Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai Tualchhung Chanchinthar ni 20.2.2018 (thawhlehni)

PHAIZAWL THIL DANG ATAN HMAN KHAP :
Pu Vanlalngaihsaka, District Magistrate Champhai District chuan a hnuaia tarlan ang hian thupek a chhuah.
Sawrkar thuchhuak Notification No. LRR-80/73 (A) Dt. 14.th APril, 989 in Champhai Town (Khawpui) a a puan angin Phaizawl leilet hmun hi Town huamchhungah telh a ni lova. Town huamchhung sawrkarin a puan ni lova chenna tur In sak leh kudam etc. atana In sakte phal a ni hloh mai bakah Mizoram Revenue Dan (The Mizoram Revenue Laws) 10(6) na leh 11(1) na in an sawi leh tarlan, Agricultural LSC, Periodic Patta and Garden Pass te hi pass pek a nihna ang taka Agriculture (huan/thlai siam etc) atan ni lova thil dang atana hman khap tlat a ni a.
Chuvangin Champhai Leilet a Agriculture kaihhnawih atana ram neiten pek an nih chhan ang takin an hmang tur a ni a. Kudam sak leh chenna atana In sakte khap tlat a ni. Kudam sak mek leh sak tawhte endikin ram pek an nih chhan anga hmang lote chu Mizoram Revenue Dan 11(8) tlawhchhanin thiat tura hriattir vek an ni a. Sa mekte pawh an hnathawh chawlhsan nghal tura hriattir an ni.
He khapna thupek awih lova tiluite chu chawi tir emaw an pass cancel sak thlenga hrem theih an ni ang.

CHAMPHAI DISTRICT IN SEMI FINAL LUT :
MFA CUp 2018, Mamit a khelh mekah Champhai District chuan Semifinal an lut.
MFA Cup 208 Mamit a khelh mekah nimin khan Champhai District aiawha kal CDFA Academy te chuan Siaha hneh zo lo mahse Semifinal an lut chiang tawh a, nimin inkhelah CDFA Academy te hian Siaha 4-2 in an hneh zo lo va, Saiha tan min 45 naah penalty atangin Talkhu chuan an hmahruaina goal khungin mi 49 naah leh min 53 naah Goal a khung zui leh bawk a, Champhai tan Lallawmsangan min 56 naah an si phurh a sut then a, Siaha tan min 58 naah Lalrinliana chuan an goal 4-na a khung a, min 92 naah Lalremruatan CDFA Academy Goal phurh  rulthen mahse hun a tawp zui tak avangin Saiha hian 4-2 in hnehna an chang ta a ni. CDFA Academy te hian naktuk chawhma dar :30 ah Kolasib nen Semifinal an khel dawn a, Kolasin hi Group B a pahnihna an ni.

NU LEH PA LEH AIA UPA THUAWIH INZIRTIR THAR LEH NGAI :
Vanzau Area MUP Conference Leithum khua a neih chu nimin khan bialtu MLA Pu T. Sangkunga`n a hmanpui.
He hunah hian Khuallian, Bialtu MLA ni bawk Pu T. Sangkunga chuan aia upa zah pawimawh thu sawiin, nu leh pa thu awih chu mihring nun hmuingilna leh taksa thil pawha changkanna a nih thu a sawi a. Mi hlawhtling leh ropuite hi nu leh pa thu awih, an thute, a kawi a ngila zawm thin an ni tlangpui niin a sawi. Nu leh pa thu awih leh zah hi Mizo hnaziaa bet nghet zel turin zirtirna pek kawngah upaten theih tawp chhuah thin se a duh thu a sawi bawk.
Bialtu MLA Pu T. Sangkunga hian Leithum MUP Unit ten Run an sakna tur Rs. nuai 2 leh singkhat a pe a, MHIP Run chung atan rangva bundle 3 a pe bawk a ni.

LEGAL SERVICES CAMP :
Mizoram Legal Services Authoruty buatsaihin naktuk chawhma dar 11 hian Kahrawt Community Hall-ah Legal Services Camp neih a ni dawn a, he hunah hian Sawrkar laipui hnuaia hmalakna leh hamthatna awm thei chi hrang hrang inhrilh hriatna hun hman a ni ang. Sawrkar department hrang hrang hotute leh bank hotute bakah dan lama mithiam Pu KL Liana, MJS leh Aizawl leh Champhai Ukilte chu rawn theihin an thutchilh dawn a. Kuthnathawktute, pianphunga rual banlote, kum upa te, naupangte, hmeichhia te, khuarel chhiatna tuartute leh harsatna dang chi hrang hrang an dawn theihte hrilhhriat an ni ang. He hun hmang tur hian mi zawng zawng sawm kan ni e.

FAINA HNATLANG TLANGSAMAH :
Tlangsam Middle School zirlai leh zirtirtute chuan nimin khan Tlangsam khawchhunga bawlhhlawhte chhar khawmin an tifai a, zirlai leh zirtirtute hi hmun hnihah inthenin khawlaia bawlhhlawh tlate chhar khawmin an hal ral nghal a. Tlangsam Middle School te hian tum engngemaw zat khawlia bawlhhlawh chhar khawm hian faina hnatlang an lo nei tawh thin a, hei bakah hian zirlai school kal tur leh an school bang ten bawlhhlawh an chhar thin bawk a ni.

INTHLANG DAWN :
MZP Hqrs. Champhai chuan vawiin ah I&PR Auditorium CHANEM ah chhung inkhawm leh hruaitu thar thlanna hun an hmang dawn.

MINISTER LEH MLA :
Naktuk hian Irrigation & Water Resources Dept. chuan Participatory Irrigation Management hnuaiah Champhai Zotlangah Water Users` Assn Meet an hmang dawn a. Finance Minister Pu Lalsawta chuan khuallian niin a hmanpui dawn a, MLA Pu KS THanga, I&WRD Minister chuan khualzahawm niin a hmanpui bawk ang.

Comments