Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai - Tualchhung Chanchinthar ni 25.6.2018 (thawhtanni)

FAINA LAMAH BIATE CHE THA :
     Inrinni khan India ram khawpui lian zualte faina kawnga inelna Swachh Survekshan 2018 lawmman sem a ni a, Biate chuan Best City of Innovation & Best Practices an dawng. 
     He chawimawina semchhuahna hun hi Indore khawpui Madhya Pradesh ah neih a ni a. He hunah hian North East State huanga inelnaa Best City of Innovation & Best Practices lawmman dawngtu Biate khaw aiawhin Champhai DC Vanlalngaihsaka, Dr Vanlalchhuanga, MO, Nodal Officer Swachh Survekshan Biate leh RV Hluna, VCP Biate ten Ministry of Housing & Urban Affairs changtu Minister Hardeep Singh Puri hnen atangin chawimawina citation leh momento mawi tak hi an dawng a ni. 
     India ramin faina kawnga hma  a sawn zel theihna tura a hmalakna Ministry of Housing and Urban Affairs buatsaih Swachh Survekshan 2018 kal tlang thian India ram puma khaw 4041 te chu fai inelna tur hian thlanchhuah an ni a. Mizoram chhung khaw lian zual 23 zingah Champhai District chhunga khawpui lian zual 4 : Champhai, Khawzawl, Khawhai leh Biate ten faina kawnga tehna hrang hrang, Sawrkar laipuiin a siamte hlen chhuah kawngah tan la in he inelna huangah hian an tel a ni. 
     Kumin kum tir khan he inelna bika enfikan hi Sawrkar laipui mithiamte chuan an rawn nei a. Swachh Survekshan hi bung thum - Service Level Progress, Direct Observation leh Citizen Feedback ah te then a ni a. Central atanga mithiam lokal ten mipui hennah zawhna te zawtin an rawn endik a ni. 

RUIHHLO MAN :
     Inrinni khan Excise & Narcotics Champhai Station chuan mi 5 kut atangin Heroin gram 376.6 (hawng 27) an man. Heroin kaihhnawiha an mante hi Lalruatfela, kum 29 New Champhai; Zonunmawia, Kum 23 Zokhawthar; Chalthansanga, kum 30 Thuampui, AIzawl; Lalawmpuii, kum 28 Dawrpui Vengthar, Aizawl leh Salemthara kum 18 Champhai Vengthar ni a insawite an ni a. Heroin man hi tualchhunga hralhna man atanga chhutin Rs. Nuai 13 leh sing 5 man a ni. 

THING PHUN :
     Inrinni khan Champhai a awm Hnahlan khaw chhuakte chuan Champhai - Hnahlan kawng dung, Vapar ram Arbaikawn leh Tuithoh lui inkarah thing phunin an hnatlang a, mi 30 zet an thawk chhuak. Hnahlan atangin VC leh YMA hruaituten an rawn fin bawk a, anni hian Tuithoh - Hnahlan inkara nikum lama thingphun vurin a hmeh hlumte chu thawm in, eng emaw zat an phun thar leh bawk. 

MHIP INELNA :
     Inrinni khan naktuk atanga khelh tan tur RL Neihkungi Mrmorial Champhai District Inter Branch MHIP Football TOurnament a tel tur Managers Meeting neih a ni. Meeting hi CDFA Office ah neih a ni a, CDFA Technical Sub-Committtee Chairman Lalbulliana chuan kairhuaiin CDFA leh MHIP Sub-Hqrs. Champhai hruaituten an tawiawm a ni. He TOurnament ah hian Team 12 an tel dawn a, Team 12 te hi Pool 4 ah then niin Pool tin Champion leh Runners Up ten 2nd ROund an lut ang a, ni 3.7.2018 ah Final khelh tum a ni. 

YOUNG LEGEND LEAGUE KHARNA HUN HMANG:
     Inrinni khan Young Legend League  chu Chhangphut Field ah Final Match kehlh niin kharna hun hman a ni. 
     League kharna hun hi Co. Hualrikhuma, President CDFA chuan kaihruaiin naupang te an nu leh pa ten tha taka a tawp thlenga an tawiawm thei chu lawmawm a tih thu a sawi a. Fin. Secretary MFA chuan thu sawin Champhai atanga chhuak mi entawn tlak tak tak an awm chu lawmawm a tih thu a sawi a. Naupangte chu anni ang a ruihhlo laka fihlim tur leh entawn tlak ni turin a chah a ni. Varun pawhin CDFA te nen an thawh hona chu tha a tih thu sawi in, Season thara buatsaih leh turah tel leh theuh turin a sawm a ni. He hunah hian Champhai atanga Mizoram pawna khel te hnen atangin thusawi ngaihthlak a ni bawk. U-8; U-10 leh U-12 a Champion Team, Runners Up leh mimal titha te hnenah lawmman hi sem nghal a ni. 



Comments