Skip to main content

Champhai Tualchhung Chanchinthar

CHIEF SECRETARY IN ZOKHAWTHAR TLAWH, CHAK ZAWKA KAWNG SIAM TURIN HRILH :

Nimin chawhma khan Mizoram Chief Secretary Pu Lalnunmawia Chuaungo IAS chuan India leh Myanmar ramri Zokhawthar hmuna sawrkar hmalakna hrang hrangte a tlawh a,   Ambassador of India to Myanmar Pu Saurabh Kumar IFS nen Rihkhawdar (Myanmar)-ah an inkawm a, ram pahnih Border Point-te an tlawh a, hemi hnu hian Land Custom Station Zokhawrtharah Indo-Myanmar inlaichinna, inkalpawhna, insumdawntawnna leh tul dangte Official-te nen an sawi ho a ni.
He hunah hian India Sawrkar leh Myanmar sawrkar  inkara thawhhona hrang hrang awmte sawrkar Official-te nena sawiho a ni a. India sawrkar puihna hmanga Myanmar ram chhunga inkalpawhna  kawngpui Tiddim Road siam mek chak zawka  kalpui leh Tiau lui kana Lei lian leh rinawm zawk Indo-Myanmar Friendship Bridge, Zokhawthar siam dan turte sawiho a ni a. Mumal zawka Indo-Myanmar Trade kalpui anih theihna turin remchang hmasa berah Ministry of External Affairs, Govt of India  kaltlanga Joint Seminar on Bilateral Trade Potential Mizorama  buatsaih tura hmalak nise tih a ni bawk.
Meeting-ah hian ramri hrula khawtual insumdawn tawnna tur Border Haat; Hnahlan, Zote, Vaphai leh Pangkhua, Mizoram leh Myanmar lama  siam tura ruahmanna kalpui tawhte chu chak zawka bawhzui nise tih a ni a. Ramri atanga teha aerial distance  kilometre 16 huamchhung chu  ram pahnih mite tan awlsam taka inkawlpawh theihna ‘Free Movement Regime (FMR) chungchangte pawh meeting-ah hian sawilan niin Pipu sulhnu pawimawh leh Mizote nuna bet tlat Rih Dil tlawh tura harsatna awm thinte pawh dan anga ruahmanna tha tak siama hmalak nise tha tih a ni bawk a. Ramri kaltlanga insumdawnna  pawh anih dan tur ang taka kalpuia, dan in a phal loh te ven kawnga   tanlak angaih thu pawh tarlan a ni a. Zokhawthar hmuna Land Custom Station leh Line Department hrang hrangte hnathawhna hmun leh hmanruate mumal leh chak zawka chhawr anih theihna tura tihchangtlung a tul tawha hriat a ni a, line department lamten lo bawhzui se tih a ni.
Meeting-ah hian Brigadier Vinod S, Commander, 23-Sector Assam Rifle chuan ramri inkalpawhna, venhimna leh inthianthatna siam tura Assam Rifles-te hmalakna hrang  hrangte Presentation hmangin a entir a. Myanmar leh India inkarah hmasawnna tura theihna nasa tak la hai chhuah zawh loh a awm thu tarlan a ni bawk.
Chief Secretary leh amah tawiawmtute hian Indo-Myanmar inlaichinna that zelna tura duhsakna lantir nan ramri kanin Myanmar ram an lut a, Pipu sulhnu hmun pawimawh tak Rih Dil an tlawh bawk a ni. Meeting   zawh hnu hian Zokhawthar hmuna Land Custom Station, Plant Quarantine, Police Check Post, Warehouse leh Sawrkar building pawimawh dangte an enfiah nghal a ni.
Mizoram Chief Secretary hi  Pu J.Hmingthanmawia, Director, Commerce & Industries Department, Dr Naveen Aggarwal IAS, DC Champhai; Pu Lalthiamsanga Sailo, SP Champhai; Pu ZD Lalrintluanga, Jt Director Commerce & Industries; Pu David H.Lalthangliana OSD, Home Department leh District Official-ten an tawiawm a.  India Ambassador to Myanmar Pu Saurabh Kumar, IFS hi Pu B.Muthuswamy  IAS, First Secretary, Development Corporate, Indian Embassy Myanmar; Pu Pu Rajesh Kumar, IFS, Consul, Consulate General of India, Sittwe;  Pu Tin Win, Deputy General Director, Border Affairs, Myanmar leh Official dangten an rawn tawiawm a ni.
Ambassador nena an inkawm zawh hnu hian Champhai to Zokhawthar World Bank Road  siam mektu TARMAT Company hotute meeting a neihpui a, kawng pawimah tak anih tih hria a, hmanrua leh hnathawktu tam zawk chhawra chak taka hnathawk turin a chah a, an hmasawnnate thla khat hnuah a hnena thlen turin a hrilh bawk a ni. Chief Secretary hi Sub-Hqtrs YMA Champhaiin tawlhloh puan an sin tir a, khawtlang   leh ram leh hnam tana thil pawimawhte an sawipui bawk a ni. Nimin Chief Secretary Zokhawthar tlawh hi khawtlangin an lo hmuak a, a hnenah khawtlang mamawh an lo thlen a ni. Chief Secretary hian Champhaiah zan khat a cham hnuah vawiin chawhnu lam khan Champhai chhuahsanin Aizawl a pan a ni.

DIRECTOR IN HOSPITAL TLAWH :
Nimin khan Dr.T.Lalhmangaihi, Director, Hospital & Medical Education Dept. chuah District Hospital Champhai a rawn tlawh a, Trauma center building sak mek leh incinerator building sak mekte a enfiah.
Director hian Dialysis khawl nei tura hmalak mek a nih thu leh supply order pawh chhuah a nih tawh thu a sawi. Hospital a Cabin awmte chu a theih ang anga lo hmang turin thawktute chu a chah bawk. Champhai MLA ten ICU nei tura nasa taka hma an lak thu te, tuna Trauma Center sak mek hian ICU changtlung tak a ken nghal tur thu a sawi bawk. Tunah hian Mizorama Health & Family Welfare department hnuaiah hian post ruak hnawhkhah loh 800 a awm thu leh heng post ruakte hi a theih anga tam hnawhkhat tura sawrkain hma a lak mek thu a sawi a. Director hian Saitual leh Khawzawl Hospital te pawh District a lo nih dawn tak avangin District Hospital a hlankai dan tur leh Plan siam dan tur ruahmanna te a hmunah an enfiah nghal bawk.

FOOTBALL ZIR TURIN THLANG :
Reliance Football Academy a awm thei turin Ramdinpuia s/o Rodingluaia, Hnahlan chuan Final selection paltlangin Academy lut turin a tling. He academy-ah hian Champhai naupang, Chhantea Venglai pawh a awm mek bawk.

RUIHHLO MAN BELH :
Champhai Excise te chuan Thawhlehni-a Heroin Hawng 3 an man an chhui zuinaah nimin zing khan Heroin Hawng hnih (23.8 grams) Tuipui Bazar, Champhai-ah an man belh a, heng heroin an man leh te hi a hma ni a Heroin an man sak te ta tho niin thu dawn ani

DISTRICT LIBRARY DINHMUN :
April thla khan District Library-ah member 2 inziak lut thar an awm.
District Library-ah hian member 1847 awm mekin, puitling 1623 leh naupang 224 an awm mek a,April thlaa inziak lut thar hi puitling 2 an ni. April thla chhungin Library tlawhtu mi 402 awmin lehkhabu thar 190 a thleng a, lehkhabu awm zawng zawng hi 29,549 niin, tualchhung chanchinbu 5 leh Magazine, Mizo tawnga ziak 4 a awm mek bawk.

PWD TEN KHAWCHHUNG KAWNG SIAM MEK :
Champhai PWD te chuan khawpui chhung hmun hrang hrang kawng chhia leh khuar, thuam that ngai te thuam that hna an thawh hnuah tunah hian Champhai leh Hmunhmeltha inkar kawng an siam meka.
Hei bakah hian Hmunhmeltha atanga North Khawbung pawh an siam nghal a, N. Khawbung panna kawng hi a thui deuh avangin a khawih chhung arei deuh dawn a, tun thla chhung hian zawh hman erawh tum niin thu kan dawng.

HNA THALO A AWM CHUAN MIZORAM PWD HRIATTIR TUR :
National Highway - 6: Seling-Champhai kawng hi PWD chuan BRO atanga a lak hnuah theihtawp chhuahin a thei ang angin a enkawl mek zel a. Kawng neitu, Ministry of Road Transport & Highways (MoRT&H) lamin beisei anga rangin sanction an pek loh avangin tum anga hna thawh theih a ni lo chu PWD chuan pawi a ti a. Seling-Keifang leh Kawlkulh-Khawzawl inkar chu nikum lam khan thuam that zawh tawh a ni a. Keifang-Kawlkulh leh Khawzawl-Champhai kawng thuam thatna tur chu nikum hmasa lama sanction tura beisei pawisa hmuh loh avangin a khawtlai a. Kumin tir lam khan Central Sawrkar atanga sanction hmuin, tunah hian tender chhuah mek a ni a. Kumin fur zawh veleh hna hi tan theih beisei a ni.
He lamlian double lane-a sial tura DPR nikum lama peih tawh chu tun thlengin  MoRT&H chuan a la sanction lo a. He hna hi National Highways & Infrastructure Development Corporation Limited(NHIDCL) kuta awm turin  Central Sawrkar chuan a ruahman a. Sanction a awm hnuah leh Land Acquisition tihfel hnuah chauh hna tan theih a ni dawn a ni.
Hetiang dinhmun anih avang hian theih ang angin State PWD chuan he kawng hi enkawl zuiin, sum lam pawh MoRT&H mawhphurh ni mahse fur hma a thawk tura sanction min an pek bawk si loh avangin leh kawng a lo chhiat zel si avangin, mipui harsatna sukiang turin State Sawrkar chuan 2019 tir khan PWD hnenah pawisa a pe a. He sum hi Keifang-Kawlkulh leh Khawzawl-Champhai inkar kawng chhe zual thlan bik siam thatna tur niin, a tluana alkatra a thuam thatna tur a ni lova.
Chutiang a a chhe zual thlan bik siamthat hna Contractor-in a thawh tawh Km 19 zingah metre 30 vel fuhlo leh chhelai a lo awm palh a; hetianga chhe bik lai hi 0.15% vel a ni a. Hemi chhe lai hi PWD  hna enkawltu pawhin hmuin siamtha turin Contractor a hriattir a.  A chhe lai nia hriat chu tunah chuan siamthat leh vek tawh a ni a. Tuna he kawng repair hna thawh mek lai leh, nakin a resurfacing thawh hunah pawh contractor hna thalo hmu apiangin, a bialtu PWD mite hriattir zel turin PWD in an ngen a. Hetiang ang hna thalo thenkhat a lo awm leh thin hi Mizoram PWD chuan pawi an ti tak zet a; hetiang hna tha lo siamtha turin  PWD chuan hmalak an tum zel a ni.

TUIALHTHEI DINHMUN :
Mizofed Pump (Jail Veng)
Petrol (ms) Free Sale
Diesel (hsd) Free Sale
RC Filling Station (Zote)
Petrol (ms)  Service Tanky
Diesel (hsd) Free Sale
RD Filling Station (Ramhrangkawn)
Petrol (ms) Free Sale
Diesel (hsd) Free Sale

Comments