Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Champhai Tualchhung Chanchinthar ni 14.6.2018 (ningani)

DISTRICT LIBRARY HLUT :
Kumin chhungin District Library tlawhtu mi 2094 anawm tawh.
Champhai District Library-ah member 1809 an awm mek a, puitling 1591 leh naupang 216 an an ni a, member thar puitling 3 leh naupang 2 an awm bawk. Lehkhabu thar 276 awmin lehkhabu 29,164 a awm mek a . Library tlawhtu hi mi 2094 an awm tawh ani. District Library ah hian mizo chanchinbu 5 awmin magazine mizo ziak 4 leh saptawnga ziah 1 a awm bawk. District Library member hi nih theih reng niin a duh apiang tán inziahluh theih reng a ni a, zirlai te tan zirna atana tangkai leh pawimawh tam tak en tur a awm a, zirlai ni lo tan pawh Pathian thu, hriatzauna leh thawnthu bu chi hrang hrang chhiartur a awm ani.

RUAHSUR NASA LEH CHAMPHAI :
Ruahsur nasa avangin PHE Dept ten Tuipui lui, tui an pump na hmun thenkhat chu tuiin a chim tawh.
Ruahsur nasa avang hian Champhai tui lakna ber, Tuipui lui chu a lianin a nu nasa hle a, pump tlak a nih loh avangin PHE Dept te hian ni 5 chhung chu Champhai khawpuiah tuisem an chawlhsan tawh a ni. Ruah hi a sur chhunzawm zel avangin tuilian hian zual lam a pan chho zel bawk a, tuilian hi a nasat zel chuan PHE Pump House No. 1 chu tuiin a chim maithei tawh tih thu dawn a ni.
Hetihlai hian ruahsur nasa avang hian Champhai District ah chhiatna lian tham thleng sawi tur a awm lo va. Champhai DC chuan thupek tichhuakin khuarel chhiatna thlen thulh pawha a rang lama che chhuak thei turin District Disaster Management & Rehabilitation
bakah Police te chu in ral ring turin a hriattir a ni.
HEADMASTER TE HNENAH ZIRTIRNA PE :
Nimin khan SSA Champhai Block huamchhunga Primary leh Middle School Headmaster, SMC Secretary te tan SSA BRC Hall ah Account training neih a ni.
C. Lalbiakzauva, DEO chuan Samagra Shiksha Abhiyan chungchangah zirtirna a pe a, Samagra Shiksha Abhiyan in a tum kawng hrang hrang te a hnen atang hian ngaihthlak a ni a; Naupang hnenah zirna tha zawk leh rah tha zawk nei thei tura Dept. hlawm Iian tak tak 3 te an thawhho thusawiin zirna tha mai piahlamah hmanraw tha neih te, Zirlai naupang te zirna lama an phur theihna tur kawng dapsak te, thliar hran bik nei lo va, in ang khat vek a zirtirna pek te hi an tum pawimawh te zing a mi a nih thu a tarlang a ni. Zirsangliana, Accountant, BRC Champhai hnen atangin Account vawn dan tur chungchang ngaihthlak a ni a, kalkhawm School tin Headmaster te hnen atanga zawhna awm te chhangin hriihfiah ngai te hriihfiahna hun a hmang nghal ani. 

BUH PHUN TAN :
Champhai zawla loneitute chuan tunkar tir lam atang khan buh an phun tan léh tawha loneitu tam zawk erawh chuan an la phun lo thung. Buh phun tawhte hi Buh chi dah hma leh buh chi puitlin hma deuh te a ni a. He tih lai hian tun hnai ruahsur nasa avangin tuiin buh chi a chim pil nasa hle a, buh chi a chim chhiat erawh hriata la ni rih lo va, phai bialah tui a khah nasat avangin buh phun tura leilet sawngbawl kawngah hna a khaihlak nasa hle a, tunkar chho hian ruahtui a tlak tam leh chuan buh phun hun pawh atih khawtlai ngei a rinawm.

Comments