Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai Tualchhung Chanchinthar ni 28.6.2018 (ningani)

NAUPANG SIKUL KAL LO 96 AWM :
Nimin khan Champhai District Education Committee (DEC) chu an Chairman Vanlalngaihsaka District Bawrhsap hovin DC Conference Hall, Keifangtlangah an thukhawm.
He hunah hian K. Lalsiamliani, DPC SSA Mission chuan kum 2017-2018 chhunga achievement report tlangpui a tarlang a. Report kum chhung hian Sikul luhniah Zirlaibu Zirlai naupang 13322 te hnenah semchhuah vek hman a ni a. School uniform pawh Zirlai 11485 te hnenah a thlawna pek a ni bawk. SSA hnuaiah Primary Teacher 44, Middle Teacher 144 bakah Instructor 162 chhawr a ni a. District chhunga Block Resource Centers (BRC) 4 awm mekah Resource person 24 an awm a, Cluster Resource Centers (CRC) 23 te chu Cluster Coordinator ten an vil bawk a ni. Meetingah hian Science leh Mathematics chawilarna  tur scheme Rastriya Avishkar Abhiyan hmalakna leh Zirna tihhmasawnna tura Training neih hrang hrangte pawh tarlan a ni.
Meetingah hian Champhai Vengthlanga Residential Girls Hostel, Khawzawla Boys Hostel leh Saikhumphaia Non Residential Special Training Center chungchangte pawh sawilan a ni a. Kum 2017-2018 chhung hian school 24 thawmthat a ni a, Mid Day Meal Kitchen Shed 7 siam belh a ni a.  Primary school Zirlai 9428 leh Middle School Zirlai 5492 te hnenah Mid Day Meal pek a ni a. District chhungah SSA TATA TRUSTS Grassroot Training Centre 11, NEIDA nena thawk hovin kalpui a ni bawk. Tun thlengin Zirlai za zela 82.35 te chuan Aadhar Enrolment an ti tawh bawk a ni. 
Pianphunga rualbanlo Zirlaite tan Khawzawl leh Champhaiah inenkawlna resource room siam niin, tanpuina bungrua te pawh pekchhuah a ni a. District chhungah chhan hrang hrang vangin naupang kum 6—14 inkar school kailo 96 an awm a, ziak leh chhiar thiamlo mi 1590 report niin, khaw 16 velah zirchianna la kalpui mek a ni. Khaw / Veng 15 a cheng mipuite chu ziak leh chhiar thiam vek a report a ni a. Puitling ziak leh chhiar thiamlo 39 te chu hlawhtling taka zirtirna pek an ni tawh bawk. 
Nimin hian SSA, RMSA leh Teacher Education (TE) society khat hnuaia chhunfin anih theih nana hmalak zel dan turte, District chhunga Ziak leh chhiar kawnga hmalakna te sawiho a zirchian a ni a. Mid Day Meal, social audit neih dan turte, Kitchen Garden siam leh Mid Day Meal kalpui tha lawmman pek anih theih dan turte chu sawiho a ni bawk. 
District Education Committee memberte chuan an Chairman kaihhruaina hnuaia Zirna kawnga District in hmasawnna a hmuh avangin lawmthu an sawi a, ngaihhruina thilpek an hlan nghal a ni.

FARKAWN HSS KHAR :
Farkawn Higher Secondary School chu tunthla ni 18 atang khan Adhoc Aided Status a hlankai beiseiin tiam chin awm lovin khar a ni.
Farkawn Higher Secondary School Managing Board kaihhruaina hnauiah tlawmngai pawl leh Kohhran bakah Party aiawh kalkhawmte chuan an thil phut tihhlawhtlin anih loh avang leh sawrkar atanga hmalakna hriattur a awm lo chu hriatthiam har an tih thu an sawi a.
An thilphut a hlawhtlin theih nan nimin khan zirlaite bakah nu leh pate chu thuziak kengin Farkawn mualah an pungkhawm a. Hetah hian Resolution te an siam bawk a ni.

DC KAL TUR UI  :
Champhai DC Pu Vanlalngaihsaka, Aizawl lama insawn tur chu a hna thar zawm tura Champhai chhuahsan a tum ni chu sawn hla turin DC Staff te chuan an ngen a. A kal hun tura a lo ruahman lawk chu a naute hian a rang teh thut lutuk tiin an ui bet a ni. DC hi a Staff te hian an ui hle tih hriat a ni a, ni 4.7.2018 (Nilaini) hian thlahna hun an hmang ang.

MHIP FOOTBALL :
RL Neihkungi Memorial Inter Branch MHIP Football Tournament Chhangphut Field a khelh mek ah nimin inkhel result :
Melbuk 2-2 Dinthar
Hmunhmeltha 0-1 Selam
New Champhai 0-3 Zotlang
Zokhawthar 1-0 Vapar

Vawiin inkhel turte
Vengsang vs Selam
Hmunhmeltha II vs Melbuk
Ngaizawl vc New Champhai
Vangchhia vs Zokhawthar

Comments