Skip to main content

CHAMPHAI ṬHALAI PAWL THUCHHUAH

CHAMPHAI ṬHALAI PAWL THUCHHUAH :
Champhai Ṭhalai Pawl ten Champhai Damdawiin Solar Plant chhia siam tha tura Mizoram Sawrkar vawi li lai a ngen hnuah an lehkha No. B. 11013/99/2012/SOLAR/DHME (PP) 252 a chhanna kan hmu hi kan lawm hle a.

Champhai Damdawiin Solar Plant siam that nan hian Zoram Energy Development Agency (ZEDA) hnenah a sum mamawh zat tur ruahmanna siam tirin Champhai Damdawiin Solar Plant siam that nan sum tam tak sen ngai lova Rs. 3,30,792 chauh sen a ngai lehzel tih ZEDA lehkha No.T.11082/01/2018-ZEDA in Mizoram Sawrkar an hriattir leh hi lawmawm kan ti takzet a.

Champhai Ṭhalai Pawl chuan August thla chhunga siamtha ngei turin Mizoram Sawrkar hnuaia Hospital & Medical Education, Aizawl chu a phutin a ngen tak meuh meuh a. Champhai Ṭhalai Pawl    huntiam August thla chhunga hmalakna a hmulo a nih chuan Champhai Ṭhalai Pawl chuan a remhriat angin hma ala dawn a. Engpawh lo thlengse Champhai Ṭhalai Pawl in mawh a phur lo ang.

Tin, Trauma sak mek Sawrkarin nikum 2018…

Champhai - Tualchhung Chanchinthar ni 1.6.2018 (zirtawpni)

WORLD NO TOBACCO DAY :
Nimin khan Khawvel hmung dang rualin Champhaiah pawh World No Tobacco Day hman a ni a. Champhaiah chuan World No Tobacco Day hi Champhai District Hospital OPD ah hman niin kumin World No Tobacco Day thupui atan hian ‘Lungnatna leh Tobacco’ tih hman a ni.
He hun hi Champhai District Hospital Medical Superintendent Dr Zatluanga chuan kaihhruaiin Hriselna chungchanga inzirtirna hian tawpin tai a nei thei lo va, kan la inzirtir zel a ngai a, kan taksa hriselna tur hian Doctor te hi a mawhphurtu ber an ni lo va mipuite hi a mawhphurtu ber kan nih avangin kan hriselna athat theihna turin ei leh in kawngah te kan fimkhur a tul hle a ni a ti.
Dr J Lalramchhuanga MD Medicine chuan thusawiin kan thih hun tur hi Pathian thu nimahse dam reng chunga sia kan nat lohna tur leh hrisel taka kan awm theina turin zuk leh hmuam kan sim a ngai ni a ti. Zuk leh hmuam sim chu thil zawng zawng zinga sim hlawk ber anih thu sawiin nak vak hnu leh kan thih dawn khera seim lovin a hun lai taka sim mai chu a finthlak thu a sawi bawk.
Mizote zingah lungnatna nei kan tam em em a, lung natna nei si mahni inhre lo tam tak kan awm bawk a, khawvel pumah kum tin mi maktaduai 7 chuangin lungnatna kan thihpui a ni a ti a. Lung natna hi zuk leh hmuam nena inzawm tlat a ni a, vaihloa tur awmte hi kan thisenah lutin kan lung a thlengin a kal a, chu chuan thisen kal kual vel tur hnawhphuiin natna hlauhawm tak a rawn siam ta thin a ni a ti a, lungnatna kan vei lohna turin mitinin tihtur kan neih chu kan lung tana tha lo thil kan taksaa lak luh loh mai hi a ni a ti bawk.
Hmanlai kan pi leh pute chuan mei zu turin an inzirtir thin mahse tunah chuan zuk leh hmuam tih hi mi an lohna a ni tawh zawk thu sawiin zuk leh hmuam tite chu mite tan hnawksak an nih bakah dan bawhchhiatna a ni tawh thu pawh tarlangin mei zu ngai lo te bula zial kan zuk hian miin boruak thianghlim hip theihna chanvo a neih kan bawhchhiat sak tihna a ni a ti a, mei zial kan zuk vang ngawtin mi chakvo kan tihchhiat sak ngawt thiang lo a ti bawk.
Doctor lem chungchanga fimkhur tul thu pawh tarlangin zirthiamna nei lo te kan pan fo hian kawng tam taka harsatna kan tawh phah thin ani a ti a, kum tam tak zira thiamna neite ring ngam tur leh thiamna nei lo inti doctor te rawn loh ngam turin muipuite a chah a, Hospital thawktute chu mipuite tana awm a ni tih hre renga hriselna chungchanga rawn vat zel turin a chah bawk.
Pu Zosangzela, Champhai District Consultant DTCC hnen atangin report ngaihthlak a ni a Kum 2018 April thla atangin Champhai District ah ATS te hian Squad Drive vawi 21 an nei tawh a, Vaihlo leh a kaihhnawih chungchanga training vawi 1, Dan lam inzirtirna vawi 1 an nei tawh bakah School 27 ah hun hman a ni tawh bawk. Kum 2015 July thla atanga vawiin thlengin mi 1000 chuang counselling pek tawh niin chung zinga 28%-35% te chuan vaihlo leh a kaihhnawih an sim tawh thu a tarlang bawk. He hunah hian Dr Thangsailova pawhin thusawiin Pu Zaihmingthanga Champhai District ATS member chuan lawmthu sawiin he hun hi a khar a ni.
Programme hman zawh hian a thlawna inentirna hun hawn nghal niin Damdawi a thlawna sem a ni bawk. World No Tobacco Day pual hian Champhai District Anti Tobacco Squad bul tumin Pinehill Adventist Academy-ah pawh hun hman a ni bawk.

HEROIN MAN LEH TAWH :
Nizan hmasa khan Champhai Police te chuan Heroin leh a neitu nia rin an man.
Champhai Khankawn Police Check Gate a duty-ten nizan hmasa khan Champhai leh Aizawl inkar a tlan khualzin phur lirthei (Maxicab) pakhat a chuang hnen atangin Heroin Hawng 2 (Gram 24.7) an man a. Heroin neitu a puh hmeichhe pakhat chu ND&PS Act tlawh chhanin thubuai siamsak a ni.
Champhai Police hotute sawi danin, HS Thangpuii (46) D/o Vanlalchhawna Champhai Zotlang, tuna Aizawl Lungverh a cheng ni a insawi hnen atangin Heroin Hawng 2 (Gram 24.7) hi man a ni a. Heroin (man tak) hlut zawng hi tualchhung hralhna a chhutin, Rs 100000.00 (Cheng Nuai khat) man a ni.
Ruihhlo neitua puh HS Thangpuii hi nizan hmasa khan Champhai Police Station-ah tantir a niin, nimin khan District Court-a hruai a nih hnuah Champhai District Jail-ah dahluh a ni.
Champhai Police hotute sawi danin, tunhnaiah Champhai leh a chheh vela Heroin thahnem tak man anih vang leh Police leh Excise & Narcotics Squad-ten ngawrh taka chet an lak vangin ramri kana ruihhlo lo lut thin pawh a tlem phah hle a ni.

FAINA INZIRTIR :
Nimin khan UD&PA Department Champhai buatsaihin Swachh Bharat Mission (Urban) hmalakna hnuaiah faina kawnga inzirtirna Street Play, Champhai Bethel Kawn, Vengthlang Bazar leh Dawrkai Kawnahte chan a ni. 
Street play hi chi thum chan niin naupangte leh nu leh pa te zirtir thei lemchan awmze nei leh hmuhnawm tak takte chan a ni a. UD&PA Champhai hian faina turin nasa takin hma an la mek zel a, inzirtirna leh inhrilhhriatna kawng hrang hrangin an kalpui mek zel a ni.

HOUSING LOAN :
PMAY-HFA (Urban) hnuaia EWS/LIG/MIG te tan Credit Linked Subsidy Scheme (CLSS) kaltlanga Home/Housing Loan dil duhte tan tun thla chhung hian hawn a ni leh dawn a. A dil duhte chuan UD&PA Office, CHANEM Top Floor-ah office hun chhungin ngaihven theih a ni e. A dilna form lakchhuah leh submit hun chhung hi June thla chhung a ni.

LAWM DAWN :
Vawiin hian Champhai District Football Association chuan District Football Association tha ber an nih lawmna hun an hmang dawn. Mizoram Football Association in Award a siam thar MFA hnuaia District Football Association tha ber Award chu Champhai Distirct hnena MFA in hlan chu vawiin chawhnu dar 3 hian a lawmna hun I&PR Auditorium CHANEM Building-ah hman a ni dawn a, he hun hi Pu Vanlalngaihsaka, Champhai DC chuan khuallian niin a hmanpui ang.

TRAINING NEI DAWN :
Vawiin hian Champhai District Legal Services Authority bul tumin Sub-Hqrts YMA Hall, Tlangrawt-ah Para Legal Volunteers Training a buatsaih dawn a, he hunah hian dan lama mithiam bik ten dan leh hrai lama zirtirna an pe anga. Para Legal Volunteers hi Champhai District-ah hian mi 40 chuang kan nei a, anni hi dan lam a hriatloh nei te tan an chenna veng leh khuaah te sum leh pai sen ngai miah lova, a thlawna rawn theihin an awm reng a, dan lama mipui te harsatna tawh ah pui tur in an awm reng a ni. Tin, Para Legal Volunteers (PLV) te hian an awmna hmun hrang hrang ah dan lama mipui te tanpui turin clinic an nei bawk thin a ni.

Comments