Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai - Tualchhung Chanchinthar ni 5.6.2018 (thawhlehni)

MIZORAM-AH HMEICHHE FOOTBALL THIAM BER - CHAMPHAI :
Nimin khan MFA leh MHIP buatsaih GIG Motors Inter Branch MHIP Football Tournament final chu AR Lammualah Kolasib Town leh Champhai Sub. Hqrs ten an khel a, hunpangngaiah 2-2 in an inhneh tawk a, hunpek belh an nih hnuah Champhai chuan 4-2 a hnehna changin Champion hmasa ber an ni ta a ni.
Inkhel tan a ni a, Kolasib chuan nawr nghalin minute 12-ah Lalnuntluangi chuan an hmahruaina goal a khung a, Champhai chuan nawr letin an siphurh sutna huntha nei mahse goal erawh an khung mai thei lo. Kolasib chuan 1-0 a hmahruaiin chawlh lawk an hmang.
Second half tan a ni a, Champhai chuan an siphurh sut ngei tumin an nawr a, minute 42-ah Lalhmangaihzuali chuan an siphurh sutna goal a khung zui a, Kolasib chuan nawr letin minute 53-ah Lalnuntluangi ball pek tha zet chu Lalrinchhani chuan box-ah la lutin an goal hnihna a khung ve leh a, Kolasib chuan 2-1 in hma anhruai leh ta a ni. 
Champhai chuan an huntha neih hmang tangkaiin Minute 65-ah Hunlawmawmi chuan an siphurh sutna goal a khung ve leh a, hunpangngaiah 2-2 in an inhneh tawk ta a ni. 
Hun pek belh an ni a, Champhai chuan nawr nghalin minute 72-ah Lalchhanhimi chuan an goal thumna an khung zui a, Champhai bawk chuan minute 79-ah an huntha neih neih hmang tangkai leh in Lalhlupuii Varte chuan an goal li na a khung chhunzawm a, Champhai chuan 4-2 in hnehna an chang a, an Champion ta a ni.
LAWMMAN SEMTE :-
Champion : Champhai Sub, Hqrs, Rs 50,000/- + Trophy + Certificates
Runner Up : Kolasib Town, Rs 30,000/-Trophy + Certificates
Semifinalist : 1. ITI 2. Zemabawk North Rs15,000/-
Quarterfinalist : 1. Phulpui 2. Salem 3. Armed Veng 4. Thingsulthliah Block. Rs 10,000/- each.
Fair play : Champhai, Sub, Hqrs, Rs15,000/-Trophy
Mimal Lawmman :
Rs 1,000/- Trophy 
Best Goalkeeper : Baby Zothankhumi, ITI
Best Defender : Flora Lalrinmawii, Kolasib
Best Midfielder : Lalhumhimi, Zemabawk North
Best Forward : Lalhmangaihzuali, Champhai

CHENNA IN CHIM :
Nimin tlai dar 3:30 vel khan Vanlalzuala In, Kahrawt Veng a mi chu a ruah sur avangin a chim
Vanlalzuala In hi Kahrawt veng, SSA Office thlang a awm niin Lalvohbika (Tea) te chhuangkua in an luah mek a, niminpiah khan he in chhak hi tlem chu min tawhin a hlauhawm loh ring in an insaseng lo va, nimin ruahsur nasat vanglai tak khan SSA Office ram ko chu a chim a, lei tawlh thla chuan a thlang feet 20 vel a hla kawrah In hi a hnawl liam a ni. Lalvohbika te hi a nupui leh a fate pahnih nen he Inah hian an cheng a, lei min in In a hnawl lai hian Inah tumah an awm loh lai niin thi leh hliam an awm lo hlauh a ni. In chimah hian inchhung bungrua a chhe nasa hle niin thusawnna chuan a sawi a, buhfai an leikhawl sa pawh laktlak a awm lova, bungraw chhia zawng zawng hi hriat theih chinah Rs. 15,000 man hu vel niin thudawnna chuan a sawi.
Nizan khan Kahrawt Veng VC kaihhruaiin Kahrawt huam chhunga NGO hran ghrangte chu thukhawm in, In chim singsak fel dan tur leh chhawmdawlna kalpui dan tur an sawiho.
Hetih lai hian CHamphai leh a chheh vela ruah sur nasa avangin harsatna a thleng nual bawk.
Nimin lama ruah tam tak sur vang khan lei a hmin viau a. Leimin hmun tam takah a thleng a, DC Road chu Chhangphut Field piaha leimin in a dang a. DC tlang, Hmunhmeltha leh N. Khawbunga kal turten Hospital lamah a n hel a ngai a. Hospital Road chu Thana piah lawk, Kohhran Thianghlim Biak In kawmtlangah leimin in a dang a, kawng hnuai zawk atanga helin Hospital a kal theih hram. Excise Office panna kawngpui chu Rodinga te in bul leh Excise Office peng bulah leimin in a dang chat a. Kanan venga Thasiama Sailo kawmtlang leimin chuan Dinthar Veng panna kawngpui a dang bawk a. Vengsang pawhhawn turikhur bul chu a min nual a. Electric Veng PS bul Upa F. Lalbiakmawia kawmthlang a min bawk. Champhai College kianga brick chimin CPACS Sikul Chowkidar chu lung in a delh a, Aizawl pan tura tih a ni bawk niin thu dawn a ni.

SABEREKA KHUANGKAIHIN A LAK RUANG HMU :
Kar kalta Inrinni chhun dar 12:30 vela ruah baw hawk surin a siam Sabereka khuangkaih chuan Nl. Kapkhendimi (46) Sesih khua chu a la a, a lenna kawrte atanga meter 300 vela hlaah a ruang hi hmuh a ni. Nl. Kapkhendimi hi an khua Sesih atangin Khua lui a tuibur thlawr tur chu Sabereka khuangkaihin a la a, amah zawngtu Sesih khawtlang chuan Pathianni khan Sabereka khuangkaihin alakna atanga Metre 300 vela an hmu a. A ruang hi Pathianni vek khan Sesih thlanmualah vuiliam a ni.

TIAU LUI HUMHALH :
Vanhnuailiana Group leh Rih-Lentlang Youth Assn te chuan Tiau lui humhalh dan tur an sawiho.
Kar kalta Inrinni khan Vanhnuailiana Group YMA leh khaw 56 awmna RLYA te hian a vawi hnih nan Lalhnehliana, RLYA President  te In Khawmawiah Tiau lui humhalh dan tur an sawiho. Tiau lui humhalh chin a tan Vanhnuailiana Group YMA huam chin leh RLYA  te huam chin a ni se tiin an rel a ni. TIau lui sangha te hi len, lenkhang leh nghakuai tih loh hmanraw danga man chu phal loh nise tiin an rel a, nghafuan ven an khauhkhirh bawk. RLYA te hian an hmalak chak zawk nan Myanmar Aawrkar thuneitute TIau lui humhalh dan sawipui tum a ni. Mizoram leh Myanmar lamah an huam chi nkhua leh Branch ah inzirtir leh infuihthar hman nise tiin TIau lui humhalh hi hman tan nghal a nih thu an puang bawk. He thutkhawmah hian an hmalaknate thlirho a, a tul ang a Joint Meeting nei thin tura thu dah a ni.

KHAWZAWL OFFICERS CLUB IN TANPUINA HLAN :
Khawzawl Officers Club ten Inrinni khan Khawzawl khawpui chhungah tanpuina leh lawmpuina thilpek an hlan.
Khawzawl Officers Club (LOC) te hian 2018 HSSLC Examination result chhuak a Mizoram puma 9-na, JK Malsawmzeli d/o J. Lalrotluanga, Khawzawl Electric Veng, PES Khawzawl Vengthar Pastorate chu lawmpuina thilpek pawisa fai Rs. 5000 an hlan. Tunhnaia kangmei in an In a tihchhiat Lalchhanhima te chhungkua Khawzawl Vengthar te leh Joseph Lalthakima te chhung Hermon Veng te tanpuina pawisa fai Rs. 5000 ve ve in an hlan bawk. He thilpek hlanna hun hi KOC President R. Lalrintluanga, H. Lalrammawia, KOC General Secretary leh K. Ziona, Asst. Secretary ten CLub hmingin an sem kual a ni.

CHAMPHAI A APPLE CHIN A RAH THA HLE :
Council of Scientific and Industrial Reseatch (CSIR) hnuaia Institute of Himalayan Bio-Resource Technology (IHBT) Palampur a mithiamte leh Mizoram Rural Development leh HOrticulture Department tangkawp ten CHamphai leh a chheh vela lOneitu thlan bikte hnenah kum 2016 atanga Champhai a enchhin Apple chi 4 an chin zingah Gala chi te chu a rah tha hle a. Loneitute huan hrang hranga Apple rah tui dan leh hrisel dan hi mithiamte enfiah turin buatsaih mek a ni.
CSIR hnuaia IHBT, Palampur a mithiamten kum 3 chhunga thar thei tur Apple chi 4 Anna, Dorset, Gangalla, Red Galla, Scarlet Galla te chu Champhai leh Hnahlan a kuthnathawktu thlanchhuah chhungkaw 30 te chintirte chu a hlawhtling thawkhat hle a. Kum 2016 a Apple chinte chu kum 3 an tlin tawh angin kumina a rah hmin mekte chu a tui dan leh hrisel dan Palampur a mithiamte enfiah tir a ni dawn a. Chinzui tlaka ngaih a nih chuan Champhai District chhungah mithiamte kaihhruaiin uar zawka chin chhunzawm a ni ang. CSIR hnuaia IHBT mithiamte thurualpui a MGNREGS COnvergence hmanga Mizoram State Rural Development Department leh Horticulture Department tangkawp ten Apple chi, Ismel leh Britain a siam chhuah hi Apple dangin rahchhuah tura khawlum lam degree 9 leh a hnuai lam darkar 1200 - 1500 chhung hun an mamawh laiin, tuna phun APple chi te hi chu rah turin khaw vawt ah darkar 300 chiah an mamawh thung. 
Heng Apple chi, Tlangram feet 3000 chunglam a sang, khaw vawhna hmun a tha thei tura ngaih, Apple kung chi 4 te hi thingkung dang nena sawhzawm niin, awmze nei a phun tlar a ni a. Feet 3 lai a thuk laih khuara leitha chi hrang hrang chawhpawlh hmanga hnawh khah a nih hnuah meter 4 zet a inhlatin phuntir an ni a. Apple chi 4 zinga Dorset leh Gala te hi Apple rahchhuahna pe tura chi chhuahtu a niin, a kar thelh a phun vek a ni. Tuna Champhai leh a chheh vel a chin chhinte hi Apple tha chi leh rah tui tura ngaih an nih bakah a rah hi thlum tha tak a nih tur thu mithiamte chuan an sawi a. A nih tur ang taka thar chhuak thei tur chuan enkawl uluk a tulin, Bawng ek leitha, Fertilizet leh tui thahnem tak pek a ngai thung a ni.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…