9ee8f597df54c5665b0d7e28b99c2dea9baf6977 Champhai Tualchhung Chanchinthar Skip to main content

VANGPUI DAY PUALIN THISEN PE

VANGPUI DAY PUALIN THISEN PE :
New Champhai chuan Vangpui an
lawmna tur pualin damlo mamawhten a thlawna an hman turin Inrinni khan New Champhai-ah thisen an pe.
New Champhai khawtlangin Vangpui an lawmna tur pualin, damlo mamawhtuten a thlawna thisen an dawn theihna turin New Champhai MHIP Branch bultumin Corner Stone School-ah thisen hi pek a niin, District
Hospital atangin Blood Bank Officer Dr. R. Vanlalchhuangi leh Technician-ten an kal chilh a.
Thisen petute hi mipa 21 leh hmeichhia 7 niin, thisen Unit 28 an pe a ni. New Champhai khawtlangin October 31 leh November 1, 2019 a Vangpui a lawmna turah khawtlang tana tang kai thawkin, Zirtawpni khan mi 500 chuang thawk chhuakten Veng chhung thenfai hnatlang an nei a. Ni hnih-awh Vangpui lawmna atan hian veng chhung mi tlawmngai ten Bawng 2 leh Vawk 1 an thawh bakah sumfai Rs 2,00,000 chuang an thawh khawm bawk a. Intih hlimna chi hrang hrang leh ruainen ropui taka hun hman an tum a ni.

Champhai Tualchhung Chanchinthar

POLICE STATION THA BER CHAMPHAI :

Nimin khan Champhai SP Lalthiamsanga Sailo thlahna leh Champhai Police Station chu Best Police Station-a thlan an nih lawmna hun chu
SP Office, Keifangtlangah Francis Lalnuntluanga Ralte, MPS, Addl. SP kaihhruaia hman a ni.
Francis Lalnuntluanga Ralte chuan Police Station tha bera Champhai Police Station puan a ni chu Champhai tan thu lawmawm tak a nih thu leh Lalthiamsanga Sailo pawh a kaisan avanga transfer a nih avangin a lawmawm hle a ni, a ti.
Lalthiamsanga Sailo, MPS chuan Champhai hi naupang anih lai atang tawha engkima a tan ber a nih thin thu a sawi Champhai-a a awm chhunga Election tum hnih, hautak tak tak an hmachhawn tumah a thawhpui te fakawm a tih thu sawiin, paltlang a harsat tur thu leh an tih tur theuh an ti chu lawmawm a tih thu a sawi a. Champhai leh Khawzawl District then hran a nih hmaa Champhai tana SP hnuhnungber tur ani thei chu lawmawm a tih thu sawiin chhinchhiah tlak tak a nih thu
a sawi a ni.
Champhai Police Station chu Police Station tha bera puan a nih theih chhan chu Champhai Police-a lo tang tawh zawng zawngte thawhrimna vang a nih thu a sawi a; an office leh a chhehvel siam that a ngaih apianga staff te'n phur taka thawh zel thinna chuan Police Station tha ber nih hi an a phu hle a ni, a ti a. Police chhuanawm tak ni zel tura an hnathawh apiang fel fai taka zo zel a, rawng an bawk sak Champhai mipui tana malsawmna ni zel turin duhsakna a hlan a ni.
Lalringdika, MPS, Commandant 2nd IR Bn.
Khawzawl pawhin thusawiin District tinah District Police enkawl tur hian hnam dang aiin Mizo ngei enkawl hi kan duh theuh a, chutiang Mizopa ngei Champhai in a chan tur chu a uiawm dawn hle a ni, a ti a. Best Police Station atan Champhai thlan an ni chu an phu hle tih sawiin Champhai Police Station in hna a thawh a lo hmuh tawhah te an thawh that thin thu a sawi bawk.
Kum tin Centre Core Ministry in a thlan thinah
Kum 2018 chhung khan Mizoram chhunga Police Station hrang hrang tha  tehna-ah Champhai Police Station chu tha ber a puan a ni a. Nimin a Champhai Police te'n an thlah liam tak Lalthiamsanga Sailo hi Kum 2018 March ni 16 khan Champhai SP ni turin a hna a rawn zawm a, Champhaiah kum 1 leh thla 3 a awm hnuah Joint Secretary, Home Dept hna chelh tura sawn a ni.

CHAMPHAI DISTRICT SESSION COURT :
Sawrkar hmalakna tur hrang hrang ngaihtuahin nimin khan Cabinet Meeting chu Chief Minister's Cabinet Room-ah neih a ni.
Cabinet meeting-ah hian department pakua atanga lut, sawrkar hmalakna tur hrang hrang ngaihtuah a ni a. Heng zingah hian Guwahati Mizoram House atan hmun lei te, Officer te hman tur laptopleh bungraw dang lei chungchang te, The Mizoram (Election to Sinlung Hills Council) Rules, 2019 chungchang te, The Mizoram Allocation of Business Rules 2019 chungchang te, The Mizoram Clinical Establishments (registration& amendment rules, 2019) chungchang leh LAD hnuaia Muster Roll-a thawkte dahnghehna tur bakah zirtirtu dahngheh te, Regional Office of food Corporation of India (FCI), mumal lehzuala Mizorama kalpui dan tur te, Champhai-a District Session Court dah nghehna tur leh The Mizoram Drug Treatment cum Rehabilitation Centre (TRCS) Accreditation Rules 2019 chungchang bakah, Draft Mizoram Youth Commission Rules 2019 leh The Mizoram Land Révenue Amendment Bill, 2019 chungchang te ngaihtuah ho a ni.

RUAHTUI TLAK DAN :
Kumin chhung hian Champhai in ruahtui 264.5 mm a dawng tawh a, May thla kha ruahtui a dawn tam ber tum niin 156.9mm a dawng a, January thla khan Champhai in ruahtui a dawng lo thung a, za zela chhutin kumin chhungin thla tin Champhaiin ruahtui 52.9mm a dawng ziah ang a ni. Kum 10 kal ta chhunga May thla chhung bikah kum 2013 kha Champhaiin ruahtui a dawn tam ber
tum niin 446mm ruahtui a tla a, kum 2015 khan ruahtui 108.625 mm tla in kum 10 kal ta chhunga ruahtui tlak tlem ber tum a ni.

MIBO HMUH A NI :
Pathianni zing atanga bo Pu Lalnghakmawia chu nimin zing khan Ngur rama an ramriahna bulah hmuh a ni.
Pu Lalnghakmawia, Electrict veng, Champhai hi Ni 9.6.2019 zinga a bo chu nizan hmasa thlenga hmuh a nih loh avangin nimin zing khan Electrict Veng YMA, bo zawng tura an chhuah hma-in an hmuh thu an dawng a. Nimin zing dar 7:30 vel khan an ram riahna atanga hla vakloah dama hmuh a ni. Pu Lalnghakmawia hian a sawidan chuan Ko-tu a nei a, a zui niin a sawi a, amah hi a chau hle a, an buk lam rawn pan lehin an riahna buk atanga hla vak loah a riahpuite hian an hmu a
ni tih thu kan dawng.

FOOTBALL ZIRNA RUN LAMAH :
Bengaluru Football Academy a awm turin Champhai naupang pahnih an tling thar.
Bengaluru Football Academy a awm turin Vanlaltleipuia s/o Lalkrosmawia, Venglai leh
Lalhluzuala s/o Lalkhuma, Venglai te an tlingthar a; ti hian India ram football academy tha-ah Champhai naupang 9 an lut ta a.  Heng naupangte hi CDFA grassroot leh Baby League naupangte an ni. Reliance Football Academy (Mumbai)-ah awm turin Lalchhanchhuaha, Venglai chu kum 2018 khan lak a ni a; Ramdinpuia, Hnahlan chu kumin khan lak a ni bawk. Bhaichung Bhutia Football Academy (New Delhi) ah Lalremmuana, Venglai leh Lalrinmawia, Zotlang chu 2018 ah khan lakluh an ni a. Bengaluru Football Academy
ah Hmingchhuana, Kahrawt; Lalramngaihawma, Ruantlang; Lalrinpuia, Lalhluzuala leh Vanlaltleipuia Venglai te chu kumin hian lakluh an ni leh ta bawk.

TUIALHTHEI 
Mizofed 
MS : Free Sale 
HSD : Free Sale 
RC Filling Station 
MS : Free Sale 
HSD : Service Tanky 



Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…