawmnaah department chuan lawmthu a sawi a ni.

MIKHUAL INTHLEN CHUNGCHANG SAWIHO :
Nimin chawhnu dar 3 khan Tourism Department hnuaia NEDP Implementing Board chu Champhai DC charge la mektu Pi Lalsangpuii Hmar hovin DC’s Conference Hall, Keifangtlang Champhaiah an thukhawm.
Meeting-ah hian Champhai District chhunga Rural Homestay kalpui dan tur chungchanga hmalak tawhna leh hmachhawpte sawiho niin Champhai, Khawzawl leh Khawbung BDO theuhte’n an huamchhunga Rural Homestay hmalakna leh dinhmun tlangpui an report a. A taka Rural Homestay kalpui theih anih hun turte pawh chipchiar taka sawiho niin inpuahchahna kalpui dante pawh meeting-ah hian tarlan a ni.
Rural Homestay hi march ni 13, 2018 hian ataka hman theih tura hawn a ni dawn a. Tourism Department lamin rate an siam anga kalpui tur a ni. Tourism Department hotute hian naktuk atangin Champhai District chhunga Rural Homestay kalpuina tura inbuatsaihnate a hmunah kalin an endik dawn a ni.
Homestay hi a awmzia ber chu khualzinte a khaw mi ten khual tha anga mahni ina an lo thlen hi a ni a. Mikhualte hi sum chawiin a khaw mite inah an thleng anga, thlen chin bithliah a awm lova, zan khat atanga a thla ang zawng pawhin an cham thei dawn a ni. Rural Homestay Scheme hnuaiah hian Champhai hi Pilot District niin khaw paruk – Vangchhia, Dungtlang, Vaphai, Zokhawthar, Hnahlan leh Chawngtlai khuate thlan an ni a. Heng khuaah hian chhungkaw thlanchhuah (Homestay Partner) ten mikhual thlenna tur pindan / in sa in mikhual an thleng thei ang a, ram chhung leh pawn atangin a duh apiang heng khuaah te hian riahchilha an ram chhehvel fang tur leh an nunphung leh khawsak anga va khawsaa hun va hmang thei turin ruahmanna siam a ni.
Meeting-ah hian Pi Zonunthari, Under Secretary Tourism Department; Pi PC Zonuntluangi BDO Champhai; Pu Lalremruata Sailo, BDO Khawzawl; Pu Lalbiakfela, BDO Khawbung leh Pi Lalrinchhani, Nodal Officer Tourism Department-te an tel a ni.

YMA HRUAITU HLUN BORAL :
Ni. 17.2.2018 (Inrinni) zing dar 3:45 khan Pu Kalkhama (88), Champhai Vengthlang chu Zunthlum natna avangin an chenna inah a boral.
Pu Kalkhama hi Mizoram a Branch YMA O.B. ni rei ber, kum 29 chhung Office Bearer hna lo chelh tawh niin Kum 1985 YMA Golden Jubilee Souvenir ah tarlan a ni. 

Comments