Skip to main content

Champhai

UD&PA DEPARTMENT HMALAKNA KALPUI MEK PUANGZAR :
Nimin chawhma khan UD&PA Department Champhai leh MJA Champhai District Member-te chuan inkawmhona hun DUDO Pisa, CHANEM Building-ah an nei a. UD&PA Department hmalaknate inhrilhhriatna hun an hmang.
He hun hi K. Lalhmuakliana, District Urban Development Officer (DUDO) Champhaiin kaihruaiin UD&PA kaltlanga hnathawh Swachh Bharat Mission (Urban), National Urban Livelihood Mission leh Housing For All hnuaia hmalakna hrang hrangte bakah department-in khawpui tih hmasawnna leh tih changtlunna tur hrang hrang a thawh mekte Chanchinbumite a hrilhfiah a. Department hmalakna hrang hrangte enzui puia, duhkhawplohna awmahte finchhuah zel thin turin a sawm a ni.
SBM (Urban) hnuaiah hian faina kawngah nasa taka hma lak chhoh mek niin, faina in zirtirna thuziak tar te, fai nunpui tura naupangte zirtirte, Short film siam te, Street play leh bawlhhlawh bawm semte kal pui mek a ni a. Kumin   hian   nasa leh zuala inzirtirna tha zawk a kalpui te, faina lam hawi poster leh  banner siam te,  faina lam inelna hrang hrang siam te bakah faina lama ke pentute hmalakna chak leh zuala thlawp tum a ni.
National Urban Livelihood Mission hnuaiah hian  khawpuia miretheite chawikanna tur hrang hrang leh intodelhna tur lam hawi training pekte, mimal leh pawl a subsidy loan pekte,  chenna In nei lote tlukluhna tur siamte, Self Help Group  din leh tihchangtluna tanpuite bakah khawlaia thilzuara inphote dinhmun tha zawka siam tuma hmalaknate kalpui a ni a. Kum hmasa lama hmalaknate chhunzawm mai bakah nasa leh zuala kal pui zel tum a ni. 
Housing For All hnuaiah Subsidy loan pek chhuak mek zel  niin,  he mi hmang hian mi tam takin In leh lo te dinin an thuam tha mek bawk a, tun dinhmunah hian Champhai leh Biate-ah insak tanpuina  sem theih turin inbuatsaihna kalpui mek a ni bawk.  Heng bakah hian department-in khawpui tih changtlungna tur leh tihhmasawnna tura ke a penna hrang hrangte tarlan a ni a,   nasa leh zuala ke pen zel tum a nih thu tarlan a ni.
He hunah hian Champhai District MJA te an kal tha hle a, Chanchinbumite hi Champhai DIPRO Dr Lallawmkima’n  a tawiawm a. UD&PA Champhai hnuaia thawktu DUDO, Scheme enkawltu Manager, Engineer leh Specialist-ten Chanchinbumite zawhna hrang hrangte an chhang a. Inkawmhona eng atang hian  Chanchinbumite pawhin UD&PA Department Champhai hmalakna turah rawtna tha tak takte an thlen a ni.

THUKHAWM :
Nimin khan Chapchar Kut inpuahchahna hrang hrang leh bawhzui leh zeldan tur relin Chapchar Kut Celebration Committee chu Liansangzuala Chhakchhuak, Addl. DC hovin a Pisa ah an thukhawm.

CHAMPHAI TLANGVAL-TE CHE THA :
5th RSC National Karate Championship. Ernakulam, Kerala-a kar kaltaa neih zawh takah Champhai atanga kal Karate Player 7 ten Gold Medal 9; Silver 6 leh Bronze Medal 2 a vaiin Medal 17 an la a. Medal latute leh an medal lak chu : B. Lalchhanhima s/o B. Laldinsanga, Vengsang Gold 3; C. Khawlrohmingthanga s/o Sangneihmawia, Murlen - Gold 2, Silver 1; C. Lalruatsangi d/o C. Zohmingmawia (L), Kahrawt - Gold 2; Lalpekhlua s/o Lalrimawia, Kahrawt - Gold 2; Rosangliana s/o Lalthanhranga, Kanan Silver 3; Lalchhuanmawia s/o C. Lalvunga, Murlen - Silver 1, Bronze 2 leh C. Lalbiaksanga s/o C. Lalvunga, Murlen - Silver 1 te a ni a. He Championship ah hian State 9 an tel a, Champhai Karate team hi Coulour Belt ah pakhatna niin, Black Belt Event ah pahnihna an ni.

PALAI 2000 VEL :
Aizawl East District PYD Conference Vawi 25-na neih zawh takah Reception COunter a inziaklut mikhual 1500 vel awmin inziak lut lo te nen mi 1800 bawr vel rawn kalin Champhai khawchhung Kohhran te nen Palai 2000 bawr vel an kal.
Aizawl East District PYD Conference hi kum hnih danah neih thin niin, COnference vawi 26-na chu kum 2021 ah Sakawrdai ah neih leh a ni dawn a ni. Nimin khan Kohhran leh Bethel Veng chuan Pandal thiah hnatlang neiin hnatlang hian mi 100 vel an thawk a, Pandal sakna hmanrua tam zawk chu lilam in  a hmunah an tiral nghal a ni.

LAWM DAWN :
Vawiin chhun dar 12 hian CTMPACS chuan tun hnaia Award an dawn lawmna hun an hmang dawn.

RUIHHLO TAWLHTU KUM 15 TANG TURIN TI :
Nimin khan R. Vanlalena, Champhai Special Court Judge chuan Dan phal loha Heroin Gram 555 tawlhruk tumtu Lalthansangi (kum 40) d/o Lalthangliana, ZOkhawthar khua chu kum 15 chhung (rigorous imprisonment) Jail tang tur leh pawisa Rs. 50,000 chawi tura hremna tur Judgement & Order a tichhuak.
Kum 2017 February ni 9, zing karah khan Champhai Police te chuan an thu dawn bawh zuiin Zokhawthar kawnga Melbuk leh Mualkawi inkarah Dan phal loha Heroin tawlh ruk tumtu Lalthansangi leh a vahpa Lalhmunsiama te Bike a an rawn chuang lai chu lo tidingin an bagken lai chu an enfiah sak a. Bag chhungah hian sahbon bawm 42 Heroin awm vek chu an man a. Heroin rawn kengtu leh Bike khalhtu pawhhi police te chuan an man a.
He thubuai rel a nih chhung hian Police lam atanga thu hretu 2 te, Forensic Science lama mi thiamte leh YMA lam atanga hriatpuitu 2 te chuan Champhai Special Court ah an thil hmuh leh hriat te chu an sawi a. Heng thuhretute thu sawi zawng zawng hi Court chuan uluk taka vawng tha vekin, an thusawi zawng zawng te chu chik takin a ngaithla a. Lalthansangi sawi dan chuan a vahpa Lalhmunsiama hi chuan Bag chhunga Heroin awm chu a hre ve kher lova, Champhaia kal duh anga insawiin a vahpa chu a Bike a thlah tura a tih angin a vahpa chuan Bike in Champhai a pan pui mai niin a sawi. Lalhmunsiama chuan Bag chu Tala a kalh a nih avangin a chhungah eng thil nge awm a hre lo tak zet niin Court chu a hrilh bawk a. Police in Bag an han hawn hnuah erawh Heroin chu a Ni chuan a lo keng reng mai a ni tih a hre ta chauh  niin a sawi bawk.
Heroin tawlhruk tum tu nia puh Lalthansangi chuan dan kalhin Heroin a keng ngei a ni tih chu COurt thu tlukna a ni ta a. Lalhmunsiama lakah hian Evidence a chak tawk theih loh avangin kum hnih zet Jail ah lo tang tawh mah se chhuah zalen a ni ta. Lalthansangi hi chhul bawk (Cancer) avanga nikum laihawl vela zaipui lo tawk tawh leh Chemotherapy lak mai hmabak nia a lan si avangin Court chuan amah hremna chu tihnep sakin kum 15 tang turin a chung thu chu a rel fel ta a ni.

TUIALHTHEI DINHMUN :
MIZOFED Pump
Petrol : Free Sale
Diesel : Free Sale
RC Filling Station
Petrol : Service Tanky
Diesel : Nil
RD Filling Station
Petrol : Service Tanky
Diesel : Service Tanky

Comments