Skip to main content

CHAMPHAI ṬHALAI PAWL THUCHHUAH

CHAMPHAI ṬHALAI PAWL THUCHHUAH :
Champhai Ṭhalai Pawl ten Champhai Damdawiin Solar Plant chhia siam tha tura Mizoram Sawrkar vawi li lai a ngen hnuah an lehkha No. B. 11013/99/2012/SOLAR/DHME (PP) 252 a chhanna kan hmu hi kan lawm hle a.

Champhai Damdawiin Solar Plant siam that nan hian Zoram Energy Development Agency (ZEDA) hnenah a sum mamawh zat tur ruahmanna siam tirin Champhai Damdawiin Solar Plant siam that nan sum tam tak sen ngai lova Rs. 3,30,792 chauh sen a ngai lehzel tih ZEDA lehkha No.T.11082/01/2018-ZEDA in Mizoram Sawrkar an hriattir leh hi lawmawm kan ti takzet a.

Champhai Ṭhalai Pawl chuan August thla chhunga siamtha ngei turin Mizoram Sawrkar hnuaia Hospital & Medical Education, Aizawl chu a phutin a ngen tak meuh meuh a. Champhai Ṭhalai Pawl    huntiam August thla chhunga hmalakna a hmulo a nih chuan Champhai Ṭhalai Pawl chuan a remhriat angin hma ala dawn a. Engpawh lo thlengse Champhai Ṭhalai Pawl in mawh a phur lo ang.

Tin, Trauma sak mek Sawrkarin nikum 2018…

Champhai

KANGMEI VEN HAPTA HAWNG :
Nimin chawhma khan Champhai District-ah Mizoram hmun dangte rualin ‘Kangmei Ven Hapta’ (Fire Prevention Week) vawi 20-na chu hman tan a ni.  Kangmei Ven Hapta hawnna pual hian District Level Fire Prevention Committee buatsaihin   Champhai DFO Pisa tualzawlah hun hman a ni a. Kumin Kangmei Ven Hapta puala thupui thlan chu ‘Ram tikanglo turin mitin i fimkhur ang u’ tih a ni.
He hun hi Champhai DFO & Member Secretary, District Level Fire Prevention Committee C.Lalbiaka chuan kaihruaiin, VL Chama Hnamte, President, Sub-Hqtrs. YMA Champhai chuan Kangmei Ven Hapta hawnna thuchah a sawi a. Kangmei Ven Hapta puala Lirthei hmanga khawlai fang kuala, aurinna hmanga mipuite zirtirna pe a chhuak tur, Vehicle Rally Team pahnihte a  vailiam nghal a ni. 
VL Chama Hnamte chuan kangmei ven kawngah mitinte fimkhur a pawimawh thu a sawi a. Ram ngaw humhalh leh kang thelh kawngah tanrual a ngai a, a enkawltu vek kan nih avangin Department kutah chauh innghah mai thin loh tur a ni, a ti a. Kangmei ven kawnga  tangkai leh hriattur angte pawh mahni hriat mai duhtawk lova midangte zirtir chhawng ve zel  a tul thu a sawi a. Kangmei thelh tura chhuah chu mitinte bat anih thu sawiin, Kangmei Ven Hapta chuan mipuite  thinlungah fimkhurna thlen se, ram pum ang pawha kangmei vanga tawrhnate a lo nep zawk phah theihna anih ngei beiseiin a hawng a ni.
He hun kaihruaitu C.Lalbiaka chuan Kangmei Ven Hapta hawnna hmang tura kalkhawmte chungah lawmthu a sawi a. Kangmei Ven Hapta puala Mizoram Chief Minister leh State Level Fire Prevention Committee  Chairman ni bawk Zoramthanga thuchah a chhiarchhuak a. DFO Champhai kaihhruainain  kangmei tichhuaklo tur leh a ven kawnga mitinte intiamkamna lak a ni.
Hawnna programme zawh hnu hian District Level Fire Prevention Committee duhdanin zau zawka mipuite thlengpha zirtirna auchhuahna tura duan Lirthei nena Champhai leh a chhehvel khuate fangkuala, aurinna hmanga mipuite hnena zirtirna pe tur Vehicle Rally Team-te chu thuang hniha inthenin an fehchhuak a. Khawlaiah kangmei laka fimkhur tulzia leh hriattur pawimawhte an zirtir a. Vehicle Rally Team-ah  hian District Level Fire Prevention Committee member, Forest Department thawktute, Champhai Buffalo member, YMA hruaitute leh Auto Rickshaw neitute an tel a ni.
Nimin vek hian Khawzawlah DFO (Wildlife) leh RO tangkawp buatsaihin Kangmei Ven Hapta hi hman a ni a. Champhai District chhunga RO thuthmun khua Kawlkulh, Khawhai, Khawbung, Farkawn leh Hnahlan-ah te Range Officer (RO) te kaihhruainain Kangmei Ven Hapta hawnna leh Lirthei hmanga khawlai fangkuala zirtirna Vehicle Rally-te neih a ni bawk a, Ngopa-ah chuan vawiin lama he hun hi hman tum a ni.

CHAMPHAI AH PMKSAN INHRILHFIAH :
Nimin zing khan Champhai khawpui veng thenkahtah Gram Sabha neiin Scheme thar PMKSAN chungchang inhrilhfihna hun hman a ni.
Champhai Venglaiah chuan Venglai Community Hall ah he hun hi hman a ni a. PM Kisan Samman Nidhi (PMKSAN) tum ber chu loneitu ram tin 5 hmun emaw a aia tlem emaw nei tan kum 1 ah tanpuina sum Rs. 6000 pek theih a ni, tih tarlan a ni a. Tunah hian loneitu ram hectare 2 emaw a aia tlem emaw nei te hming lakkhawm mek niin loneitute hian dilna Form hmangin tanpuina hi dil tur a ni a. VC te hnenah an thehlut leh tur a ni tih te; tanpuina diltuin a dawng thei em tih endikna turte sawilan tel a ni bawk.
He Scheme hi vantlang tana ram hmantirte chuan an hmang thei dawn lo va. Hei bakah hian Minister lo ni tawh leh ni mek te bakah, Central leh State a sawrkar hna thawk te, Pension hlawh Rs sing 1 chunglam la te tan dawn theih a ni dawn lo bawk. Hetihlai hian Centre hnuaia MTS, IV Grade leh Group D te a huam dawn lo thung.

MIBO HMU :
North Khawbung High School zirtirtu T. Sanjoy Singh Thokchom-a, Inrinni a chin hriat lohva bo chu hmuh leh a ni.
T. Sanjoy Singh Thokchom hi kar kalta Inrinni thimhlim khan Aizawl atanga Manipur a kal tur, Ngopa Police Check Gate bulah a chuanna lirthei atanga a chhuk chu chin hriat lohin a bozui nghal a. A chuanna lirthei a chuang ten an hmuh zui tak loh avangin Ngopa Joint YMA hruaitute hnenah a tul anga buaipui turin an ngen a. Ngopa VC, Joint YMA leh Ngopa Welfare Committee ten hmala zui nghalin, khawtlang huap bo zawn hna kalpui a nih hnuah nimin chawhma lam khan Ngopa Government MS II mualah a taksa a hliam tuarin hmuh a ni. T. Sanjoy SIngh Tholchom hi ramhnuaia a chetsualna lamah hliam a neih avangin Ngopa CHC ah enkawl zui niin, ngaihtuahawm erawh a ni lo tih thu dawn a ni a, vawiin hian a awmna Manipur panpui tum a ni tih thu dawn tel a ni.

MLA IN HMA LA :
Champhai North Bialtu MLA Dr ZR Thiamsanga ngenna ngaipawimawhin Transport Minister TJ Lalnuntluanga chuan Kawlbem thleng MST Bus Service thin chu 18.2.2019 atangin Vaikhawtlang thleng tlantir a ni dawn ta tih thu dawn a ni.

DAMDAWI PE :
nimin khan Khawbung Health Sub-Centre hnathawktute chuan Zirtawpni "National Deworming Day" a an tuam hman loh Khawbung HSS leh Govt. High School Khawbung rulhut hlo zirlai naupangte an eitir chhunzawm.
Damdawi hian a daih loh avangin nimin khan Khawbung HSS zirlai 62 leh Govt.High School zirlai 90 hnenah rulhut hlo hi an sem leh a ni. Rulhut hian taksaah harsatna hrang hrang a thlen theih avang leh zirlaite hriselna a ngaih pawimawh avangin Central Sawrkar chuan mumal tak leh awmze nei taka zirlai hmaih nei lova rulhut hlo eitir dan tur a ruahman angin ram pumah kalpui mek a ni.

TUIALHTHEI DINHMUN :
Mizofed Pump
Petrol (MS) - Free Sale
Diesel (HSD) - Khawlchhia
RC Filling Station
Petrol (MS) - Service Tanky
Diesel (HSD) - Service Tanky
RD Filling Station
Petrol (MS) - Service Tanky
Diesel (HSD) - Nil
Service Hours 6 AM to 7 PM
Sunday Open 12 Noon to 3 PM 

Comments