Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai Tualchhung Chanchinthar ni 15.2.2018 (ningani)

HMANGAIHTE NI PUALIN THISEN PEK RUNPUI :
Valentine`s Day pualin Champhai leh a cheh vela thalai thahnem takin mite nun chhan nan a thlawnin nimin khan Champhai District Hospital Blood Bank ah thisen an pe.
Champhai khawpui chhungleh pawn atanga thalai pungkhawmte chuan Champhai District Hospital pankhawmin, Champhai District Association for Voluntary Blood Donation (AVBD) hruaitute kaihhruaina hnuaiah thisen hi pek a ni a. THisen pek a nih hma hian AVBD hruaituten inkhawmna tawi an buatsaih a, Valentines Day tobul leh nihphung sawifiahna neih a nih bakah Champhai District a thawk mek Dr Zatluanga leh Dr Lalramchhuanga te chuan mite nun chhanna atana thisen pek tluk a hlu a awm loh thu leh thisen petute hriat tur leh zawm tur tarlanna an nei.
Valentines Day pual a Champhai District Hospital a thisen petute ei leh in tur hi JK Business, Champhai ten an tumsak a. Nimina thisen petute hi mipa 70 leh hmeichhia 29 niin thisen Unit 99 an pe a ni. Valentines Day pual hian nizan khan Champhai khawpui chhung hmun hnihah hun hmang turin duan a ni bawk. Thisen pe tur hian thalai rual 200 chuang kalkhawm mahse thawktu lam indaih lohna avangin mi 99 thisen an la theih hram a ni.
Valentines Day pualin Aizawl leh District hrang hrangah thalai ten a thlawna thisen pek runpui an nei a, Mizoram pumah thisen Unit 944 pek a ni.

AR MEDICAL CAMP :
Headquarters 23 Sector Assam Rifles hnuaia 46 Assam Rifles te chuan Feb 13 leh 14 chhung khan Healthy Mizoram Campaign denchhenin Champhai District chhung Ngopa leh Vaikhawtlang mipuite tan medical camp an buatsaih.
46 Assam Rifles 457 Field Hospital Community Health Care Ngopa leh National Institute for Locomotor Disabilities (NILD) Aizawl tang kawpin Ngopa Sub Division, Champhai District ah Medical Camp neih a ni a. He hunah hian mi 1223 inentir in a thlawnin damdawi pek an ni.
He camp ahhian mipuite tan medical expert ten Awareness Workshop on Common Health Related Issues, Drug Abuse and HIV & AIDS neihpui an ni a. State Bank of India bul tumin Jan Dhan Account hawn dan leh Social Welfare Scheme hrang hrangte in hrilh hriatna hun hman ani bawk. He hunah hian chhungkua mamawh zualte tan Solar Light 250 sem a ni.

CHAMPHAI CHAK :
Nimin khan MFA Cup 2018 chu Mamit ah khelh tan niin District pariat aiawhte an inlan kim thei a ni. Nimin khan Champhai District aiawha kal CDFA Academy te chuan hnehna an chang nghal a. Champhai hian an Match hmasa ber Lunglei nen inkhelin 2-1 in hnehna an chang. Champhai tanhian Lalawmsangan min 7 na leh min 74 naah Goal a khung a, Lunglei tan Malsawmdawngkiman goal khat akhung ve bawk. 

FINANCIAL AWARENESS CAMPAIGN :
Nimin khan Govt. Champhai College Seminar Hall ah Reserve Bank of India bultumin Financial Awareness Campaign neih a ni.
Dr C. Laldawngliana kaihhruai sum leh pai chungchang inzirtirnaah hian Resource Person  Pu Ankit Agarwal Manager LDO AIzawl chuan RBI awmzia leh a hnathawh pawimawh hrang hrang, pawisa siam chungchang te, Banking chungchang te a sawifiah a, Bank Account hawn pawimawhna a tarlang a, Account nei te tana hamthatna chi hrang hrang awm te a tarlan bakah Account neite tana pawisa awlsam zawka Internet Banking hmanga khawih chet dan te a tarlang a ni. Heng bakah hian Account neitu tam tak chuan bum an nih tawh thin avangin fimkhurna tur kawng hrang hrang a tarlang a, Account hralh ching an awm thu tarlangin an chungah na taka hremna pek theih a nih thu a tarlang tel bawk.
Pu Ankit Agarwal chuan misual ten RBI hming hmangin mi tam tak an bum tawh a, an Account  a pawisa ten an lak sak vek thin ani a ti a. Phone Call hmanga a Account dil an awm chuan tumah account no pe lo turin a chah a, email hmang te a fake link siam thin te chu lo awihsak lo turin a chah bakah Complain duh nei te tan Complain thehluh theihna leh a kalphung te a zirtir a ni.
He hun hi Lalzam D Neihsial Asst. Manager, RBI Aizawl leh SP Sharma, Lead Bank Manager leh Tombing SBI Champhai manager te chuan an telpui a, Govt. Champhai College te hnenah hian Sports Equipment an hlan nghal a ni.

CHAPCHAR KUT HMAN DAN TUR NGAIHTUAH :
Nimin chawhma dar 11 khan DC’s Conference Hall, Keifangtlangah Champhai District Chapchar Kut Celebration Committee chu  Chapchar Kut 2018 hman dan tur ngaihtuahin Addl DC Pi Lalsangpuii Hmar kaihhruaina hnuaiah an thukhawm.
Meeting-ah hian thu pawimawh hrang hrang sawiho niin, Chapchar Kut 2018 chu March ni 2, 2018 hian Kahrawt Field, Champhaiah chawhma dar 10:30 atanga lawmna neih nise ti a rel a ni a. Kut Pa atan Pu H.Lianruma leh Kut thlengtu atan Pi Lalsangpuii Hmar, Addl DC-te chu beisei an ni bawk.
Meeting chuan Organizing Committee leh Sawrkar Department chanvo hrang hrang changtu turte a ruat a. Organizing Committee Chairman atan Addl DC leh Member Secretary atan Secretary, Sub-Hqtr YMA-te chu ruat an ni a. NGO hrang hrang aiawh hruaitute chu Member atana ruat an ni bawk. Programme kimchang erawh chu Sub-Headquarters YMA kutah hlan a ni. Meeting chuan sum senso tur indaihlohna phuhrukna atan donation mi thilphalte hnen atanga khawn nise a ti a. Champhai District chu pipute sulhnu tamna hmun anih avangin Cultural Centre din nise tha a ti a, hemi buaipui tur hian Sub-Hqtr. YMA chu ruat a ni. Remchan dan anga phungbawm sawmin North East Zone Cultural Centre (NEZCC) lam hotute dawra hmalak nise ti a rel a ni bawk.
Kutah hian mizo hnam lam chi hrang hrang thlirho theih tura beisei a ni a. Heng bakah hian zaipawl leh malzai mawi tak tak ngaihthlak theih tura ruahman a ni. Chapchar Kut hlawhtlin zawk nan sawrkar hnathawk leh mipuite chu a tam thei ang ber Kut chhim tura ngen leh hriattir nise tiin meeting chuan a rel bawk a ni. Meeting chuan February ni 26 atanga March ni 1 thleng sawrkar hnathawk leh zirlaite chu an hnathawhna hmun leh zirna Inah a tam thei ang bera mizo silhfen inbel tura ngen leh hriattir nise a ti bawk.
Chapchar Kut Celebration Committee thukhawmah hian Sawrkar Official hrang hrang, chanchinbumite, NGO aiawh leh khawtlang hruaitute an tel a ni.

Comments