Skip to main content

Champhai Tualchhung Chanchinthar

LIRTHEI DAN CHUNGCHANGAH INBIAKNA NEI TURIN ZOKHAWTHAR VC LEH NGO TE A IN KAU RENG : Champhai Zokhawthar VC leh All NGO Coordination Committee chuan thuchhuah siamin Champhai Transport Union te chuan Zokhawthar atanga Bungraw phur lirthei ang dan chungchangah dikhlel taka thuchhuah a awm niin an thuchhuahah an tarlang. An thuchhuah a an tarlan danin CTu hian Zokhawthar khawtlang nen inremna an lo nei tawh a. Kum 1997 khan kha tih lai SDO (Civil) hriatpuina in AO ho in inremna an lo siam tawh a. Zokhawthar khawtlangin Special Load Trip khat an lak bakah khawtlang hriatute zinin Petrol man an phut remtih a nih thu an sawi a. Khawtlangin Special Load an lak chu duh loin thla khatah Rs. 10000 in anmahni thuin an bithliah a. Hun engemaw ti hnuah Rs. 8000 ah tihniam leh in pek tawhlo thlengin anmahni thu zelin thil an lakpui tak ah chuan Zokhawthar khawtlangin kawng dang a dap lo thei ta lo a, Zokhawthar Welfare Committee (ZWC) chu November ni 9, 2017 din alo nih thu an sawi. Zokha…

Champhai Tualchhung Chanchinthar ni 23.3.2019

PRISM MP CANDIDATE IN RAM LEH KHAWTLANG TANA HMALAK TUM :

            Nimin khan PRISM Party MP Official Candidate TBC Lalvenchhunga chuan Champhai MJA Press Club ah Press Conference neiin, kumin MP inthlan lo awm tura ram leh khawtlang tana hmalak a tum dan tlangpui thuthar thehdarhtute hmaah a sawi lang.
            TBC Lalvenchhunga chuan Mizoram aiawha MP a thlantlin a nih chuan CAB dodal nan Mizoten kan chanvo dik tak kan neih theihna turin theihtawp a chhuah tur thu leh India ram rorelna sang ber Parliament ah RIght to Succession Bill a thehluh tur thu a sawi. MP a thlantlin a nih chuan CAB in Zo hnathlakte laka nekchepna leh a thalo zawnga nghawng a neih dan tur kawng hrang hrang a tarlang a. TBC Lalvenchhunga chuan Zo hnahthlakte ram, hnam tobul leh nihdan phung dik tak hmuchhuak turin Sawrkar in ziaka chhinchhiahna a neihte fawmkhawm a tum thu a sawi a.
            MP LAD sum hmanga chhawrnahawm thilsiam chhuahna din a tum thu te, thenawm ram Bangladesh leh Myanmar sawrkar nena insumdawn tawnna mumal zawka kalpui tura tan a lak tur thu te, Mizoram mamawh hmasawnna ruhrel lian dinna kawnga Sawrkar laipui ah theihtawp chhuah a tum thu leh Sawrkar kalphung khalh ngil tura theihtawpa tanlak a tum thu a sawi bawk.

CHAMPHAI IN KHAWPUI FAI LAWMMAN A LAK LAWM :
            Nimin khan hmarchhak State a khawpui fai ber Champhaiin a hauh lawmna hun hman a ni.
            India ramin faina beihpui a thlakna kalpui meka peng pakhat a hmalakna chi khat, India hmarchhak State chhunga mihring 25,000 atanga 50,000 chin chenna khawpui fai inelna, Swachh Survekshan Award 2019 ah Champhai chu pakhatna niin, Champhai DUDO bultumin nimin chawhnu khan Champhai I&PR COnference Hall ah he lawmman dawn lawmna hi neih niin ruai kilho nghal a ni.
            Khawpui fai ber nih lawmna hi Champhai DUDO K. Lalhmuakliana`n kaihhruaiin, faina denchhenna khawpui fai inelna kalpui a nih dan phung tarlanna a nei a. He hun hmanpuitu CHamphai DC Dr Naveen Aggarwal chuan India ramin daina beihpui a thlakna kalpui mekah India rama District 700 chuang zinga ODF 82 na ni thei a. Chmphai District a awm chu chhuanawm tak a nih thu leh India hmarchhak State khawpui zinga Champhai khawpui in lawmman pakhatna a dawng thei chu thil inhmeh tak a nih bakah a lawmawm a, chhuanawm taka ni, a ti.
            Champhai District UD&PA Social Development Specialist C. Lalengkima chuan Champhai khawpui in hetiang lawmman a dawn theihna chu a chhunga cheng mipui khawsak phungin a zir vang leh faina beihpui kal meka mitin tanlakna rah a nih thu leh Sawrkar Department hrang hrangte, Veng hrang hrang khawtlang hruaitu VC leh YMA thawhrimna vang a ni tih a sawi a. Faina kawnga hmasawn zel theih nan theihtawp chhuah turin mitin a sawm nghal bawk. Khawpui fai lawmman pakhatna hian nomawi leh thuziak a kengtel a ni.

LIRTHEI KAL HUN :
            Champhai SP Lalthiamsanga Sailo chuan thupek chhuahin, kawngpui siam that anih dawn avangin karleh Thawhlehni atangin Kawlkulh leh Tuivawl inkarah Light Motor Vehicle leh Medium Motor Vehicle tan tlai dar 5 atanga a tuk zing dar 8 thleng kaltlang phal a ni ang a. Heavy Motor Vehicle tan tlai dar 5 atanga a tuk zing dar 6 thlen gkaltlang phal a ni ang. Kawng siam hna hi chak zawka kalpui a nih theih nan zing dar 8 atanga chhung dar 12 inkar leh chawhnu dar 1 leh tlai dar 5 inkarah chuan lirthei eng chi mah kaltlang phal a ni dawn lo tih thupekah chuan a tarlang tel bawk.

WORLD  WATER DAY HMANG :
            Nimin khan World Water Day 2019 chu DIET Zotlang Champhai ah neih a ni a. C. Lalbiaka, IFS, DFO Champhai chuan khuallian niin a hmanpui.
            Thusawiin khuallian chuan tui hi nunna nei te tan a hlu hle a. Pathian thu pawhin tui hi Nunna a nih thu a sawi a ni, a ti a. Khawvel hmasawnna kal zelah khaw nuam ni tur chuan tui hniang hnar khua nih a ngai a, tui tam lohna khua ah chuan fai pawh a har thu a sawi a ni. Kumina thupui chuan tupawhin duh thala a in theih tur tui chhawpchhuah hi a tum ber  anih thu a sawi a. Tui in tur mai bakah kan mamawh a kan hman tur kan hniang hnar hi a pawimawh a ni, a ti. Tui ngah leh nghah loh hi kan economic than leh than loh innghahna pakhat a ni tih sawiin, tui pawimawhna hriatchian a tul thu leh a hmanralna chauh ngaihtuah lo va, a hnar hrang hrang venhima pawimawh tih a sawi a. A bik in ramngaw kan humhalh that a ngai tih a sawi tel bawk.

ni 22.3.2019 (zirtawpni)TUI SEM MIPUI TAN HIM :

            PHE Department in Champhai mipui tana tui an sem mekah sawngbawl that tawk loh leh thianghlim tawklo deuh ni a thuthang awm mekah Thangkhat lian zet hman mek Champhai khawpui chawmtu tuilakna ‘Greater Water Supply Scheme’ chu nimin khan MJA Champhai District Memer te chuan tlawhin, Tuipui lui lakan hmun, tui tih thianghlimna leh sawngbawlna hmun bakah Darthlalang tlanga tuidah khawlna hmun an enfiah.
            Rs. VBC 27 zet senga Champhai khawpui chawmtu Tuipui tuilak hi 2008 khan Commission niin, Meter 1000 dawn a sanga tui pump chhoh nan hian Pump house 2 dah a ni a. Pump house no 1 a khawl 2 (Diesel leh Electric hmang) hian meter 200 a sangah tui thlitfim loh chu Treatment Plant-ah pump chhovin, heta tang hian khawl 2 hian Meter 800 zeta sang Darthlalang Tlanga tuizem litre nuai 12 dawngah pump chhoh a ni.
            Tui intur hi nitin darkar 18 vel chhungin tui litre nuai 28 vel pump chhoh ziah a ni a, mipui hnenah litre nuai 26 vel sem ziah a ni a. Darthlalang tlang atanga sem chhuah a nih hma hian thlitfim vek a nih bakah natna hrik thah nana hman leh India rama an hman tlanglawn ber Chlorine telh vek a niin, Darthlalang tlangah an pump thlenna hmunah hian Chlorine hi an tui pumpna khawh thlakna bulah hian a inpawlh awlsam zawkna atan natna hrik that tur tawka mithiamten an bithliahsa angin dahluh nghal a ni a. Mipui hnena tui sem a nih hma hian tui thianghlim dan hi laboratory ah uluk taka enfiah ziah a ni a. Mipui tana tui an pekchhuah tawh chinah mipui tana hlauhawm a awm lo tih an enfiah hnuah semchhuah niin, Champhai mipui tana tui an sem chhuah tawh chinah mipui tana hlauhawm leh natna hrik awm thei an la sem chhuak lo tih an sawi.
            Kumin February thla thleng khan Champhai khawpui ah Private Connection 4821 leh Public Point 42 atangin tui sem chhuah thin a ni a. Kumin February thla chhunga sum lakluh bik hi Rs. 23,09,811 niin, 2018 APril atanga February 2019 thlenga sum lakluh chu Rs. 1,75,85,849 a ni. Mipui hnena tui sem chhuah hi a thianghlim tawk thu leh tun dinhmuna India ram khawpui hrang hranga mipui tana tui an pekchhuah, a him tawk leh an enfiah theih chin anga an thlitfim a ni tih an sawi a. Champhai mipuiten an tui sem hi thinhrik lose an duh tih Champhai PHED WATSAN SE leh EE Office a hotute hnen atangin thu dawna ni.

DINTHAR VENG RAM BUAI :
            Nimin chawhma khan Champhai DC Conference Hall ah Champhai Dinthar Venga UPC North East India (NEI) leh Dinthar NGO, VC ram buai chungchang ngaihtuahin thutkhawm a ni.
            Meeting ah hian UPC NEI, Dinthar VC leh NGO aiawhte hnen atangin insawifiahna hun siamsak an ni a. UPC NEI in helai ram neitu nihna Land Lease No. 54 of 1998 an neih chu a dik ngei a ni tih Settlement Officer, Champhai atanga finfiah a nih thu leh UPC NEI hian kum 2017 - 2018 thleng pawhin  chhiah an chawi thu tarlan a ni a. Helai ram ruak anga hria a In lo sak tawh MUP, MHIP, VC, Waiting Shed bakah Anganwadi te chuan ram neitu nihna Document engmah phawrh tur an neih loh avangin ziaka insawifuahna leh thu thlen duh an la nei a nih chuan March ni 27, 2019 ral hmaa thuneitute hnena thlen tura hun pek leh an ni a. Dinthar NGO leh VC ten chhanna an thehlut zulzuiin hmalak zel dan tur State Government ah thlen ani ang a. State Government thutlukna a zirin District Administration in hma a la dawn ani.
            March ni 4, 2019 a Dinthar khawtlang ten UPC NEI Biak In sakna tur ban phun hnatlang a an thiah sak avangin UPC NEI-in Deputy Commissioner, Champhai hnena thu an thehluh kal zelah March ni 7, 2019 khan DC Conference Hall, ah District Bawrhsap  hova Meeting neih a lo ni tawh bawk. Meeting  ah hian Champhai Bawrhsap Dr Naveen Aggarwal, Lalthiamsanga Sailo, SP Champhai; Liansangzuala Chhakchhuak, Addl. DC Champhai; Remlalliana Hnamte, SO; Dr Lallawmkima, DIPRO; WC Zorammawii, CDPO; VL Chama Hnamte, President SYMA Champhai;Champhai Dinthar Veng VC, NGO aiawh leh UPC NEI hotute an tel a ni.

BUNGZUNG HAW RUNPUI :
            Bungzung khua chuan Haw runpui ni thum chhung awh tur an hmang mek.
            Thawhlehni atang khan Bungzung khua chuan Bungzung ah hawrunpui an hmang tan a, hemi zan hian kawnah meipui chhepa zaiho in mikhual hmuahna hun an hmang a. Niminpiah khan hun hmang chhunzawmin zingah Lal chhungkaw thlanah zahna hlanna Bungzung Lal chuan neiin, he hun hi Rongura, President MUP kaihhruaiin pangpar hlanna neih a ni. Hemi hnu hian chhun lamah haw runpui  function pui neih chhunzawm leh niin, H. Ramfangzauva VCP Bungzung chuan a kaihruai a. Organising Committee, Bungzung Welfare Champhai, Aizawl, Myanmar leh Bungzung Watsan Committee hnen atanga report ngaithlak a ni. Uaptu R. Vanlalmawia, MCS, Director, SIRD&PR, Mizoram chuan thusawiin, Bungzung khaw tana hun lawmawm tak haw runpui an hmang thei chu lawmawm a tih thu sawiin, he hun hmang tura haw khawm zawng zawngte inlungrual tak leh hlim tlang taka hmang theuh turin a duh thu a sawi a ni. Hemi hnu hian Bungzung khaw mi hmingtha te, Bungzung Lal fate leh Kum Upate chawimawina thilpek hlan a ni a, tlai lamah haw runpui lawmna ruai kilho nghal a ni.
            Nimin kha Bungzung Khawchhuak haw runpui hman tawp ni a ni a, parallel programme hmangin hmun 2-ah THalaite leh nu leh pate a hrangin Function neih a ni a, Lalmuanpuia Zawngte, Jt. Secretary Bungzung Welfare Comt. Aizawl kaihhruaiin Thlai pual hunhman a ni a. He hunah hian thalaite hnenah zirna lam uar a tulzia leh ruihhlo lama insum a tulzia te; R. Vanlalmawia, Director, SIRD&PR Uaptu chuan a sawi a ni.
            T. Lalrinthanga, Fin. Secy, Bungzung Welfare Comt. Aizawl kaihhruaiin nu leh pate pualin hun hman a ni bawk a. He hunah hian Hualthanga Chhakchhuak, Jt. Director, JR, S&WC chuan ei leh bar zawn lama nu leh pate mawhphurhna kawng hrang hrang a sawi ve thung bawk.

MHIP  THUKHAWM :
            Nimin khan Lalhlimthangi Khiangte, President MHIP Sub-Hqrs. Champhai kaihhruaina hnuaiah Special Committee Vawi 4-na an nei.
            He meeting ah hian Sub-Hqrs., Block leh Branch a Office Bearer a zawna kum 10 tang tawhte chawimawina hlan ni rawh se tih leh kum 2000 atanga chhiara kum 5 chhung OB tangte chawimawina pek ni se tih te, Gutkha Product do chu thu leh awm hma chu chak zawka hmalak ni se tih te, MHIP Member boral an awmin Pawndum bih chhunzawm zel  ni se tih te, Ruang tuamna puana hming ziah tawh loh tih chu kalpui chhunzawm zel ni rawh se, tih te leh Thlan tifaitu nei lo tihfaisak  thin chu kalpui zel ni rawh se tih te an rel a.
            Heng bakah hian Sub-Hqrs. huamchhunga mitthi an awmin Kuang chunga Pangpar dah thin chu Mitthi chhungte lungawina ngei tura mawi leh nalhin khawi thin ni se tih te, General Hqrs. inthlan kuma Nominee ten Block hrang hrangte kal man an tumsak thin chu Sub-Hqrs. huamchhunga Block te chuan lak ve tawh lo nise tih te, Sub-Hqrs. Champhai Executive Member atan Town Branch te chauh ruat ni se tih te leh Sub-Hqrs. Conference thlengtu puihna hi thu leh awm hma chu Rs. 50,000 pek thin ni rawh se tih tepass a ni a. Kum 2019-2020 chhunga Sub-Hqrs. Budget atan Rs. 3,38,000 pawm a ni.
            

Comments

Popular posts from this blog

Sermon

Thawhlehna - Thihna Hnehna
Chang thlante : I Kor 15: 1-34, Hebrai 2 : 14-15
Thawhlehna hi Bible zirtirna chiang tak leh kohhran thurin nghet tak a ni. Isua thawhlehna thuchah atang hian thurinte hi an lo to chhuak thar vek a ni. Thuthlung Thar kohhranah hian Krista thawhlehna hi kawng hnihin a inlan a. (1) Chhangphel : Hei hi sacrament rawngbawlna a ni. A tir atang rengin zirtirte khan inkhawmnaah chhang phel an ching thin. Hei hi Isua a tholeh ngei a ni tih hre lo tan chuan lungngaihna tuar rual loh hriatrengna a ni a, a hretu tan chuan ‘Chhang phel atang chuan a hmel an lo hre ta’ tih chu an testimony a ni ang. (2) Thu : Lalpa an khenbeh hnu chawlhkar tlemte chhungin zirtirte khan Lal Isua thiamlohchantirtute kha hmachhawnin a thawhleh thu leh lalna thu an hril a ni. Paula pawhin Felika hmaa a din khan ‘Mitthi thawhlehna thuah vawiinah hian in hmaah chhuahchhalhin ka awm a nih hi’ a tih kha. Tin, Thuthlung Thar ziaktute chuan Krista thawhlehna hi Pathian thu puanlawk tihkimna ni…

Sermon

Lal Isua i chawimawi ang u
Chang thlante : Matthaia 21;1-9, I Petera 3:15
Vawiin hi Tumkau Ni a ni a, Isua chu vawiin angah hian hmanah Jerusalem khawpuiah lal angin sabengtung no chunga chuangin a lut a ni. He khawvela hun a hman chhung zawng khan, vawikhat chiah, he Tumkau ni ah hian chawimawi a hlawh ve a ni. Pharisaite chuan mipui hlim taka Isua hmuaka lo au te chu a bengchheng tiin khap turin an la ngen lehnghal a. Keini, ringtute nunah pawh hian kan pianthar hlimchhawn bak hian Isua hian chawimawi a hlawh meuh lo em aw?? Vawiin hian kan thinlungah Isua hi Lalah i pawm thar leh ila, i chawimawi thar leh ang u.
Lal dangdai : Isua hian Pilata hmaah khan lal a nih thu hi a pha lo. Mahse, khawvel lal te angin leilungah lalram a nei lo va, tisa takin ralthuam nen hmelmate a bei lo va, a khawnbawl ve te lah chu sangha mantu Petera, Johana tih vel an ni. Chuvangin, a hunlaia Judate khan lal a nihna hi an pawm thei lo. An beisei Messia, Rom- ho awpbehna lak ata chhanch…

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…