Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai

PARKING FEE KHAWN TAN TA :
Champhai khawpui chhungah Parking Fee khawn a ni ta.
Tarlan tawh angin CHamphai khawpui chhunga hmun 6 ah parking fee hi khawn ani dawn a. Heng te hi Area 1 : Awmpu Phei, Vengthlang North peng atang Bazar inkar te, Area II : Vengthlang North peng atanga Vengthlang Biak In inkar te, Area III : Vengthlang KD Rickshaw Stand thlang atanga 2 Wheeler stand chhak te, Area IV : 2 Wheeler stand atanga droping zone chhak Area V: Venglai Bazar bakah Area VI : Bethel kawn te a ni. Parking Fee khawn turte hi tender tihchhuah hmanga chhan niin a khawn turte hi thlanfel tawh a ni.
Parking fee hi Two wheeler tan darkar khat hnuailamah Rs. 5 a bak zawng tan Rs. 10 a khawn ani dawn a, an dah hun chhung a zirin fee hi a sang zel dawn a, a sanna hi Two Wheeler ah Rs. 5 zel a nih laiin a bakah hian Rs. 10 zel ani dawn a, parking  fee hian Sawrkar lirthei leh Public Transport te a huam dawn lova, zan lamah parking fee hi khawn ani dawn lo bawk a ni.

KHAWLTHANGI HMUH A NI :
Zirtawpni zing atanga chin hriat loha bo Pi Khawlthangi (88) Hmunhmeltha ruang chu nimin chawhma dar 9 vel khan Champhai Vengsang ramchhung Leitha zawl ram (Saikah lui kam)-ah hmuh a ni.
Tarlan tawh angin Pi Khawlthangi hi Zirtawpni zing khan a Makpa PuR. Lalrinsanga, Vengsang in atanga a chhuak chu chin hriat lohin a bo zui a, nimin zing dar 5-9 inkar chhung khan Champhai Vengsang huamchhung hmun thumah hmutu an awm thu dawn a niin, amah hi Hmunhletha kal tum a nih thu leh ramhnuai lam a pan a. A ruang hmuhna hmun hi ZIrtawpni zinga amah hmu hnuhnung ber Vengsang PHE Veng atanga km 2 vel a hla a ni, tunhma Aizawl panna kawng (PWD Road) thlang Saikah lui kamah hmuh a ni.
Pi Khawlthangi hian Alzheimer natna a nei ni a thu dawn niin a makpa te in a chhuahsan lai hi a chhungte hian an hre lova, khawilam nge apan ber hriat a nih tak loh avang hian SYMA thut hmun Branch YMA Member thahnem takte chu insem darin zawn a ni a. Nimin khan Champhai Vengsang huamchhung leh Hmunhmeltha huamchhung ram hnuai pilril zawk zawn a nih laiin, a chenna Hmunhmeltha thalaiten a ruang hi an hmu ta a ni.
Nimina a ruang an hmuhna bil hnaiah hian niminpiah tlai thim dawn khan a pawnfen chhar a ni a, nimin zing atang khan Hmunhmeltha thalaiten helai hmun hi zau zawka an zawn hnuah a ruang hi hmuh a ni ta a ni. Pi Khawlthangi hi nimi chawhnu khan Hmunhmeltha thlanmualah vuiliam a ni.
Mi bo zawngte hman tur atan hian hriat theih chinah Champhai North Bialtu MLA TT Zothansanga chuan Rs. 11000 leh Silpauline 6 a pe a, Dr Thiamsanga`n Rs. 6000 a pe ve bawk a. Anni bakah hian Sub-Hqrs. MHIP Rs. 2000, Kahrawt Br YMA Rs. 1000, Kanan MUP Rs. 1000, Kanan MHIP Rs. 1000, Kanan VC Rs. 1000, Chhungte Br YMA Rs. 1000 leh mimal hnen atangin pawisa dawn ani bawk.

THUBUAI 13 ZIAHLUT :
June thla chhung khan CHamphai Police Station ah thubuai 13 ziah luh a ni. Thubuai ziahluh zingah hian POCSO Case - 2; Rukruk Case - 2; Tualthah Case - 2; Pawngsual Case - 1; Hmeichhe chunga hleilenna Case -2, Juvenile Justice Case - 1 leh ND&PS Case - 4 te ziah luh a ni a, June thal chhung hian Heroin No 4 hi Hawng 107 an man bawk.

CHAMPHAI NAUPANG FOOTBALL ACADEMY AH :
CDFA chuan naupangte tan Football lamah tan a la mek zel a, Football a eizawnna an hmuh theihnan India ram Club lian leh Academy te nen thawkhoin hmasawnna a hmu zel. Tunhnaiah pawh India ram Football Academy thaa awm turin Champhai naupang an lut zel a, heng a hnuai a mite hi phai lama Academy a lut thar te an ni.
1. Reliance Football Academy, Mumbai - F. Lalchhanchhuaha s/o F. Rokhuma, Venglai
2. Bhaichung Bhutia Football Academy, New Delhi - K. Lalremmuana s/o K. Lalhmingliana, Venglai; Lalrinmawia s/o PC Lalmuankima, Zotlang
3. Punjab Minerva FC Academy, Chandigard - R. Lalhmachhuana s/o Jerry Rosangzuala, Zotlang; Lalrohlupuia s/o Lawmsangzuala, Melbuk; H. Lalrinpuia s/o H. Lalramnghaka, Venglai; Thangventluanga s/o MT Zasiama, Selam

MHIP FOOTBALL :
RL Neihkungi Memorial Football Tournament For Inter Branch MHIP 2018 Chhangphut Field a khelh mek chu vawiin hian Final khelh a zawhfel a ni dawn ta. he Tournament kharna inkhawm vawiin chhun dar 1:30 ah neih a ni ang a, Lalsiamliani, DPC, SSA chu khuallian niin inkhawm hi Lalbulliana, Hony. Secy CDFA in a kaihruai ang. Final hi Selam leh Zotlang ten an khel dawn a ni.

Comments