Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Champhai Tualchhung Chanchinthar

ADDL. CEO HOVIN VOTE CHHIAR TURA INBUATSAIHNA ENFIAH :

Nimin khan  Additional Chief Electoral Officer Pu Krishna Mohan Uppu IAS   chuan  Champhai a rawn tlawh a, May Ni 23, 2019 a Lok Sabha inthlanpui vote tla  chhiarna tura inpuahchahna kalpui mek a rawn enfiah a ni.
Champhai District Election Officer Dr Naveen Aggarwal, IAS chuan inpuahchahna hrang hrangte NICConference Hall-ah powerpoint presentation hmangin   a sawi fiah a. Counting Center puahchah leh peihfel dante, Vote chhiar tur ruatna leh training pek tawh dante leh inbiakpawhna tur atana ruahmanna siamte a hrilhfiah a. CEO team ten Vote chhiar huna round tin report pekna tura duan Suvidha Counting Application hrilhfiahna an nei bawk a ni. Chawhnu lamah CEO Team-te hian EVM Strong Room leh  Vote chhiarna tura ruat Counting Hall pangate  an tlawh kuala, heng  an tlawh kualna hmunahte hian District Election Officer Dr Naveen Aggarwal, Champhai SP Pu Lalthiamsanga Sailo leh  District Election Official-ten an tawiawm a, ruahmanna an neihte an hrilhfiah zel a. Ruahmanna siamte chu tha tawka hriat anih thu leh Vote chhiarna tur dawhkan awm zat turte tul anga siam that leh Counting Hall luhna tur siam danglam ngai te a tul anga bawhzui leh nise tih a ni.
Champhai SP Pu Lalthiamsanga Sailo-in venhimna kalpui dan leh ruahmanna siamte a sawifiah a. ECI duhdanin inthlan vote chhiar chhungin DC Complex-ah venhimna khauh tak siam tum anih thu leh venhim hna hi thuah thum a kaipui tum niin, Central Armed Police Force, State Armed Police Forces-te leh Police ten  venhim hna  tha taka an thawh dawn thu a sawi a ni.
Election Official lokalte hi Pu Krishna Mohan Uppu, IAS,  Addl CEO; Pu Malsawmzuala, Assistant CEO leh Pi H.Vanlalruatfeli, Programmer-te an ni a. Ruahman dan chuan zanin hian Champhaiah an riak ang a, vawiin lamah Lawngtlai leh Siaha lama inpuahchahnate enfiah turin Champhai an chhuahsan ve leh dawn a ni.

VOHBIK-TE ENKAWL DAN TUR ZIRTIRNA PE :
Vawiin khan Grass Root Level Workers te tan Vohbik te enkawl dan turah sensitization programme neih a ni. He hun hi WC Zorammawii, CDPO, ICDS Project kaihhruainaa neih niin vawiin a an zir tur hi a pawimawh thu tarlangin an hman tangkai nghal tur a nih avangin uluk taka ngaithla turin a chah a ni.
He hun hi Champhai ICDS Block huam chhunga Anganwadi Worker te tan Rehabilitation Council of India leh SCERT, Govt. Of Mizoram ten an buatsaih a ni a, Venglai Community Hall ah neih a ni. Pi Vanlaldiki Sailo, Dy. Director SCERT leh Pi Zokungpui, Special Education Officer SCERT te chu Resource Person atana hman niin an ni hian kalkhawm worker te hnenah zirtirna an pe a ni.
Resource person te chuan vawiina an hun hman hian naupang Vohbik, an huam chhunga awm te chu a hma thei ang bera zawn-chhuah a, an mamawh ang à zirtirna pek leh enkawl nghal chu a tum ber a nih thu an sawi a ni. Rualbanlo chi hrang hrang te leh The Right of Persons with Disabilities Act, 2016 in rualbanlo te chanvo a humhalh dan.te zirho niin rualbanlote hi kawng hrang hrangah hmaih an ni fo tih sawiin, a then chu hmuhsit leh nuihza siamna atana hman te an nih fo thin avangin rualbanlote kim taka enkawl an nih theihna tur leh anmahni venhimna dan te chu siam a nih thu an tarlang a. Rualbanlote hi hmuhsit leh nuihza siamna atana hmang mai lo va an tih thiam tur chi hrang hrang zirtir hi mi tin mawhphurhna a nih thu leh, rualbanlote zir nana pek hi a thawktute chauh thawh tur ni lovin mi tupawhin an thawh theih a nih avangin vohbikte enkawl hi mitin thawh theih a ni tih hi midang hnenah pawh an zirtir a ngai tih an sawi a ni.
Resource person te chuan Anganwadi Worker te chu an huam chhungah kawng hrang hranga rualbanlo awm te zawng chhuak a, an mamawh hrechiang a, zirtir ngai te leh enkawl ngai an awm a nih chuan an theih ang ang a zirtima leh enkawlna hna thawk zui turin an chah a. Chutianga kawng hrang hrang a rualban lote enkavwl dan keh zirtir theih an nih dan te an hnen atang hian ngaihthlak a ni a, vawiinah training hi an nei zui leh dawn a ni.

NULA CHHUANAWM KAWM :
Nimin khan Gov't GM HSS zirtirtute chuan Pawl 12 result chhuaka Commerce Subject atanga 9-na K.Vanlalremi chu an school pisa-ah an kawm a. Commerce Subject-a top 10-a lang thei an neilh vawikhatna a nih thu leh, school a tihhming that avangin lawmthu an hrilha ni. K.Vanlalremi hi Commerce Subject-ah hian sorkar school atanga top 10-a lang thei awmchhuna ni. Pawl 12 result chhuakah hian Exam tura inziak lut mi 10,876 zingah mi 10,616 an exam a. Zirlai 8,380 an pass a, 2030 an fail a ni. Compartmental chance nei mi 206 tan hian MBSE chuan exam nawn leh hun atan thla thar June ni 6 a ruat a, Cham-phaiah chuan Gov't GM HSS ah exam hi neih a ni ang.

INSAK SAK :
Khawbung khuaa Pi Vanlalrawni dam lohna avanga inenkawl mek chu Khawbung Branch YMA-te'n a chenna in sak lai chu Khawbung Branch YMA a Section hrang hrangte inhnatlan chhawkin nimin khan sak pum fel a ni.
Pi Vanlalrawni hi mahni intodelh tak, chenna in pawh sak tuma a beam leh a ban concrete-a a siam mek laiin natna-in a tlak buak a. Hmunpui lamah inenkawl chhunzawm a ngaih avangin  Khawbung Branch YMA te chuan an huam chhunga Section 4 te chu a ni inchhawkin Pi Vanlalrawni chenna in sak mek chu hnatlangin an pui a. Nimin khan in hi sa pumin, tuaihnum ngai lai tuaihnum hnuah luah mai theih tura peih a ni.

THILPEK HLAN :
Nimin chawhma dar 9 khan Govt. GM High School 1974-1978 Batch te chuan Govt.GM High School ah ngaihhruihna thilpek an hlan.
He thilpek hlanna hunah hian Kum 1978 a Class X, Govt. GM High School hminga exam ten School hriatrengna atana an thawhkhawm pawisa tlingkhawm atanga an lei Projector, Water Cooler leh Ngaihhruihna thuziak bakah an pawisa hman ban Rs. 6000 chuang chu Govt. GM High School Headmaster & Staff kutah an hlan.
Govt. GM High School atanga kalchhuak Batch hrang hrangte hian School tan hian thilpek leh HSLC Exam a ti thate chawimawina hun pawh vawi tam tak an lo hmang tawh thin a ni.

TUIALHTHEI DINHMUN :
Mizofed Pump (Jail Veng)
Petrol (ms) Free Sale
Diesel (hsd) Free Sale
RC Filling Station (Zote)
Petrol (ms)  Service Tanky
Diesel (hsd) Service Tanky
RD Filling Station (Ramhrangkawn)
Petrol (ms) Free Sale
Diesel (hsd) Free Sale

Comments