Skip to main content

Champhai Tualchhung Chanchinthar

VENGSANG BRANCH YMA IN THISEN PE:

Inrinni khan Champhai Vengsang Branch YMA te hian District Blood Bank-ah thisen an pe.
Thisen pek a nih hma hian hun hman a ni a, Dr. Biakthansangi, Pediatrician chuan thusawiin, thisen hi a hlu em em a, a hlut zia hriafchian loh chuan midang tana pek mai te hi uiawm chang a awm ve thei a; mahse, thisen hi thla 3 danah a thar a insiam zel avangin hlu hle mah se midang nun chhanna atan chuan a uiawm lo hle thung a ni, a ti a. Doctor te'n an thiamna hmangin damlo an enkawl a, an thiamna ang nei pha ve lo te'n Doctor hna kan thawh theihna phakhat chu thisen pek hi a ni, a ti. Mi mawl ber pawhin midang nun chhanna atan thisen hi a pe thei tih sawiin, thisen pe thei tura tul pawimawh awm te a tarlang a, mimal leh thianho ang pawh a thisen pek hi chhunzawm zel turin a sawm a ni.
Champhai Vengsang te hian YMA Day pual leh June thla hi an Branch YMA in thisen an pek thla a ni a, hemi denchhen hian Inrinni khan a mamawhte hman turin thisen hi an pe a. Mipa 34 leh Hmeichhia 6 te chuan Thisen Unit 40 an pe a,
George Lalthanngüra, DAO Champhai chuan thisen pe te ei tur a tum sak. Vengsang Branch YMA hian June thla chhung hian Blood Camp vawi 2 neih leh an la tum a ni.

TAWH TUR THAWK MINISTER FAKAWM:
Transport Minister TJ Lalnuntluanga chuan Zirtawpni-a zirlai ti tha te chawimawina hun a
hmanpui hnuah a bial a fan chhunzawm mek.
Inrinni khan Minister hian a bial chhung Dilkawn khaw huam chhunga HSLC leh HSSLC pass tharte an chenna Inah kalin chibai a buk a, lawmpuina thilpek hlan nghal a ni. Dilkawn khua bakah Kelkang, Zokhawthar,  Melbuk leh Mualkawi khaw huam chhungah te HSLC leh HSSLC zirlai ti thate chibai bukna leh lawmpuina thilpek hlan hian hun a hmang a ni.
Nimin chhun Inkhawm ban khan New Champhai huam chhunga HSLC leh HSSLC pass thar te an chenna inah kalin chibai bukna leh lawmpuina thilpek a hlan a, chawhnu inkhawm banah Tlangsam lam panin HSLC leh HSSLC pass tharte chibai bukna leh lawmpuina thilpek hlan hian hun
hmang chhunzawm leh Vawiin hian a bial chhung hmun thenkhat a tlawh kual leh hnuah Champhai South Higher Secondary School (Pvt.) hawnna hun a hmang leh ang a, chawhnu dar 1:00 ah Aizawl panin a kir ang.

SCHOOL EDUCATION MINISTER :
School Education Minister Lalchhandama Ralte chuan tukin hian Champhai HSS building thar
hawng turin Aizawl atangin Champhai a rawn pan ang a, chawhnu dar 1:00 ah school  building thar hi a hawng ang.
Zanin Champhai-ah riakin, naktuk zingah Farkawn HSS Crystal Jubilee lawmna hun hmanpui turin Farkawn a pan ang a, Farkawnah a riak ang. Nilaini zingah  Khawbung a pan le ang a, Khawbung HSS Tin Jubilee lawmna a hmanpu ang a, Khawbungah riakin Ningani zingah Aizawl lamah a kir thla leh ang Minister hi East Tuipui bialtu MLA Ramthanmawia leh C.Lalmuanpuia, MLA baka School Education dept lama hotuten an rawn 
tawiawm ang.

RAMSA LEH THIL DANG MAN :
Champhai Police leh Khawzawl SDPO te chuan
Zirtawpni liam ta zan khan Zokhawthar kal tlanga Myanmar atanga lakluh Nungcha, Sava leh Ramsa chi hrang hrang lirthei hmanga phurh chu Mualkawi dai-ah an man.
Police te hian Zokhawthar panna kawnga lirthei tlan an enfiahna lamah Zokhawthar atanga Aizawl pan-tur Maxicab ah ramdang  atanga lakluh Green Parrot7, Black Parrot 2, Black Cokatoo 6, Emu (Ostrich ang chi) 3, Small Green Parrot 6, Multicolour Parrot 20, Owl Monkey leh Slow Lories (Sahuai)2 an man a. Hemi rual hian Nauban chi 4 an man tel bakah Thing zaina khawl (Chainshaw) pawh man a ni bawk. Zirtawp zan vek khan lirthei khalhtu hi- man a ni a, Police te'n thu an zawh fiah -naaha thil phurh chu lirthei neituin a muthilh laia a lo load a nih thu leh eng nge a phurh tih a hriatpui loh thu a sawi. Wildlife DFO Khawzawl kutah heng ramsa te hi hlan a ni a. Wildlife Act tlawhchhana thubuai siam nghal a ni bawk.

ṬAWNGṬAI RAMMU :
Vengthlang Presbyterian Kohhran KTP-te chuan kar kalta khan Chhanchhuahna Inah tawngtaiin an rammu a, chhun lamah Programme an siam lo va, zan lamah erawh zantin hun hman thin niin riaklut leh lang in member 80 vel an rammu a ni.

HARSATNA MLA HOIN EN :
Lengteng bialtu MLA L.Thangmawia chuan
tunhnai a Kawlkulh leh a chhehvel khua ten an eng lakna ber 132 KV Sub-Station Khawzawl-Kawlkulh transmission line inkara harsatna an tawh thin vanga power an hmu tha theilo chu a hmunah kalin a enfiah.
P&E Dept hotute chuan,tunlaia Kawlkulh leh a chhehvel ten zan lama power supply an hmuh that loh chhan chu line foul a awm thin vang a nih tih an hrilh a, harsatna hi pumpelh a nih theih nan Line existing Location te siamthat a ngaih thu an lo thlen. MLA chuan ruahtui tla in Line foul a siam thin chu pumpelh nan  theihtawp chhuah tur feh a rang thei ang bera Jungle Clearance nei turin a ngen. MLA hian DRDA Champhai in Puilo leh Tuichang inkar a Link road km 5 a sei laih tur chu a enfiah bawk.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…