Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Champhai

LEITHA SIAM DAN TRAINING NEI :
Champhai District Krishi Vigyan Kendra (KVK), Khawzawl leh NABARD, Champhai District tangkawp bultumin KVK Farmers Training Hall, Khawzawlah ni 5 chhung awh tur, Khawzawl RD Block huamchhunga Self Help Group thlan bik pasarih (7) atanga Member 30 te tan Pa khawi leh Changpat Leitha (Vermi Compose) siam dan Training neih tan a ni.
A hawnna pualin KVK Farmers Training Hall-ah inkhawm tawi buatsaih a ni a. He hun kaihruaitu, Dr. Vanlalhruaia Hnamte, KVK Head & Scientist chuan Champhai District KVK leh NABARD ten hun rei tak thawhhona tha tak an neih thu a sawi a.
        NABARD tanpuinain KVK pawhin loneitute tan nasa taka hma an lak mek thu leh hmalakna pakhat zinga mi Self Help Group Member te tana eizawnna tha tak ni thei Pa khawi leh Changpat hmanga lei tha siam dan Training buatsaih a ni chu lawmawm a tih thu a sawi a. Training chhimtu Self Help Group Member te chu eizawnna puitling leh chhawrtlak nei thei ngei tura training hlawkthlak tak hmang turin a chah nghal a ni.
He hunah hian Champhai District NABARD Development Manager Rabishankar Likmabam pawhin KVK nena thawhhona tha tak an nei thin chu lawmawm a tih thu sawii,  Training a tel SHG Member te chu an thil zir chu a zirah chauh duh tawk lova, pakhawi leh Changpat hmanga leitha siamte chu eizawnna atana hmang chhunzawm turin a chah bawk.
Hemi hnu hian Training neih chhunzawm nghal a ni a, KVK Scientist R. Vanlalduati (Soil Science) in Khawzawl RD Block huamchhunga Self Help Group thlan bik 7 atanga tel Member 30 te chu Pa khawi leh Changpat hmanga lei tha siam dante a zirtir a. SHG Member-te hi Theory a zirtir an nih hnuah KVK Demonstration Farm-ah Practical in Training pek leh an ni dawn a ni.
Training hawnna hun hi SBI Khawzawl Branch Manager PC. Lalnunpuia pawhin a telpui a ni.

CHAMPHAI DISTRICT HOSPITAL 2-NA :
District Hospital Fai intihsiakna Kalyakalp 2018 neih zawh takah Champhai District Hospital chuan pahnihna an hauh a Faina kawnga hmalakpui tute hnenah lawmthu an sawi. District Hospital fai inelnaah hi Mizoram District hrang hrangah kalpui niin Round thumah tehna chi hrang hrang hmangin intihsiakna kalpui a ni a, Round khatna hi Internal Assesment neih niin mahni Hospital theuh chu thawktuten enfiah niin anmahni in Mark an in pe a, Round hnihnaah hi chu Pure Assessment hmangin Hospital hrang hrang hotute chu an in endik tawn sak leh a. Round thumna Final Round ah External Assessment neih niin hotute chuan endik hna hi an thawk a ni.  Heng Round hrang hrang an Mark  hmuh dan a zirin  Result hi siam a ni a, District Hospital Fai Pakhatna chu Lawngtlai District niin  Champhai District chuan lawmman pahnihna an la a ni.
Community Health Centre ah pawh District tinah inelna hi neih niin District Hospital endik dan nen a endik dan hi a in ang a, Biate CHC  chu pakhatna niin Thenzawl CHC pahnihna niin Vairengte CHC chu pathumna an ni.
Primary Health Centre erawh chu District tina PHC te an mahni District theuhah intihsiakna an nei ve thung a. Endik dan pawh a pangngai veka kalpui niin External Assessment District Level Award Committee te chuan endik hna an thawk thung a ni. PHC ah hian Kawlkulh PHC te chu pakhatna niin Hnahlan PHC te chuan pahnihna niin Khawbung PHC te chu pathumna a ni.
He intihsiaknaah hian Champhai District chuan Rs. nuai 4 a dawng a, Community Health Centre fai intihsiaknaa lawmman pakhatna dawngtu Biate CHC hian Rs. nuai 8 dawngin Primary Health Centre intihsiakna a pakhatna te chuan lawmman Rs. nuai 2 pahnihna in Rs. 94000 leh pathumnain Rs. 81100 an dawng bawk a ni.
Champhai District Hospital a thuneitute chuan faina kawnga District Hospital in hma a sawn zel chu hmangtute kutah a in nghat thui hle a ni tih an sawi a. Pahnihna dinhmun an hauh theihna tura hmala tute hnenah lawmthu an sawi a. Pakhatna dinhmun hauh thei tura tang chhunzawm zel turin mipuite chu thawhpuiah an sawm a ni.

MIT ZAI :
National Programme for Control Blindness and Visual Impairment (NPCBVI) hnuaiah kum upa mit thalo te Khawbung PHC ten enfiahin zai ngaite zai nghal an ni.
Dr Zosangzuala, Eye Super Speacilist Champhai District Hospital leh a team te chuan nimin atang khan Khawbung PHC ah kum upa lam te tan a thlawna mit inentir leh zaina hun an hmang a. Mit thalo entir 120 awmin heng zinga mi 18 te chu mit zai ngai an ni a. Niminpiah tlai atanga nizan thleng mit zaina hun hawn a ni a, mit zai ngai mi 18 te hi zai zawh hman tum a ni.

LIRTHEI DINHMUN :
January thla khan District Transport Office ah lirthei 140 ziahluh thar a ni.
Lirthei ziahluh tharte hi Twowheeler 68, Bus 1, Maxi Cab 4, Car 27, Bolero 3, Taxi 5 leh Truck 33 te ziah luh a ni a, hriattheih chinah lirthei ziahluh number hnuhnung ber hi MZ04A 2032 a ni. January thla chhung vek khan Lirthei mihring phur chi atangin Rs. 38350 hmuh a ni, Bungraw phur chi lirthei atangin Rs. 191150 hmuh niin Road Taxe atangin Rs. 12,89,208 hmuh a ni. MV Fee atangin Rs. 731630 leh Parking Fee atangin 36100 ah te hmuh  ani a. January thla chhunga lirthei hrang hranga chhiah lut tlingkhawm hi Rs. 22,86,348 a ni.

TUIALHTHEI DINHMUN :
Mizofed Pump
Petrol (MS) - Free Sale
Diesel (HSD) - Khawlchhia
RC Filling Station
Petrol (MS) - Service Tanky
Diesel (HSD) - Service Tanky
RD Filling Station
Petrol (MS) - Service Tanky
Diesel (HSD) - Nil
Service Hours 6 AM to 7 PM
Sunday Open 12 Noon to 3 PM 

Comments