Skip to main content

Champhai Tualchhung Chanchinthar

ADDL. CEO HOVIN VOTE CHHIAR TURA INBUATSAIHNA ENFIAH :Nimin khan  Additional Chief Electoral Officer Pu Krishna Mohan Uppu IAS   chuan  Champhai a rawn tlawh a, May Ni 23, 2019 a Lok Sabha inthlanpui vote tla  chhiarna tura inpuahchahna kalpui mek a rawn enfiah a ni.
Champhai District Election Officer Dr Naveen Aggarwal, IAS chuan inpuahchahna hrang hrangte NICConference Hall-ah powerpoint presentation hmangin   a sawi fiah a. Counting Center puahchah leh peihfel dante, Vote chhiar tur ruatna leh training pek tawh dante leh inbiakpawhna tur atana ruahmanna siamte a hrilhfiah a. CEO team ten Vote chhiar huna round tin report pekna tura duan Suvidha Counting Application hrilhfiahna an nei bawk a ni. Chawhnu lamah CEO Team-te hian EVM Strong Room leh  Vote chhiarna tura ruat Counting Hall pangate  an tlawh kuala, heng  an tlawh kualna hmunahte hian District Election Officer Dr Naveen Aggarwal, Champhai SP Pu Lalthiamsanga Sailo leh  District Election Official-ten an tawiawm a, ruahmanna …

Champhai Tualchhung Chanchinthar ni 29.6.2018 (zirtawpni)

MISSION FREE CLINIC NEI :
Nimin khan Mizoram Sawrkar hnuaia National AYUSH Mission ten Chawngi Memorial English School Biate ah School Health Mission leh AYUSH Damdawi chungchang inzirtirin, School naupangte tan Free Clinic an nei nghalbawk.
He hun hi Thanmawia, Chawngi Memorial School Principal chuan kaihruaiin Mizoram Sawrkar hnauia AYUSH ten School Health Mission an kalpui mek leh an School a hetiang Programme Sawrkarin an neih sak chu lawmawm a tih thu a sawi a. Dr Vanlalchhuanga chuan National AYUSH Mission School Health Programme Activities Mizoram hmun hrang hranga an kalpui dan a sawi a. Sawrkar laipui chuan India ram mipui hriselna a ngaih pawimawh thu te, zirlaite an hriselna Sawrkarin a ngaih pawimawh thu te a sawi a, Zirlai leh mipui chu Ayush Damdawi hmanga inenkawlna tha zawk an neih theih nan kalpui zel a nih tu thu a sawi bawk. Hemi hnu hian School naupang tan Free Clinic neih zui nghal a ni a, School naupang 140 zet a thlawna damdawi tha tak tak an sem a, Mizoram Sawrkar hnauai CM English  School tana School health Mission nei tur hian Dr Isa Lallawmkima, Dr T. Lalramthari leh Dr Emmanuel Zarzokimi ten School naupang hriselna enin Free Clinic hi an nei a ni.

UWMP HNUAIAH SERTHLUM TIAK SEM :
Tunlai hian Champhai III IWMP Project hnuaia khaw panga Khawzawl, Tualpui, TUipui, Neihdawn leh Ngaizawl khuaah te Serthlum tiak leh Valencia tiak sem mek ani.
Champhai III IWMP Project hi RD Department, Khawzawl enkawl a ni a, tun tumah hian Khawzawl khawpui chhunga chhungkaw 19 te phun turin Valencia tiak 1500 sem chhuah tawh a ni a. Niminpiah leh nimin lamah te he Project hnuaia khaw 5 a kuthnathawktute phun turin Serthlum Tiak 6400 chu sem chhuah leh a ni a, Serthlum tiak hi Khawzawl tan 2000 Tuipui tan 2000, Ngaizawl tan 500, Neihdawn tan 500 leh Tualpui khaw tan 1400 in sem chhuah a ni a. Khaw hran ghranga IWMP Watershed Committee chuan Serthlum tiak hi Beneficiary te hnenah an sem chhuak leh dawn a ni. Champhai III IWMP Project hnuaiah vek hian Tualpui khuaa KIWI chingtute tan GI Wire Coil 40 leh Gravity Pipe 100 pek a ni bawk a, hei bakah hian chhungkaw 2 chu Individual Tank an siamsak mek bawk.

SIALHAWK AH PHED IN FAI ZIRTIR :
Nilaini khan Champhai WATSAN Circle PHE Department leh Sialhawk VC tangkawp te chuan Swatch Bharat Mission hnuaiah vantlang mipu ifaina chungchang  Sialhawk Community Hall kawtah inzirtirin veng hrang hrangten mahni veng chhung an thian fai nghal.
Faina chungchanga Awareness Campaign hi Sialhawk VC Vice President R. Lalzamlianan a kaihruai a, Champhai WATSAN Circle atangin Julie C. Mawii, District Co-ordinator, Swatch Bharat Mission chuan hriselna leh mihring changkan zelna atana faina pawimawhzia a sawi a. PHE Department chuan Sialhawk khuaah hian nikum lamah bawlhhlawh bawm an pek thu te, bawlhhlawh paihna tur ruahmanna an siam sak thute tarlangin, tangkai taka hmang chhunzawm zel turin a chah a. Faina chungchang an inzirtir zawhah hian Sialhawka Veng 14 a khawsa mipui te chu mahni Vengah theuh hnatlanga khawlai thianfai turin an thawk chhuak a. Sialhawk khuaa Veng hrang hrangte hian kum thinin VC huaihawtna hnuaiah veng fai inelna an nei thin a ni.
Hnatlanga thawk chhuak zingah hian VL Khawpuimawia Ralte chu an hnatlannaah chesualin Lal Lungdawh bul ‘Kawtchhuah Kham’ awihah tlak dal a phun laiin a lum a, 500 ft dawn lai lumin a lu ah hmun thum a kak a, a taksa hmun thenkhat a sawh bawk a. VL Khawpuimawia Ralte hi la chhuakin Sialhawk PHC ah dah luh niin, a dinhmun hi hlauhthawnawm lutuk ani lo niin khawtlang hruaitute chuan an sawi.

KHAWZAWLAH  ANTI TOBACCO SQUAD :
Khawzawl Sub Division Anti Tobacco Squad din a nih hnuah nimin khan Squad Member te tan Vaihlo leh a kaihhnawih hrang  hrang dan in a khap dan te leh Anti Tobacco Squad te mawhphurna hrang hrang inhrilhhriatna chu Khawzawl Block BNRGSK Hall ah neih a ni.
Khawzawl Sub-Division Anti Tobacco Squad Chairman SDO (C) ni bawk Lalremruata Sailo chuan Khawzawla Anti Tobacco Squad din a nih hnuah Khawzawl khawpui chhunga Sawrkar Office hrang hrangte tlawhin meizuk khapna hmuna meizuk a nih leh nih loh endikna tukkhat an lo nei tawh tih a sawi. He hunah hian Champhai District Tobacco Cell atanga kal ten zirtirn an pe a ni.

NIPUI CHAWLH :
Champhai District Court chuan hmundang rualin thla thar July chawlhkar hmasa ber hian Nipui Chawlh an hmang dawn a. Hemi hun chhung hian dawr theih an ni dawn lova, Urgent Case erawh lo dawngsawng turin Magistrate pakhat Duty a awm thung ang.

MHIP  FOOTBALL :
RL Neihkungi Memorial Inter Branch MHIP Football Tournament 2018 Chhangphut Field a khelh mekah nimin khan Pool Match khelh zawh a ni.
Inkhel result :
Vengsang 0-2 Selam
Hmunhmeltha II 1-0 Melbuk
Ngaizawl 3-0 New Champhai
Vangchhia 1-2 Zokhawthar

Vawiin ah Quater Final khelh chhunzawm a ni ang a, inkhel tur te :
Zokhawthar 10:30 Ngaizawl
Vapar 11:30 Zotlang
Dinthar 12:30 Hmunhmeltha I
Salem 2:30 Hmunhmeltha II

Comments