Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai Tualchhung Chanchinthar ni 13.6.2018 (nilaini)

THUPEK KENGKAWH TURA PHUT :
Champhai Nature Conservency chuan thuchhuah hetiang hian an siam : Deputy Commissioner, Champhai District in 19 february 2018 a Champhai leilet zawl Agricultural land (Agricultural LSC, Periodic patta leh Garden pass) a Kudam leh Chenna in sak thiat tur leh sak khapna order a lo chhuah tawh chu huntiam hnuhnung leh insawifiahna hun pek a ral hnuah pawh thupek zawma thiat an awm lo hi pawi kan tiin kan dem takzet a. He thupek kenkawh dan hian Champhai awm zel dan tur thui tak a hril avangin Thupek chhuahtu Deputy Commissioner leh thupek bawhzui tura din Task Force te hian khauh tak leh huaisen taka thupek hi kengkawh turin kan phut a, huntiam a ral tawh avangin thupek zawm lo te chungah dan anga action la turin kan phut tlat a ni.

CHAMPHAI POLICE TEN RUIHHLO MAN TAM :
January atanga June thla chhungin Champhai District Police ten ND&PS Act tlawhchhan a thubuai 33 an ziahluh ah Heroin Gram 2687.9 leh Ganja Kg 82.6 an man.
Ruihhlo an man zawng zawng hlut zawng hi tualchhung hralhna a chhutin Rs. 1,05,95,000 man a ni a, nikum chhung khan Heroin Kg 4.527 an man tih nimina POlice In-Service Training neihna Champhai POlice Station ah hian tarlan a ni. Ni 3 chhung awh tur POlice te intuai tharna, First Quarter Police In Service Training, Police Station Management Reward & Punishment, Leave and Rules, Preparation of Pension Paper tih thupui hmanga neih hi Champhai SDPO C. Lalbiaksiami`n kaihruaiin Champhai District SP Charge la mektu Addl. SP Lalbiakkila chuan Police ten ram leh khawtlang tana hna thawhna ah intuai thar reng ngai a ni tih tarlangin, mipui rintlak leh innghahna ni zel turin tha leh zuala mahni hna theuh thawh a tul tih a sawi a. Police te chu an hnatheuh thahnemngai leh rinawm taka thawk turin a fuih a ni.
Police te intuaitharna hun neih mekah hian Champhai District chhung Police Station hrang hrang (Champhai, Khawzawl, Zokhawthar, Ngopa, SP Office bakah Dungtlang leh Farkawn Out Post) a Police Officer te an tel kim a ni.

CHAMPHAI AH ZIAK LEH CHHIAR THIAM THAR 40 :
Nimin khan SSA Champhai Block huam chhunga Primary leh Middle School a Mid Day Meal incharge zirtirtute tan SSA BRC Hallah Training neih a ni.
He hun hi C. Ralkapzauva, BRCC chuan kaihruaiin Resource Person C. Lalbiakzauva, DEO chuan Samagra Shiksha Abhyan chungchang zirtirna a pe a. Samagra Shiksha Abhyan chu huamkim emaw huapzo zirna beihpui tihna a nih thu a sawi a. RMSA, SSA, Teacher Education hi tum thuhmun ni theuh si, mahni te tea kal an nia, hmun khatah chhung khawmin kan ramah Quality Education hlenchhuah a nih theih nan Pre Primary atanga Higher Secondary thlenga zirna leh zirtirtute training na chu integrated scheme pakhat hnuaiah hian a awm tawh a ni, a ti. He hunah hian School 70 atanga aiawh kal tura beisei School 67 aiawh te an tel thei a, School tin atangin mi 1 zel an kal a ni. SSA hnuaia zirtirtu Animation Dept. te hmalakna in kuminah ziak leh chhiar thiam thar mi 40 vel Champhai ah an awm tih tarlan a ni.

CAMPAIGN NEI :
Khawzawl Officers Club te chuan niminpiah khan Khawzawl HIgher Secondary School ah Career Awareness Campaign an nei.
He hun R. Lalrintluanga, Khawzawl Officers Club (KOC) President kaihhruai Campaign hi Khawzawl HSS Zirlai thahnem takin an chhim a. Bank officer chi hrang hrang Exam te, All India leh State Civil Service Exam chungchang te, Medical Doctor leh Technical Entrances Exam leh Teaching Profession pawimawhna leh a kalkawng te inhrilhfiah a ni. Campaign hi Govt. Khawzawl leh Khawzawla High School dangah te neih zui leh tum a ni.

HMASAWNNA THLIRHO :
Nimin khan DC’s Conference Hall, Keifangtlang, Champhaiah District chhunga Central sawrkar sum hmanga hmasawnna hnathawh hrang hrangte enzuitu Committee; District Development Co-ordination & Monitoring Committee (DDCMC/DISHA) chu an Chairman Pu CL Ruala, MP (Lok Sabha) hovin an thukhawm. Meeting-ah hian Pu Ronald Sapa Tlau, M.P (Rajya Sabha) bakah  Champhai District chhunga MLA; Pu Lalrinliana Sailo, Pu TT Zothansanga leh Pu T. Sangkunga te pawh an tel a ni.
Pu CL Ruala chuan Champhai District chhunga sawrkar department hotute chu thahnemngai taka thawk tur leh mipuite tana rotling nakin hun thlenga chhawr tangkai theih tur chherchhuah tum turin a chah a. District chunga central scheme hnuaia  hmasawnna hmuh theiha awmte chu lawmawm a tih thu a sawi a. Sawrkar hnathawkte chu an kutah District mai bakah Mizoram hmasawnna a innghah tlat avangin rinawmna, taihmakna leh huaisenna thinlungpu chunga hnathawk thin turin a fuih bawk a ni.  
Meeting hmasa thurel bawhzui dan ennawnna leh meeting agenda thlirhona Pi Zosangzuali Pachuau, Project Director, DRDA kaihhruainain neih a ni a. Report hrang hrangte chu a tul angin sawi zuia hmalak chhunzawm dan tur ruahman nghal zel a ni.
Rural Development hmalakna MGNREGA hnuaiah 2017-18 chhungin   Job Card  holders 28414 hnenah ni 66 inhlawhna  siam sak a ni a. Kumin 2018-2019 chhungin inhlawhna siam a la ni rih lova, Ni 28 inhlawhna tur job card holders 28549 tan siam fel ni tawhin Ni 76 aia tlemlo inhlawhna siam hman tum a ni.   PMAY-G (Rural Housing Scheme) hnuaiah beneficiary mi 146 te hnenah insak tanpuina pek niin, In 75 chu sak zawh tawh a ni. IWMP Project paruk   kalpui mek a ni. MGNREGA hnuaiah hian Champhai leh a chhehvelah DRDA Champhai, Institute of Bioresource Technology (IHBT), Palampur, Himachal Pradesh leh Horticulture Department-te nena thawkhoin Apple Plantation Programme neih a ni a, Apple rah hmasa chu vawiin hian hmuh theiha pholan a ni a, a that leh that loh zirchianna turin Apple rah te hi Palampur-ah thawn tawh a ni.
Swachh Bharat Mission (Urban) hnuaiah Swachh Survekshan kaltlangin kawng hrang hranga fai zirtirna hmalak a ni a. Rohmingthanga Recreation Centre (Kahrawt) chu Zero Littering Zone a puan niin, Biate khua chuan North East bikah Best Practice and Innovation Award an dawng a ni. Swachh Bharat Mission (Rural) hmalaknain 2018-2019 chhungin thingtlang khaw 38 ah Waste Collection Centre siam tum niin, Community Sanitary Complex (CSC) 18 pawh District chhunga khaw thlan chhuah 15-ah te siam tum a ni. Saubhagya Scheme hnuaiah a thlawnin electric eng District chhunga In 773 ahte pek tawh a ni.   
National Health Mission hnuaiah 2018-2019 First Quarter chhungin Naupiang dam tha 140 an awm a, nausen thi 3 awmin IMR chu 21.42 a ni. Nu nau chunga thi awm lovin MMR chu Nil a ni. A nawlpuia thisen test mi 442 zinga  14-te chu HIV positive an ni a, Nu naupai thisen test 235 zinga 3 te pawh HIV positive an ni tih hmuhchhuah a ni bawk. Mipa zingah kum 25-49 inkar kaithar tam berin Hmeichhia lamah kum 35-49 inkar an tam ber ve thung a ni. HIV inkaina tam ber chu mipat hmeichhiatna hmanna  atangin a ni. TB test mi 82 zinga 12 te chuan TB an vei a, Multi-Drug Resistance TB rinhlelh 122 test zinga mi 2 te chuan an vei tih finfiah a ni bawk. Damlo khawsik thisen test 849 zingah Malaria vei hmuh a ni lo bawk. Measles Rubella Vaccination hlawhtling taka kalpui a ni a, target naupang 40571 zinga 40319 te pek niin hei hi za zela 99.30 a ni.
National Social Assistance Programme (NSAP) hnuaiah tar chawmna/ Tar pension mi 2,766; Hmeithai pension mi 269 leh Disabled pension/ Rualbanlo mi 76-te hnenah pek mek a ni a. Naupang 6,833-te hnenah chaw tha (Nutritional Food) pek niin chhungkaw eizawngtu ber boral avanga tanpuina (NFBS) mi 23-te hnenah pek a ni bawk. Geology and Mineral Resources Department chu Central Scheme PMKKY hnuaiah DISHA meeting an tel ve tawh tur thu tarlan a ni.  Agriculture Department kaihhruaina hnuaiah Rainfed Area Development (RAD) kaltlangin mi 306 te hnenah tanpuina pek a ni tawh a, Gram Swaraj Abhiyan hnuaiah Kisan Kalyan Karyashala hlawhtling taka huaihawt a ni bawk.
Heng bakah hian CSS hnuaia hnathawh hrang hrangte sawiho a zirchianna neih a ni bawk.  Nimin DISHA meeting-ah hian Pu Vanlalngaihsaka, DC Champhai, Department hrang hranga hotute bakah khawtlang hruaitu leh NGO aiawhte an tel a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Bethel YMA (BYMA)

BRANCH EXECUTIVE COMMITTEE NEIH A NI
Bethel. March.27Sunday) : Branch Executive Commiittee vawi thumna chu ni 24.3.09(Thawhleh) zanah YMA Office-ah neih a ni.
Branch Executive Committeee hi President Pu Lalsanglura Zote in kaihruaiin member sawm pariat an kal thei a, Pu C.Lalfaka Senior Adviser chuan Committee te tluang taka neih theih nan Pathian hnenah tawngtaina neiin rorel tan a ni.
Rorel I-na Kan Branch Vice President Pu S.Lalruatsanga chawlh dilna chu ngun taka sawi ho a nih hnuin a rawn dilna chu zahawm viau mahse tun atan chuan la pawm sak lo mai ni se an ti.
Rorel II-na Branch-ina a thunun mek Pu Nanghekmanga, Pi Nianglianchini, Pu Thangkhanlanga te ngaihdam dilna chu ngun taka ngaihtuah a nih hnuah an dilna pawm sakin thunun an nihna chu hlih sak a n ni.
Rorel III-na Central YMA atang Branch tina YMA chhang din theih ni se an tih chu kan Branch-ah pawh ngun taka sawi ho a nih hnuin kum 2009 atan kan Branch-ah pawh din ve nise an ti a, Section Wise-a din nise April thla chhunga …