Skip to main content

Champhai Tualchhung Chanchinthar

CHAMPHAI ṬHALAI PAWL TEN HMA LA :
Nimin chawhma dar dar 10:30 khan Champhai Thalai Pawl leh hun rei tak an lo ve tawh Champhai leh Khawzawl kawng inkar kawng chhe lutuk chhungchangah PWD Natioanal Highway Sub-Division 5 hotute nen inkawm ho na an nei. Champhai Thalai Pawl ten an tum dan tak chuan kawng chhe lai hi a hmun ngeiah PWD hotute nena enhoa sawiho an duh laiin khuain a bumro tak avangin an duh angin an ti thei ta la lo a. He hun rawn hmang tur hian Pi Lalbiakengi, SDO, PWD Natioanal Highway Sub-Division 5 rawn chho in harsatna chi hrang bakah Champhai Thalai Pawl ten an vei te sawihona hun an hmang a. Pi Lalbiakengi, SDO chuan tuna kawng kan siam mek hi chu in hriat tawh angin tun tum fur lo thleng turah motor tang leh tlu a awm loh theih nan Mizoram Sawrkarin theihtawp a chhuak vang a ni, Champhai leh Khawzawl inkar kawng  Repair and Rehabilitation of Existing Single Land Pavement form Km 10 to Km 150 on NH 6 (Champhai to Khawzawl) Rs. 23.64 crore hmang hian siam leh vat tu…

Champhai - Tualchhung Chanchinthar ni 7.4.2018 (inrinni)

EX-SERVICEMEN TEN KHAWMPUI HMANG :
Nimin khan Mizoram Ex-Service Leaque (MESL), Champhai Sub-Headquarters chuan Assembly vawi 16-na Champhai Venglai Community Hall-ah an hmang. He hun hi Pu TT Zothansanga, Champhai North bialtu MLA chuan khuallian niin a hmanpui a. Pu Remlalliana Hnamte, MCS, ASO-II chu khualzahawm a ni.
Khuallian Pu TT Zothansanga chuan ram leh hnamin zalenna a neih theihna tura pawimawh tak chu sipaite hi an ni tiin, “Vanglai hun hlu tak leh theihna sang ber ram leh hnam tana hlan chu mihringin a tih theih ropui ber a ni”, a ti a. Sipai pension-te zinga hun a hmang thei chu nihlawh a in tih thu a sawi a. Sipai rawngbawlna chu a ngaihsan thin thu leh tan ve a lo tum tawh  thu pawh a sawi a. Champhai North bialtu MLA chuan Sipai tan chu intihhmuh angaih thu sawiin, inkaihhruaina tha tak hnuaiah mihring puitling a in siam thin a ni, a ti a.Champhai District chhunga Ex-Servicemen member thahnem tak an awm chu chhuanawm a tih thu leh khawtlang leh kohhran tana an rawngbawlnate chu fakawm a tih thu a sawi a. Harsatna hrang hrang paltlang tawh an nihna atanga an tawnhriatte chu khawtlang leh ram tan pawha chhhawrnahawm tak a ni, a ti a. Sainik Welfare hotute chu tun aia tam zawk Champhai District thalaite sipaia an tan theihna atan Pre-Recruitment Rally buatsaih tura hmala tur leh puih an ngaihna a puih a inhuam reng thu pawh a sawi a. India ram sawrkar chuan Ex-Servicemen te hmakhua angaih thu a sawi a, hemi kawngah hian ex-servicemen-te pawhin sawrkar lam atanga hamthatna leh intuamhlawmna awm theite pawh an hriatfiah a tul thu a sawi a. Ex-Servicemen kalkhawmte chu khawtlanga mite entawn, ngaihsan leh tawnhriat ngah tak an nih hlawm avangin   ram leh hnam kaihhruaina kawnga tangkai taka hmang thin turin a chah bawk a ni.
Khualzahawm Pu Remlalliana Hnamte, MCS, ASO-II pawhin Ex-servicemen te chu khawtlanga mi aia chung en bik leh inthununna hnuaia awm tlat an nih thu a sawi a. A takin pension thin mahse an rank/nihna an la chhawmnung zel thin a ni, a ti a. Ram leh hnam tana ni pawimawh bikahte pawh phur taka an rawn tel thin chu fakawm a tih thu a sawi a. Tun lai hna vang tawh tak karah Champhai thalai tam zawkte sipai hna zahawm tak an thawh theihna tura tan lak angaih thu a sawi a. Sipai bangte chu an sipai tan laia venghim reng thintu Pathian hnena lawmthu sawi thin turin a chah bawk a ni.
He hunah hian Maj Rebecca Chhakchhuak, DSW&RO chuan Assembly hmang tura  kalkhawm sawm bik, sipai pension leh an chhungte chungah lawmthu a sawi a. Champhai District chhungah  Ex-Servicemen 800 chuang leh an pasalte boralsan tak hmeithai 200 chuang dawn lai an awm thu a sawi a.  Hnathawh tur leh  hmachhawp tam tak awmte tipuitling turin sipai pension-te chu thawhpuiah a sawm nghal a. Sipai pension ten hamthatna an neihte chhawrthiam a tul thu a sawi a. Hruaitu leh hotu hmasate thawhrimna rah chu a takin tun atanga reiloteah a seng theih dawn thu a sawi bawk a ni.
Nimin Assembly-ah hian Ex-Sub Rohnaa Sailo, President, MESL-Sub-Hqtrs Champhaiin kalkhawmte lawmna thu a sawi a. Upa B. Hranghlira’n hunserh a hmang a. Ex-Sepoy H.Zobuanga, Secretary, MESL-Sub-Hqtrs Champhaiin report a pe a. Kum 2016 April atanga Kum 2018 March thla thlenga pawl member boralta mi 10-te sunna hun hman a ni a. Heng bakah hian chawimawina hun Pu Saizama, Ex H/Capt kaihhruainain neih a ni a. Sipai pension kum 80 chuang mi 4, World War II Veteran mi 5 leh Parade Contingen member-te hnenah chawimawina thilpek hlan a ni a. Heng bakah hian tanpuingai sipai pension leh an chhungkua thlan bik mi 8-te hnenah tanpuina hlan a ni bawk.
Chawhnu lamah programme hi chhunzawm a ni a. Darbur hawn niin a duh apiangte tan zawhna leh chhanna hunte neih a ni a. Sgt Lt Cdr Lalnuntluanga, Director, Sainik Welfare & Resettlement Department hnen atangin thu sawi ngaihthlak a ni a. a Hruaitu thar thlanna hun MJA kaihhruaina hnuaiah neih a ni a. Ex Sepoy. Lalzuiliana, Vice President, MESL lawmthu sawina neiin tawpna a siam a ni.
Ex-Service Association Champhai hi October Ni 16, 1960 khan din a ni a. Mizoram Ex-Service Leaque  (MESL) Sub-Hqrs hi June 14, 1996 khan din a ni bawk a. Tun dinhmunah MESL Sub-Hqrs Champhai hnuaiah hian Unit 8 a awm mek a ni.
Programme-ah hian Pu Lalthiamsanga Sailo, SP Champhai; Assam Rifles lama hotute; Sipai pension leh an chhungte thahnem tak an tel a ni.

LIRTHEI PHURH RIHZAWNG ENFIAH :
Champhai leh Aizawl inkar kawng a tlo theihna tura Truck lian ten bungraw an phurh theih zat bithlaih chu kalpui a ni a, Police leh Ligal metrology  Dept. te chuan Khankawnah an Duty.
Champhai leh Aizawlinkar kawnghi sumdawng lirtheiin an zawh nasat avangin a chhe hle a. Kawng a chhiat bakah kawng lakah lirthei chhia avangin kawng hi a piang ngunhle bawk a. Hei hi Champhai tlangdung, he kawngpui hmangtute chuan nikum atang tawh khan an ngaimawh leh ansawisel  nasat ber a ni. Kawngpui hi PWD Highway Division chuan a siam hna an thawk mek a, heti chung hian Champhai atanga AIzawl inkar km 198 chu darkar 10-12 thlan a la ni thung. Kawngpui hi a chhiat zel lohna turin Champhai DC hovin hmalak dan tur chu January thla khan ngaihtuah a ni a, bungraw phur lirtheite bungrua phurh theih zat chu bithliah nise tia rel a ni a, hei hi thawhlehni atang khan kalpui tan ani.

CHAMPHAI AH LIRTHEI A PUNG :
March thla chhung khan Champhai District Transport Office ah lirthei 82 ziah luh a ni.
Champhai District Transport Office ah hian thla kal ta March thla chhung khan 2 wheeler - 44, Auto Rickshaw 1, Car 13, Bolero 4, Taxi 1, Truck 18, Tracktor 1 leh KCB 1 ziah luh niin, ziahluh hnuhnung ber hi MZ04 A 1090 a ni. March thla chhung vek khan Champhai District Transport Office ah lirthei mihring phur chi atangin Rs. 21,850 hmuh a ni a, bungraw phur lirthei atangin Rs. 1,62,075 hmuh a ni a, Road Tax atangin Rs. 7,98,710 hmuh niin MV Fees atangin Rs. 5,81,020 hmuh a ni a. March thla chhung hian Champhai District Transport Office ah chhiah hrang hrang atangin Rs. 15,63,655 hmuh a ni.
Hetihlai hian March thla chhung khan Champhai Traffic Police te chuan lirthei dan bawhchhia 96 an man. Heng lirthei dan bawhchhia an man zingah hian ke pali nei chi tam berin 34 an man a, an pawisa chawi hi Rs. 18,900 a ni a. Ke 3 nei chi 2 manin an pawisa chawi hi Rs. 800 a ni, ke pahnih nei chi dan bawhchhia 12 bawk maninan pawisa chawi hi Rs. 5100 a ni. Champhai Traffic Police ten lirthei dan bawhchhiah an man zawng zawng 96 te pawisa chawi hi a vaiin Rs. 24,800 a ni.

RII & HAWLA TOURNAMENT :
Champhai a Football Tournament lian ber Rii & Hawla Inter Village Tournament khelh mekah nimin khan Match thum a awm a, inkhel hmasa berah Kanan VC I chuan Zotlang VC II chu si 6 faiin an hneh a. Inkhel vawi hnihnaah Zotlang VC I chuan Khawzawl Vengthar VC chu 4-1 in an hneh a. Inkhel hnuhnung berah Hnahlan VC chuan an bitum Kahrawt VC te chu 3-1 in an hneh ve thung a ni.
Vawiin ah khelh chhunzawm a ni ang a. Inkhel turte
Vengthlang VC (12:00) Vengthang North VC
Zote VC (2:00) Dilkawn VC

IN KANG :
Vaikhawtlang khua Pu John Nuntluanga In Assam Type chu nilaini zan dar 7:30 vel khan bungrua engmah chuh hman lovin a kang ral. Kangmei chhuah lai hian in neitute hian inkhawm avangin tumah inah an awm lo va, kangmei chhuak hi hriat a nih meuh chuan thelh hleih theih a ni tawh loh avangin inchhung bungrua pawh engmah chuh hman ani lo.

ZIRLAI TITHA :
Nizan hmasa khan Zote Branch MZP te chuan ZOte COmmunity Hall ah an khaw chhunga zirlai ti tha O Grade a pass chinte chawimawina hun an hmangin zirlaite thilpek an hlan a. Zirlai pawl hruaitute atangin zirlaite fuihna thu chah ngaihthlak a ni bawk. Zote Branch MZP hi kum 2013 atanga din tan chauh ni mahse MZP Branch te zinga nung ber pawl an ni a, Exama zirlai ti tha leh in ziaktlingte hnenah chawimawina thilpek anhlan thin a. Heng chawimawina an pek senso te hi an inhlawhna atanga an tuak ngah vek a ni bawk.

DAMCHHUNGA HMEICHHE LAKA INVAWNG TURIN INTIAM :
Nimin khan Aizawl Diocese Bishop hian Deacon Paul Tuangkhanlal s/o Martinous Hausuanthang, Champhai Bethel Veng chu hmeichhe laka invawng thianghlima dam chhunga Pathian rawng bawl tur, Puithiam (Father) ni turin Holy Cross Biak In, Bethel Vengah a nemnghet a. Aizawl Diocese Bishop Most Rev. Stephen Rotluanga chuan sakhaw rawngbawltu a bikin hun puma Pathian tana rawngbawl tura inpe te hi, kan nun leh kan thusawi te hi inpersan lo leh inmul tur a ni a, rawng kan bawlsak ringtute tana nun hmang leh fehchhuak tur kan ni, a ti.

Comments