Skip to main content

Posts

Showing posts from 2019

KHUANGLENG VC HOUSE HAWNG

KHUANGLENG VC HOUSE HAWNG : Rashtriya Gram Swaraj Abhiyan (RGSA) sum Cheng Nuai 20 senga Khuangleng Panchayat Bhavan/VC House sak thar chu nimin khan Local Administration Department Director RS Lalzamliana'n a hawng. RS Lalzamliana chuan, Mizoram sawrkarin sawrkar laipui atangin nikum lamah VC House ti a hriat mai, Panchayat Bhavan thar 5 sakna tur Cheng Nuai 20 theuh leh a hlui 4 thawmthatna tur Cheng Nuai 4 theuh a hmuh zingah Khuangleng khua chu a tel tiha sawi a. District Headquarters pan kher ngai lo va, awlsam taka lehkha pawimawhte lakchhuah theihna hmun tura ruat, Community Şervice Centre (CSC) dinna tur thingtlang khaw 10 zingah  Khuangleng a tel avangin tun atanga reiloteah Panchayat Bhavan hmuna bunfel tum a ni a, ICT department nena inzaitawn zel tum a ni, a ti. Faina kawnga thingtlang khuate hmasawn chakzia chu fakin faina nunpui zel turin a fuih a. VC te chu rinawm leh taima taka khawtlang hmasawnna hna thawh te enkawl thin tura chahin, an hnathawh a zir zelin khawtl…

TRANSFORMER CHHIA

TRANSFORMER CHHIA : Kar hmasa Ningani atang khan Tuipui tum pump-na chawmtu Electric Transformer  chu a chhia, current in tui pump theih ani lo va. Diesel khawl chauhva pump anih bakah khawl hi a upat deuh tawh avangin dimdawi a ngai a. PHE dept chuan tui  duhtawk an pump thei lo niin an sawi a. Hei vang hian mipui hnena tui an sem thin aia tlema sem a ngai maithei a, mipui hriatthiamna an ngen tih thu kan dawng.

VAWK 3 KAPHLUM

VAWK 3 KAPHLUM : Nimin khan Champhai District chhunga dan lova Vawk lakluh 3 te chu kahhlum ani. Nimin chawhnu khan Champhai District chhunga dan lova Vawk lakluh 3 te chu CJM thupekin kahhlum ani a, hriselna lamaa nih dan tur ang thlapin nimin vek khan heng vawk 3 te hi phum nghal a ni. Heng vawkte hi Champhai District Magistrate in mun dang atanga vawk lakluh khapna thupek a chhuah dan dinglai anga Champhai Police-te'n Dungtlanga an man niin, Vawk neitute hi dan angin thubuai siam sak an ni a, vawk kahhlum tak te hi PRRS an vei ngei a ni tih hmuhchhuah a ni bawk. Champhai District DVO Dr. B Zonghinga chuan  Champhai District Magistrate in December  ni 5, 2019-a Ram dang leh State dang atanga Vawk, Vawksa leh Vawksa atang thilsiam lakluh khapna leh Champhai District atanga district dangah leh Khaw pakhat atanga khaw danga lak chhuah  khapna thupek a chhuah chu zawm turin mipui a ngen a, a ti lui mante chu dan anga hrem ngei an nih tur thu a sawi bawk.

DIALYSIS KHAWL LEH HDU HMUN HAWNG

DIALYSIS KHAWL LEH HDU HMUN HAWNG : Inrinni khan Health and Family Welfare Minister Dr R.Lalthangliana chuan Champhai District Hospital-ah Dialysis khawl leh ICU te deuh zawk, High Dependency Unit (HDU) chu hman mai theih turin a hawng. He hunah hian Health & Family Welfare Board Vice Chairman Dr. ZR Thiamsanga, Champhai North bialtu MLA ni bawk chu khual zahawm a ni. Hawnna puala programme, Champhai District Hospital-a buatsaihah Minister chuan khawl tha leh changkang tak. peihfel a nih theihna kawnga Chamkphai North leh South bialtu MLA te thahnemngaihna fakawm a tih thu leh, Champhai chu Aizawl atanga lam hla tak a nih mai piah lamah ramri dep hmun pawimawh tak a nih angin sawrkarin a ngaipawimawhin a thlahthlam loh thu a sawi a. Sawrkar thar din atanga hun reilote chhungin hmasawnna ruhrel tam tak neih belh mek a nih thu sawiin, Health Sector chu Chief Minister-in a ngai pawimawh hle a ni, a ti ICU kailawn pawimawh tak HDU leh Dialysis-te bunfel a ni a, Champhai District Hospi…

MINISTER IN A DEPARTMENT CHAN TLAWH

MINISTER IN A DEPARTMENT CHAN TLAWH : Inrinni khan Health & Family Welfare, Commerce & Industries leh Higher & Technical Department changtu Minister Dr R.Lalthangliana chuan Champhai leh Khawzawl District-a department a enkawl hrang hrangte tlawhin a enfiah.  Minister hian Inrinni zing khan Zokhawthara Land Custom Station leh Health Sub Centre-te tlawhin khawtlang hruaitute a káwm a. Myanmar ramri depa  awm sumdawnna hmunpui, Zokhawthar chu a awmna avangin khaw pawimawh tak a ni a, sumdawnna mumal zawk awm theihna tura buaipui a ni, a ti a. Land Custom Station chu tichangtlunga Integrated Check Post-a hlankai tum a ni a, hemi atan hian Central lam hotute pawh State Official-te nen a hmunhmate tlawha zirchiang tura a ngen tawh thu a sawi a. Mizoram chhim lamah Indo Mynamar mai bakah Bangladesh nena insumdawn tawnna tichangtlung thei tura ngaihtuahna sen zet a ni, a ti bawk. Zokhawthar khawtlang hruaitute'n mamawh an thlente a tul anga lo enpui a tum thu a sawi bawk. Min…

SYMA THUKHAWM

SYMA THUKHAWM : YMA Sub-Hqrs Champhai Executive Committee vawi 10 na chu Inrinni khan an President VL Chama Hnamte kaihhruain neih a ni. He hunah hian YMA General Conference vawi 72 na, N. Vanlaiphaia neih zawh tak thlirlet niin, Conference hlawhtling tak a nih thu leh hmasawnna tur awm te sawiho a ni a. Hruaitu hlun chawimawina hi hruaitu thlan hunah neih thin tawh ni se tih leh, General Conference na hmuna handloom dawr te, hmun dang leh hun dang aia to lo a zuar thin tura hriattir ni se tihte chu CYMA ah thlen ni se tiin an rel a. Hnam lam intihsiakna chungchang sawiho niin, Cultural Club te'n remchan zawkna avanga a hun thlak an dil chu -State Games leh zirlai second term exam a hnaih tawh avangin an rawtna ang hian a hun sawn nise tiin an rel. A hun atan December ni 17 ruat nghal niin, Hnam lam intihsiakna neih tura pawimawh tak tak te sawi hi a ni bawk.


LENKHANG HAL

LENKHANG HAL : Zirtawpni kalta zan, zanlai khan Khawbung Branch YMA te chuan an thu dawn bawh zuiin - Biate nena Tuipui lei bul an humhalh  huam chhunga lenkhang zar chu a hmunah kalin an sut a. Lenkhang zartute hi chan chhuah mai theih a nih loh avangin lenkhang hi a hmunah an hal ral nghal a. Lenkhanga sangha awk awm ang angte chu hmeithai, mahnia  khawsa Pi Runi hnenah an pe niin thu dawn a ni.

FREE WIFI

FREE WIFI : BSNL Company chuan Central Scheme hnuaia khaw tina wifi a thlawna pek tur chu an kalpui mek a. Champhai District-ah pawh wifi a thlawna mipui hman tur hi buaipui 'mek niin, khaw thenkhatah chuan hnathawh mek a ni a, Champhai khaw chhung thenkhat leh khaw veng pawn lamah te an vuah mek ani. Champhai leh Khawzawl District chhunga khaw 20 velah wifi hi vuah turin hma lak mek a ni a, December thla ah tun aia tam zawk a rawn chhuak leh ang a, kum tharah chuan khaw thenkhatah wifi hi hman theih tura ruahmanna kalpui mek a ni.

RUIHHLO MAN

RUIHHLO MAN :  Champhai Excise & Narcotics Enforcement staff te chuan Inrinni khan Tiau panna kawng, Ruantlang ram chhungah Heroin hawng 43, gram 450.8 chua neitua puh  Vanlalrammawia kum 27 s/o Ralkapchhunga, Ruantlang Mualveng man a ni a. Inrinni vek khan Melbuk ah 8 Assam Rifleste nen tangkawpin, Zokhawthar atanga lirthei lo kal an enfiahna lamah Heroin Hawng 9 leh a neitu a puh, Malsawmdawngkima, Champhai Electric Veng nia inchhal an man bawk a, an mi mante hi ND & PS Act tlawh chhanin thubuai siam sak an ni. Ruihhlo an man hi tualchhung

hralhnaa chhutin Rs. 15,60,000 man a ni.

BIAK IN THAR HAWNG

BIAK IN THAR HAWNG : Salvation Army, Tlangsam Biak in chu Inrinni khan India Eastern Territorial Commander, Commissioner Lalzamlova chuan a hawng. Hetihlai hian Salvation Army, Tuichangral Sipai Pawl inkhawmpui chu Zirtawpni atanga nizan thleng khan Tualte-ah neih a ni a. Tuichangral huam chhungah hian C.O bial 8 an awm a ni.

PAVALAI PAWL MEET

PAVALAI PAWL MEET : Vengsang Kohhran huam chhunga Pavalai Pawlte chuan Inrinni zan atanga nimin, Pathianni thleng khan Vengsang Kohhran Biak Inah, Vengsang Pastor Bial Pavalai Meet vawi 6 na an hmang a. Meet thupui  atan, 'I ram lo thleng rawh se,' tih an hmang a ni.

TLEIRAWL HARSATNA NEITE TANPUI TURIN RKSK AWM TA

TLEIRAWL HARSATNA NEITE TANPUI TURIN RKSK AWM TA : Rashtriya Kishor Swasthya Karyakam (RKSK) buatsaihin nimin khah Adolescent Health Day 2019 hman a ni. He hun hi I&PR Auditoroum, CHANEM-ah neih niin Dr. R. Lalawmpuia, CMO chuan Adolescent Clinic Hospital ah hawn a nih thu leh kar khatah vawi 2 Counsellor an thu thin tih a sawi a. A thlawnin kar khat chhunga heng ni 2 chhung hian tleirawl,  taksa inthlak danglam avanga harsatna nei te tan pan theih reng an ni tih a tarlang a. Tleirawl an nih lai atanga an hriselna tur an ngaihtuah that chuan an puitlin hun thlengin an hriselna a that phah thei a ni, a ti. RKSK hian ei leh in bakah mipat/hmeichhiatna chungchanga inzirtirna te, tharum thawhna tihtawpna tura inzirtir leh ruihhlo hman sual laka inven dan te chu an tum lian tak a nih thu leh he an tum hian thingtlang kilkhawr ber a huam tih a sawi. Dr. R. Lianmawia, DMO chuan Adolescent Health Day an hman chhan chu, tleirawlte hriselna chawi kan a nih theihna tura hmalak a nih thu a sa…

CHILDREN'S WEEK KHAR

CHILDREN'S WEEK KHAR : District Child Protection Unit leh District Legal Services Authority-te tangkawp buatsaih Children's Week hman mek chu nimin khan Kahrawt Community Hall-ah khar a ni a. He hunah hian Lalrochami Ralte, Chief Judicial Magistrate chu khuallian a ni Khuallian Lalrochami Ralte, CJM chuan Naupangte chu India ram danin a humhalh tlat thu sawiin, hna thawka chhawrte, kutdawhtir leh an chunga hleilenna ang chi reng reng thlentir chu dan kalh tlat a ni a, hetiang tiluite chu na taka hrem theih an ni, a ti a. Naupangte chu lsuan a hmangaih em em te an nih avangin anmahni enkawla  venhim chu puitlingte mawhphurhna a nih thu a sawi a. Naupang thil tisual an awm pawhin Jail-ah dah mai lovin an insiamthatna turin Home-ah dah an nih thin thu sawiin, naupan laia harsatna leh tawhsual lo tawk tawh mi ropui leh hlawhtling tak takte a tarlang a. Naupangte chu an chungah eng harsatna pawh lo thleng beidawng lova Pathian hnena  tawngtai thin tura fuihin, tawngtaina chu beidaw…

FREE CLINIC

FREE CLINIC : MED AIM Hospital chuan Hospital Building thara an insawn hnuah an Building awmna New Champhai mipui tan nimin khan Free Clinic an buatsaih a, Damlo 76 lai an inentir. Damdawi thenkhat a thlawna an sem bakah Laboratory Test thenkhat a thlawnin an ti bawk.

PISA KAI TUR DANG

PISA KAI TUR DANG : Federation of Mizoram Samagra Employees (FEMSE) ten dinhmun tha zawk nawrna an huaihawtah nimin khan RMSA leh SSA pisa kai turte an dang a, boruak duhawm lo thleng a awm lo. Hei bakah hian tun thla ni 25 thleng hian mass Casual leave an la a. FEMSE Champhai District chuan November ni 21-25 chhunga mass casual leave an lak turah FEMSE Champhai District hnuaia  pawl hrang hrang MIREWA, MSSTA, MISIA, SRPAM member-ten an rorel tha taka an bawhzui vang leh nimin an hmalak  bultannaah lungrual taka ke an penho avangin lawmthu a sawi Hetihlai hian Champhai SDEO chuan  FEMSE hmalakna avanga nimina Casual  Leave la zirtirtu, mahni thawhna hmuna kal lo zawng zawngte chu chhinchhiahin, sorkar hotulu zawkte hnenah a thawn thla dawn niin thu kan dawng.

MLA RAWN KAL DAWN

MLA RAWN KAL DAWN : Champhai North bialtu MLA, H&FW Board vice chairman Dr ZR Thiamsanga chuan naktuka Health Minister-in District Hospital, Champhai-a Dialysis Unit leh HDU a hawn tura tawiawm turin zanin hian Kawlkulha zan riak turin Aizawl a rawn chhuahsan ang a. Naktukah Champhai rawn thlengin, Minister hi a tawiawm ang a, Inrinni chawhma, Dialysis Unit leh HDU hawnna hun a hmanpui hnuah, Minister-in Champhai College a tlawh a tawiawm hnuah Aizawl panin a kir thla leh ang.


NAUPIANG 9% THI

NAUPIANG 9% THI : Nimin khan Reproductive & Child Health (RCH) chungchang Half Yearly District Review Meeting neih a ni. He hun hi-CMO Conference Häll-ah Dr. R. Lalawmpuia, CMO kaihhruaia neih niin CMO chuan Champlhai District chhunga PHC, CHC, District Hospital, Sub Centre-a thawktute hnathawh chu fakawm a tih thu leh thahnem ngai taka an bial mipui tana ke an penchhuah thinnå-ah lawmthu a sawi a. Mipui rawngbawltu an ni tih inhre thar zel tura chahin duhsakna a hlan a ni. C.Lalramengi, DPM chuan kum 2018-2019 chhunga an hmalaknate a tarlang a. Kumin April ni 24 atanga September ni 24 chhunga nau piang leh thi zat a tarlang a. Health Centre leh Sub Centre hrang hrangte chu nau chhar tura beisei an nih dan leh Centre tina an beisei zat ngaihthlak a ni a, nau chhar tam Centre te tan hamthatna awm te a tarlang nghal bawk. Champhai District chhungah hian District Hospital 1, PHC 11, CHC 2, DH 1, Sub Centre 59 leh Sub Centre Clinic 23 te a awm a. Heng hmun atang bakah Home atangin Apr…

CHAMPHAI NORTH STATE GAMES NEI TURIN INBUATSAIH

CHAMPHAI NORTH STATE GAMES NEI TURIN INBUATSAIH : Thawhlehni khan Mizoram State Games 2019, 23-Champhai North A/C Committee te chu an thukhawm. He thutkhawm I&PR Conference Hall, Chanem Building-a neih hi Working Chairman Alex V Chawngthu chuan kaihruain Discipline thenkhatte'n an sum mamawh an report belhte chu pawmsak an ni a. Fund Raising Committee Chairman hnen atangin sum pek chhuah tawh zat leh pek chhuah leh dan turte ngaihthlak a ni a. Joint Secretary hnen atangin hmalak tawhna hrang hrang ngaihthlak a ni bawk. November ni 22 a meeting-on Sucessful Implementation of Mizoram State Games 2019, Sport Minister hova neih turah Chairman aiawhin Paul Zakhuma kal tura ruat a ni a. OB post siam remin Sr. Vice Chairman atan Lalnunmawia ruat a ni bawk. Nov. ni 22, Zirtawpni hian Mizoram State Games inbuatsaihna atan Constituency Meet neih tur niin, Athletics tan Zotlang Stadium-ah neiin, Indigeous Games Hmunhmeltha field-ah neih tur a ni ang. Infiammi khualkhua atanga kalte chu Т…

HMAICHANAH MZP IN HEALTH MINISTER HMU DAWN

HMAICHANAH MZP IN HEALTH MINISTER HMU DAWN : Niminpiah khan MZP Hqrs Champhai leh Students' Union Govt Champhai College te College zirtirtu indaihlohna chungchangah thukhawm hmanhmawh an nei. He thutkhawm hi H.Lalramhluna, President MZP hqrs chuan kaihruai a, Mizoram sawrkar in College dang ruala Govt Champhai College-a contract-a zirtirtu thawk pahnih a sawn te, College dang- zawng an dahlet sak hnu leh ngenna Nov.6, 2019 a an thlen chunga dah let kim an ni lo chu pawi an ti tak zet a. Tunkara Higher & Technical Education Minister lokal tur hi hmaichhana hmuh a, Champhai College zirtirtu indaih lohna, a hma atanga sorkar a an lo thlen tawh te hnawhkhat thuai tura lo ngen ni se, an ti. Hei bakah hian Economics dept a indaih lohna pawh hnawhkhat a, khawtual mi qualify ngei te la tura ngen ni se tiin an rel bawk. MZP Champhai hian tun thla ni 6 khan School education Minister hnenah Champhaia TET Exam centre hawng tura ngenna an lo thlen tawh a, a hlawhtlinna hmuh ngei an beisei …

DHO AH HLANGKAI

DHO AH HLANGKAI : Assembly Session neih mekah Champhai North MLA Dr ZR Thiamsanga zawhna chhangin Chief Minister leh Horti. Deptt. changtu Zoramthanga chuan Champhai SDHO Office chu DHO a hlangkai turin GAD atanga a thuphunga phálna hmuh a ni tawh tih a sawi

RAMSA KHAUH ZAWKA HUMHALH TUM

RAMSA KHAUH ZAWKA HUMHALH TUM : Nimin khan District Wildlife Crime Control Sub Unit, Champhai District chu an Chairman SP Rex Zarzoliana Vanchhawng, hovin SP Pisa ah an thukhawm. He thutkhawmah hian Champhai District chhunga ramsa humhalhna kawnga hma lak dan tur kawng hrang hrang sawiho a ni a. Police Station leh Police Outpost hrang hranga Wildlife Crime Squad lo din tawh chu a tul anga siam rem a, dinthar leh ni se tiin, heng Squad te hi a tam thei ang ber duty in chhuak thin se tiin an rel a. Air Gun leh silai dang hmanga sava veh leh ramvak lo turin mipui an ngen a, nungcha te humhalh kawnga hmalakpui turin Kohhran, tlawmngai pawlte bakah mipui an ngen nghal a. Dan pawisa lova ramsa kap lui emaw an awm a nih chuan Dan anga an chungah hremna lekkawh a ni ang tih an tarlang a. Ramngaw leh nungchate humhalhna dan bawhchhetute manchhuah leh hrem an nih theihna tura report pe tute leh Dan bawhchhetute manchhuah an nih theihna tura puitute hnenah lawmman Cheng Sing 2 thleng pek an nih …

HEALTH MINISTER IN HAWNG DAWN

HEALTH MINISTER IN HAWNG DAWN : Health Minister Dr R.Lalthangliana chuan tunkar Inrinni chawhma dar 10:30 khian District Hospital, Champhai-a Dialysis Unit leh HDU chu a hawng dawh a Minister hian Zokhawthar Sub-Centre, Govt Champhai College bakah a haw pahin Govt Khawzawl College leh Damdawi in a tlawh bawk ang.

BETHEL KṬP FLIM SIAM THA BER

BETHEL KṬP FLIM SIAM THA BER : Project HIMNAMADAT hnuaia Kohhran thalai intihsiakna chu nimin khan endik a ni. Nimin khan Upper Primary School chin chunglam zirlai thalaite ruihhlo leha kaihhnawih hrang hrang laka an fihlim theihna tura zirtirma Project HIMNAMADAT kaltlanga Undivided Champhai District chhunga kohhran hrang hrang thalaite tana lemchan tawi insiamsiak chu Chairman Alexander V.Chongthu, Addl DC Champhai hova endik a nia. Endik tura ruat Sub-Committee chuan kohhran thalai hrang hrangte buatsaih lemchan tawi Video 10. te NIC Conference Hall-a a endik hnuah Bethel Branch KTP Champhai lemchan 'Lo him ang che' tih chu pakhatna atan an thlang a. Vengthlang Branch KṬP, Champhai lemchan 'Hnehna' chu pahnihna niin, AYM (Adventist) Champhai Bethel temlemchan chu 3-na a ni. Pakhatna hian Cheng Nuai 1,2-na hian Cheng Sing 7 leh Pathumna-in Cheng Sing 5 an dawng dawn a. Heng bakah hian he. inelna huanga tel dang Kohhran thalai pawl 7 te hnenah ParticipationnPrize pek …

ZOKHAWTHAR KALTLANG BUNGRUA KHAILAK HRIH DAWN

ZOKHAWTHAR KALTLANG BUNGRUA KHAILAK HRIH DAWN : Ni hnih chhung atan Indo Myanmar Border trade chu khar a ni dawn. Indo-Myanmar Border Trade Point-a duty-ten kumin September ni 7-a Myanmar lam atanga kuhva ro lakluh tur an dan hnuin, Thinghmarcha lakluh mek chu kal thei lovin dan a ni leh a Nimin leh vawiin bik atan helai hmuna insumdawn tawnna bungrua eng chi pawh ram chhunga lakluh theih lohin an dang leh dawn. Assam Rifles te chuan hotulu zawk atanga thu an dawn bawhzui a hma la an nih thu dawn a ni a. Hunpui lo thleng turah sumdawngten bungrua an lakluh hun laia bungraw lakluh hleih theih loha dan a ni thin hian ramrí hrul a mi te mai bakah mipui nawlpui lakah nghawng a nei thin a. Helai hmuna ram pahnih insumdawn  tawnna hi pangngai taka kalpui tura tih a nih tawh vangin danin a phal chin bungruate chu Zokhawthar  kaltlang hian lakluh a ni a. Nitin eichawp chi hrang  hrang, thlai leh theirah te lakluh a niin, thawmhnaw chi hrang hrang, insakna bungrua leh Motor spirit thlengin cha…

A VAWIKHATNAN CHILDREN'S DAY ROPUI TAKIN HMANG

A VAWIKHATNAN CHILDREN'S DAY ROPUI TAKIN HMANG : Naupangte pual hapta hmannakal zelah nimin khanbDistrict Child Protection Unit leh District Legal Services Authority, Champhai tangkawp buatsaihin, Children's Park, Kahrawt-ah Champhaia a hmasa ber tur Children's Carnival chu buatsaih a ni. Children Carnival hawnna hunah hian Rex Zarzoliana Vanchhawng, Superintendent of Police Champhai chu khual lian niin Children Carnival hi a hawng. Lalrochami Ralte, Chief Judicial Magistrate chu khualzahawm niin   Champhai Bawrhsap SL Naveen, IAS chu Carnival Pa, Father of Carnival a ni. Khuallian Rex Zarzoliana Vanchawng chuan Children Carnival hmang tura kalkhawm, naupangte chu hlim fo thin tur leh thuawina nunpui thin turin a chah a. Nakin lawka ram leh hnam innghahna tur mipuitling tak tak ni thei tur chuan taima taka lehkha zira tul a ni tiin, naupangte chu zirna ngaipawimawh hmasa fo turin a chah a ni. Carnival Pa Champhai Bawrhsap SL Naveen pawhin thu sawin, naupangte hmakhua ngaia…

HMEICHHIATE VENGHIM DAN ZIR

HMEICHHIATE  VENGHIM DAN ZIR : Niminpiah khan Champhai Police te chuan District Crime Review Meeting an nei. He meeting, Champhai District SP Rex Zarzoliana Vanchhawng hova neihah hian Champhai District chhunga thubuai ziahluh pending-te thlir leh zirho a ni a. Champhai khawpui chhung lirthei tlan dan ennawn mekin a tul anga ruahmanna siam mek a ni a, hei bakah hian zu rui chunga lirthei khalhte chungah dan anga thubuai siamsak zel tura rel a ni bawk. Meeting-ah hian Champhai District chhunga SDPO, Police Station OC leh Case l/0 te an tel tha hle a ni. January atanga October thla thleng khan thubuai 146 ziah luh niin, heng zinga 26 te chu Special report Case (serious case) a ni a. Nikum 2018 January atanga October thla chhungin thubuai 186 ziah luh niin, nikum aiin kumin hian za zelah 21.5 in thubuai ziah luh hi a tlem zawk a. Kumin October thla thleng khan ND&PS Act hnuaiah thubuai 43 ziah luh niin, MLPA hnuaiah thubuai 18, Inrawk thubuai 15 leh Rukruk thubuai 10 ziah luh a ni.


IN TIKANGTU MAN

IN TIKANGTU MAN : Inrinni zana Champhai Kahrawt Venga in 3 kanga mawhphurtu-a puh chu nizan hmasa khan Champhai Police-ten an man. Inrinni zan dar 8:30 vela Champhai Kahrawt venga in pathum kang chungchanga mawhphurtu-a puh Lalnunpuía s/o HD Lianngenga, Champhai Kahrawt chu nizan hmasa khan Champhai police-te chuan an man a. Champhai Police-te hnena Lalnunpuia sawi danin Inrinni zan khan. anmahni dawr Petrol leh Artui zawrhnaah hian lutin Artui Case khat a lak ruk hnuah Petrol ruk tum lehin a petrol ruktumna lama a Lighter talh alhin Petrol hi man kaiin kangmei hi chhuak ta niin a sawi niin thu dawn ani. Lalnunpuia hi Champhai Police Station-ah thubuai siamsak niin, nimin khan. Champhai District Jail-ah dah luh nghal a ni.


RUIHHLO MAN NUAL

RUIHHLO MAN NUAL : Thawhtan chawhnu khan Champhai Excise & Narcotics Enforcement Staff te chuan Hruaikawn peng, Zokhawthar Road-ah heroin hawng khat (13.7 gms) leh a kengtu Lalramhluna (30) S/o K.Rotluanga (L), Vengthlang North, Champhai leh Lalmuanpuia (28) S/o C.Rokima, Bethel. Veng, Champhai te chu an man. An thil man hlutzawng hi tualchhung rate-ah Cheng 30,000. a ni. An mi man te hi nimin khan District Court, Champhaiah hruai an nih hnuin District Jail, Champhaiah dah luh an ni.

CDFA CUP KHEL TAN

CDFA CUP KHEL TAN : Nimin atang khan Chhangphut Field ah CDFA Cup chu khelh tan a ni a, team 15 an tel a. Nimin khan inkhel tum 3 a awm a, vawiin hian tum 3 bawk khelh leh an ang. Nimin inkhel result leh vawiin inkhel turte chu: Nimin result: Kahrawt 1-0 Zotlang Vengthlang 6-2 North Khawbung Murlen 1-0 Ngur Vawiin inkhel tur: 10:30am Venglai FC vs Vengthlang FC II 12:45pm Zote FC vs Mualkawi 2:15pm Dinthar FC vs Vengthlang North

MJA LEH DC INKAWMNA HUN HMANG

MJA LEH DC INKAWMNA HUN HMANG : Nimin chawhma khan Champhai Bawrhsap thar SL Naveen, IAS chuan a Pisa-ah Champhai District MJA Member-te a kawm a, MJA-te ngenna bawhzuiin, Zokhawthar World Bank Road kawngpui siam mek dinhmun. chu vawiina a pisa-a kal a, a hnena hrilh turin kawng siamtute chu a hriattir nghal a. Keilungliah khuah chungchanga hmalakna pawh ngaihven a, a tul anga hma la zui turin Additional DC chu a hrilh nghal bawk. Bawrhsap SL Naveen chuan Sawrkar thuchhuak leh hmalakna hrang hrangte mipuite'n an hriat zel theihna turin Chanchinbumite tawiawmna a ngen a. Sawrkar chu amah maia kal thei a nih loh thu sawiin, Media, NGO leh district mipui te puihna leh tawiawmna a mamawh fo a ni, a ti a. Chanchinbumite chu sawrkarin a mawmawh leh puih a ngaih hun pawha biakpawha banphak maia awm thin turin a chah nghal bawk a ni. MJA Champhai District member-te chuan Champhai Bawrhsap tharin a hun remchang neih hmasa berah Chanchinbumite ngaipawimawha lenga a sawm chu lawmthu sawiin, …

LEGAL AWARENESS TRAINING NEI

LEGAL AWARENESS TRAINING NEI : Nimin kan Champhai Forest Division leh Khawzawl Wildlife Division Staff te tan Legal Awareness Training neih a ni a, Lalrochami Ralte, Chief Judicial Magistrate, Champhai chuan khual lian niin a hmanpui. Thu sawiin khual lian Lalrochami Ralte chuan India Danpui Article 48 leh 51 (a) in mitin te chu Ramngaw humhalh tur leh Environment chhe tur veng tura a phut thu a sawi a, Forest Deptt a thawk an nih vang ringawt a ramngaw humhalh tur ni lovin khua leh tui an nihna anga an tih tur pawimawh tak a nih thu leh mitin tih tur a ni tih a sawi a ni. Wildlife Act leh Environment Act te hian kan ram chhe mai tur leh chereu mai tur a veng. Ramsa, thing leh mau te humhalh tura Dan hrechiang a, an hna hlen zel tura a duh thu a sawi. Nungcha humhalh kawngah Kohhran leh Khawtlang anga hmasawnna leh hmalakna awm chu lawmawm a tih thu a sawi. Global Warming avanga buaina leh harsatna nasa tak an tawh mek thu a tarlang a, sik leh sa danglam avanga chhiatna a thlen zel lo…

CHILDREN'S CARNIVAL

CHILDREN'S CARNIVAL : Vawiin Children's Carnival hman a nih dawn avangin Champhai SP chuan thupek chhuahin, tukin dar 7:00 atanga tlai dar 5:00 inkar chhungin Children's Park, Kahrawt pan thlakna kawng leh Dawrkaikawn atanga helai pan chhohna kawngpui chu No Entry atan a puang a. Vengthlang atanga Vengsang, Hospital pan tur tan kawngpui pangngai (one way) zawh theih a ni ang a. Vengsang, Hospital atanga Vengthlang pan turte tan Vengsang Presbyterian Biak in kawt atangin LAD Office, Kahrawt hrula pheiin, Kahrawt Presbyterian Biak in hrul chhuah lama her liamin Dawrkaikawnah chhuah thlak tur a ni ang.


THUKHAWM DAWN

THUKHAWM DAWN : Vawiin chhun dar 12:00 hian Champhai North A/C Committee chu I&PR Conf. Hall, CHANEM ah an thukhawm dawn a. Thla thara Mizoram State Games neih tura Champhai North huam chhunga hmalakna chungchang leh pawimawh dangte an rel ang.

CDFA CUP TAN A NI TA

CDFA CUP TAN A NI TA : Champhai District Football Association buatsaih CDFA Cup chu vawiin atang hian Chhangphut Field-ah khelh tan a ni dawn a. He inelna neih turah hian team 15 an tel dawn a, a chaklo apiang tlak nghal zel a ni dawn a. He inkhel hi Karleh Nilaini khian final khela zawhfel tura ruahman a ni

SAREP MAN HALRAL

SAREP MAN HALRAL : Environment Forest and Climate Change, Champhai Range Staff ten ramsa rep an mante chu Champhai DFO Pisa tualhah khai 20 hal ral a ni. He hunah hian DFO Lalduhthlana chuan Nungchate humhalhna dan tha tak a awm thu leh nungchate that emaw an sa zawrh leh ei hi dan in a phal loh thu a sawi a. Dan bawhchhetu mi pahnihte chu danin a phut anga hremna  рe a, pawisa chawitir an nih bakah ramsa rep man takte pawh halral anih thu a sawi a ni

CHHUNGKAW 2 LUAHLAI IN KANGRAL

CHHUNGKAW 2 LUAHLAI IN KANGRAL : Inrinni zan dar 7:30 - 8:00 bawr vel khan Champhai Kahrawt Veng, Dawrkaikawn ah Assam type in, chhungkaw pahnih luahlai chu bungraw engmah chuh hman lohin a kangral a, vanneihthlak takin thi leh hliam an awm lo. Kangmei chhuah chhan hi hriat a ni lo va, Artui leh Petrol zawrhna Dawr atanga kangmei hi intan nia hriat a ni. Mei hi a chak avangin mi in luaha cheng mek, Pu Thansanga te in a kan hian bungrua engmah chuh hman a ni lo va, an in hnuaia Thingzai zawrhlai remkhawm erawh vanneihthlak takin a kangchhe lo thung. Hetihlai hian Pu Thansanga te nena bang insi renga awm, mi in luaha khawsa mek Pu Hrilliana in pawh bungrua engmah chuh mumal hman lohin a kangkai nghal bawk. Kangmei chhuak hi hriat a nih ve leh mi tlawmngaiten a theih ang angin thelh an tum nghal a. Kangthelh motor pahnih ten in kanna hmun an thlen zui ve bawk avangin in dang kangkai zel lovinzan dar 9 vel khan thelh mih a ni. Champhai Police hotute sawi danin, he kangmei chhuak avang hia…

CHAMPHAI TKP TEN THISEN AN PE

CHAMPHAI TKP TEN THISEN AN PE : Baptist Kohhran Thalai Kristian Pawl, Champhai Pastor bial chuan Inrinni khan Champhai District Hospital blood bank-a dah turin thisen Unit 22 an pe. Blood Donation Camp neih hma hian Champhai District Hospital Blood Bank kawtah hun hman a ni a. Dr RE Lalremruata chuan thu sawiin, thisen pek chu mi hrisel pangngai tan chuan hlauhawm loh a, hrisel tha turin nun uluk leh invawn a tul tih a sawi a. Mithiamte chhut danin thisen unit khat hian nunna pathum a chhan thei a, a mamawhtu an pun zel avangin a thlawna thisen pek chu uar zel a ngai tih a sawi. Kohhran thalaiten thisen pek an ngai pawimawh chu lawmawm a tih thu sawiin, thalaite chu Kohhran bel turin a sawm a. Mizoram-a AIDS hluar mek, Champhai District phei chu a vei tam lama pakhatna a nihnaah fihlim thei tur chuan Kohhran bel a, Pathian lam hnaih a tul a ni, a ti.

RUIHHLO VANGIN THUBUAI 80 ZIAKLUT

RUIHHLO VANGIN THUBUAI 80 ZIAKLUT : Champhai Excise and Narcotics Deptt chuan kumin chhungin ND&PS Act hnuaiah thubuai 80 an ziak lut tawh. Kumin January thla atanga October thla chhung khan Champhai Excise & Narcotics deptt chuan ND&PS Act hnuaiah thubuai 80 ziak lutin mi 93 an man tawh a, Heroin Gram 2938.90 man tawhin Metamphetamine mum 56,964 an man tawh a, Cough Syrup 18, an man tawh bawk. MLPC Act hnuaiah kumin chhungin thubuai 209 ziak lutin mi 190 an man tawh a, Rakzu litre 5204.370 man tawhin Zu bilh lai tin 2035, Dawidim Gram 417.600 leh zu bilhna hmanrua, Pot 159 an man tawh bawk. Beer bottle 6, Ram dang Zu bottle 326 leh Ram dang Beer um 7 bakah Beer Canned 1610 an man tawh a, Apple Juice um 2640 an man tawh bawk a, Ruihhlo phurhna atana man lirthei ke pahnih nei 5 leh LMV 15 an man tawh bawk. Champhaia Excise & Narcotics Enforcement staff te chuan Zirtawpni tlai lam dar 3:00 khan heroin grams 6.5 leh a kengtu Lawmsangpuia (18) s/o Lalrinenga (fam), Tlangsa…

CHAMPHAI KANAN WELFARE TEN ZU LEIHBUA

CHAMPHAI KANAN WELFARE TEN ZU LEIHBUA: Champhai Kanan Welfare chuan thla hnih chhunga an veng chhung leh a chheh vela Zu chi hrang hrang an mante Inrinni khan an leihbua a. Zu sakna bungbel tam tham tak an man bakah Zu tin 20 sak mekna hmun an tichhe bawk. Zu leh a sakna bungbel an mante hi neitu awmlo a nih hlawm avangin sorkar thuneitute kutah hlan lovin Welfare chuan leihbua niin Welfare Chairman Lalremmawia chuan a sawi. Zu chi hrang hrang an leihbuak leh a sakna bungbel an man hlut zawng hi Cheng 50,000 chuang a nih thu Kanan Welfare hruaitute chuan an sawi. Champhai Kanan Veng then thianghlimna tur hian VC, NGO hrang hrang leh Kohhran tangkawp-ten Welfare dinin, Zu leh Ruihhlo vaiin hma an la mek zel a ni.

PIPU SULHNU THEIHTAWPIN HUMHALH TUM

PIPU SULHNU THEIHTAWPIN HUMHALH TUM : Vangchhe Branch YMA te chuan an khaw bula hmuhchhuah, pipute sulhnu, dik lo taka her danglam tumna a awm a nih chuan theihtawpin hma an la zel dawn tih an sawi. Vangchhe Branch YMA hruaitute chuan an khaw bula pipute sulhnu chungchangah Pathian thu hriltu thenkhat leh Social media lama ASI hmalakna thenkhat zeldin thubawla mipui rilru hruai sual thei leh Vangchhe Branch YMA-te thu dik tawk loa puhna awm chu pawi an tih thu an sawi a. An khua, Vangchhe khaw bula mihring sulhnu hlui chu Mizo pipute sulhnu ngei a ni, an ti a. Hnam dang ziarang nen zirkawp ngai leh a inlaichin dan zirchian ngai a ni tih an pawm laiin, dik lo taka her danglam tum a nih erawhchuan a tawp thlenga dodal an tum thu an sawi. India rama mihring sulhnu pawimawh Kawtchhuah ropui awmna Vangchhe khuaah hian mihring 1060 chengin, chhungkua 175 an awm męk a ni.


YMA CONFERENCE NEI TURIN INBUATSAIH TAN

YMA CONFERENCE NEI TURIN INBUATSAIH TAN : Nakkum Sub Headquarters YMA Champhai Conference Organising Comtt chu Inrinni khan Khuangthingah neih a ni. Committee hi an Chairman Vanlallianzuala'n a kaihruai a, YMA Conference thleng tura hmalakna tur ruahmanna chi hrang hrang siam a ni a. Pandal sakna hmun turte ruat fel a ni a, pandal hi Khuangthing G& SA playground-ah sak ni se an ti a. Pandal len zawng hi a dung 120ft leh 60ft а vang a sak ni se an ti. Organising comtt chuan pandal sub comtt kutah sum hmahruai Cheng Sing 5 pek phawt ni se tiin an rel a. Organising comtt hnuaiah hian sub comtt peng hrang hrang 12 ten chak taka hma lak mek a ni bawk.

VENGCHHUNG THIANFAI

VENGCHHUNG THIANFAI : Vengsang Presbyterian Kohhran hnuaia Social Front te chuan Kohhran hriatpuiin Sunday School-a Junior Department chin chung lamte chu Inrinni khan an hnatlanpui a, Vengsang huam chhungah insem darhin khawlai dunga bawhhlawh awmte chu an chhar fai a, a paihna hmunah an dahkhawm a ni.

BEDC TLAWN 100 MAN

BEDC TLAWN 100 MAN : Vangchhe Branch YMA te chuan kar kalta khan pa hmei, dam lohnain a tlak buak mek chu a buh an vuak sak a, hemi rual hian dam lohna avang bawka buh seng mumal thei lo, chhungkaw pakhat buh chu an zai sak bawk. Vangchhe Branch YMA leh VDP tangkawpte chuan Burma zu BEDC Myanmar lam atanga rawn lut tur, tlawn 100 chu manin an hal ral bawk a, heng zu te hi tualchhung hralhna anga chhutin Cheng Sing 5 man a ni.


CHAMPHAI DISTRICT COURT P.I. ROOM RAWKTU NIA RIN MAN

CHAMPHAI  DISTRICT COURT P.I. ROOM RAWKTU NIA RIN MAN : Champhai Police, District Executive Force in thuchhuah an siam dan chuan Ni 9.11.2019 (Inrinni) zan a District Court, Champhai P.I. room chu mi tu tih hriat lohin a kalhna kawngkapui tala kar chhiain, a chhunga Steel almirah pakhat la chhuakin, kar hawn a ni a,  a chhunga thubuai file chi hrang hrang leh documents pawimawh tak tak District Court daiah ah hal ral a ni a. Tin, hemi zan vek hian Champhai District Court Canteen kawngkapui kalhna tala kar chhia in, rawk a ni bawk a, hemi chungchangah hian Champhai Police Station ah thubuai ziah luh nghal a ni. (CPI-PS C/No 121/19 Dt.10.11.2019 U/S 457/380/435 IPC & CPI-PS C/No 122/19 Dt.11.11.2019 U/s 457/380 IPC). He thil thleng chungchang ah hian Enquiry/Investigation ulauk taka kalpui a ni. Special Investigation Team (SIT) SDPO, Champhai kaihhruaina in din a ni bawk. Police te chuan thil tisualtu hi man tumin  theihtawp  an chhuah a, Dt.15.11.2019 (Friday) hian Champhai Police …

NU LEH NAUPANG VACCINE PEK DAN TUR REL

NU LEH NAUPANG VACCINE PEK DAN TUR REL : Nimin khan Champhai Bawrhsap SL Naveen, IAS kaihhruaiin District Task Force for Immunization chu an thukhawm a, Intensified Mission Indradhanush (IMI) thawh hnihna kalpui dań tur leh Vaccine pek vanga thil duhawm lo thleng thei laka hmalak dan turte rel a ni. Bawrhsap chuan Naupang leh Nu naupaite hriselna kawnga rahbi pawimawh hmasa leh pawimawh tak natna laka lo invenlawkna Vaccine-te a bikima hunbi nei thlapa lak a ngaih thu sawiin, vaccine la thei zawng zawngte chu ngaipawimawh turin a chah a. Intensified Mission Indradhanush tluang taka kalpui a nih theihna tura thawktu leh line department hrang hrangte intawiawmna fakin, hmabak la awmahte pawh tha taka thawkho zel turin a chah a ni. District Task Force for Immunization tarlan dan chuan tun dinhmunah Undivided Champhai District-ah Naupang kum hnih hnuai lam 5460 leh Nu naupai 1525 an awm mek a. IMI thawh hnihna hmang hian vaccine la ngai lo, la chhunzawm thei lo emaw, hmaih palhte tan vacc…

CHAMPHAI OPEN BADMINTON TOURNAMENT KHAR FEL TA

CHAMPHAI OPEN BADMINTON TOURNAMENT KHAR FEL TA : CDBA in a buatsaih Champhai Open Badminton Tournament chu nimin khan Final khelh niin khar ni. Kharna hun hi C.Hualdingpuia, Vice President, CDBA chuan kaihruaiin, Lalnunmawia, Chairman Champhai District Sports Committee hnen atangin thusawi ngaihthlak a ni. Champhai Open Badminton Tournament hi Thawhlehni khan khelh tan a ni a, Category hrang hrang 7 siam niin, heng Category hrang hrangah hian inel a ni. Tournament.chhung hian Match 95 an khel a, khual khua atangin Vangchhia Badminton Club leh Kawlkulh Badminton Club te chu he Tournament ah hian an tel a, Player 132 an tel a ni.

KAR LEH THAWHLEHNI AH CHILDREN'S CARNIVAL

KAR LEH THAWHLEHNI AH CHILDREN'S CARNIVAL : Karleh Thawhlehni-a Kahrawta Children's Carnival hman a nih dawn avangin Champhai SP chuan thupek chhuahin, hemi ni zing dar 7:00 atanga tlai dar 5:00 inkar chhungin Children's Park, Kahrawt pan thlakna  kawng leh Dawrkaikawn atanga helai pan chhohna kawngpui chu No Entry atan a puang a. Vengthlang atanga Vengsang, Hospital pan tur tan kawngpui pangngai (one way) zawh theih a ni ang a. Vengsang, Hospital atanga Vengthlang pan turte tan Vengsang Presbyterian Biak in kawt atangin LAD Office, Kahrawt hrula pheiin, Kahrawt Presbyterian Biak in hrul chhuah lama her liamin Dawrkaikawnah chhuah thlak tur a ni ang.


DIET AH TOBACCO CONTROL CELL IN HUN HMANG

DIET AH TOBACCO CONTROL CELL IN HUN HMANG : Nimin khan HIMNA MADAT program, District Tobacco Control Cell, Champhai chuan DIET, Champhai ah training an pe. He hun hi Rebecca Lalbiakdiki Hnamte, DIET Lecturer in a kaihruai a, Zosangzela, District Consultant, DTCC Champhai chuan COTPA 2003 Dan chungchang a sawi a Lalruatdiki Hnamte, Psychologist, DTCC Champhai chuan Vaihlo in mihring taksa a khawihchhiat dan sawiin, Dr. Elizabeth Niangtawimang chuan Substance Disorder chungchang zirtirna a pe a ni


RUIHHLO MAN

RUIHHLO MAN :  Ningani zan khan Champhai Excise & Narcotics Enforcement Staff te chuan  heroin hawng khat (12.5 gms) leh a kengtu Lalnunpianga (52) S/o Sawhkhuai (fam), Tuirial Airfield Veng chu Hruaikawn Peng, Zokhawthar Road-ah an man. An ruihhlo man hlutzawng hi tualchhung rate-ah Cheng 30,000 a ni. NDPS Act'85 hnuaiah thubuai siamsak a nih hnuah nimin khan District Court, Champhaiah hruai a ni a, District Jail, Champhai-ah dah luh a ni.


FREE CLINIC

FREE CLINIC : Nimin khan Farkawn Higher Secondary, NSS Unit leh Farkawn PHC tangkawp chuan Saikhumphai-ah Free Medical Clinic neiin, damlo inentir an thahnem hle. Free Medical Clinic hi Farkawn PHC Medical Officer, Dr. Benjamin Lalramchuana hova neih niin, damlo mipa 26 leh hmeichhia 32 an inentir a, damlote hnenah hian damdawi eng emaw zat a thlawna sem a ni bawk,

CHILDRENS' DAY LAWMNA NEI

CHILDRENS' DAY LAWMNA NEI : India ram hmun dangte rualin nimin khan Naupangte Ni, Childrens’ Day lawmna hun chu Kahrawt Field Champhaiah hman niin, naupangte pual hapta tan nghal a ni. He hun District Child Protection Unit leh District Legal Services Authority, Champhaite tangkawp buatsaihah hian Pu S.L Naveen, IAS Deputy Commissioner Champhai chu khuallian a ni a, Naupangte Ni puala kawngzawh a vailiam a ni. Bawrhsap Pu S.L Naveen chuan Champhai District chhunga naupangte Childrens' Day lawmpuina hlanin chibai a buk a. Naupangte ni chu India ram pumah kumtin November Ni 14 a hman thin anih thu sawiin, India ram Prime Minister hmasa ber  Jawaharlal Nehru hriatrengnana a  pianchamphaphak November Ni 14 hian kum tin hman thin a ni, a ti a. Naupang duhawm tak takte chu nakin lawka Mizoram mai bakah India ram tana nghahfak leh  chhenfakawm tak takte an ni tiin, nakin lawkah chuan zirthiamna hian thachakna khumin kawng engkimah hma a la hruai dawn a ni, a ti a. Naupangte chu zirna …

TANPUINA PE

TANPUINA PE : Nimin khan Champhai District Auto Rickshaw Owners' Association chuan home ah leh District Hospital ah thilpek an hlan. Champhai District Auto Rickshaw Owners' Association chuan an thurel bawhzuiin nimin khan Home pahnih : Emanuel After Care Centre-ah Rs. 3000 leh MZ Home, TNT ah Rs. 3000, an hlan a. Hei bakah hian Champhai District Hospital Poor Fund atan Rs. 4000 an pe bawk

CHAMPHAI NULA CHHUANAWM TE HMUAK DAWN

CHAMPHAI NULA CHHUANAWM TE HMUAK DAWN : Mizoram Football Association buatsaih Inter District women Football championship, Siaha-a khelh zawh takah champion Champhai District women team te chuan vawiin hian Champhai an rawn thleng dawn a. Champion team te hi CDFA huaihawtin Khankawn Police check gate-ah lo hmuah tur a ni a. A hmuak tur hian CDFA chuan mi tin an sawm a, lirthei nei leh thawh chhuak thei ten vawiin tlai lam dar 3:00 ah Khankawn check gate thleng turin an ngen.

SANGHA KHAWI DAWN ZIRHO

SANGHA KHAWI DAWN ZIRHO : Nimin chawhma dar 10:30 khan Champhai District Fisheries Development Officer Office bultumin Khawzawl Vengthar YMA Hall-ah Tuichang A/C huamchhunga Sangha khawitu mi 50 leh Lengteng A/C huam chhunga Sangha khawitu mi 50 te tan Sangha khawi tura hriat tur pawimawh hrang inhrilhfiahna buatsaih a ni. Nimin Training hi Champhai DFDO Lucy Lalrinpuii'na kaihruai a. Training hawnna thu sawiin Lucy Lalrinpuii chuan, Sangha khawitu kalkhawmte chu Training an neih chu hmang tangkai tum a, Mizerama Sangha thar chhuah tisangtute zinga tel ngei tum turin a fuih a. State pawn atanga Sangha lakluhte a lo tlem zel theihna turin Sangha khawitute chu tan la sauh sauh - turin a fuih a. Department hrang mithiamte pawh rawn hreh lo tura chahin Sangha khawitute tan an Department chu an inkau reng tih sawi a ni. Nimin Training-ah hian Lalmalsawma, Fisheries Demonstrator in Dil enkawl dan chungchangah zirtirna pe a. Lalchhuanawma, Assistant Fisheries Officer in Sangha chaw pek d…

VC THU LO IN MOTOR REGISTER THEIH LOH

VC THU LO IN MOTOR REGISTER THEIH LOH : Nimina Champhai khawpui leh a chhehvel cheibawla hmasawnna ruhrel siam dan tur rela Champhai Master Plan Committee, Transport Minister TJ Lalnuntluanga hova DC Conference Hall-a thukhawm chuan, Champhai Town huam chhunga mi, an veng VC atanga Lirthei dahna an nei ngei a ni tih hriatpuina lehkha nei lo chu Lirthei register thar tawh loh ni se, tiin an rel. Minister TJ Lalnuntluanga chuan, Champhai khawpui thanzelna leh nakin hun ngaihtuah chunga Champhai Master Plan tharthawh leh a nih thu sawiin, abul tanna chauh la ni mahase hlawhtling tur chuan a tak taka hnathawh a ngai a ni, a ti a. UD&PA Department lama mithiamte kaihhruaiin zirchianna zau zawk leh mipui ngaihdan lak a ni dawn tih a sawi a. Khawpui remfela cheibawl hna chu a bultanna mai a la nih avangin mithiam leh khawtlanga mitha hnemngaite chu Champhai khawpui Plan leh Leilet vawnhima tihchangtlun'tumina kawngah thahnemngai taka hotute tawiawma thurawnte pe zel turin a sawm a. N…

CHAMPHAI NULA THIAM BER

CHAMPHAI NULA THIAM BER : Mizoram Football Association buatsaih Inter District women Football championship Siaha-a khelh zawh takah Champhai District an Champion Champhai District Football Association Hmeichhe team te hian final lut turin an khingpuite an hnèh fai vek a, Semifinal-ah Kolasib hnehin nimin khan Aizawl district nen final an khel a, sikhat faia hnehna changin an Champion ta a ni. Goal pawimawh hi Lalhmângaihzuali, Dinthar khung ni. He championship-a match an khelh zawng zawngah а, Champhai hian hian goal khat mah chhuah lovin an champion a ni. Champhai District Hmeichhe Team te hian Fairplay award an dawng bawk a, Best Player atan Lalrawngbawli, Champhai Vengthlang North thlan a ni a. Champion-na goal khungtu Lalhmangaihzuali Dinthar chu Top Scorer atan thlan a ni a, Nubawihi hian goal 7 a khung a ni. Champion team-te hi CDFA chuan ropui taka lo hmuah an tum thu an sawi.


RUAHTUI DINHMUN

RUAHTUI DINHMUN : October thla chhung khan Champhai in ruahtui mm 50.3 a dawng. Kumin chhung hian Champhai ah ruahtui mm 1438.1 a tla tawh a, January thla khan ruahtui tla lovin July thla khan ruahtui mm 435.2 a tla a, hei hi kumin chhunga Champhai in ruahtui a dawn tam ber tum a ni. Kumin chhung hian thla tin Champhai in ruahtui mm 143.81 a dawng ziah ang a ni a Hetihlai hian kum 10 kalta. chhunga October thla chhung bikah kum 2017. October thla khan ruahtui tlak tam ber tum niin, mm 179.8 a tla a, kum 2016 khan October thla ah ruahtui mm 0.8 tla in hei hi kum 10 kalta chhunga Champhai in October thla chhung bika ruahtui a dawn tlem ber tum a ni a Kum 10 kalta chhunga October thla chhung bikah Champhai in ruahtui mm 1184.54 a dawng thung.

EXCISE REPORT

EXCISE REPORT : October thla chhung khan Champhai Excise & Narcotics Staff-te chuan ND&PS Act hnuaiah thubuai 10 an ziak lut. Champhai Excise & Narcotics Staff-te hian ND&PS Act hnuaiah thubuai 10 ziak lutin mi 10 bawk an man a. Heroin Gram 283.8 an man a, Alprazolam tablet 90 an man bawk. MLPC Act hnuaiah thubuai 22 ziak lutin mi 16 an man a, Rakzu litre 169.750 an man a,

Ram dang zu um 74 an man a. Ram dang Beer canned 29 leh Apple Juice um 2640 an man a, Ram dang mi pakhat an man bawk.

BORDER TRADE TIH HMASAWN DAN TUR NGAIHTUAH

BORDER TRADE TIH HMASAWN DAN TUR NGAIHTUAH : Champhai North bialtu MLA Dr. ZR Thiamsanga leh Indian Council for Research on International Economic Relations(ICRIER) aiawh Team, Sanjana Joshi kaihhruaiten India-Myanmar Border Trade tihmasawn dan tur nimin khan an sawiho. He inkawmhona hunah hian Champhai North MŁA chuan ICRIER te hnathawh chu ropui a tih thu leh ei leh bar zawnna tihchak leh Policy siam hna lam ngaihtuahtu an nihna chu ropui a tih thu sawin, Zokhawthar Border Trade chuan thuamthat a mamawh nasat thu a lo hrilh a. Administration lamah pawh harsatna a awm tih lo hrilhin, Sorkar ang paw'n bawhzui ngai leh hmalak zui ngai turah chuan theihtawp a chhuah dawn tih lo hrilh a. ICRIER lama mithiam Sanjana Joshi chuan Indo-Myanmar Border Trade tihmasawn nan rawtna an neih te leh hmalak tul an tihte a hrilh ve nghalook bawk. Indian Council for Research on International Economic Relation

(ICRIER) hi Aug. 1981 a din niin, India ram hmasawn nan, mithiam leh chungchuang tak tak …

CHILDREN'S DAY KARAWT RECREATION AH

CHILDREN'S DAY KARAWT RECREATION AH : District Child Protection Unit bultumin National Children's Day 2019 pualin naktuk hian Champhai Kahrawt Field ah hun an hmang dawn a, hemi atan hian inbuatsaihna kalpui mek a ni. Ni 19 khian District Child Protection Unit bultum vekin Rohmingthanga Recreation Centre, Kahrawt ah Champhai-a a vawikhatna atan Children's Carnival buatsaih a ni ang a. He hun hi World Day Against Child Abuse, 2019 denchhena hman a ni dawn a, Champhai DC chuan khuallian niin he hun hi a hmanpui ang.


RINHLELH MAN LA NEILO

RINHLELH MAN LA NEILO : Champhai District court-a lutru leh thil tichhetu chu chhui zui mek a ni a, nimin lam thleng kha chuan he thil thlengah hian rinhlelh man emaw an la nei lo. District Court-a duty Armed Police 5 te hriat miah loha pawikhawih nih vang hian ruahmannanfelfai tak nei a thil tih ni ngeia a lan thu District Court hotute chuan an sawi bawk.

MLA FAKAWM

MLA FAKAWM : Hnahlan khua Pu Zohmingmawia leh Pi Vanlalzami te fanu, Malsawmzuali, kum 10 mi, Khawsikpui vanga hun rei tak enkawl ngai leh Champhai District Hospital-ah pawh hun eng emaw chen lo awm tawh, Aizawl lama enkawl tura an hruai thlak chu nimin khan Champhai North Bialtu MLA Dr Thiamsanga chuan kan-ina hlawh atangin tanpuina Rs. 10,000 a pe niin thu kan kan dawng. Malsawmzuali hi a natna avangin hun rei tak enkawl a ni tawh a, sum leh pai an sen tam tawh avangin MLA chungah hian an lawm hle niin thu kan dawng bawk. Malsawmzuali hi Whatsapp Group Vengthlang Undivided pawhin Rs. 30,000 bawr in an lo tanpui tawh bakah mimal leh thianho tanpuina pawh a dawn nual.

STATE GAMES TURIN INBUATSAIH ZEL

STATE GAMES TURIN INBUATSAIH ZEL :
December Ni 9-13, 2019 chhunga Mizoram State Games-2019 neih tura
Champhai South Assembly Constituency tana hmala tura din, Champhai South Assembly Constituency Level Committee chu nimin chawhnu khan an Chairman TJ Lalnuntluanga, Law and Judicial Minister leh bialtu MLA ni bawk hovin
Circuit House Conference Hall-ah an thukhawm.
Minister TJ Lalnuntluanga chuan, Mizoram State Games 2019 chu infiamna chawisana hma kan sawn theihna tura chhawpchhuah, Assembly Constituency hrang hrangte inelna tura ruahman a nih thu sawiin, theihna leh thiamná nei thalaite zawnchhuah a, tihhmasawnna tur a ni, a ti a. Infiamna pui tham tak MLA bial hrang hrangte telna tur a nih angin bial leh District hmakhua ngaia theihtawp. chhuaha ngaihtuahna sen a ngai tih a sawi a. Infiammi leh mawhphurhna kengkawhtu zawng zawngte chu rilru zau tak pu a, mahni chanvo theuhte tihlawhtling thei tura ngaihtuahna seng tura chahin, mahni khua leh Constituency aiawh tur an nih angin bial t…

EI LEH IN THA INZIRTIRNA NEI

EI LEH IN THA INZIRTIRNA NEI :
Food & Drugs Administration Wing (FDA), CMO Office Champhai chuan October 2019 atang khan Champhai khaw chhunga Zirna In, High School leh Higher Secondary School hrang hrangte tlawh kualin, Zirlaite hnenah 'Food Safety & Drugs Awareness Campaign' neiin hun an hmang.
He awareness campaign-ah hian C.Ramdinmawii, Asst. Director (Food & Drugs) leh C.Zarzokimi, Asst. Drugs
Inspector, CMO Office, Champhaite'n Ei leh In thianghlimna kawnga inzirtirna bakah damdawi hrang hrang chungchang an hriattur pawimawhte leh antibiotics resistance chungchangte sawiin hun an hmang thin a ni. Food Safety & Drugs Awareness Campaign hi kalpui zel tura ruahman a ni.

JUNIOR ICON ZO FEL TA

JUNIOR ICON ZO FEL TA :
GMM Junior lcon 2019 chu Inrinni zan khan zawhfel a ni. Result puan zan hian Uaptu Dr ZR Thiamsanga, Champhai North MLA chuan, GMM-in naupangte Pathian lama kaihhruaina, rawngbawlna atana Junior Icon a buatsaih chu lawmawm a tih thu a sawi a. Zai mite an talent hai chhuakna atana hun tha an siam thei chu tha a tih thu leh, he intihsiakna hi thangtharte tan an thiamna leh finna  te, an theihna te hai chhuah mai bakah Isua Krista chuan nun kaihhruaitu atana an hman theihna remchang ni se a duh tih a sawi a.
Khawvel sualna laka fihlim turin intihsiaknaa telte chu a chah a ni. Junior Icon atan hian Lalhruaitluangi, Champhai Jail Veng chu thlan a ni a. Lalkrosmawia, Sazep chu 2-na niin Lalngaihzuali, Electric Veng chu 3-na a ni.

RUIHHLO MAN

RUIHHLO MAN :
Nimin zing dar 1:30 vel khan Champhai Excise & Narcotics Enforcement Staff leh Vaphai Khawtlang Tangrual Pawl te chuan heroin hawng 3 (38.7gms) leh a kengtu Runhmingthangi (39) D/o Thanzauva, Vaphai chu Vaphaiah an man a, Heroin an man hlut zawng hi tualchhung rate-ah Rs. 90,000 man vel a ni a, Runhmingthangi hi NDPS Act'85 hnuaiah thubuai siam sak a ni a, District Court, Champhaiah hruai a nih hnu in District Jail, Champhaiah dah luh nghal a ni.

MINISTER IN TLAWH

MINISTER IN TLAWH :
Nimin tlai khan Law & Judicial Minister,
Champhai South bialtu MLA ni bawk TJ
Lalnuntluanga chuan Med-Aim Hospital sak thar, New Champhai michu tlawhin mamawh hrang hrang an thlente
theihtawp chhuaha hmalakpui a inhuam thu a hrilh. Hemi hnu hian MLA fund hmanga New Champhai Unit-te hnathawh leh Supply Deptt. Kudam sakna tura ruahman hmunte a tlawh nghal bawk.

THI IN CHHAR

THI IN CHHAR :
T.Vanlalhnema kum 27 hi nimin zing dar 9:30 vel khan a chenna inah thia hmuh a ni a, T. Vanlalhnema hi Mahindra Workshop-ah Cashier hna thawk niin, Mahindra Workshop bul New Champhai ah amaha in luahin a cheng a. Champhai Police-te hnenatang thu dawn danin T. Vanlalhnema hi Electric in a man hlum nia hriat a nia, aruang an hmuh lai hian Electric hrui a lo la vuan a, a in bula Sangha a khawinaah Electric pek a tumna lamah Electric hian a man ta ni a rin a ni. A ruang, hi nimin khan an khua Kawlkulha vui turin lakthlak nghal ani

CHAMPHAI NULATE FINAL LUT

CHAMPHAI NULATE FINAL LUT :
Nimin khan MFA buatsaih Inter District Women Football Tournament semi final chu khelh zawh a ni a. Champhai district leh Aizawl district ten Final an lut.
He tournament hi Siaha khawpui-ah khelh a ni a, semi final hmasa zawkah Aizawl district chuan a thlengtu Siaha district chu 1-0 in an hneh a, semi final hnuhnung zawkah Champhai district hian Kolasib district chu 1-0 bawkin an hneh a. Champhai district team hi coach Lalfakzuala ho in Siaha ah hian an kal a, Pool match ah Lawngtlai dist leh Siaha district hnehin pool champion ni chungin semi final an lut a. Semi final-ah team tha bera ngaih leh champion tura rin Kolasib district nulate hnehin final an lut ta a ni.
Final luhna goal hi captain Lalhmangaihzuali, Dinthar in minute 20-naa a khung a ni. Champhai hmeichhe team hian hnehtu an la tawng lo mai ni lovin tun dinhmunah an goal hi an la venghim vek rih a ni. Final hi naktuk chawhnu dar 2:00 ah khelh a ni ang.

HUMSUAL DAITE KAWNG DIK ZAWH NAN JAIL SIAM A NI

HUMSUAL DAITE KAWNG DIK ZAWH NAN JAIL SIAM A NI :
Champhai Additional District and Session Judge R.Vanlalena chuan hmangaihna avang zawkin, India danpui hnuaiah humsual dai palhten kawngdik an zawn leh theihna tura Jail tang mekte chu insiamtharna hmuna dah lailawk rih an ni, a ti.
District Legal Services Authority bultumin Inrinni khan Champhai District Jail-ah National Legal Day hman a ni a, he ni denchhen hian Champhai District Jail-a tang mekte hnenah dan hnuaia mitin chanvo inhrilhfiahna hun hman a ni. District Legal Services Authority Secretary & CJM Lalrochami Ralte kaihhruaiah hian Additional District & Session Judge R.Vanlalena chuan, Lung in hi misualte tawmkhawmna atana sorkarin a din ni lovin, bumtu bumna avanga tlupalh, tihpalh vanga humsual daite awmkhawmna a ni, a ti a. Chungtiang mite in dinthar lehna tur leh an kalpenna lak ata nunkawng dik an zawh theihna tura India danpurin a phut vanga Dan kengkawhtuten dan hmanga an dahkhawm rih an nih
thu a sawi a. Humsua…

HOSPITAL VENG BIAK IN HAWNG

HOSPITAL VENG BIAK IN HAWNG :
Inrinni khan Cheng 81,02,000 senga sak Champhai Hospital Veng Presbyterian Kohhran Biak In thar chu Synod Moderator Rev. R. Lalhmingthanga'n a hawng.
Hawnna inkhawm neih hma hian Upa Dr. J.Lalramchhuanga kaihhruaiin
kum 25 an tlin, Silver Jubilee dar vuak a ni a, Synod Moderator in hma hruaiin
Champhai South Presbytery Moderator leh Kohhran hruaituten an zui a, KTP leh Kohhran hmeichhia bakah Kohhran Pavalai Pawl hruaituten Jubilee dar hi an vua a ni. Kum 25 an tlin lawmna hi ni 6 atang khan an lo hmang tawh a. Biak In thar
hawnna chhunzawm niin Rev. R.
Lalhmingthanga, Synod Moderator chuan Biak In thar chu Pathian hruaina leh Kohhran ho te thawh hona leh thahnem ngaihna vanga ding thei a nih chu sawiin, Biak In thar chu Thlarau Thianghlim zalenna a nih theihna tura malsawmin a hawng a ni. Hawnna Inkhawm, Biak In chhungah hman zui niin, Rev. PC Malsawmtluanga, Moderator, Champhai South Presbytery chuan kaihhruaiin Upa Dr. J. Lalramchhuanga'n Biak …

ORGANISING COMT THUKHAWM

ORGANISING COMT THUKHAWM :
Champhai South A/C hnuaia Mizoram State Games 2019 Organising Committee chu Inrinni khan an thutkhawm.
He hunah hian hmalak dan tur hrang hrang ngaihtuah a ni a, Sum mamawh hrang hrangte buapui turin Fund Raising Committee din niin, Convener-ah R. Thangseia ruatin member mi 5 dang an ruat tel bawk. Hei bakah hian Discipline hrang hrang Incharge-te'n vawiina Bialtu MLA hova meeting an neih tura pharh hman turin sum an mamawh turte Treasurer IC Hranglura emaw Fin. Secretary C.Lalrochhara emaw hnenah thehlut turin an rel ni. Mizoram State games 2019 atan Jersey neih ngei ni se tiin an rel a. Discipline hrang hrangte'n a rem chan dan angin mahni discipline jersey tur hi Sponsorship zawn ni se, an ti a. Constituency Flag siam nise tiin, Jersey leh Flag buaipui tur hi an inruat fel nghal bawk a ni.

DISTRICT COURT RAWK

DISTRICT COURT RAWK :
Champhaia District Court chu Inrinni zan khan misualin an rawk a, Excise leh Police ten Case chi hrang hrang record an dahna, Prosecution branch chhunga thir awm khauh, Steel almira te la chhuakin, a chhunga lehkha pawimawh an halh chhia a Court lehkha hi Excise lam lehkha erawh halchhiat a ni lo niin thu dawn a ni a. Nimin zing lam khan he thil thleng hi hriat niin, Champhai Police ten theihtawp
chhuahin an chhui zui mek tih thu kan dawng.

MINISTER PROGRAMME

MINISTER PROGRAMME :
Ruahman lawk ang chuan, Champhai-a hun hmang mek Champhai North bialtu MLA Dr
ZR Thiamsanga chuan vawiin hian Aizawl lam a pan ang a. Hetihlai hian Champhai South Bialtu MLA, Minister TJ Lalnuntluanga chuan,vawiin chhun dar 1:00 a State Games neih tura a bial chhung inbuatsaihna leh hmalak dan tur relpui turin Champhai a rawn pan dawn a. Naktukah MNF Champhai South Block meeting a telpui ang a Nilaini-ah Champhai
Master Plan Comtt thutkhawm, DC Conf. Hall aneih tur a kaihruai ang a, chawhnu lamah Aizawl panin a kir thla leh ang.

IN KAHLUM

IN KAHLUM :
Nizan dar 6:00 vel khan Tualte khuaah naupang kum 10 mi vel, a pa in an silai hawha lamtir chu a mu awm a lo ni a,
a nau kum 5 mi a kaphlum palh a, a nu
pawh hliamin, a nu hi nizan khan Khawzawl damdawi in an panpui niin thu dawna ni

CHAMPHAI MIPUI HLUT SARAS FAIR 2019

CHAMPHAI MIPUI HLUT SARAS FAIR 2019 :
Champhai Kahrawt Venga Vanlallawma Indoor Stàdium-a MZSRLM leh DRDA Champhai buatsaih Regional Saras Fair Champhai 2019 chu nimin khan VANIS-ah khar a ni a, kharna hun hi Rex Zarzoliana Vanchhawng, Champhai SP chuan khual lian niin a hmanpui.
Khual lian chuan Champhaiah SARAS Fair buatsaih a ni chu lawmthu sawiin, SHG te siam chhuah hmun hla tak pan ngai lo va mahni khawtual ngei a, lei theiha chhawp chhuah a ni chu lawmawm a tih thu a sawi bawk. Self Help Group kalkhawmte chu an thit siam chhuah leh an thar chhuahte
eizawnna tak tak atana an hman theihna turin ram danga thawn chhuah tham siam chhuak tur leh thar chhuak tura theihtawp chhuah turin a chah a. An eizawnna hrechianga ngai pawimawh tura chahin, khawtlang leh pawl hrang hranga inhman aia eizawnna. dah pawimawh zawk fo
turin a chah a. Hna tha taka an thawh theihna tura an hriselna ngai pawimawh a, taksa hriselna khawih pawi thei zuk leh hmuam laka insum turin a chah bawk
'He hunah hi…

CHAMPHAI MAMAWH HRANG HRANG SAWI HO

CHAMPHAI MAMAWH HRANG HRANG SAWI HO :
Kumin December thlaa Mizoram State Games, Aizawla neih tur atana inpuahchahna neih mek leh Champhai khawpui mamawh hrang hrangte sawihona chu nimin khan Champhai  DC Conference Hall-ah Dr. ZR Thiamsanga MLA, Vice Chairman, Health &  Family Welfare Board hova neih a ni.
Dr. ZR Thiamsanga chuan Champhai District chu infiamna huanga sulhnu nei tha tak anih thu leh State Games neih turah pawh beiseina sang tak neih ani, a ti a. MLA Bial inelna ang ni mahse District pumpui dengchhuak inelna huhang nei tak a nih angin sawrkar department, mipui mimir leh pawl hrang hrangte chu district tihmingtha turin thahnemngai taka kan thawhho a ngai a ni, a ti a. Champhai North bialtu MLA chuan Champhai District chu Mizoram District dangte tana entawntlak District Model,  thianghlimna, faina leh mawina kawnga midangte tihhmuh theitu ni tura hmalak a ngaih thu a sawi a. Zirna  kawngah nasa lehzuala tan lak angaih thusawiin, thiam elna hrang hrang leh hnasang lakn…

LARSAP SAWM

LARSAP SAWM :
Champhai District BJP President Hrangsatkima chuan nimin khan
Mizoram Larsap thar PS Sreedharan Pillai chu hmu-in, Champhai mamawh
Kut hnathawktute'n nasa zawka hlawkna an hmuh theihna tur te leh Champhai mamawh hrang hrangte a thlen a.
India leh Myanmar border a nih anga a rang lama Champhai chu a hmun ngei a rawn kal a, Champhai mamawhte
hmuhpui turin Larsap hi a sawm bawk tih thu kan dawng.

LEMCHAN ENTIR

LEMCHAN ENTIR :
Champhai District-a Health Department, District Tobacco Control Cell leh District Education Office tangkawpin Project Himna-Madat hnuaia lemchan intihsiak "Street/Live Play Competition" a buatsaih chu Ningani khan Khawbung BRC Hall ah neih a ni.
Project Himna-Madat hnuaia lemchan
intihsiak "Street/Live Play Competition" ah hian thupui atan "Mizoram Against Drugs, Alcohol and Tobacco" hman a ni a. Ruihhlo, zu leh meizial that lohzia inzirtirna lam hawi minute 10 chhung lemchan intihsiak a ni.
Nimina Khawbung BRC Conference Hall-a lemchan intihsiak hi Khawbung RD Block huam chhung atanga District Level-a tel tur thlan chhuahna niin, a pumpuiah Gov't KM Middle School, Khawbung chu District inelnaa tel tura thlan an ni.

TOMATO CHIN ATANGIN NUAI 100 CHUANG SUM LA LUT TAWH

TOMATO CHIN ATANGIN  NUAI 100 CHUANG SUM LA LUT TAWH :
Nimin khan DHO Khawzawl leh Tomato Grower's Association Tuipui tangkawp buatsaihin Comprehensive Middle School Tuipui tualzawlah ‘Tomato Kut’ hman a ni a. He hunah hian Prof F. Lalnunmawia, MLA, Vice Chairman, Horticulture Development Board chu khuallian niin, Tuipui khua mite Tomato tharchhuah chu hralh turin a vailiam a ni.  He hunah hian Dr ZR Thiamsanga MLA, Vice Chairman Health & Family Welfare Board chu khualzahawm a ni.
Khuallian Prof F. Lalnunmawia chuan  Tuipui  khua ten Tomato Kut an huaihawt hmasak ber  hmanpui tura an sawm chu vannei a in tih thu a sawi a. Mizoram in kan ei nasat tak Tomato hlawhtling taka Tuipui khuain a rah an seng thin  chu lawmawm tiin, Tomato mai bakah Tomato atanga siamt ei theih dangte siam kawngah tan lak angaih thu a sawi a. Sawrkar flagship program SEDP hmangin thei leh thlai tharte tihpuna theihtawp chhuaha intodelh tum ani tiin, State pawn atanga lakluh thlai tam takte titawp turin …