Skip to main content

Champhai Tualchhung Chanchinthar

ADDL. CEO HOVIN VOTE CHHIAR TURA INBUATSAIHNA ENFIAH :Nimin khan  Additional Chief Electoral Officer Pu Krishna Mohan Uppu IAS   chuan  Champhai a rawn tlawh a, May Ni 23, 2019 a Lok Sabha inthlanpui vote tla  chhiarna tura inpuahchahna kalpui mek a rawn enfiah a ni.
Champhai District Election Officer Dr Naveen Aggarwal, IAS chuan inpuahchahna hrang hrangte NICConference Hall-ah powerpoint presentation hmangin   a sawi fiah a. Counting Center puahchah leh peihfel dante, Vote chhiar tur ruatna leh training pek tawh dante leh inbiakpawhna tur atana ruahmanna siamte a hrilhfiah a. CEO team ten Vote chhiar huna round tin report pekna tura duan Suvidha Counting Application hrilhfiahna an nei bawk a ni. Chawhnu lamah CEO Team-te hian EVM Strong Room leh  Vote chhiarna tura ruat Counting Hall pangate  an tlawh kuala, heng  an tlawh kualna hmunahte hian District Election Officer Dr Naveen Aggarwal, Champhai SP Pu Lalthiamsanga Sailo leh  District Election Official-ten an tawiawm a, ruahmanna …

Champhai - Tualchhung Chanchinthar ni 15.5.2018 (thawhlehni)

CHAMPHAI LEILET ZAWLA KUDAM LEH IN SA THIAH LOH CHHAN ZAWT :
Champhai Task Force te hmalakna kal zelah phaizawla kudam sa te chu thiahsak an nih lohna tur chhan leh vang sawifiah tura hriattir an ni.
Champhai leilet zawl hi Sawrkar dan dinglai angin loneih leh a kaihhnawih atan chauhva hman theih a ni a. Hetiang tur hian LSC leh ram pass pawh pek chhuah a ni a, hei vang hian Kudam sa lo tur leh a sa tawhte pawh thiat tura thupek chhuah a ni a, sa lai te pawh a hmuna kal chilh a tihtawp tir an ni tawh a. APril thla chhung a hriat vek tura tih an ni a, tun dinhmunah thiat emaw thiahsak engmah ala awm lova, thudawn danin heng kudam neitute hnenah hian hriattirna tawp ber pek a ni tawh a. Thiahsak an la nih loh chhan chu Kudam neitute hi COurt lam thu ngaihchan vang leh ni 8 khan Kudam neitute chu Dan ang thlapa thiahsak lo a nih chuan anmahni a thiat tura tih an ni a. Lehkha hi an dawng vek tih finfiah a ni a, lehkha an pek atanga ni 15 hmaa sawi tur nei silova, kudam thiat lo te chu thiah sak emaw nawr chhiat sak emaw an ni tawh dawn niin thudawnna chuan a sawi.
Champhai leilet zawl hi sumdawnna hmunhma atana cheibawl a nih tak avangin a hmelhmang a danglam nasa hle a. Kudam leh in sakte hi Champhai mawina hliahkhuhtu leh Champhai mipui hriselna tichhe theitu a nih avangin CHamphai Nature Conservancy chuan an duh loh thu leh, Champhai DC thupek tihchhuah tawh chu an thlawp thu an sawi a. Task Force te pawh dan anga hma la tura an beisei bakah CHamphai leilet zawl humhalhna atana an hmalakna chu an thawp thu an lo sawi tawh bawk.

TUI SEM LEH TAN :
PHE Dept. chuan veng tinah tui an sem chhuak leh tan. Kar hmasa khan ruah sur nasat avangin Tuipui a nu nasa hle a, in tlak loh khawpa tuihi a nut avangin kar hmasa khanmipui hnenah tui sem theih a ni lova, chhungkaw thenkhat chuan harsatna an tawk hman nia  thusawn a ni. Tuipui tui hi in tlak tura dim ni leh tawhin pump nghal a ni a, nimin chawhnu lam khan kar hmasa a tui sem ve hman loh te atangin an sem chhuak nghal a, tui in tlak loh khawpa nu leh a nih loh chuan tunkarah chuan mipui hnenah pek chhuah vek an beisei tih an sawi.

RUIHHLO MAN :
Pathianni chawhma dar 11 vel kahn Champhai Excise & Narcotics Dept. te chuan Tuipui Bazarah Heroin No. 4 Gram 9.2 leh a neitu nia rin Ramengmawii (26) d/o Rodingluaia, Champhai Venglai a khawsa nia insawi chuan man a. Ramengmawii hi ND&PS Act hnuaiah thubuai siamsak niin nimin khan District Court ah hruai niin Champhai District Jail ah dah luh nghal a ni.

HNATLANG:
Champhai District Promoters Club chuan Helipad Gate an tifai a, hantlangte hian an hna an thawh zawhah helipad leh a chhehvela bawlhhlawh awm te an chhar fai nghal a, remchang hmasa berah rawng hnawih thar turin hnatlan leh an tum nia thudawn a ni.

SAWRKAR NGHAK KHER LO :
Val upa kaihhruaiin nimin khan Khawbung khawchhung inkalpawhna kawng tuiluan kawr hnawlin a hnawh chu hai fai a ni.
Kar hmasa ruahsur avanga Khawbung khawchhung inkalpawhna (Village Internal Road) tuiluan kawr hnawl leh lei nawiin a hnawh chu a veng neitu Bazar veng tlangval ten val upa kaihhruaiin an thian fai a. Val upa B. Liandula chuan khawtlang nawmna atana tha thawh chu tlangval mawhphurhna awimawh tak niin, chhiat thulhah chauh lo pawh chet chhuah a tul thu sawiin engkima sawrkar nghenchhan tumna rilru dik lo chu paih bo ngai niin a sawi a. Khawtlang faina atan pawh tlangvalte chu tha thawh hlawk thei ber an nih thu a sawi bawk.

THLIR LET :
Kar hmasa Zirtawpni a neih zawh tak NLUP Fair-cum-Exibition 2018 thlirletna leh sawihona hun chu nimin chawhnu khan DC Conference Hall, Keifangtlang, Champhaiah District Bawrhsap Pu Vanlalngaihsaka hova neih a ni.
Bawrhsap chuan NLUP Kutpui hlawhtlin theihna tura Line Department-te leh thathawhtu zawng zawngte   thawhrimna leh inpeknaah lawmthu a sawi a. NLUP hlawhtlinna tur atan District administration leh Line Department-te inkarah thawhhona tha tak a awm a tul thu a sawi bawk a ni.
Meeting chuan boruak muanawm tak hnuaia NLUP Kutpui neih a ni chu lawmawm a tih thu leh  mipuiten an hlutin hlawhtling  hle a hriat anih thu a tarlang a. NLUP Kutpui buatsaih chuan Line Department-te inkarah inlungrualna leh inpawhna tha tak siamin, thil hlawkthlak tak a ni a ti a. Line Department-te  hnathawh mipui hnena puanzarna tha tak anih thu leh NLUP Beneficiary-te pawhin an hlawkpui thu meeting-ah hian tarlan a ni bawk.
He hunah hian Line Department hrang hrang hotute hnen atangin report ngaihthlak a ni a. Inpuahchahna leh Kutpui neih laia harsatna tenau awmte sawilan niin nakin zel atana insiamthat ngaihna laite sawiho a ni a. Kutpui puala thil hralhchhuah  zat leh hmalak zel dan tur sawiho a ni bawk. NLUP Kutpui 2018-a Stall tithate hnenah NLUP Nodal Officer Pi Laldinfeli’n Cheque hlanna a nei nghal  a. Stall titha  ber chu AH&Vety Department a ni a, pahnihna chu Industries Department niin, Fisheries Department chu  pathumna a ni.

Comments