Skip to main content

Champhai Tualchhung Chanchinthar

SYMA IN KAWNGPUI THA NEI TURIN HMALA DAWN:

Inrinni khan YMA Sub-Headquarters Champhai chuan kum 2018-2019 a a vawi hnihna atan Executive Meeting an nei.
He hun hi VL Chama Hnamte, President SYMA kaihhruaina hnuaiah SYMA Office, Tlangrawtah neih a ni a VL Chama chuan member in auhkhawm a ngaih niah an member te an chhuak tha lo fo thin chu kawng tam takah hruaitute'n mawhphurhna an neih thu a sawi a, hruaitute'n an zir chuan an member te an phur mai thin ani, a ti a. Thuthmun Branch te hian Group YMA te hi kan pha thei meuh lo a ni, a ti bawk. VL Chama chuan thangthar te'n kan hnam humhim duhna thinglung lian tak an neih mek lai hian an thinlung duhna hi a hlawhtlin theihna tura theihtawp kan chhuah a ngai a ni, a ti a. Hmun hrang hranga zofate kan inunau zel theihna turin kan YMA na hi kan vawn nun zel a ngai a, tan kan lakzual a ngai a ni, a ti. Hnam inpumkhatna kan neih zel theihna tur hian District hrang hrangte chuan an entawn ber chu Champhai, Zokhawpui hi a ni tih sawiin entawn tlaka kan awm zel a tul a ni, a ti bawk. PC Lalrawnliana hnen atangin report ngaihthlak a nih bakah agenda sawi hawnna hun a hman hnuah rorel tan nghal nin April ni 5 a Kahrawt Community hall-a ro a lo rel tawh bawhzui dan tur chungchang an sawi ho a ni.
YMA khawih an rorel zingah pem lehkha leh testimonial pekchhuah leh lak chungchangah CYMA in rualkhai taka hman tura duan chu a nihna ang tak leh kim taka dah khah thin ni se, an ti a. Kan tui tlan leh lakna tui hnar a thianghlim theihna turin Group leh Branch tinah thenfai hnatlang neih ni se, an ti. SYMA anga lui hnar tihfai hnatlang runpui neih ni se, UD&PA te hmalakpui ah sawm ni se, an ti bawk. Fa lak chungchangah hnam dang ringlote'n mizo, fa-a an la thin chu tha an tih loh thu leh mizo te'n an fate ringlo mite hnenah an pek lohna tura inzirtirna neih ni se, an ti a. Hemi atan hian Social Welfare Department, Aizawl te biak ni se an ti. Sub committee hrang hrangte hmalakna tur an sawiho bawk a ni. Sawrkar khawih ah Champhai Polytechnic chu a nihna tur taka hman a nih theihna atan leh District Hospital chu changtlung zawka siam a nih theihna atan ziakin thuneitute hnenah thlen ni se an ti a. PWD in Champhai khaw chhung kawng an siam mek chu chak zawk leh tha zawka siam a nih theihna atana hmalak dan tur te an sawiho bawk.

VANDUAINA THLENG :
Inrinni zing Dar 5 vel khan Champhai Tlangsama Pu Hrangkianlova in chu bungrua engmah chuh hman lohin a kang ral vek.
Pu Hrangkianlova hi Zirtawpni zan khan amah chauhin ainah hian a riak a, a in kang hi a thenawmte chuan hmuin an kai tho va, a tlan chhuak hman hlauh a ni. Kangmei a chhuak a ni tih hriat a nih veleh Tlangsam khawtlang te tlan khawm nghalin Fire Dept-te pawh thleng mah se kangmei hi a nasat tawh em avangin thêlh mih thėih a ni ta lo a ni
Vanneihthlak takin he inkangah hian In neitupa Pu Hrangkianlova ban chu nasa lutuk lovin a kang tih loh chu thi leh hliam an awm lo va. A ui leh a Arte pawh chhan hman a ni bawk. Kangmei hi a inhnuai lam atanga chhuak niin, inhnuaia a ar vulh, Electric a peknaa current kal sual atanga chhuak a nih rin niin, In kangah hian Pawisa fai Rs. 3,26,700 bakah Thingzai khawl, Scooter bakah Bungrua Rs. 1,20,000 man hu bawr vel a kang ral ni a hriat a ni.
Inrinni zing khan Tlangsam VC leh NGO hrang hrangte chu thukhawmin Inrinni khan inkang bungruate senghawi leh mahni chakneih ang angte keng khawmin hnatlang an nei a, vawiinah insak hnatlang an nei chhunzawm dawn bawk a ni

CHAMPHAI RAWLTHAR TE CHHUANAWM :
Avalon Badminton Tournament, 2019 Mission veng Aizawla khelh zawh takah Champhai Venglai rawlthar Saihmingmawia Sailo s/o Hranghmingthanga Sailo (Tesena) chu Under-15 Boys Singles-ah a Champion a. Lalrinchhana s/o Rothuamluaia Vengthlang chu Mens Singles B ah Runner Up a ni bawk.

EXAM TURTE TAN :
Champhai District atanga HSLC Compartmental Exam tum
tan tun thla ni 6-14 chhung hian Gov't. GM H/S Office-ah Office hun chhungin ngaihven theih a ni tih thu kan dawng.

TUIALHTHEI DINHMUN :
Mizofed Pump (Jail Veng)
Petrol (ms) Free Sale
Diesel (hsd) Free Sale
RC Filling Station (Zote)
Petrol (ms) Service Tanky
Diesel (hsd) Service Tanky
RD Filling Station (Ramhrangkawn)
Petrol (ms) Service Tanky
Diesel (hsd) Free Sale

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…