Skip to main content

Champhai Tualchhung Chanchinthar

 CHAMPHAI TLANGVAL CHAMPHAI TAN :

Aizawl leh Champhai inkar Helicopter Service, chawlhkar khata vawi 2 thlawk thin chu vawi 5 thlawk tawh turin ruahmanna peihfel a ni.
Aizawl leh Champhai inkar kawngpui a la  that tawk rih loh avanga Champhai leh a chheh vela dam lo, upa te leh zin mite’n  harsatna an tawh mek chu sutkian a tul thu Transport Minister Pu TJ Lalnuntluanga’n Chief Minister, Pu Zoramthanga hnena tawngka leh ziaka a thlen chu Chief Minister-in lo ngai pawimawhin mipui zin veivakte harsatna sutkian a nih theihna turin ruahmanna thar hi siam a ni.
Helicopter thlawh dan tura ruahmanna an siam  thu hi GAD Civil Aviation Principal Consultant, Wing Commander, Pu J. Lalhmingliana’n vawiin khan  Transport Minister hrilhin, karleh Thawhlehni atangin Thlawhtheina hi thlawh belhtir tan a nih tur thu te, hemi chungchanga hriattirna pek chhuah ngai te pe chhuakin hma lak nghal a nih tur thu te a sawi a. Principal Consultant chuan Helicopter Service-tir hi thil namai a ni lova, darkar 1 lekah pawh Rs. Sing 8 vel mamawh a nih avangin passenger te khat reng thei se an duh thu a sawi bawk.
Ruahman dan chuan Aizawl leh Champhai inkarah Thawhlehni-ah vawi 1, Ningani-ah vawi 3, Inrinni-ah vawi 1 Thlawhtheihna a thlawk thin tawh dawn a ni.

CS CHAMPHAI LOKAL :
Nimin tlai khan Chief Secretary Lalnunmawi Chuaungo, IAS chuan Champhai a lo thleng a, Champhai DC, SP leh Officer dang ten Circuit House tualah an lo hmuak.
Chief Secretary hian tukin hian Zokhawthar a pan ang a, India Ambassador to Myanmar Saurabh Kumar, IFS nen an inkawm dawn a, line department hrang hranga hotute nen ramri hrula department hmalaknate an en ho dawn bawk. Chief Secretary hi Aizawl atangn J. Hmingthanmawia, Director, Commerce & Industries; HD Lalrintluanga, Jt Director, Commerce & Industries; David H.Lalthangliana, OSD to CS leh Department aiawh dang ten an rawn tawiawmna a ni.

RUIHHLO MAN :
Nimin tlai lam-dar 3:30 vel khan Champhai Excise & Narcotics Enforcement  Staff te chuan Sapianmaksak, Zokhawthar kawngah Heroin hawng thum (33.6 grams) an man a, a neitu-a puh K. Zosangliana (33) s/o Zachungnunga (fam) leh Andrew Lallawmsanga (27) s/o Simon Dala, Muanna Veng, Aizawl ve ve te chu an man a, NDPS Act 1985 hnuaiah thubuai an ziak lut nghal a ni.

MZ04 A 2355 TLING TA :
District Transport Office Champhai-ah April thla chhung khan 2 wheeler 486, car 16, Bolero 1, Truck 20 leh JCB 3 te ziahluh a ni a, hriat theih chinah lirthei ziahluh hnuhnungber hi MZ04 A 2355 a ni. April thla chhung vek khan lirthei mihring phur atangin Rs. 14,767; bungraw phur atangin Rs. 1,78,638; road tax atangin Rs. 8,09,739 hmuh niin, MV Fee atangin Rs. 5,79,540 leh Parking Fee atangin Rs. 34,310 hmuh a ni a, lirthei hrang hrang atanga sum hmuh hi Rs. 16,16,994 a ni.

CHAMPHAI RAWLTHAR TEN CHAMPHAI TIMAWI TAN :
Mizoram pum huap Grassroot Badminton Tournament-ah Zoramthari d/o Lalthlekchuailova (fam), Vengthlang chu Under 11 Girls Single ah Champion in, JK Vanlalmalsawmi d/o Johnny, Vengsang chu Under 13 Girls Single ah Runner Up a ni bawk.
Zoramthari hi Under 11 Girls Single ah Mizoram No 2 a ni mek bawk. KVS Regional Sports Meet 2019, Agartala a neihah H. Lalchhanhimi, Venglai Champion in, Avalon Badminton Tournament, 2019 Mission Veng Aizawla neihah Saihmingmawia Sailo, Venglai chu Under 15 Boys Single ah a Champion bawk. Hei bakah hian Joshua Lalremmuana, Zotlang chu State Player atana thlan zingah telin Assam-ah All India Level Tournament a zu khel a ni.
Lalrinchhana s/o Rothuamluaia, Vengthlang chu Avalon Badminton Tournament ah Mens-B ah Runners Up a ni a, a ni hi Mizoram Badminton Clúb lian leh hlun Saron Badminton Club in an Club zawm tura an sawma ngin a zawm tawh bawk a ni.

MALSAWM RUAH DINHMUN :
Kumin chhungin Champhai chuan ruahtui mm 128.3 a dawng tawh a, tun thlaah hian mm 19.8 a tla tawh bawk. Kumin chhungin February thla khan Champhai inruahtui a dawn hnem ber tum la niin mm 52.4 a dawng a, January thla khan a dawng lo thung. Kum 10 kal ta chhungin April thla bikah kum 2017 kha ruahtui tlak tam ber tum niin mm 273.3 a tla a, kumin hia tlak tlem ber tum niin mm 22.1 a tla ve thung.

TUIALHTHEI DINHMUN :
Mizofed Pump (Jail Veng)
Petrol (ms) Free Sale
Diesel (hsd) Free Sale
RC Filling Station (Zote)
Petrol (ms) Service Tanky
Diesel (hsd) Service Tanky
RD Filling Station (Ramhrangkawn)
Petrol (ms) Free Sale 
Diesel (hsd) Free Sale



Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…