Skip to main content

Champhai Tualchhung Chanchinthar

ADDL. CEO HOVIN VOTE CHHIAR TURA INBUATSAIHNA ENFIAH :Nimin khan  Additional Chief Electoral Officer Pu Krishna Mohan Uppu IAS   chuan  Champhai a rawn tlawh a, May Ni 23, 2019 a Lok Sabha inthlanpui vote tla  chhiarna tura inpuahchahna kalpui mek a rawn enfiah a ni.
Champhai District Election Officer Dr Naveen Aggarwal, IAS chuan inpuahchahna hrang hrangte NICConference Hall-ah powerpoint presentation hmangin   a sawi fiah a. Counting Center puahchah leh peihfel dante, Vote chhiar tur ruatna leh training pek tawh dante leh inbiakpawhna tur atana ruahmanna siamte a hrilhfiah a. CEO team ten Vote chhiar huna round tin report pekna tura duan Suvidha Counting Application hrilhfiahna an nei bawk a ni. Chawhnu lamah CEO Team-te hian EVM Strong Room leh  Vote chhiarna tura ruat Counting Hall pangate  an tlawh kuala, heng  an tlawh kualna hmunahte hian District Election Officer Dr Naveen Aggarwal, Champhai SP Pu Lalthiamsanga Sailo leh  District Election Official-ten an tawiawm a, ruahmanna …

Champhai _ Tualchhung Chanchinthar ni 22.6.2018 (zirtawpni)

VENGSANG, ZOTE LEH HMUNHMELTHA TEN BAWLHHLAWH PAIH VE THEI LO :
Champhai khawchhung veng hrang hrang te chuan an mahni puala motor ruaiin bawlhhlawh an paih.
UD&PA bawlhhlawh paih motor hian Champhai khawchhung a chawm zawh loh avangin veng hrang hrang te chuan an VC te hmalaknain motor ruaiin bawlhhlawh hi an paih thin a. Hei hian nasa takin UD&PA Dept. te chu a pui a, veng hrang hrangte intih hmuh zelin tunah hian Champhai khawchhung a Veng 15 te chuan anmahni pualin bawlhhlawh hi an paih mek a, anmahni bakah hian UD&PA bawlhhlawh paih motor pawh an kal kual reng bawk. UD&PA Dept ngenna angin mahni puala bawlhhlawh la paih ve thei lo veng 3 - Zote, Hmunhmeltha leh Vengsang te pawh paih ve vat thei tura beisei an ni mek.

VENG/KHUA HMASAWNNA ATAN SAWM NGAIHTUAH SENG TURIN SAWM :
EDP-Mipui Mamawh Intawm Ruahmanna (MiMIR) chungchanga Champhai District NEDP MiMIR Committee chuan thuchhuah a siam.
Mizoram State dinhmun chawikanna atana ruahman, New Economic Development Policy - Mipui Mimir Intawm Ruahmanna (MiMIR) Policy chu duan chhuaha kalpui mekah hmasawnna hnathawhna atan hian Rs. vbc 8 ruahman niin, District 8 ten vbc 1 man theuh Project lian an siam theihna atan an ruahman tih an tarlang a. He Project hnuaiah hian District chhunga Veng emaw khaw tin ten khawtlangin an chhawr tangkai tur Porkect lian an siam ang a, chung an Project siam te chu DC Chairman na hnuaia din District MiMIR Committee Member Secretary, SDO (S) Champhai hnenah an thehlut ang. Project thehluh atang hian District MiMIR Committee chuan Project tha ber Rs. vbc 1 hmanga thawh tur a thlangchhuak dawn a ni.
Hemi chungchang hi Champhai District chhunga Veng leh khaw tin inelna tur Porkect siam tura hriattirna leh a kaihhruaina VC tin pek an ni tawh bawk a ni. Sawrkar ruahmanna tha tak hnauiah kan District in hmasawnna rotling kan neih theih nan veng leh khaw tinte ngaihtuahna senga theihtawp chhuah turin Champhai District MIMIR Committee chuan a ngen tih an tarlang tel bawk.

MUALKAWI IN TLANGVAL CHAWIMAWI TLAK CHAWIMAWI  :
Nizan hmasa khan Mualkawi khawtlang chuan Mizoram University in Under Graduate
 Result a tih chhuaha Arts Subjects a Pakhatna Lalbiakenga chu ropui takin an lo hmuak.
Mualkawi VC leh NGO hrang hrang huaihawtin Lalbiakenga hmuahna hi neih a ni a. He hun hi C. Laldingliana, Mualkawi VCP chuan a kaihruai a. Mualkawi YMA Vice President Lalchhawnkima chuan thusawiin, Mizoram puma pakhatna ni thei Lalbiakengan Mualkawi khawtlang leh zirlai naupangte tana sualhnu ropui tak a hnutchhiah chu engtikahmah Mualkawi khawtlangin a theihnghilh tawh loh tur thu a sawi a. Mzioram puma Mualkawi ti hmingthatu Lalbiakenga chu YMA in a chhuang tak zet a ni tih a sawi bawk.
Mualkawi MUP Secretary C. Lalthankhuama pawhin thusawiin, Mizoram puama thiam ber ni thei Lalbiakenga chu MUP in an chhuang tak zet tih sawiin, tuna lehkha zirlai awm mek te chu Mualkawi atanga mithiam lo chhuak tawhte entawn turin a chah a, hlawhtling tur chuan Pathian tih tak chunga a ram leh a felna zawng hmasa a, Pathian malsawm tlak leh a chawimawi tlaka lehkha zir turin a chah bawk. MZP Vice President Lalhmingthara Hlawncheu pawhin thusawiin, MZU hnuaia Arts biakah Subject hrang hrang 13 khai khawma pakhatna nithei Lalbiakenga chu MZP Mualkawi Branch chuan chawimawina nopui an hlan tih a tarlang a. Lalbiakenga sulhnu avang hian Mualkawi zirna meichher hi a mit tur a nih loh thu leh a alh zual zel tur a ni tih a tarlang bawk.
He hunah hian Mualkawi MHIP President Lallawmthangi hnen atangin thusawi ngaihthlak a ni bawk. Lalbiakenga hi Pachhunga University College ah lutin a pumpuiah Mark 1068, zaa 89% hmuin Mizoram University hnauiah pakhatna a ni.

KAWNG SIAM MEKAH LUNGAWILO :
Nimin khan Champhai- Zokhawthar kawng siam meka lungawilohna thlente ngaihtuahtu Grievances Redressal Committee (GRC) chu an Chairman District Bawrhsap charge la mektu Liansangzuala Chhakchhuak hovin DC Conference Hall, Keifangtlangah an thukhawm.
Liansangzuala Chhakchhuak chuan District chhunga Project lian tak Champhai-Zokhawthar kawng siam mektu Company hnathawktute leh khawtlang hruaitute chu District thuneitu nena thawkho thiam turin a chah a. Hmasawnna hnathawh thenkhatin chhiatna thlen chang awm thin bawk mahse, hnathawktu company, a tuartute leh sawrkar thuneitute chuan dan angin hma an la tlang thin tur a ni, a ti a. Kawng siam Company hotute chu Grievances Redressal Committee  thupekte chu a hma thei ang bera tifel thin turin a chah a. District tana hmasawnna rahbi pawimawh tak siam kawngah district mipuite leh hnathawktute chu thawhpuiah a sawm bawk a ni.
Nimin meeting-ah hian Champhai-Zokhawthar kawnglaih avanga chhiatna tuartute hnen atanga lungawilohna thehluh hmun 6 atanga   hmun 4 amite chu ngaihtuahho a ni a. Lei vung paihin a tihchhiat Huan Lo ram leh tuikawngte bakah kawng laih avanga leimin, Sangha Dil chhia leh kawng hnawhpingte chu sawi ho a ni.
Thutkhawmah hian meeting hmasa thurelte bawhzuia hmalak anih dante ngaihthlak a ni a. Lungawilohna thehluh tawhte bawhzui anih dante ngaihthlaka sawiho a ni bawk. Nimin Grievances Redressal Committee-ah hian R.Lalnghakliana, Special Land Acquisition Officer (SLAO); Laltlanthangi Sr AE, PIU; Company hotute, Kawng laih avanga mimal Huan Lo ram tihchhiat sakte; New Champhai, Zotlang, Ruantlang, Mualkawi, Melbuk leh Zokhawthar khawtlang hruaitute an tel a ni.

AIR GUN NEI IN REPORT TURIN TI :
Sawrkar laipuia HOme Department in July ni 15,2016 a Arms Rules, 2016 thuchhuah a lo siam tawhin a phut angin Air Gun neite chuan  thuneitu hnen atangin Licence an lak a ngai tawh dawn.
Liansangzuala Chhakchhuak, District Magistrate chuan thupek chhuahin Air Gun nei zawng zawngte chu DC Office, Keifangtlangah emaw, mahni bialtu BDO Office  emaw atangin Air Gun Licence dilna Form la chhuak a, kumin June thla ral hma ngeia Form Fill Up sa leh an Air Gun kawl laite kengin DC Office, Keifangtlang ah in report vek turin a hriattir nawn leh a ni. In report turte chuan AIr Gun leina Cash Memo ken tel tur a ni a, neilo chuan Arms Dealer hnen atangin an lei ngei a ni tih tichiang turin Affidavit ken tur a ni ang. Mizoram Rifle Association  leh a hnauia inziaklut Rifles Club/Assocaition Member te chuan an Air Gun leh Member ID, an President  Counter Sign kengin an report tur a ni. Thupek zawmloa hun tiam chhunga in report lo te chu Arms Act, 1959 leh Arms RUles 2016 behchhanin an chungah hremna lekkawh a ni ang tih thupek chhuahah chuan a tarlang.

DC-AH VAI :
Dept. of Personal & Administrative Reform, Civil Service Wing, chuan Civil Service thenkhat a siksawi a, Champhai DC Vanlalngaihsaka chu Registrar, Cooperative Societies-ah a awm dawn a, a hmun ruak hi Registrar Cooperative Societies hna chelh mek Dr Naveen Aggarwal chuan a rawn luah dawn a ni.


Comments