Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai - Tualchhung Chanchinthar ni 2.5.2018 (nilaini)

KM 1 PAWH TLINGLO CHUAN MANAH RS 100 CHAWI HI MIRETHEI HMANGAIHNA A NI THEI DAWN A MI :
Nimin khan Champhai to Zokhawthar Maxi Cab Owners Welfare Committee leh Champhai to Zokhawthar Sumo Service Association te chuan Chanchinbumite kawmin Sawrkar lamin Zokhawthar khawtlang nen an buaina chungchang a chinfel hma chu Sumo tlan tir tawh lo an tum thu an sawi.
Nimin chawhnu dar 1 khan Champhai MJA Press Club-ah Champhai to Zokhawthar Maxi Cab Owner Welfare Committee leh Champhai to Zokhawthar Sumo Service Association te chuan Press Conference kovin Champhaileh Zokhawthar Sumo fare Rs 150 chu a to loh thu an sawi a. Zokhawthar Maxi Cab/Service te hian an permit in Tiau thleng a huam laiin Zokhawthar khawtlang chuan Tiau Lui thleng tlan an phal lova, an khaw chhungah passenger te Drop tir vek thin an nih thu leh passenger harsa ve tak tak te pawh Zokhawthar Sumo Counter atanga Km 1 pawh tling lo Tiau lei thleng Taxi in Rs. 100 leh Bike 125 (Foreign Bike) in Rs. 50 te an phur thlak leh thin dan atanga tehin Sumo chuan man Rs. 150 hi a to an tih loh thu an sawi a. heng Bike 125 te hian Champhai District Transport Office ah Registration an neih loh thu leh chhiah an pek ngai an hriat loh thu an sawi a. Mipuite tana a awlsam zawk nan leh Maxi Cab Service Permit in a huam tel ang ngeia Tiau Luia Sumo Counter hawn phal sak turin an phut thu an sawi bawk.
Champhai leh Zokhawthar inkar chu Zokhawthar khawtlang hruaitute ngen angin dar bithliahah tlan thin a nih avangin hun tiamah chuan Passenger an khah lo pawha an tlan chhuah tho thin avangin Rs. 150 lo chuan tihngaihna a awm loh thu leh Zokhawthar khawtlangin kawng chhiat chhuanlama Rate tisang anga an sawi chu kawng chhia chu an chhuanlam a nih ber loh thu a sawi a. Zokhawthar chu Border Trade Centre a nih avangin Champhai atanga khawdang Sumo chuan man nen khaikhin theih a nih loh thu an sawi bawk.
Champhai atanga an passenger phurh thlak mi harsa tak takte bungrua rit tak takte Zokhawthar Sumo Counter a hlan thlak hmasak phawta, man to taka Taxi leh Bike hman ngai thin chu mirethei leh harsa hmakhaw ngai intite tan chuan thil tih chi nia an hriat loh thu leh an permit in a huam ang ngeia Champhai atanga an passenger  phurhte chuan man ngai renga Tiau thlenga phurh tlang an duhna te chu dodal tawh lo se an duh thu an sawi bawk.
Chanchinbumite zawhna chhangin Champhai to Zokhawthar Maxi Cab Owners Welfare Committee leh CHamphai to Zokhawthar Sumo Service Association te chuan inbiakremna a awm hma chuan thiam chin awm lova ZOkhawthar leh Champhai inkarah an motor te tlan tir an tum loh thu an sawi a. 
Hetih lai hian nimin thleng khan ZOkhawthar khawtlang chuan Sumo chuan man tih tlem phur hian Sumo tlan turte an la dang a.Sawrkarin mipuite thlavang hauh tura a tih tur hun an nghah thu sawiin sawrkar rate ang em em ahnaiam tlan tir an phut loh thu leh Rs. 100 pawh hi MMCDA ten rate tihsan an tumna aia la sang zawk fe a nih avangin tha tawk hlea an ngaih thu an sawi bawk a. MMCDA ten rate thar an puan ang chuan Zokhawthar leh Champhai inkar Sumo chuan man hi Rs. 84 tur a nih thu leh Sawrkar rate ang chuan Rs. 56 a nih thu an sawi bawk.

HEROIN MAN HNEM :
Champhai Police Duty ten nimin chhun khan Zokhawthar kawng (Mualkawi leh Melbuk inkar) Champhai District Park  pengah Heroin Hawng 20 an man a, Heroin neitu a puh leh a phurhna lirthei pawh man nghalin, thubuai siamsak a ni. Champhai Police hotute hnen atanga thu dawn danin, nimin zing atanga khan ZOkhawthar atanga Champhai lam pan lirthei lokalte chu District Park pengah an enfiah (random checking) a. Lirthei pakhat (Maruti Car) chuan Heroin Hawng 20 (Gram 292) phurin, Heroin neitua puh Lirthei neitu leh a khalhtu Lalruatfela (27) s/o Ralliana (fam) Zokhawthar a cheng nia insawi chu man a ni. Heroin neitua puh Lalruatfela hi ND&PS Act tlawhchhana thubuai siamsak a nih bakah ruihhlo phurhna a puh lirthei pawh Champhai Police Station ah hren nghal a ni a, Heroin hlut zawng hi tualchhung hralhna a chhutin Rs. nuai 10 man a ni. Lalruatfela hi nimin khan District Count ah inlantir nghal niin, nimin vek khan Champhai District Jail ah dah luh nghal a ni.

CDFA GENERAL BODY MEETING :
Vawiin chawhma dar 11 hian Champhai District Football Association te chuan I&PR Auditorium CHANEM Building ah General Body Meeting an nei dawn a, Ist Session ah Er Lalrammawia, SE PHED in khuallian niin a hmanpui ang a, he hun hi IC Hranglura, Sr. Vice President  in a kaihruai ang a, khuallian leh CDFA President C. Hualrikhuma hnena atangin thusawi ngaihthlak a nih dawn bakah Secretary leh Finance Report ngaihthlak a ni bawk ang. Chawhnu lamah Rorel inkhawm neih a ni ang a, kum 2018-2020 chhunga CDFA hruaitu thlanna neih nghal a ni bawk ang. CDFA General Body Meeting hmanpui tur hian Mizoram Football Association atangin Lalsawma, Hony Vice President a rawn kal dawn bawk a ni.

THISEN HLU PE :
Nimin khan Champhai Zotlang Zirlai Pawl te chuan CHamphai District Hospital Blood Bank a dah turin thisen an pe.
Champhai Zotlang Zirlai Pawl te chuan an din champha vawi 9-na pualin nimin khan mamawh apiangte hman turin Champhai District Hospital Blood Bank ah thisen an pe a. Thisen hi Unit 13 pein mipa 11 leh hmeichhia 2 ten an pe a ni. Champhai Zotlang Zirlai Pawlte hian kumtin an veng chhunga zirlai ti tha te chawimawina hun an hmang thin a, kumin hian Career Guidance & Counselling Programme an lo hmang tawh bawk.

NLUP FAIR-CUM-EXIBITION - 2018 THLIRLAWKNA CHAMPHAIAH NEIH A NI :
Nimin khan Champhai DC Conference Hall, Keifangtlang-ah Bawrhsap Pu Vanlalngaihsaka hovin Champhai District NLUP Fair-cum-Exhibition Organising Committee an thukhawm.  He hunah hian District Level NLUP Fair-cum- Exibition-2018 neih dan tur chungchang thlirlawkna neih a ni. 
District Level NLUP Fair-cum-Exibition neihna hmun atan hian Kahrawt Field leh Community Hall-te chu ruat niin, a hun atan May ni 11 chu ruat a ni a. Ruahmanna hmasa a NLUP Kutpui May Ni 3-4 chhunga neih tura tih chu sawrkar programme kal lai mek Gram Swaraj Abhyaan leh Youth Summit & Road Show-te a awm avangin remchan zawknain May Ni 11-ah sawn a ni.  
NLUP Kutpui hi May Ni 11 chawhma dar 10 ah hawn  a ni anga, a duh apiang tan nilengin a dawr theih dawn a ni. Meeting-ah hian Line Department hrang hrangte chanvo sem niin  inpuahchahna tura an mamawhte pawh thehlut   tura hriattir an ni a. Fair-cum-Exhibition-ah hian Line Department ten an hnathawh dan leh an hmasawnna photo exhibition leh Video  show-te hmangin an pholan dawn bakah an hnuaia kuthnathawktuten an tharchhuah chi hrang hrangte an phochhuak ang a, hengte hi a hmunah hian man tlawm zawk za zela 20 subsidy-in  a lei theih dawn bawk a ni.  Stall tithate hnenah lawmman pek nise tiin meeting chuan a rel bawk a. NLUP Fair-cum-Exibition hlawhtling tak huaihawt anih theihna atan mipuite he Kutpui hi chhim theuh turin Organizing Committee chuan a sawm nghal bawk a ni.
Thukhawm chuan a zau thei ang bera NLUP Kutpui puanzarna neih nise tha a ti a. District chhunga VC tinte sawmna lehkha pek nise a ti a. Chanchinbu leh Cable TV lamahte a zau thei ang bera puanzar nise, heng bakah hian District chhunga remchang laiah-te NLUP Fair-cum- Exibition a tel tura sawmna Banner-te tar nise tiin a rel bawk a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Sermon

Ringtute Hi Khawvel Eng Kan Ni
Chang thlan : Matthaia 5 : 14 - 16
Eng tel lo chuan khawvela nunna neite hi an dam khawchhuak thei lo. Eng hmanga chaw siam thei chauh vek an ni. Thil, a nihna ang taka kan hmuh fiah theihnan pawh eng a ngai a, eng awm lohna ah chuan kan chetvelna pawh a buai zo vek a nih hi. Thimah chuan kawng kan hmu thei lo va, hlauhawm leh hlauhawm lo kan thliar thei lo va, kan mit kan chhawr tangkai thei hek lo. Eng tel lo chuan kan khawsa thei lo a ni
Khawvel Eng - Isua : Isua hi khawvel eng a nih thu Johana 1:9, 8:12 ah te kan hmu. Isua tel lova khawvela nun kan hman chhung chuan thimah kan cheng tihna a ni. Nuamsa takin awm mah ila, Kawng leh Thutak leh Nunna Isua kan neih loh chuan kawngbo kan ni tho. Kan hlawhtlinna te, ropuina leh hmingthatna te pawhin kan damchhung bak a daih lo. Tin, kan nunna atana tha leh tha lo pawh kan finna atangin kan teh ang a, a dik zik tluak chuang lo . Kan hlimna leh lawmna pawh hian tawp chin a nei a, lungngaihn…