Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Champhai - Tualchhung Chanchinthar ni 8.6.2018 (zirtawpni)

NAUPANG KUTDAWH TIR A INHNAMHNAWIH MAN A NI :
Tunhnaia Champhai kahwchhung vela Naupang Kutdawh chungchanga inhnamhnawih Suresh Kumar Chakma chu man a ni.
Tun hnaia naupang pahnih leh mitdel pahnih te chu Champhai kutdawh tir a, Mizoram hmun hrang hranga an kalna leh an kutdawhna tura ruahmanna lo siam puitu ber niahriat Suresh Kumar Chakma chu tunhnai khan Champhaiah man a ni.R Lalrinchhanni, district child protection officer, Champhai hnen atanga thudawn danin tun hnaiah naupang pahnih leh mitdel pahnih te chu Champhai khawpui chhungah vakin kut an dawh a. Naupang kutdawh tir hi naupang pual bil dan the Juvenile Justice (Care and Protection of Children) Act 2015 (JJ Act)in a khap tlat avangin he mite chungchang hi District Child Protection Unit, Champhai leh Child Welfare Committee Champhai District leh Champhai Police te tangkawp chuan an chhui zui a, anmahni buaipuitu nia hriat Suresh Kumar Chakma chu man a ni.“Mitdelte hi Lawngtlai atanga lo kal niin, Champhaia hotel pakhatah an thleng a, Champhai mai ni lo Aizawl, Lawngtlai, Saiha Lunglei, Serchhip, leh Mamit ah te naupang nena kut dawhin kum 2013 atang khan hun an lo hmang tawh tih hriat a ni,” tiin thudawnna chuan a tarlang.Suresh Kumar Chakma hian hming lemdang ‘Biakmawia’, ‘Roberta’ leh ‘Lalmuanpuia’ tih te pawhin alo in chhal thin a, an kut dawhna pawisa atang hian hlawh a lo nei ve thin a ni. 
Suresh Kumar Chakma lakah CWC Champhai chuan Section 76 of JJ Act tlawh chhanin Champhai Police Station-ah FIR thehluh a ni a. June 4, 2018 khan Champhai district Jail ah dah luh a ni.Juvenile Justice (Care and Protection of Children), Act 2015 Section 76-in chuan kutdawh tura naupang chhawr hi a khap a, naupang kutdawh tura chhawrtu emaw, kutdawhtirtu emaw kut dawh tura titu chu kum nga thlengtantir bakah cheng nuai khat chawitirtur a ni.District child protection officer, Champhai chuan naupangte kutdawhnaa inhnamhnawih tir hi an dikna chanvo palzut sakna a nih avang leh JJ Act dan kalh anih avangin mitinte lo fimkhur a, hetiang naupang hmu leh hria kan awm anih chuan District Child Protection Unit emaw Child Welfare Committee emaw Police Station hnai berah emaw report turin mipui a ngen bawk a ni.

PRESBYTERIAN KOHHRAN LEH UPC :
Champhai Ramthar Presbyterian Kohhran chuan Vengsang UPC (MZ) hnenah Pulpit leh chair pahnih (thinga siam) an pe dawn. Thudawn danin UPC (MZ) hian Pulpit hluihlawm tawhte hi Ramthar Kohhran hnenah hian an dil a, an dilna hi Kohhran Committee chuan ngaihtuahin pek an remti a, Pulpit leh Chair inhlanna hun atan hian tukin zing dar 7:30 hi an ruat a ni.

KAWNG TAN ZAWNGA DIN PHAL :
Champhai District Superintendent of Police Lalthiamsanga Sailo chuan Taxi Stand ah Taxi kawngpui tan zawnga din phalsak an nih thu a sawi. Champhai District Superintendent of Police Lalthiamsanga Sailo chuan Motor Vehicle Act 1988 Section 117 in thuneihna a pek angin Taxi Stand atana hman mek Pu Kalkhama (Fam) Building  Vengthlang kawt leh Pu Lalmalsawma Building (R. Lalrinawma (fam) Building) Vengthlang inkar chu Venglai pan thlakan dal lovin kawngpui tan zawng a din phal sak a nih thu a puang a. he thu pek hi tul bik thilah chuan eng hunah pawh tihdanglam theih a nih thu a tarlang bawk.

EXCISE IN THUBUAI 43 ZIAKLUT :
May thla chhung khan Champhai Excise & Narcotics Dept te chuan thubuai 43 an ziak lut.
Thubuai an ziah luh zinga 23 te hi MLPC Act hnuai an ziah luh niin MLPC Act ah hian mi 22 manin mipa 13 leh Hmeichhia 9 te man an ni a. ND&PS Act hnauiah thubuai 20 ziak lutin mi 24 an man a, mipa 19 leh Hmeichhia 5 te man an ni bawk. May thla chhung khan Rakzu Litre 109.0 leh BEDC Litre 60.2 an man a. Zubilhna dawidim Kg 1 an man bakah Pot 5 leh lirthei 1 an man a, Heroin No. 4 170.45 an man bawk.
Kumin January atanga March thla thleng khan Rakzu Litre 406.850 leh BEDC Litre 685.6 an man tawh a, Ramdang Beer Can 52 leh FML Bottle 3 an man bawk a. Zubilhna hmanrua Pot 47 leh lirthei 1 an lo man tawh bakah Heroin No. 4 Gram 84.5 leh Ganja Gram 14.216 an lo man tawh bawk. MLPC Act. hnuaia thubuai 58 ziak lut tawhin mi 41 an man a. ND&PS Act hnauiah thubuai 11 ziak lutin mi 10 an man bawk a ni.

MUALBUHVUM-AH GREEN MIZORAM DAY :
Nimin khan District Level Committee on Green Mizoram chu an Chairman Pu Vanlalngaihsaka, Champhai DC hovin DC Conference Hall, Keifangtlang, Champhaiah an thukhawm a, Green Mizoram Day 2018, June ni 11 a lo thleng tur hman dan tur an rel a ni.
He hun  Pu Vanlalngaihsaka kaihruaiah hian  Pu C.Lalbiaka, DFO, Champhai Forest Division, Member  Secretary-in meeting neih chhan leh thurel tur tlangpui sawifiahna a nei a. Thukhawm chuan kumin Green Mizoram Day hmanna programme hmunhma leh thingphunna hmun atan Mualbuhvum chu a thlang a. He mi nia thingphun tur hian Department tin atangin thahnemngai taka thawhchhuah nise a ti a. Planting Agency pakhat tan thing tiak 10 vel theuh phun tura hisap chhin niin, thing tiak phun reng reng chu tha taka hungna siam tum a ni bawk. June ni 11 chawhma dar 11:00 a.m ah a hawnna inkhawm leh Fire Prevention Week puala titha lawmman semna buatsaih a ni ang a. He hun hman zawh hnu hian thing phun hnatlang  neih zui a ni ang.
Nimin meeting-ah hian Green Mizoram Day hman dan tur programme duan a ni a, heng bakah hian Department thenkhat mahni ram chhunga thingphun duhte tan Forest Department lamah ngaihven theih reng anih thu tarlan a ni a. Ramngaw humhalh leh siam that kawnga thawhhlawk Mimal, Pawl leh Sawrkar Department hnena pek thin Green Mizoram Award guidelines chu zirho a ni bawk.
Kumin hian Mualbuhvuma YMA ram chhungah thing chi hrang hrang 5 vel phun tum niin, tha taka hung leh YMA nena tangkawpa enkawl zui zel tura ruahmanna kalpui a ni a. Nikum lamah khan Hringlang Tlangah Green Mizoram Day pual hian thing 5050 lai phun niin, heng zinga za zela 77.9 chu tha taka nungin enkawl zui a ni. Green Mizoram Programme hi Mizoram sawrkar hmalaknain kum1999 atanga tan a ni a, hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm thin a ni.

Comments