Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Champhai - Tualchhung Chanchinthar ni 25.5.2018 (zirtawpni)

CHAMPHAI THALAI PAWLTE THUKHAWM :
Nimin chawhnu dar 3 khan Champhai Thalai Pawl ten Kahrawt YMA Hall-ah an thukhawm.
He thukhawmah hian Champhai Thalai Pawl hmalak dan turte ngaihtuahin hun remchang hmasa berah Champhai khawchhung Office hrang hrangte tlawh kuala an harsatna te zawh pahin thawhpuiah sawm nise, hemi pah hian mipuite tana Office hunchhung vawng dik hram hram tura ngen nghal nise an ti a. Champhai-a Political Party hrang hrangte hnenah thuneih sang (Hqrs.) nei tura ngen nise an ti bawk. 
Tin, Champhai Nature Conservancy te hmalakna Project Tlaizawng leh Champhai Zawl humhalh kawngah Champhai Thalai Pawl chuan a thlawpin hlawhtling ngei turin duhsakna a hlan a ni.

MAXI CAB NEITUTE LEH ZOKHAWTHAR INREM :
Champhai leh Zokhawthar Sumo chuan man chungchanga hun rei tak chhung Zokhawthar khawtlang leh Champhai to Zokhawthar Maxi Cab Service pawl pahnihte an inrem theih loh hnuah nimin zing khan inremna an siam fel ta.
Nimin zing khan Zokhawthar YMA Hall-ah Zokhawthar NGO hruaitute leh Champhai To Zokhawthar Maxi Cab Service pawl 2 ten rei tak chhung Champhai to Zokhawthar inkara Sumo rate chungchanga harsatna an neih chu inremna siama tihfel ani ta a, Zokhawthar khawtlang hruaitute sawi danin Zokhawthar khawtlang beiseina angin, ZOkhawthar leh Champhai inkar km 28 Sumo chuan man atan Rs. 150 ni thin chu Rs. 100 ni leh turin inremna siam a ni a. Sumo te hian dar bitukah chat chhuak tawh lovin Passengers a full an nghak thin ang a. A dang chu tunhmaa kal dan pangngai anga service tur a ni dawn a ni.
He inremna hi nimin atanga hman tan nghal a ni a, thu leh awm hma zawng chu an inremna ang hian an tlan rih dawn a, he inremnaah hian Zokhawthar khawtlang, NGO hruaitute leh Maxi Cab Service pawl 2 aiawh, mi 10 ten hming an ziak a ni.

CHAWIMAWI DAWN :
Vawiin hian MZP Hqrs. Champhai chuan zirlai ti tha chawimawina hun an hmang dawn.
Vawiin chawhma dar 9:30 hian MZP Hqrs. CHamphai chuan an huamchhunga Mizo Zirlai HSLC Distinction a pass te leh HSSLC Distinction leh 1 Division a pass te leh 100% pass School te bakah Ph.D Degree nei tharte chawimawina hun Govt. Champhai College Multipurpose Hall ah an hmang dawn a, he hun hi Vanlalawmpuii Chawngthu, Minister of State chuan khuallian niin a hmanpui ang a, TT Zothansanga, MLA Champhai North chu khualzahawm niin he hun hi a hmanpui bawk ang. He hunah hian zirlai chawimawi tur zawng zawngte leh an chhungte emaw an aiawh kal vek turin MZP Hqrs. Champhai chuan a ngen a ni.

THUPEK CHHUAH :
Champhai SP Lalthiamsanga Sailo chuan Motor Vehicle Act 1988 (act of 59 of 1988) Sections 115 leh Government of Mizoram Notification No. B. 12021/10/04-TRP Dt. 25.09.2007 in thuneihna a pek angin thupek a chhuah a, Champhai Vengthlang Chalchung Run leh Vaihmun inkar kawngpui chu Electric Veng Village COuncil ten Cement (Concrete) a an siam that dawn avang leh hna chak zawka thawh anih theih nan naktuk (26.5.2018) thleng eng motor mah kal tlang phal a ni lo.

MINISTER IN A DEPARTMENT CHAN TE TLAWH KUAL :
Nimin khan Cooperation, Sericulture leh Fisheries Department changtu Minister Pi Vanlalawmpuii Chawngthu chuan Champhaia  a Department chan DFDO Office, ARCS Office leh DSO Office te a tlawh kual a. Minister hian naktuk hian MZP Champhai buatsaiha Mizo Zirlai Titha Chawimawina hun a hmanpui zawhah Aizawl a let thla leh ang. 
District Fisheries Office a tlawhnaah hian DFDO Pi Lucy Lalrinpuii leh a thawhpui ten an lo dawngsawnga. An harsatnate a enpuiin Sangha Dil, Feed Mill leh Godownte a tlawh nghal bawk a ni.
Hemi hnu hian ARCS Office tlawh lehin an harsatnate a hnenah an lo thlen a, theihtawp chhuaha hma a lakpui tur thu leh Champhai chu Society chakna hmun anih angin mipuite tan theihtawp chhuah a hna thawk zel turin a fuih bawk a ni. 
Pi Vanlalawmpuii Chawngthu chuan DSO Office, Champhai pawh  tlawhin Pu Lalchhuana DSO leh staff ten an lo dawngsawnga. He hunah  hian Integrated Muga Silk Development Project (IMSDP) hnuaia Beneficiaries mi 22 te hnenah hmanrua a sem nghal a ni. 
Minister hi  Pu Thlamuana, Secretary Fisheries Department ;  Pu Vanlalduhsaka, Secretary, Sericulture Department ; Pu Lalhmangaiha, Director, Fisheries Department, Pu Lalrozauva, Director, Sericulture Department leh Official dang ten an  tawiawm a ni.

Comments