Skip to main content

Champhai Tualchhung Chanchinthar

TLEIRAWL 8 DUNGTLANG POLICE IN CHHANCHHUAK :  Bangladesh-a Rohingya raltlan hmunpui atanga ruk chhuaha Myanmar lama hruai chhoh tur ni a rin Rohingya Muslim, kum 15 leh 16 bawr vela upa, hmeichhe 8 chu niminpiah khan Police te'n Champhai district-a Dungtlang khuaah an chhanchhuak. DIG (Northern Range) Lalbiakthanga Khiangte sawi danin he'ng an tleirawl chhanchhuahte hian Hindi leh tawng dang pawh an thiam lo va. Bangladesh atanga rawn ruk chhuah ngei an nih rin a ni a,-Saikhumphai kaltlanga Myanmar rama luhpui tum an ni a, anmahni hruaitu tur hi Saikhumphai-ah a awm nia hriat a ni. Mizorama luh phalna nei lo he'ng hmeichhe 8-te hi nimin khan Champhai district Chief Judicial Magistrate hmaah hruai an ni a. Hmeichhe enkawlna Home lama dah rih an nih rin a ni.  Rohingya Muslim te hi Myanmar ram Rakhine State a cheng, tihduhdahna an tawrh avang leh helna avanga Bangladesh-a raltlan an ni hlawm a. India rama an luh hian thawnkir nghal zel turin Ministry of Home Affairs chuan s…

Champhai Tualchhung Chanchinthar ni 19.2.2018 (thawhtanni)

DAN ZAWM LOH AVANGIN CHHUNGKUA PAKHAT LEI CHAWI TIR :
Champhai Chhungte rama kawngpui kam huan/lo var chhuak luitu chhungkaw pakhat chu Chhungte Village COuncil/Court leh Champhai District Fire Prevention Committee chuan a hrem dawn.
Champhai Chhungte VC huamchhung Aizawl Road a huan/lo ram vattu chhungkaw pakhat chuan kawngpui chhuaka thing a vah/kihthluk avangin Champhai District Fire Prevention Comt chuan The Lushai Hills Regulation 1954 Section 5 & 8 tlawhchhana hriattirna pein, kawngpui Reserve feet 100 huam chhung hal lova, thianfai vek tur leh kawngpui thlanglam feet 100 chinah thingphun leh vek tura a tih bakah mumal taka meilam sial turin a ti a. Kumin June thla ral hma ngei a he ram humhalh ah hian thingphn leh vek turin a hriattir a. District Fire Prevention Committee chuan Champhai District chhunga Leipui leh huan ram lo vahte chu February thla ralhma ngeia hal vek turin a ti bawk.
CHamphai Chhungte Village COuncil/Court chuan he mite chhungkua in huan/lo ram an vah hma pawha kawngpui ram humhalh chin chu vat lo tur leh zuah tura a hmun ngei a an hriattir lawk chung pawh a kawngpui chhuaka a vah luih vangin Rs. 5000 chawi tur leh February thla ral hma ngei a leichawi hi pe turin a tia. Kawngpui kam feet 24 tal a zau thianfai a, meilam sial tura Chhungte VC ten hriattirna an pek bakah a huan.lo vah hal ni ah Chhungte VC te hriattir ngei turin a ti a. Kumin June thla ralhma ngei a, kawngpui kam Reserve Area hualchhungah thingphun vek turin a ti bawk a. Heng hi a zawmlo a nih chuan huan/lo ram a neih zawm an phal sak loh tur thu Chhungte VC chuan a hriattir nghal bawk. Chhungte VCP hnen atanga thu dawn danin Road Side Plantation thing kung 60 leh Road Reserve Area (feet 24 huam) a thing kung  600 vah thluk a ni.
Kumin hian Champhai District chhungah ram kang a tlem theih nan, Lo hal hun March ni 15 ral hma ngei a hal vek tur leh ram a kan lohna tura Sawrkar thupek chu mitinten an zawm theih nan khauh taka kenkawh tum a ni a. Thupek zawmlo mimal leh khuate chu fel taka chhinchhiahin an phu tawk hremna pek a nih tur thu District thuneitute hnen atanga dawn a ni.

CHAMPHAI LEH A CHHEH VEL HUMHALH TUM :
Champhai leh a chehvela thingphun bakah thin leh mau leh nungcha humhalh tura din, Champhai Nature Conservancy chuan Champhai leh a chheh velah Tlaizawng atam thei ang ber phun an tum.
Champhai Nature Conservancy hi tun hnaia dinthar a ni a, Champhai kahwchhungah leh khaw chheh vela thingphun uar te, Champhai tualto pangpar thing leh mau leh nungcha humhalhte, Champhai zawl nihphung leh mawina humahalh te, khuarel ram leilung leh hmelhmang humhalh te, bawlhhlawh sawngbawl dan tha ngaihtuahte bakah Champhai leh a chheh vel ram leh leilung mawina leh hausakna hmanga khuazin mite hip chu an pawl thiltumah an hmang a. Hemi atana hna hmasaah Champhai khawpui leh a chheh vela Tlaizawng phun chu 'Project Tlaizawng' tia vuahin kalpui an tum a ni. 
Tlaizawng phunna atan hian Keifangtlang kawng, Circuit House hung chhung, ZOtlang leh Khankawn inkar bakah Darthlatlang tlang te an hual lawk a. Hemi atan hian School hrang hranga zirlaite Volunteer atan lak nise, an ti a. Project Tlaizawng hi kumin chhunga tihhlawhtlin tum ni mah se Tlaizawng tiak hmuh tur a tam loh avangin kumin hian a hlawhtlin hman a beiseiawm loh thung.
Hei bakah hian Champhai lei let leh a vel, sumdawnna hmun atana hman a ni leh tihchhiat mek a nih chungchangah hmalak an tum bawk a. Champhai leilet zawl chu Champhai hmel pholangtu pakhat a nih avangin a nihphung leh a mawina a hloh zel avang te, leilet hualtu ramngaw tihchereu nasat avanga sik leh sa leh tuihna thlenga nghawng tha lo a neih avangin zirchian a, humhalh an tum a. Environment humhalh chungchangah awareness campaign neih chu an pawlhmalakna hmasa atana an chhawp chhuak bawk.

MFA  CUP :
Mamit a MFA Cup khelh mekah Zirtawpni khan CDFA Academy (Champhai DFA) chuan Mamit DFA chu 3-0 in an hneh a. Champhai tan hian Vanlalkoha (own Goal), Lallawmsanga leh Lallawmtluanga ten Goal an khung a. Champhai hian Game 2 atangin point 6 neiin semi final an lut chiang tawh a. An group ah hian Mamit hian Point 2 neiin, Lunglei leh Saiha ten point khat ve ve an nei a, semi finallut hei dinhmunah an la ding vek a. Vawiin chawhma dar 11 hian Siaha leh Champhai an intum ang a, chhun dar 1 ah Lunglei leh Mamit an inkhel ang.

MUALNUAL TIFAI :
Champhai Venglai Branch KTP chuan Inrinni khan KTP Day denchhen leh Branch intihhlimna ni pah fawmin Mualnuam tifaiin hnatlang an nei a, Mualnuam hi Champhai hmun pawimawh te zinga khualzin hiptu zinga mi a nih avangin a hmuna bawlhlawh tam tak awm bakah ran ek awm te chu an thian fai a, hnatlang hian member an thawkchhuak tha hle.

CENTENARY LAWM :
Farkawn Presbyterian Kohhran chuan kar kalta Thawhtanni atang khan kum 100 an tlin lawmna an hmang a. Inrinni chawhma inkhawmah Centenary SOuvenir chu Upa Vailianchhawnan a tlangzarh a. Rev. Michael Lalchhuanawma hnen atanga thuchah ngaihthlak a ni a. Chawhma vek hian Centenary lung chu bialtu pastor Rev. K. Laldakzuala chuan a hawng a, chawhnu inkhawmah thuchah a sawi bawk a ni. Centenary lawmna hi vawiin hian ruai nen khar tum a ni. Farkawn Presbyterian Kohhranah hian member 1618 an awm a, Upa 12, TUal Upa 5 neiin dan zawhkim mi 1157 an awm mek a ni.

Comments