Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai

PISTOL 6 MAN :
Kar hmasa ZIrtawpni khan 46 Assam RIfles leh Champhai Police tangkawp chuan Diltlang, Champhai District bulah .32 Pistol paruk an man a, heng zinga pali chu foreign Pistol a ni. Heng Pistol te hi thlam chhungah hmuh niin hel pawl hnena hralh tura dah an nih rin a ni a. May thla khan Assam RIfles chuan AK Rifle pahnih Aizawl ah an lo man tawh bawk a.  Assam Rifes leh Mizoram Police chuan thawkhoin ralthuam tawlhrukna thleng thin tihtawpna turin hma an la nasa hle tih an sawi a ni.

PI KHAWLTHANGI RUANG HMUH A NI :
Zirtawpni zing atanga chin hriat loha bo Pi Khawlthangi (88), Hmunhmeltha chu Sub-Hqrs. YMA, Champhai huaihawtin zawng chhunzawm zel niin ni 2 chhung zawn a ni tawh a. Ni thum zawng tura mipuite an inbuatsaih mek laiin Pi Khawlthangi ruang hi Khankawn atanga PWD Kawng Thlangtlak ram, Chhungte khaw zawn, kawng atanga feet100 vel kawng thlang thing tuluang chungah thi a hmuh a ni e

THINGPHUN TIFAI :
Inrinni khan Champhai Nature Conservacy chuan Circuit House bul vela an thingphun tifaiin hnatlang an nei a, helai velah hian thing tiak 80 vel an phun a ni. hei bakah hian Champhai khawpui chhung hmun hrang hrangah thing tiak engemawzat phunin uluk takin an enkawl zui reng a, an thingphunte enkawlpui turin mipuite an sawm bawk. Champhai Nature Conservancy hian Champhai chu Tlaizawng Khawpui a siam turin Project Tlaizawng hmalakna an kalpui mek bawk.

DC THLAH DAWN :
Naktuk Thawhlehni hian Champhai DC Vanlalngaihsaka Aizawl a insawn tur chu a Staff ten an thlah dawn a, thlahna inkhawm hi chawhnu dar 2:30 ah DC Conference Hall, Keifangtlang ah neih a ni ang.

REMNA NI HMANG :
PAMRA, Taitesena Group Champhai District chuan Inrinni khan Remna Ni chu an President Vanlalruata Pautu Inah an hmang. He hun hi R. Thansiama, PAMRA Secretary chuan kaihruaiin ram tana nunna hlantute sunna hun an hman bakah thusawi ngaihthlak a ni a, tlaia ruai an kilho nghal a ni. He hunah hian PAMRA Member te an kal thain an hlim tlang hle a, MNF North Block ten Remna Ni hmanpui tura an sawmna chu an lawm rualin khawtlanga mibo zawn ngai avanga an hmang thei lo chu pawi an tihpui thu an sawi.

Comments