Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai - Tualchhung Chanchinthar ni 1.3.2018 (ningani)

GCC PRINCIPAL THLAHNA HUN HMANG :
          Nimin khan Govt. Champhai College te chuan pension a kal chhuak Principal Lalnunmawia thlahna hun an hmang.
          Govt. Champhai College Principal Lalnunmawia thlahna hun hi College Multipurpose Hall ah Students Union  te huaihawtin neih a ni a, he hun hi F. Zosangliana Students Union Asst. Secretary chuan kaihruaiin Principal kal chhuak tur Lalnunmawia hnen atangin thusawi ngaihthlak a ni a. Zirlaite fuihna thusawiin zirlaite tan zirna ni lo thil dang tui zawng kan nei a nih pawhin a bera kan nei tur ani lova. Thil dang kan tui zawng kan tih nasat avanga lehkha zir kawnga kan tha thum thin hi thil nih phung ani lo. Infiamna lam kan tui a nih chuan infiamna ve ngai lo te aiin kan zir nasa tur a ni a ti a. Hlawhtlin tur chuan in thu nunna, inpumpekna leh tumruhna te neih loh chuan sang tak a thlen theih loh tih hre renga zirna kawnga theihtawp chhuah turin a chah a. Zirlaite chu Champhai District chhunga zirna in sang bera kal an nih tih in hre renga an nu leh pa te beisei ang ngeiawm hlawhtlin na kawng zawh turin a chah bawk.
          He hunah hian Associate Professor Lalhmingzauva leh Samuel Vanlal Biak chhana Students Union General Secy hnenah atangin thusawi ngaihthlak a ni bawk.
          Zirlaite thlahna hun an hman zawh hian Govt. Champhai College Welfare ten Govt. Champhai College Seminar Hall ah thlahna hun an hmang zui bawk a, he hun hi Associate Prof. Chalthangan kaihruaiin Principal kal chhuak tur Lalnunmawia leh Well fare aiawh te hnenah atangin thusawi ngaihthlak a nih bakah ngaihhruaina thil pek hlan a ni bawk.
          Govt. Champhai College Principal-in kal chhuak tur Lalnunmawia hi kum 1979 Voc. Ni 5 atangin Govt. Champhai College ah hian a thawk tan a, kum 39 chhung zet he College ah hian a thawk hman a. Kum 2010 December khan Principal ah lut in a pension thlengin he hna hi a cheh a ni.

KAWNG SIAM ENDIK :
         Nimin zing khan Champhai Norh bialtu MLA Pu TT Zothansanga chuan NEDP sum cheng nuai 14 hmanga siam mek TT Road, Champhai Vengsang atanga Champhai-Aizawl Road pawhtu kawngpui  leh BADP sum cheng nuai 17 hmanga sak mek  Vengsang High School-te chu a hmunah kalin hnathawh dan a enfiah.
         Bialtu MLA chuan kawngpui siam that mek chu a mam a, hnathawh chin pawh tha a tih thu a sawi a. Kawng siam that mekin a huam lem loh laia kawng khuar awmte pawh a theih ang anga lo hnawhkhat turin PWD hotute a hrilh a. Nakin lawka  kawngpui tangkai tak anih dawn avangin uluk leh tha taka siam turin a  chah nghal a ni.
         TT Road hi Metre 600 vel a thui a ni a, Champhai khawpui chhunga lirthei tawt lutuk tihziaawmna leh khawchhunga kawng chhiat palh thut pawha  hman theih mai tura siam that a ni.
         Nimin zing vek khan bialtu MLA chuan BADP sum cheng nuai 17 senga sak mek Vengsang High School pawh a tlawh a, zirtirtu leh thawktu dang ten an lo dawngsawng a ni. Pu TT Zoithansanga chuan Sikul tha tak Vengsang High School-in a neih theihna tura theihtawp chhuah turin Sikul building satute chu a chah nghal bawk a ni.
         Bialtu MLA hi Pu Vanlaldika PWD EE leh thawktu dangte, Champhai Vengsang khawtlang hruaitu leh NGO lam aiawhten an tawiawm a ni.

SPECIAL HANDLOOM EXPO 2018 HAWNG :
            Ministry of Textiles bultuma buatsaih Special Handloom Expo 2018 hawnna chu nimin chawhma khan Kahrawt VC Hall, Champhaiah neih a ni. He hunah hian Champhai District DC charge la mektu Pi Lalsangpuii Hmar, Addl DC, Champhai District chu Khuallian niin Special Handloom Expo-2018 chu a duh apiangte dawr theih turin a hawng a ni. Hawnna programme-ah hian Pu S.K Sen, Officer-in-Charge, Weavers Service Centre, Aizawl leh Dr Lallawmkima DIPRO Champhaite chu Khualzahawm an ni.
           Khuallian Pi Lalsangpuii Hmar chuan Ministry Of Textiles leh MAHCO Ltd-te tangkawpin Champhaia Special Handloom Expo an buatsaih chu lawmawm a tih thu a sawi a. Handloom Expo chu puantahtute tana inphochhuahna, hralhna hmun leh mipuite tan pawha awlsam taka an duh zawngte an lei theihna a ni, a ti a. Sawrkar laipui pawhin Handloom chawikan nan Scheme leh Programme hrang hrang a duan thu leh Exhibition, Fair, Mela leh Training-te a buatsaih thin thu a sawi a. India ram zau taka hnam hrang hrang awmte hian hnam ziarang kan nei theuh a, hengte pholanna tha tak chu handloom kutchhuakte hi a ni, a ti a. Puantahtute chu an hluin pipute hun lai atanga kan chhawm zel incheina te hi an kutchhuak a nih thu leh kan Mizo nihna tilangtu tangkai tak an ni, a ti a. Thawn chhuah tlak quality tha silhfen mai bakah inchhung bungraw dangte thlenga tah a tul a, chu chuan sum dehchhuah pawh a tih pung dawn a ni, a ti a. Special Handloom Expo puala kalkhawm puantahtute hnenah chuan Hanloom chu eizawnna tlak anih thu sawiin tun aia nasa zawka tan la a hmasawn zel  turin  duhsakna a hlan bawk a ni.
           He hunah hian Pu SK Sen, Officer-in-Charge, Weavers Service Centre, Aizawl pawhin thu sawiin, Handloom Expo buatsaih anih chhan ber chu puantahtute tana inhralhna leh a leitute tana hmunhma tha siam sak anih thu a sawi a. Sawrkar laipuia Ministry of Textiles-in puantahtute tihhmasawnna turin District, State, National leh International Level thlenga inphochhuahna hun  a huaihawt thin thu tarlangin henga tithate hnenha hian lawmman leh hamthatna tha tak takte a pek thin thu a sawi a. Mizoram a puantahtute pawhin tel ve thei tura tan lak angaih thu leh Acrylic nilova Wool, Silk, Cotton leh Natural Fibre lam atanga siam silhfen leh inchhung bungraw dangte siam lama tan lak   angaih thu a sawi a. Champhai District chu Handloom-a tan lak a ngaih thu a sawi a, lei lamah chuan chak viau mahse, siamchhuah lamah a hnufual thu a tarlang a. Handloom kutchhuakte chuan ram chhung hmun dang leh ram pawn thleng tur chuan  Indian Handloom Brand (IHB) an neih angaih thu sawiin Handloom Census neih hunah puantahtute chu inziaklut vek turin a chah a; chu chuan sawrkar atanga hamthatna leh sumdawnna kawngah pawh a puih theih dawn thu a sawi bawk a ni. 
         Programme hi Pu R.V Lalzara, Secretary, MAHCO Ltd chuan kaihruaiin kalkhawmte lawmna thu sawiin inhmelhriattirna hun a hmang a. Hemi hnu hian Khuallian, Khualzahawm leh sawm bik chhimtu dangte hnenah thilpek hlan a ni a. Programme hman zawh anih hnu hian Khuallianin Stall-te a tlawh kual leh a, hemi hnu hian a duh a piang dawr theih turin Special Handloom Expo- 2018 hi hawn a ni.
Mizoram Apex Handloom and Handicraft Cooperative Society Ltd. (MAHCO) hi kum 1977 a din a ni a. Thiam hnang deh leh puantah lama tuimite chawikanna leh phochhuahna tura din niin Mizoram Society-te zinga upa ber pawl a ni. Tun dinhmunah Mizoramah Handloom Cluster 7 awm mekin a dang 5 nei leh thei tura hmalak mek a ni a. Special Handloom Expo-2018 hi Kolasib-ah neih a ni tawh a, Champhaia neih zawh hnu hian Aizawl lamah neih leh tura ruahmanna kalpui a ni.
  Champhai Special Handloom Expo-2018 hian March Ni 2, Chapchar Kut ni thleng a awh dawn a. Expo-ah hian Stall 31 awmin Aizawl atangin 23, Thenzawl atangin 5 leh Champhai atangin 3 te a awm a ni.
 Special Handloom Expo (State) 2018 hi Sawrkar laipuia Ministry of Textiles hnuaia Development Commissioner for Handlooms, New Delhi bultumin Mizoram sorkara Commerce & Industries department kaltlanga buatsaih a ni a, MAHCO Ltd. chu implementing agency a ni.

CHESS INTIHSIAK :
          Vawiin leh naktuk hian CDFA huaihawtin District pum huam Chess Tournament, Kahrawt YMA Hall, Champhai ah neih tur a ni a, entry fee Rs. 50 a ni ang. Champhai District a Chess a tui mi zawng zawng he INTIHSIAK tel tur hian sawm in ni e. Lawm man pakhatna atanga 5-na thleng siam ani dawn a, lawm man atan hian Rs. 18,500 sen ral ani ang. Tel turte tan vawiin chawhma dar 9:30 ah Registration tih fel vek tur a ni.

NATIONAL SCIENCE DAY HMANG :
          Govt. Champhai College a Research Consultancy & Evaluation Committee leh Mizoram Science Technology & Innovation Council tangkai ten an buatsaihin nimin khan Govt. Champhai College Seminar Hall ah National Science Day 2018 lawmna hun hman a ni. 

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Sermon

Ringtute Hi Khawvel Eng Kan Ni
Chang thlan : Matthaia 5 : 14 - 16
Eng tel lo chuan khawvela nunna neite hi an dam khawchhuak thei lo. Eng hmanga chaw siam thei chauh vek an ni. Thil, a nihna ang taka kan hmuh fiah theihnan pawh eng a ngai a, eng awm lohna ah chuan kan chetvelna pawh a buai zo vek a nih hi. Thimah chuan kawng kan hmu thei lo va, hlauhawm leh hlauhawm lo kan thliar thei lo va, kan mit kan chhawr tangkai thei hek lo. Eng tel lo chuan kan khawsa thei lo a ni
Khawvel Eng - Isua : Isua hi khawvel eng a nih thu Johana 1:9, 8:12 ah te kan hmu. Isua tel lova khawvela nun kan hman chhung chuan thimah kan cheng tihna a ni. Nuamsa takin awm mah ila, Kawng leh Thutak leh Nunna Isua kan neih loh chuan kawngbo kan ni tho. Kan hlawhtlinna te, ropuina leh hmingthatna te pawhin kan damchhung bak a daih lo. Tin, kan nunna atana tha leh tha lo pawh kan finna atangin kan teh ang a, a dik zik tluak chuang lo . Kan hlimna leh lawmna pawh hian tawp chin a nei a, lungngaihn…