Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai - Tualchhung Chanchinthar ni 2.6.2018 (inrinni)

CHAMPHAI THALAI PAWL LEH MEDICAL SUPERINTENDENT :
Nimin chawhma dar 11 khan Champhai Thalai Pawl-te chuan District Hospital Champhai chungchangah Dr Zatluanga, Med. Supt. kawmna hun an nei.
He hunah hian Dr Zatluanga chuan kum khat liamta atang khan sawrkarin min enkawl danah lawmawm a tih thu te, bungrua thar a rawn thlen belh reng mai a. Tunah pawh hian in zaina room (OT) thar pawh buaipui mek a nih thu a sawi. Champhai Thalai Pawl hruaitute chuan tuna Solar Power 100 KVA kan neih mek chungchang chu zawtin an hman ngai lo thu leh Dept lam hotute hnenah pawh vawi tam tak an lo thlen tawh thu te sawiin hma erawh vawiin ni thlenga lak a la nih loh thuin a chhang a. Hemi chungchang a hriat thui loh thu a sawi bawk. Power chungchangah chuan tunah hian Generator 100 KVA hmangin chawhma dar 11 - chawhnu dar 1:30 vel thleng Power Supply a khaih lak changin an hmang thin a. Hei hian nasa takin Damdawiin harsatna tawh mek chu a su kiang nasa hle a ni. Tunah hian Sawrkarin Generator lian zawk 500 KVA dahna hmun tur lo ngaihtuah tura an tih thu a sawi bawk. Champhai Thalai Pawl chuan hetia sum tam tak senga lei tawh a tawl mai tur chu uihawm an tih em avang leh hmalak zel dan tur an hriat theih nan a chinchang RTI hmanga zawh an tum mek a ni.
Dr Zatluanga chuan tunah hian khum 100 awm theihna anga kalpui ni mahse thawktu lam indaih lohna a nasat avangin harsatna an tawh thu a sawi a. Doctor mai piah lamah Sister, Nurse leh 4 Grade thlengin thawktu indaihlohna hi sawrkarin min hriatpuiin rawn pe thei se a duh thu a sawi bawk. Tunah hian thawktu tam tak hi Damdawi in inenkawlna tur sum hmanga chhawr an nei nual avangin duh angin Damdawi in inenkawlna pawhin hma a sawn tak tak theih loh thu a sawi bawk.
Khaw thenawm leh thingtlangah te miharsa zawkte tana fehchhuah duh thin mahse a kalna tur motor lamah harsatna an tawh avangin an duh angin an kal thei lo a, mi inphal ten hetiang lamah hian hmala thei awm se a duh hle a, tuna motor an kawl thenkhat te hi kum 2005 bawr vela NBCC ten an pek te a nih a. Motor hi a upa tawh avang leh an mamawh ang a phuhruk theih tawh loh bakah ruang phur thei tur an mamawh thu a sawi bawk.
Tunah hian Damdawi In hian hmasawn lam a pan chho mek zel a, bawlhhlawh sawngbawlna hmun pawh siam mek a nih bakah tunah hian Trauma Centre dah tura hmalak mek a nih thu a sawi a. Tin, BDO Champhai hmalakna in Damlo leh a awmpui te tana Khualbuk sak chu zawh fel a nih thawh thu a sawi bawk. Building hlui chungchang Champhai Thalai Pawl zawhna chhangin kum 2015 khan Building hlui (Hospital leh Quarters 5) te thiah phal dilna hi Sawrkarah an lo thlen tawh a, mahse engemaw avangin dilna hi kumin kumtir khan a tharin EE, PWD Building Division lamah thlen that leh a, tunah hian hmalak mek niin lehkha pawh hi SDO, PWD Bulding Division Champhai in an dawng tawh niin a sawi bawk.
Champhai Thalai Pawl hruaitute chuan an harsatna te hi pe thei an nih loh avangin Sawrkarah theihtawp an chhuahpui tur thu an sawi a. Champhai tan theihtawpa hmala ho zel turin an sawm bawk.
Champhai Thalai Pawl te hian Champhai Office hrang hrangah lengkualin an harsatna te zawha thawhpuia sawm an tum a ni.

CDFA IN DFA THA BER NIH LAWM :
Nimin khan Mizoram Football in Award a siam thar MFA hnuaia District Football Association tha ber Award Champhai District Football Association (CDFA) in a lak lawmna hun chu CDFA buatsaihin I&PR Auditorium, CHANEM Building-ah neih a ni a. He hunah hian District Bawrhsap Vanlalngaihsaka chu khuallian a ni. He chawimawina pawisa fai cheng nuai 1 kengtel hi May Ni 25 khan MFA General Body Meeting chuan a lo hlan tawh a ni. 
Khuallian chuan Champhai District-in Mizorama hmasa ber atan District Football Association hnathawk tha ber lawmman a dawng chu chhuanawm a tiin CDFA hotute thawhrimna chu fakawm a tih thu a sawi a. CDFA hlawhtlinna chu Mizoram Football History-a chuang reng tawh tur leh reh tawh ngailo tur a ni, a ti a. District mai nilo Sate tihmingtha thei tur chherchhuah kawnga CDFA hmalaknate chu chhuanawm a tih thu a sawi a. Mizoram Youth Commission (MYC) hmalaknain Dsitrict tin atangin kum 40 hnuai lam mi entawn tlak leh chanchin chhuizui tlakte thlanchhuah a nih tur thu sawiin, Sports discipline atang pawha thlan chhuah tur itawm tak tak an awm thu a sawi a. Football chu eizawnna tlak anih avangin football-a talent tha tak neite zawnchhuaha pholan zel chu a pawimawh thu a sawi bawk a. CDFA kalzelna turah duhsakna a hlan nghal a ni. 
He huanha hian C.Hualrikhuma, CDFA President pawhin thu sawiin Mizoram sawrkar duhsakna dawnga Infrastructure tha tak Champhai District-in a nei chu tun dinhmun hruaithlengtu a ni, a ti a. CDFA hmalaknain Champhai District football pet thiamten ram chhunga club hrang hrangahte an khelh mai bakah India ram tan an fehchhuah nual tawh thu a sawi a. Mizoram mai nilo ram pawna football club-te pawhin CDFA chu thawhpui an duh tawh a ni, a ti a. CDFA President chuan District hminga a tam thei ang ber State leh Ram tana thawh chhuah an tum thu leh player-te hmakhua leh hlawkna chu an ngaihpawimawh ber a nih thu a sawi bawk. 
CDFA hian an lawmman dawn atanga sawma pakhat chu District Hospital Poor Fund atan Medical Superitendent Dr R. Zatluanga hnenah an hlan a. Vawiin Programme hi IC Hranglura, Sr. Vice President, CDFA chuan a kaihruai a. Lalbulliana, Hony. Secretary-in report a pe a. District chhunga sports Discipline hrang hrang aiawh leh Club, Association ten lawmpuina thilpek an hlan bawk a. B.Lalramngheta, Vice President, CDFA-in lawmthu sawina neiin hun a khar a ni. 
Nimin Football Association hmala tha lawmna programme-ah hian District chhunga Footbal lama thawktute leh Sports discipline danga hotute an tel a, tlai lamah a lawmna chawhlui an kilho nghal a ni.

CHAMPHAIAH NSUI BUATSAIHIN ZIRLAI TITHATE CHAWIMAWINA NEIH A NI :
Nimin khan National Students Union of India (NSUI) Champhai District buatsaihin Champhai District atanga HSLC leh HSSLC Distinction-a pass leh Topper chawimawina hun Champhai Venglai Community Hall-ah neih a ni. He hun hi TT Zothansanga, Champhai North Bialtu MLA chuan khuallian niin a hmanpui a ni.
Khuallian chuan Zirlai hlawhtlinna changte chu a lawmpui thu sawiin, intlansiakna bei mek ang an nih avangin, inthlahdah lova tang mar reng turin a chah a. Lehkhathiam thei apiang an hlawhtlin vek bik loh thu leh theihtawp chhuah thin mi leh teirei peihte chu a tawpa hlawhtlinna tlanga ding thinte an ni, a ti a. Inelna sang tak khawvela leng mek Zirlaite chu zirlaibu chhung mai bakah hriatzauna Lehkhabu dangte zir tel ve zel thin tura fuihin, thawklehkhata zir vak ai chuan muangchanga inthlahdah hauh lova zir a tha zawk a ni, a ti a. Pawl 10 leh 12 result tha neih chu hlawhtlinna tluantling a la nih rih lova, tehna pakhat, rahbi intanna chauh anih avangin Zirlaite chu nun dan dik leh mawi zawh turin a fuih a. Nu leh pa thuawiha an hmuhphaklohah pawh taihmakna, tumruhna leh rinawmna nunpui zel a tul thu a sawi a.
TT Zothansanga chuan Champhai District-in Zirlai beiseiawm tak tak aneih thu sawiin, Ziralite chu an zirlai aia thildang dah pawimawh hmasa lo turin a chah a. Zirlai la peng thei thil ang chi reng rengte pumpelh angaih thu leh khawtlang leh kohhranahte pawh Zirlai tibahlah phah khawpa inhman rih loh a that thu a sawi a. Zirlai nih chhungin Social media hman chin tawk thiam a tul thu leh nulat tlangval lamah pawh hawiherh lutuk rih loh chu a finthlak thu a sawi bawk a. Khuallian chuan Zirlaite chuan harsatna an neihin hotute leh amah ngei pawh pan hreh lo tura hrilhin, a tih theih angah chuan tanpui a inhuam reng thu a sawi a. Zirlai Nu leh pate thawhrimna chu fakawm a tih thu a sawi a, chawimawina dawng Zirlaite chu nakin lawka hlawhtlinna tak tak leh tluantling chang ngei thei tura tan la zel turin duhsakna a hlan a ni.
Nimin Zirlai tithate chawimawina hun hi Khawllianthangi, President District NSUI-in a kaihruai a. JH Laldawngliana, General Secretary, District NSUI-in report a pe a. Valalchhuanga, Lalhmachhuana, President, NSUI Hqtrs leh Lalramngaihzuala, Secretary, MZP Sub-Hqtrs. Champhaite pawhin zirlaite fuihna thu an sawi bawk a ni. He hun hi B.Rothangvunga, Vice-President, District NSUI chuan lawmthu sawina hun hmangin a khar a ni.
Nimin hian HSLC distinction-a pass Zirlai 88 leh HSSLC Distinction-a pass Zirlai 12, an vaiin Zirlai 100 te hnenah chawimawina Citation hlan a ni a. Mizoram puma HSLC result puan taka pakuana dinhmun hauhtu JK Malsawmzeli D/o J. Lalrotluanga, PES Khawzawl Vengthar hnenah Khuallianin chawimawina Citation leh Laptop a hlan nghal bawk a ni.

PHE SE SAWN :
PHE Dept. SE Champhai WATSAN Circle Er Lalrammawia chu SE Aizawl Rural WATSAN  Circle a awm tura sawn a ni a, a aiah hian Er HB Chakma a rawn awm ang.

CHARITY CONCERT :
Vawiin hian MZI Hqrs. Champhai bultumin OK Ministry Home tanpui nan Champhai khawpui chhungah Mobile Charity Concert neih tum a nia, mipuite tanpui ngaite tanpui nan Charity ah theih ang tawk tawk hlan turin ngen kan ni e.

AWARENESS CAMPAIGN :
Niminpiah khan DCPU leh Vapar khawtlang hruaitute buatsaihin Child Protection Awareness Campaign neih a ni a. Vapar khaw chhunga zirna in hrang hrang Primary School, Middle School leh Higher Secondary School te bakah Adventist English Medium School naupangte leh khawtlang mipuite zirtirna pek an ni a. Zirlai naupangte chu an mahni invenhimna dan zirtir in mipuite hnenah JJ Act 2015 leh POCSO Act 2012 te zirtirin nu leh pa te mawhphurhna hrang hrang tarlan a ni bawk.

CASE 25 ZIAK LUT :
Thla hmasa May thla chhung khan Champhai Police Station ah Case 25 ziah luh a ni. Champhai Police Station ah hian POCSO Case 2, Rukruk Case 1, Mi vau Case 1, Motor Accident Case 1, ND&PS Case (No. 4) 19 leh Hmeichhia chhaih nawmnah Case 1 ziahluh a ni a. May thla chhung vek hian Champhai Police te hian Heroin No. 4 hawng 45 (756 grams vel) an man bawk

KUM 18 LEH MAT THAR :
Champhai District Karate Association chuan vawiin chhun dar 1 hian kum 18 an tlin lawmna leh Mat thar lawmna Tourist Lodge ah an nei dawn a. He hun hi Champhai North Bialtu MLA TT Zothansanga chuan khuallian niin a hmanpui ang.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…