Skip to main content

SAWRKAR UISA THIAMTEN NIHNIH CHHUNGIN RUIHHLO NUAI 7 MAN

SAWRKAR UISA THIAMTEN NIHNIH CHHUNGIN RUIHHLO NUAI 7 MAN : Champhai Police-te chuan nihnih chhung lekin Champhai Town huam chhungah Ruihhlo Cheng Nuai 7 man zet an man. Champhai Police hotute hnen atanga thu dawn danin, Police leh CID (SB) tangkawpte chuan nimin-zing khan New Champhai-ah rinhlelh thila an dapna lamah Lalthluaii kum 48, Kaphnawka fanu, Aizawl Bawngkawn ni a inchhal hnen atangin Heroin Hawng 6 (Gram 176) an man a. Champhai Police Station-ah ruihhlo neitu a puh hi ND&PS Act tlawh chhanin thubuai an siam sak a ni. Ruihhlo leh a neitu a puh hi nimin khan District Court-a hruai a nih hnuah Champhai District Jail-ah dahluh nghal a ni a. Ruihhlo (Heroin) man tak hlut zawng hi tualchhung hralhna a chhutin Cheng Nuai 3 (Rs. 300000) man a ni  Nimin chawhma khan Police Petrolling chuan Springdale School piah, Zotlangah Zokhawthar atanga Champhai pana tlan, Taxi MZ04 4049 atangin heroin Hawng 3, Gram 42, tualchhung hralhnaa chhutin Cheng 1,50,000 man chu an man a, a neitu ni-a…

Champhai - Tualchhung Chanchinthar ni 17.5.2018 (ningani)

VANTLANG SIKUL - CHAWNCHHIM HSS :
Vantlang zirna In, Chawnchhim Higher Secondary School din tura hmalak mekah a tula ngte tihfel thawkhat tawh a ni.
Chawnchhim Higher Secondary School hi Champhai khawpui chhunga Higher Secindary  School indaih lohna avanga khawtlang hruaitu hrang hrangte leh tlawmngaipawl intel khawmin an din a ni a. HIgh School atanga pawl 10 passed chhuak ten Sawrkar sikul a Admission an hmuh vek theih loh avang te, veng chuan hnuai lam tana sikul panna hla lutuk vangte leh khawtlnga zirna boruak nasa zawk a awm theihna tura din a ni, Sikul hi khawtlang mipuiin an din a nih avangin khawtlang hruaitu kal khawm chuan Monthly Fee lak loh nise an ti a. Admission fee erawh Rs. 1000 a ni ang. Admission hi tunah Bethel Br. YMA in ah kalpui mek a ni a, Ziritrtu leh Staff  dang ten admission hi an buapui mek ani. Class tanna tur hmun pawh rei lote ah peih fel thuai a ni dawn a, Bethel veng huam chhungah Class hi tan tur a ni. Subject lak theihte chu ENglish, Mizo, Pol. Science leh History te a ni dawn a ni.

KHAWBUNG AH MPF SEMINAR NEI :
Mizoram People Forum, East Tuipui Constituency chuan East Tuipui bial chhunga Local Forum 25 hruaitute ko khawmin nimin khan kum 2018 a inthlanna zalen, thianghlim lehtha a awm theih nan Khawbung Zawlbuk ah ‘Political Education Seminar leh thawhhona thuthlung sawi hona’ hun an hmang.
Nimina Political Education Seminar Khawbung Zawlbuk a neih hi Rev. Lalhunliana Royte in kaihruaiin, Resource Person atan Rev. Lalrinawma hman ani a. ‘Political Party te leh Candidate te zawm tur Model Code of Conduct’ te kum 2018 a Mizoram Legislative Assembly General Election lo awm tur atana MPF leh Political Party te thawhhona thuthlung te leh MPF in inthlan an hmachhawn dan tur inzirtir a ni. Election Commission of India in Campaign a phal hun chhungin Candidate te chu ‘House to house Campaign’ phalsak an nih avangin Candidate ten house to house campaign an duh chuan Local MPF hruaituten zui a ngaih thin dawn avangin Local Forum hruaitute tan la turin an inhrilh bawk.

RUIHHLO AN MAN :
Zokhawthar panna kawng Champhai District Park pengah Champhai Police Duty ten nimin khan Zokhawthar atanga Aizawl panpui tur ni a hriat Heroun hawng 11 an man a. Ruihhlo neitu a puh mi pathumte hi ND&PS Act tlawhchhan a thubuai siam sak an ni.
Champhai Police hotute sawi danin Niangsianvungi (32) d/o Suanliana, Champhai Bethel Veng, tuna Aizawl Republic Venga khawsa ni a insawi hnen atangin Heroin Hawng 5, Gram 65.7 an man bakah Lalengmawii (31) d/o Tlanathanga, Aizawl Republic Veng ni a inchhal hnen atangin Heroin Hawng 5, Gram 64.4 an man bawk a.Ruihhlo neitu a puh te hi nizan Champhai Police Lock Up ah dah an ni ang a, vawiinah District Court a hruai an ni ang. Nimin zing vek khan Police te hian District Park pengah Lalmuanpuii (43) d/o Thangliana (L) Aizawl Muanna Veng Zuangtui a cheng nia insawi hnen atangin Heroin hawng khat, gram 13 an man bawk a. Ruihhlo neitu a puh hi nimin khan District COurt a hruai a nih hnuah Champhai District Jail ah dahluh nghal a ni. Police te Heroin man tak hlut zawng hi Champhai Tualchhung hralhna a chhutin Rs. 5,50,000 man ani.

CHAMPHAIAH NATIONAL DENGUE DAY PUALIN HUN HMAN A NI :
Nimin May Ni 16 hi National Dengue Day a ni a, hemi pual hian Champhai District Vector Borne Disease Control Programme bultumin vawiin khan I&PR Conference Hall, CHANEM Building, Champhaiah hun hman niin Zirlaite tan painting compettition buatsaih a ni.
Inkhawm tawi buatsaihah Dr R.Lianmawia, District Malaria Officer (DMO) chuan Dengue natna chu Mizoramah Kum 2012 atanga kan hmelhriat thu leh Champhai District chhungah ngei pawh a vei hmuh a nih tawh avangin fimkhura, inzirtirna tha tak neih a tul thu a sawi a. Mipuite hnenah he ni puala a zau thei ang bera zirtirna pek chu an tum a nih thu a sawi a. Dengue natna chu Malaria anga Thosi seh atanga kaichhawn theih, Thosi chi khat Aedes aegypti in a putdarh thin thu leh  Mizoramah pawh a awm ve avangin fimkhur a tul thu a sawi a. Natna kai chhawn dan leh lanchhuah dante, enkawl dan leh lo invenlawk dante a sawifiah bawk a. DMO chuan National Vector Borne Disease Control Programme (NVBDCP) kaltlangin natna chi hrang hrang 6 ah hmalak mek anih thu sawiin,  heng natnate  pudarhtu Thosi hrang hrangte chu ven angaih thu a sawi a. Thosi seh atanga natna awm thei veng tur chuan Health Department lama thawktute leh khawtlang mipuite inkarah thawhhona tha tak awm a ngaih thu a sawi bawk a. Department lam atanga tih theih chu mipuite a zau thei angbera zirtirna pek leh an mamawhte phuhruk a ni, a ti a. Dengue natna chuan enkawlna damdawi hranpa a neih loh avangin a lanchhuah dan symptom ang zela enkawlna pek thin a ni a, enkawl vata tihdam theih anih avangin a ranglama damdawi In pan vat zel tur a ni, a ti a. National Dengue Day puala kalkhawm Zirlaite chungah leh phal taka Zirlaite rawn teltirtu School Headmaster leh Principal-te chungah lawmthu a sawi bawk a ni.
He hunah hian Dr Lallawmkima, DIPRO Champhai pawhin Vector Borne Disease awmzia sawifiahna a nei a. Zirlai kalkhawmte chu an thil zir leh hmuhte midangte hnena zirtir chhawngtu ni thei turin a chah bawk a ni. Pi Lalhmingmawii, Consultant, Champhai District Vector Borne Disease Control Programme chuan he hun hi a kaihruai a. He Ni puala Painting Compettition neih dan tur leh topic sawi zauna a nei bawk a ni.
Nimin National Dengue Day pual hian High School Zirlaite tan Dengue chungchang lantirna  Lemziaka inelna buatsaih a ni a. Champhai khawpui chhunga Zirna In 8 atangin Zirlai 16 te an tel a ni.

Comments