Skip to main content

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

Champhai Tualchhun Chanchinthar ni 18.6.2018 (thawhtanni)

RUAHSUR AVANGA CHHIATNA :
Kar hmasa Ningani leh Zirtawpni ruah sur avang khan Champhai khawpui chhungah chhiatna hrang hrang a thleng nual a, hriat theih china chhiatna thlengte :
1. Pu Topuia Tochhawng IB veng, a in bul a min a, leimin hian a in chu tih chhiat anei lo va, kawngkal a awm avangin a min belh zel tur ven nan silpaulin pek an ni.
2. Pu Muana Hangsing Kanan veng chu a ram in la sak lohna a min a, leimin hian a thenawm te in luhna tlemin a khoih tel deuh a. A thlang Kanan veng field panna leivungin a hnawh a, PWD hriattir tawh an ni.
3. Kanan veng to Electric veng inkal pawhna Sapsakei lamlian ni 13.6.2018 a min chu a min belh a, kawng hi a hnawh ping a, a bul hnaia cheng Pu Hrangthanzama chhungkaw member pathum (3) te chu engemaw palhah an inthiar chhuak a. Kawngping hi PWD EE hrilh tawh a, clear thuai tum a ni.
4. Tuipui leh Champhai inkar ah kawng block a awm a, tunah chuan clear fel a ni tawh.
5. Kanan veng hman kuma min nasa tak kha vawiin ruah sur avangin a min leh a, min nasa lutuk chu a ni lo.
6. Chawngthuama hmunhmeltha a kawmthlang min. An ekin khur a chim tel silpaulin pek an ni bawk. 
7. BDO champhai lam atangin Zote leh Mualkawi ah retaining wall chim leh leimin awm bawk a. Silpaulin a lo pe bawk e.

BRANCH HRANG HRANGIN YMA DAY HMANG :
Kar hmasa Zirtawpni khan Mizoram hmun dang rualin Champhai khawpui chhunga Branch YMA hrang hrangte chuan YMA Day pualin hun an hmang a, ruahsur avangin Branch hrang hrangte chuan an tum angin hun hmang thei lo mahse, he ni pual hian an theih dan ang angin hun hman a ni.
Champhai Zotlang chuan YMA Day pual hian tanpui ngaite puala hun hmangin an huamchhunga chhungkaw 2 te chu Rs. 5000 ve ve an pek bakah Zirlai pakhat College Admission tihna tur Rs. 6500 an tum sak bawk a. Chhun lamah YMA Chhangte intihhlimna neiin hun an hmang bawk.
Bethel, Vengthar leh Zion Veng Branch YMA te chuan YMA Day pual hian lungrual ni hmangin Bethel Branch YMA atang lo indang tawh Branch te hian a huhoin hun an hmang a, chhun lamah indoor leh outdoor item hmangin intihhlimna an ngei a, zan lamah hmang chhunzawmin SYMA Champhai Secretary PC Lalrawnliana`n a hmanpui a ni.
Vengsang Branch YMA te chuan YMA Day pual hian ni 12 atang khan hun hmang tanin YMA Chhang pualin hun an hmang a. Ningani zan khan hranghlui nite hmangin YMA Day khan Leimin hlauhawm Section Kudam thiatin hnatlang an nei a. Champhai District Hospital a thawktu leh dam lo te tan ei tur an pe bawk. Zam lamah chawngchen zan an hmang bawk a. SYMA Champhai Asst. Secretary R. Lallawmzuala’n a hmanpui a ni.
Vengthlang North Branch te chuan YMA Day khan Sports a hun hmangin tlaiah ruai an theh a, zanah Govt. Champhai College Multipurpose Hall ah kumpuan hawnna leh Members Meeting an nei zui leh a ni.
Kanan Branch YMA te chuan chhun lamah an Branch huamchhung tifaiin hnatlang an nei a. YMA Member ten buhfai leh pawisa keng khawmin vengchhunga tanpui ngaite an tanpui bawk.
Kahrawt Branch YMA chuan ningani khan Champhai District Poor Fund Rs. 6500 hlanin MZ Home TNT ah Rs. 6500 bawk an hlan a. YMA Day zanah Kahrawt Community Hall ah hun an hmang chhunzawm a. Section hrang hrangten lengkhawm zai intihsiakna an nei a. Concert an nei chhunzawm nghal bawk.
Ruantlang Branch YMA te chuan YMA Day pual  hian YMA Park ah thingphun hnatlang an nei a, zan lamah YMA Hall ah Variety Programme in hun an hmang a, YMA thuthleng tur Section hrang hrang ten an siam leh kum chanve Budget lakkhawmna hun an hmang bawk.
Vengthlang Branch YMA te chuan Beijing Bend-ah Sports a hun hmangin Mizo infiamna chi hrang hrang hmangin intihsiakna an nei a. Kumpuan hawnna neiin R. Vanlalena. Addl. District & Session Judge leh C. Vanlalpeka te hnenah chawimawina thilpek an hlan bawk.
Zote Branch YMA chuan chawhma lamah Sports hun leh Section Budget lakkhawmin hun an hmang.
Hmunhmeltha Branch YMA te chuan zingah Section hrang hrangten mahni huamchhung tifaiin hnatlang an nei bawk.

INDIA AIAWH DAWN :
Ulaanbaatar International Boxing Tournament, Ulaanbaatar, Mongolia a naktuk ni 19.6.2018 (Thawhlehni) atanga karleh Thawhtanni 25.6.2018 thleng neih turah Indai aiawhin Tuipui Boxer tha HC Johnkenty Vanhlimpuia (22) chu Middleweight (75kgs) ah a inhnek ang. Johnkenty telna India Team hian nimin khan Tokyo, Japan panin heta tang hian Mongolia an pan leh dawn a ni.

DAWR DUNGAH THINGPHUN :
Champhai Nature Conservancy chuan Vengthlang Dawr dung chei hna an thawk tan ta. Dawr dung thlaa Railing ah CNC te hian hnim hring daha a remchanna laiah thing an phun a, Dawr Veng Welfare Committee te nen inbiakna neiin an thawkho a ni. A chei leh a enkawl hna hi CNC hian thawkin Welfare hian a tul angin an tawiawm thin dawn a ni. Hnim leh thing hmanga Champhai khawpui chhung lunlai chei hna hi Inrinni zan atang khan an thawk tan nghal a ni.

NUPUI VAWHLUM :
Kar hmasa Ningani zan dar 6 leh 7 inkar vel khan Vungkhupchingi d/o Vialkhanlama, Vengthar chu a pasal VL Kama (62) s/o Zuangoa chuan a vawhlum.
Ningani zan dar 6 leh 7 inkarah khan VL Kama hi Ina a haw chu a nupui thutthlenga chatthla leh a thiante an ina zu in a hmuh chuan thikin a nupui thutthlenga chatthla chu chhuatah pawt thlain a rem lai laiah a vua a. An inah hian current a luh loh avangin a vuakna lai pawh hre lovin a vaw ta chiam niin a insawi a. Zirtawpni zing dar 7 vel khan a nupui Vungkhupchingi hi a thi tih an hre chauh a, a thih chhan ber nia lang chu a bek leh a lu vela a vuakna chu niin Police lam chuan an sawi a ni. A nupui vawhlumtu VL Kama hi Case 68, IPC Sec 302 na hmangin tualthah thubuai siamsak a ni a. Zirtawpni vek khan District Jail ah dah luh nghal a ni.

FUR ZIKHLUM :
Kar hmasa khan Mission Integrated Horticulture Development (MIHD) hnuaia Samthang Farmers Association ten Fur Zikhlum an chin chu East Tuipui Bialtu MLA T. Sangkunga’n a hmunah tlawhin an hmalak dan a enpui. Bialtu  MLA chuan zikhlum phurhna leh hralh chhuahna tur tangkai tam tak, kawng chei thatna thlengin hmalak a nih tur thu a sawi a. Samthang Farmers Association ah hian chhungkaw 104 awmin kumin hian nikum lama an chin let zikhlum tiak bul nuai 8 vel an phun a. A hralh chhuahna lamah harsatna an tawh thin avangin a hun indawtin an phun a ni. Sik leh Sa lamah harsatna a awm loh chuan Quintal 6000 - 8000 vel kumin hian thar theih an in beisei a ni.

Comments