Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai - Tualchhung Chanchinthar ni 9.5.2018 (nilaini)

CHAMPHAI POLICE TEN RUIHHLO LEH RANGKACHAK MAN :
Zokhawthar panna kawnga CHamphai Police Duty ten nizan hmasa thimhlim khan Heroin hawng khat leh a neitu a puh an man bakah ZOkhawthar atanga Aizawl pan tur Maxicab pakhat atangin Rangkachak Kg 9.964 an man a. Rangkachak neitu hi Police te chuan an chhui zui mek.
Zokhawthar panna kawng, Champhai District Park peng a Champhai Police Duty ten lirthei an enfiahna lamah lirthei pakhat a chuang Zohmangaiha kum 39 s/o C. Vanlalngena, Ngur khua inti hnen atangin Heroin hawng khat, Gram 15 an man a. Zohmangaiha hi ND&PS Act tlawhchhana thubuai siamsak a niin, nimin khan District Court ah inlan tir a nih hnuin Champhai District Jail ah dahluh a ni.
Police Duty te hian nizan hmasa vek khan ZOkhawthar atanga Aizawl kal tur Maxicab khalhtu Kaphnuna kum 28 s/o PC Lalzuiliana Champhai Vengsang inti hnen atangin Rangkachak kg 9.964 chu Police te hian an man a. Thudawn danin Maxicab khalhtu Kaphnuna hian he rangkachak hi Excavator part Aizawl a dah turin Zokhawthar a mi pakhatin a thawn a nih thu leh rangkachak a ni tih a hriat loh thu Police te hnenah a sawi a. Rangkachak neitu hi Poice te chuan chhui nghalin, Nizan hmasa khan he Maxi cab khalhtu hnena thawntu mi pakhat chu man nghal a nih bakah he rangkachak a inhnamhnawihte thuk zawk a chhui zui mek anih thu Champhai Police hotute hnen atangin dawn a ni a. Hnuchhui hna hi zawhfel a nih hunah Champhai Dustoms Preventive Force kutah hlan a nih tur thu Police hotute hnen atangin dawn tel a ni bawk. Rangkachak man tak hlut zawng hi tualchhung hlutna a chhutin Rs. nuai 3,12,37,140 man a ni.

HMUN 2 A LIRTHEI CHESUALAH MI 2 BORAL :
Nimin chawhm lan k han Dulte khawdaia ritphur lirthei dokan chu a kamkanna (jack) a tluk palh avangin, he lirthei siampuitu Driver Lalnunzira kum 31 s/0 Lalnghaka (L) Champhai Kanan Veng chu lirthei let thut hian a delh a, ka pawh chhawn loin a hmunah aboral nghal.
Thudawn danin, kawng lakah ritphur lirthei chhia hi siam mek a ni a, he lirthei kianga ding ritphur lirthei Pu Zathanga, Champhai ta, a khaltu Lalnunzira chuan bengvar chuahin a siampui a. Lirthei dokanna tlu thut chuan lirthei hnuaia awm mek Lalnunzira chu a delh ta a ni. A ruang hi Dulte khawtlangin an hlawm a, tih tur tul angte tihfel a nih hnuah Champhai panpui a ni. Lalnunzira hian a nupui leh a fa pakhat a kalsan a ni.
Hetihlai hian nimin zing dar 6 vel khan Vanzau ram chhung (Veivek) mualah Sumo a chesual a. Dungtlang khua Pi Zaliankimi kum 61 chu a hmunah ka chhawn loin a boral a, hliam na zual deuh 4 an awm bawk. He motor hi Lalhmingmawia s/o Upa Sangnghinglova, Zawngtetui ruang zui a kal niin thu dawn a ni. Hliam na zual deuhte hi Khawbung pHC atangin Aizawl lam panpui tura ruahman ani tih thudawnna chuan a sawi.

NHM HNUAIAH ASHA TRAINING :
Nimin khan Health & Family Welfare Department hnuaia National Health Mission buatsaihin ASHA Refresher training May 8-18, 2018 chhunga neih tur chu Dr. Lalrozama IAS, Mission Director NHM chuan I&PR Auditorium CHANEM Building Champhaiah a hawng.
Dr.Lalrozama IAS chuan National Health Misson kaltlanga Central atanga pawisa an hmuh  za zela 85 chu hnathawktute hlawha sem chhuah anih avangin hnathawhna tur sum a awm theih loh thu a sawi a. Hemi anih avang hian sawrkar laipui chuan hnathawktu za zela 50 te ban tura an tih thu sawiin, hna thawk tha lo leh chhawr tlak lohte chu ban an nih zel tur thu a sawi a.
NHM Director chuan Mizoram chu NHM hnuaia thawk tha berte zing ami anih laiin thawh that lantirna report a luh that loh avangin hnathawh tam zawkte hriat a ni lo fova, kawng hrang hrangah harsatna kan tawh phah thin a ni, a ti a. Sawrkar laipuia thehluh report dik lo leh report kimlo te'n nghawng tha lo a neih thin avangin a hun takah a dik tak report pek thin tur a ni, a ti bawk. NHM hnuai thawktute chu mahni hnathawhah chiang tura chahin,  sawrkarin scheme leh programme a duante reng reng chu mipuite ta tur a ni a, a nei tu tur dik tak nilo ten hamthatna chan ve an tum thin avangin hnathawh a chak thei lo a ni, a ti. Training chhim tura lokalte chu training hlawkthlak tak neia chhawr tangkai turin duhsakna a hlan a ni.
ASHA Refresher training hawnna hi Dr.Vanlalnghaki CMO Champhai chuan a kaihruai a. He hunah hian Dr. Hmingthanmawii SPO, RCH pawhin thusawiin ASHA-te hi khawtlang hriselna kawnga thawhhlawk berte zing a mi an ni, a ti a. Nausen hrisel taka an thanlen theihna tur te, Nu-in nau tha taka an paia, dam taka an hrin chhuah theihna tur te, Damdawi In ngeia nau an neih theihna tura nute hrilh hriat hi ASHA-te mawhphurna a ni, a ti a. ASHA kalkhawmte chu Naupai zawng zawngte  chhinchhiaha, an nau neih hun tur thlenga hriatpuina record fel tak vawng turin a chah a ni.  
Dr. R Lalchhuana SNO, pawhin thusawiin ASHA te chu mipuite leh sawrkar inkara hnathawktu pawimawh tak an nih thu a sawi ve bawk. Chawhnu lamah training tan nghal niin ASHA te hnathawh tur leh hriat tur pawimawh te, Raipuar test dan tur te, NU nei tura inbuatsaih dan te, Naupang leh Nu hriselna te, Home visit neih dan tur te leh Nau neih hnua inenkawl dante zirtir an ni a. Pi C. Lalthanzami State ASHA trainers, Pi C. Lalchungnungi District Trainers leh Pi C. Lalramengi, DPM District Trainers-ten zurtirna an pe a ni. Tun dinhmunah  Champhai District chhungah ASHA mi 122   an awm mek a ni.

INFIAMMITE HNENAH PAWISA SEM :
Nimin khan Sports and Youth Services (SYS) Department bultumin Govt Champhai College Multipurpose Hall-ah Champhai District chhunga Infiammi hmingtha kum 2016 atanga 2018 inkara chetha, chawimawiphute hnenah Sports Incentive Cash Award sem chhuah a ni.  He hunah hian Pu TT Zothansanga, Champhai North bialtu MLA chu khuallian a ni.
Pu TT Zothansanga chuan mahni inthununna leh taksa hriselna ngaihpawimawh chu infiamna khawvela hlawhtlinna thuruk anih thu a sawi a. Champhai district chhungah ruihhlo avanga thalai tam tak an buai kar a, thalai sawmli lai infiamna lama hmingtha chawimawi tlak an awm chu chhuanawm a tih thu a sawi a. Sports Incentive Cash Award chu sawrkar lam atanga hriatpuina anih thu leh hlawhtlinna tak tak zawk chu infiammite thinlunga hlawhtlinna anih thu a sawi a. Champhai District chu thiamna leh theihna nei anih avangin zawnchhuah kawngah tan lak angai a ni, a ti a. Sports Minister viak tha tak hmalakna zarah Mizoramah hmasawnna hrang hrang a thlen thu leh Champhaiah ngei pawn hmuh theih a awm thu a sawi a. Infiamna chu eizawnna tlak anih thu sawiin, mite hriat hlawhna chu tlakchhiatpui lova, hmalam pan tura fuih phurtu ni thei se a duh thu a sawi a. Tunlai chhanah  khawvel hmuh theiha ram leh hnam tarchhuaka pholang theitu chu Infiamna muala inelna hi a ni, a ti a. Champhai District chhunga Sports association hrang hrang leh hruaitute hmalakna chu fakawm a tih thu a sawi a. District leh Mizoram tihmingthatu Infiammi kalkhawmte chu an kalzelna turah duhsakna a hlan nghal a ni.
Pu Vanlalngaihsaka, Champhai DC pawhin thusawiin District chhunga Infiammi   40 laiin Sawrkar hriatpuina leh lawmpuina Sports  Incentive Cash Award an dawng thei chu a lawmpui thu a sawi a. Champhai District chhungah National level mai piah lamah Internationeal level thlenga lawmman la pha an awm chu chhuanawm a ti a. Infiamna chawinung kawnga Sports Minister, Department leh District lama thawktute hmalakna chu fakawm  a tih thu a sawi bawk a ni.
Nimin a Sports  Incentive  Cash Award semchhuah hi Infiamna discipline hrang hrang 6 atangin infiammi 40 te hnenah pekchhuak a ni a. Avaiin cheng cheng nuai sawm sing sarih leh sangnga semchhuah a ni. Kum 2016 atanga 2018 inkar khan Champhai District chhunga infiammiten National leh Internatioanal level-a an fehchhuahnaah Mizoram State tan  medal 55 lai an hlawhchhuak a ni.
Programme hi Pu C. Rochungnunga, Superintendent, SYS Department-in a kaihruai a. Pu C.Lallianpuia, Chairman, Champhai District Sports Committee pawhin thusawina hun a nei a. Pu Lalbulliana, Champhai District Sports & Youth Officer (DSYO) in lawmthu sawina neiin  hun a khar a ni.
Tun dinhmunah Champhai District Sports Committee hnuaiah hian Sports Association 27 an in ziaklut mek a. Vawiina Sports Incentive Cash Award dawngtute hi sports discipline hrang hrang 6; Football-16, Karate-10, Boxing-5, Hockey-5, Kickboxing-2 leh Weightlifting-2 atangtein an ni.

DISASTER REDUCTION WEEK HAWNG :
May Ni 8 tanga Ni 11 chhung hian Disaster Manamagement & Rehabilitation Department leh Champhai District Disaster Management  Authority tangkawp buatsaihin Champhaiah Disaster Reduction Week hman tur a ni a. A hawnna hun hi nimin khan Champhai Town Hall, Vengthlangah neih niin, Pu Vanlalngaihsaka  Champhai DC chuan Disaster Reduction Week hi a hawng a ni.
Champhai  District Bawrhsap chuan khuarel chhiatrupna lo thleng thinte chu mihring dan theih loh tupawhin kan tuar vek theih thil a ni, a ti a. Chiatna thleng thei laka lo inhmakhua a, chhiatna tam zawk thleng zel tur ven chu a pawimawh thu a sawi a. Training chu mipui nawlpui thlengpha leh huapzo ni thei se a duh thu a sawi bawk a. Champhai District chhunga  sawrkar department tinte chu an mahni puala Disaster Management  Plan siam tur leh a siam tawhte pawh ennawn leh fo thin turin a chah a. Sawrkar laipui pawhin khuarel chhiatrupna laka lo invenlawk dan leh a thlen hnu lama chet lak dan inzirtirna a ngaihpawimawh  thu a sawi bawk a ni. Kalhawmte chu training tha tak neia, a taka chhawrtangkaitu ni turin duhsakna a hlan a ni.
Pu H.Dolianbuaia, Director, DM&R pawhin thusawiin khuarel chhiatna laka hmalakna leh inzirtirna  chu mitinte mawhphurhn, Department mal khai chauha tanlakna tur anih loh thu a sawi a. Disaster Reduction Week tum ber chu chhiatna lo thlen thulh pawha a tihziaawm dan leh enkawl zui zelna lam anih thu a sawi a. Tun hnai maia Mega Mock Drill neih anih dan tarlanna a nei a, inbiakpawhna lama  hmathar lak a tul thu a sawi a. Disaster Management & Rehabilitation Department hmalakna leh hmachhawpte a sawi bawk  a. Disaster Reduction Week hman anih theihna tura District level-a thathawhtute chungah lawmthu a sawi bawk a ni.
Hawnna programme-ah hian Pu Zothansanga Hmar, District Organiser, DM&R chuan Disaster Reduction Week chhunga hun hman dan tur duan chhin tlangpui a sawifiah a. Pu PC Zoramthara, District Disaster Management Co-ordinator Champhai chuan lawmthu sawina neiin hun a khar a ni.
Hun hnihna neih chhunzawm a ni a, he hunah hian mithiam bikte hnen atangin zirtirna ngaihthlak a ni a. Dr Lalrokima Chenkual, Asst Director (Trg) hnen atangin ‘Introduction to Disaster Risk Reduction’ tih leh ‘Vulnerability of Mizoram to various hazards’ tih thupui hmangtea zirtirna ngaihthlak a ni a. Zawhna leh chhanna hunte neih zui a ni bawk.
Programme hi vawiin  lamah chhunzawm leh tur niin May ni 11 thleng neih  tur a ruahman a ni a. He hun hmang tur hian  Sawrkar Department hotute, NGO, School zirtirtu, Adventure Club leh khawtlang hruaitute an tel a ni. 

JUBILEE LAWM :
Champhai Kanan Branch KTP te chuan nizan hmasa atang khan Diamond Jubilee lawmna hun an hmang tan.
Jubilee thupui atan hian ‘Ngaihdamna’ tih hman ani a, Kanan Presbyterian Kohhran Biak Inah a lawmna hi neih a ni. Nizan hmasa khan Jubilee mei an det hnuah Jubilee hawnna inkhawm an nei a. Souvenir tlangzarh a ni. Nimin zing khan SPort hawnna an neih bakah nimin lamah hmunhlui fan leh tawngtai bethel in hun an hmang a. Nizan khan hruaitu hlui puala inkhawm buatsaih in zaninah fakna inkhawm an hmang ang. Ningani zanah Colourful night an hmang ang a, Zirtawpni ah Monument hawn leh Jubilee dar vuak neiin hemi ni hian ruai theh a ni ang a, zanah Jubilee Concert an nei leh dawn a ni. Diamond Jubilee lawmna hian Pathianni zan thleng a awh ang.

Comments