Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai - Tualchhung Chanchinthar ni 18.4.2018 (nilaini)

HAPTA KHAT CHHUNG TUI SEM DAWN LO :
Champhai khawpui chawmtu (Greater Water Supply) Tuipui tuilakna leh Tuizem te thenfai hnathawh mek a nih avangin Champhai khawpuiah Hapta khat chhung mipui hnenah tuisem a ni dawn lova. TUilak thenfai hnathawh hi niminpiah atang khan kalpui niin, Tuipui tuilak (pump) na lipui bawlhhlawhin a hnawh chu khawl hmanga thenfai mek ani a. Hetih rual hian tui thlitfimna (Treatment Plant/Sedimentation) hmuna Tuizem zawng zawng bakah Darthlalang Tlang a Zempui (Main Reservior Tank) leh khawpui chhunga TUizem lian (Zonal Tank) II te pawh thuahfai nghal a ni. Champhai TUilakna leh tuizem thenfai hna thawh mek hi Champhai PHED WATSAN Division hotute leh MJA Champhai District Memberte chuan a hmunah kalchilhin, thenfai hnathawh peng hrang hrangte chu an enpui a. PHED WATSAN Division EE Er. J. Kapkima chuan mipuite hnenah intur tuithianghlim pek a nih theih nan kumtin a tahtawl a thenfai hna thawh thin anih thu sawiin, kumin bikah chuan tumkhat a thenfai vek hi hnakhat zawk a hriat a nih avanga thawk mek an nih thu a sawi a. hetih rualin chawlhkar khat chhung mipui hnena tuisem chawlhsan a tul ta erawh a inthlahrun awm hle tih a sawi a. He tuisem khaihlakna thlengah hian mipuite hriatthiamna leh tawiawmna EE Er. J. Kapkima chuan a ngen tih sawiin, tuibik pawimawh leh rikrum thil a hman tur erawh tui dahkhawl a nih thu a tarlang tel bawk.
Champhaia WATSAN PHES hotute chuan CHamphai Tuipui tuilakna Pump House kawng hi Department enkawl a nih rualin mimal sumdawng lirthei ten an zawhpui avanga kawngin a chhiatphah thin chu an enghelh thu an sawi a. Kum 10 chuang Tuipump na khawl 4 te chu a hlui tawh hlawm avang leh rim tak hman annih hlawm avangin a thar a thlak tumna a awm em tih MJA Memberten an zawhna chu ‘Pump khawl thar a thlak turin rawtna engmah Sawrkar ah thlen ala nih loh thu an sawi a. Fur Tui nut laia Luite peng Fallui buk tuihna lakbelh tumna a awm em tih MJA te zawhna pawh PHED hotute chuan rawtna sawrkar ah thlen a nih tawh thu leh sawrkar thu nghah mek a nih thu an sawi bakah hnianghnar zawk a mipuiten tui an dawn theih nan Tuizem lian (Reservoir Tank) Darthlalang tlangah siam belh a tul thu an sawi tel bawk.

VAWK 13 ENDIKAH 2 IN PRRS NATNA VEI :
Champhai AH & Vety Dept. chuan tunhnaia vawkna hrileng leh mekah Champhai khaw chhungah Vawk 13 an endik atangin 2 chu PRRS natna nei tih an hmuchhuak.
AH&Vety Dept chuan CHamphai a vawk damlo Vety a report 13 te chu endik niin 2 te chu PRRS natna hi an vei tih an hmuchhuak a. Kawlkulh ah vawk dam lo 17 an endik atangin vawk 8 in PRRS natna hi an vei tih hmuchhuah a ni bawk. Heng vawk dma lo an endik atang hian vawk 2 te chu Classical Swine Fever (vawk pul hri) a ni tih an hmuchhuakbawk. Tunah hian endik tur Sample dang thawn leh mek a ni a. District Vety Officer chuan a reh lam ni a an hriat thu a sawi a ni.
Vawk thi report leh report lem lo, thi tih an hriat hi kar hmasa zirtawp ni thlen gkhan 42 an thi tawh niin tarlan a ni a, vawk vulh tute chu an vawk a danlo emaw a thi emaw a nih chuan a natna hriatchhuah anih theihna turin Vety ah hriattir vat thin turin mipuite a ngen a ni.
VCO chuan Ran thianghlim lo, damlo tih hriat te chu hlawk dawn lo mahse sah tur azuar lo turin vawk vulhtute chu a ngen a, a thi a nih pawhin paih liam mai mai lova, thuk taka phum nise a him bik tih thu a sawi a ni. Vawk dam lo neite chuan midang vawk bulah kal lo hram turin a chah a, a natna hri hi mihring te hian kan pu darh thei a ni a ti. Kan Vawk a dam lo tih hriat veleh a sah tir ching an awm chu pawi a tih thu sawiin Vety ah hriattir thin nise, enkawl dam leh hman a beisei awm thin thu a tarlang bawk. Vawk damlo te chu enkawl dam an nih pawhin an dam atanga thlakhat hma chuan an enkawlna damdawi chu an taksa ah a la beh thin avangin sah loh tur  a ni a, a dam atanga thla hnih hnu velah hralh chauh thin tur a ni a ti a, kan vawk vulh a dam lo ni a kan hriat chuan Vety ah hriattir vat thin tur  niin enkawl dam theih an nih thu a tarlang a ni.
Hetihlai hian Classical Swine Fever (vawk pul hri) Vaccine pek mek chu kalpui zel la niin, Champhai khawchhung leh khawchheh velah chuan pek zawh thawhkhat tawh a ni a, tunah hian Zotlang ah he SF Vaccine hi an pe leh mek a ni.

KUMPUAN BAWHZUI :
Farkawn Branch YMA te chuan zirna in hrang hrangah YMA kum puan hmalak denchhenin Education Wareness Campaign nei Farkawn branch YMA Executive Committee Member te chuan YMA Kumpuan ‘Ram leh  Hnam Humhalh’ hmalakna peng hrang hrang zinga pakhat zirna lama an hmasawn zel theih nan Farkawna zirna in hrang hrangah zirlai leh zirtirtute theihtawp chhuah turin an inngen a. ‘Mizo te chu zirna lama kan hniam chuan kan ram leh hnam a him dawn lo a ni’ tiin kawng hrang hranga zirna leh thiamna ram leh hnam humhalhna atan leh himna atan a pawimawhzia an inzirtir a ni.

KHAWMAWI KANGMEI HNUHMA THIAN :
Niminpiah a Tiau khawmawi a In kang chu nimin khan hnatlanga singsak fel a ni.
Tarlan tawh angin niminpiah khan Indo Myanmar Trade, Tiau Khawmawi a Petrol zawrhna dawr atangin kangmei chhuak ni a hriat a ni a, In hi inhnaih chilh te tea sak a nih hlawm avangin he kangmei chhuak hian a bul vela chhungkaw 7 chenna In dinglai 7 leh dawr 3 chu a kang kai a, chenna In kang hia  then chu a neitute Rihdilah chhungkuaa an kal lai a nih avangin an him hlauh a, an bungrua, rangkachak leh pawisa an dah thatte chu kangmei chhuak hian a kangral vek a, heng bakah hian kawng ana chenna In leh Dawr thenkhatte pawh kangkaiin akan nasat hmain thelh mih hman a ni thung.
Myanmar ramah hian sawrkar hmasaah chuan In a kanin, a tikangtu chu chhawmdawlna pe lovin pawisa chawitir emaw Tan in hial pawh tan tir thin an ni a, tun sawrkar tharah erawh chuan sawrkarin hma alak dan tur an sawi mai thei rih lova, sawrkara an hotute chu a hmunah kalin an la endik dawn a ni.
Nimin zingkar atang khan kangmei chhuakin a tih chhiat In leh bungruate chu senghawiin hnatlang hi an nei a, hnatlangah hian Tiau Khawmawi mipuite mai bakah Zokhawthar, Melbuk leh Rihkhawdar atangtein mi thahnem tak hnatlang hian an chhuak khawm a, hnatlanghian mi 700 vel bawr an thawk chhuaka, lirthei neitute pawhin tlawmngaiin JCB leh Tripper engemaw zat an thawhchhuahpui bawk.
He kangmei chhuak avanga hliam tuar Siangsiangi hi kangmei chhuakah hian tangin chhuahna tur mai a awm loh avangin tukverh atangin in thlanga Lui aha zuang chhuak a, bawihsawmtu pawh nei lovin amahin a insaseng a,tunah hian Rihkhawdar Damdawi Inah enkawl mek a ni a, Hmunpui lamah refer ni mahse, heta an enkawlna ang bak chuan enkawl theih a nih an rin loh avangin RIhkhawdar Damdawi Inah hian enkawl chhunzawm ani ta ani a. Siangsiangi chhan tura kal mi pakhat chu chhan a tumna lamah kangmei chhuak hian atukhum leh a bekte chu a kang a. Rihkhawdar Damdawi Inah hian enkawl ve mek ani bawk. Hetihlai hian kangmei chhuak thelh tura kal mi thenkhat chu Gas puakin aper avangin hliam tuar an awm nual bawk a, ngaihtuahawm erawh an ni lova, thi an awm lo bawk.

Comments