Skip to main content

CHAMPHAI ṬHALAI PAWL THUCHHUAH

CHAMPHAI ṬHALAI PAWL THUCHHUAH :
Champhai Ṭhalai Pawl ten Champhai Damdawiin Solar Plant chhia siam tha tura Mizoram Sawrkar vawi li lai a ngen hnuah an lehkha No. B. 11013/99/2012/SOLAR/DHME (PP) 252 a chhanna kan hmu hi kan lawm hle a.

Champhai Damdawiin Solar Plant siam that nan hian Zoram Energy Development Agency (ZEDA) hnenah a sum mamawh zat tur ruahmanna siam tirin Champhai Damdawiin Solar Plant siam that nan sum tam tak sen ngai lova Rs. 3,30,792 chauh sen a ngai lehzel tih ZEDA lehkha No.T.11082/01/2018-ZEDA in Mizoram Sawrkar an hriattir leh hi lawmawm kan ti takzet a.

Champhai Ṭhalai Pawl chuan August thla chhunga siamtha ngei turin Mizoram Sawrkar hnuaia Hospital & Medical Education, Aizawl chu a phutin a ngen tak meuh meuh a. Champhai Ṭhalai Pawl    huntiam August thla chhunga hmalakna a hmulo a nih chuan Champhai Ṭhalai Pawl chuan a remhriat angin hma ala dawn a. Engpawh lo thlengse Champhai Ṭhalai Pawl in mawh a phur lo ang.

Tin, Trauma sak mek Sawrkarin nikum 2018…

Champhai Tualchhung Chanchinthar

SKILL DEVELOPMENT & ENTERPRENEURSHIP BUATSAIH JOB/SKILL THALAI TAN :
Naktip June Ni 13, 2019 a Govt Champhai College-a Labour, Employment, Skill Development & Entrepreneurship (LESDE) department buatsaiha Job/Skill Fair-cum-Career Guidance neih tur chungchanga Chanchinbumite hrilhhriatna vawiin chawhnu khan neih a ni.
He hun I&PR Conference Hall-a neihah hian Dr J.T Vanlalngheta, Joint Director, LESDE department chuan thalai hna zawng mek leh zirlaite hmakhua ngaiin Champhaiah Job/Skill Fair-cum-Career Guidance neih tum anih thu leh hemi hmalakna mipuite hnena puanzar kawngah media-te tawiawmna a ngen a. Mipuiten sawrkar department hmalakna leh kalhmangte chiang zawka an hmelhriata,
hamthatna an hmuh theihte an dawn zel a pawimawh a ni, a ti a. Job Fair leh Career Guidance hmangin Champhai khua leh a chhehvel a cheng ten hna an zawn theihna tur bakah zirlai ten an kalzelna tur an ruahman thiam theihna tura hmalak tum anih thu a sawi.
LESDE Department Deputy Director Pu Lalmuanawma’n programme ruahman dan tlangpui a sawifiah a. Zawhna leh chhanna hunte neih niin inkawmhona hun tha tak hman a ni. June Ni 13, 2019 (Nilaithawhtan) zing dar 10:15 hian Govt Champhai College Auditorium-a hawnna hun buatsaih anih zawh veleh zing dar 10:30 atanga tlai dar 3:30 thlengin Job/Skill Fair-cum-Career Guidance hi neih tum a ni a. Govt Champhai College Auditorium-ah Zirlaite pualin Career Guidance neih tum a ni a, First Session hi zing dar 10:30 atanga chhun dar 12 thleng Class 10 zirlaite puala neih tur a ni a, chawhnu dar 1 atanga 2:30 thleng class 12 te puala neih tum a ni. Hetih rual hian College Classroom hrang hrangahte Training Provider Firm hrang hrang 16 ten thalai hna zawngte pui turin Job/Skill Fair an kalpui dawn bawk a ni. Job/Skill-cum-Career Guidance hi Lunglei leh Siaha-ahte neih zawh tawh a ni.Job/Skill Fair kaltlang hian thalai hna neilo, zawng mek leh zirna bansan tawhte tan an thawh theih zawng tur hna zawn theihna hun remchang hawn ani dawn a. LESDE hriatpui Firm hrang hrangten he hun hi an rawn hmanpui dawn a, firm kaltlang hian hna thawh theih leh tulte hriatchian theih a ni ang. Tin, heng bakah hian Zirlaite kalzelna tura kawhhmuhna ‘Career Guidance’ chungchanga inzirtirna Eastern Solutions & Consultancy Services (ES&CS) firm chuan a rawn nei dawn bawk a ni. Tun dinhmunah LESDE Department Mizoram kaltlanga Pradhan Mantri Kaushal Vikas Yojana (PMKVY) hnuaia Skill India Portal-a Training Provider-te’n Short Term Skill Training tura diltu an ziahlut tawh zawng zawng hi mi 5282 an ni a, heng zinga 3332 te hi training zo tawh niin, mi 2333 ten exam hmachhawn tawhin an zinga mi 2071 ten certificate an dawng a, mi 765 ten hna an hmu tawh bawk a ni.


CHAMPHAI-AH GREEN MIZORAM DAY :
Mizoram hmun dangte rualin nimin khan Champhaiah ‘Thing phunin Sik leh Sa vawng tha rawh’  tih thupui thlan hmangin Green Mizoram Day puala hun hman a ni a. He ni puala   hian New Champhai Community Hall-ah a hawnna programme neih a ni a, hemi hnu hian  Sub-Hqtrs YMA ram Mualbuhvum, Zote Road-ah thingphun hnatlang neih chhunzawm a ni. Hawnna inkhawm tawi neih hmasak hi District Bawrhsap Dr Naveen Aggarwal IAS chuan khuallian niin  a hmanpui a ni.
Khuallian  chuan thing leh maute chu mihringte tana nunna hnar pawimawh tak, kan thawkna chuap leh chawbel  a ni, a ti a.
Kum tin hun bi neia Mizoramin  Green Mizoram Day a buatsaih thin chu thil entawntlak leh hlutawm tak anih thu a sawi a. Champhai District chhunga he hun hman anih theihna tura DFO hmalakna hmanga Sawrkar hnathawk, NGO leh mi thahnemngaiten phur taka thing an phun thin chu chhuanawm, a ti a. Green Mizoram Day puala hnatlangte chu  thing tiak phun chauha duhtawk mai lo tur leh a enkawl leh venhim kawnga tan la chhunzawm zel turin a chah a ni.
He hun kaihruaitu Pu C. Lalbiaka IFS, DFO & Member Secretary chuan  Green Mizoram Day kum 20 na pualin kalkhawmte chibai a buk a, kum 20 kalta chhungin Mizoramah thing nuai 36  phun anih tawh thu leh   kum 10 kalta chhunga thing vaibelchhe 20 vel kihthluk anih tawh thu a sawi a. Ramngaw a chereu zel chuan khua a lum chho zel anga, boruak inthlak danglam zel vangin harsatna a thleng thei dawn a ni, a ti a. Ram ngaw lo chereuna chhan chu   fimkhur tawk loh vanga ram tih kan leh  thing leh mau suat nasat lutuk vang a ni tiin,   mipuite chu  thing phun kawnga thanharh turin a sawm a. Champhai District-in kumin bikah Mizoram puma  Kangmei ven kawnga titha ber lawmman a dawng thei chu lawmawm a tih thu sawiin, hemi  thleng thei tura YMA, VC , Media leh mipuite tawiawmnaah lawmthu a sawi a ni.Nimin hian  Kangmei ven hapta leh kengmei hluar hun chhunga khua, Sawrkar Department, Planting Agency leh Chanchinbu thawkthate hnenah khuallianin lawmman tangkafai leh Citation a hlan a. Kangmei veng tha khuate chu a indawt danin Biate,
Khawbung South leh Neihdawn te an ni a. Chanchinbu thawhhlawkte  chu Pakhatna Khawzawl Times,  Pahnihna Rihlipui niin, Pasaltha chu pathumna  a ni a. Sawrkar Department/Zirna In thingphun leh humhalh tha lawmman dawngtute chu Pakhatna DIET Champhai, pahnihna KLTM High School Ngopa leh pathumna Govt. Ruantlang Middle School-te an ni a, heng bakah hian nikum lama Green Mizoram Day puala thingphun tam leh enkawl chhunzawm thate a indawt danin Agriculture & Food and Civil Supply Department tangkawp, Education Department leh Fisheries & Transport Department tangkawpte hnehah lawmman hlan a ni  bawk. 
Green Mizoram Day pual hian Planting Agency hrang hrang 25 leh Sub-Hqtrs YMA ten Tlaizawng  tiak  428   an phun a, a hungna  tha takin an siam nghal bawk a ni. Department thenkhat ten mahni ramah he ni pual hian thing tiak an phun ve bawk a ni.   

ZIRTIRTU MAMAWH NA SAWI HO :
Nimin chawhma khan MZP Hqrs Champhai OB leh Gov't Champhai College Students' Union hruaitu ten emergency meeting an nei.
Meeting hi H. Lalramhluna, President MZP Hqrs Champhai kaihhruaia neih meeting-ah hian Champhai-a zirna in sang ber Gov't Champhai College a zirtirtu indaihlohna hnawhkhat tura sorkar an ngen laia History zirtirtu tunhnaia thlaktu awm lova pahnih sawn chhuah leh a ni chu hriatthiam har an tih thu an sawi a. Subject hrang hrang zirtirtu post hrang hrang ruak te hi Session thar ni 1.7.2019 hma ngei a Mizoram sorkar in hnawhkhah sak turin ngen a. History zirtirtu phei chu a tlem berah pahnih tal pe turin an ngen a. College in an mamawh ngawih ngawih te session tan hma ngei a an neih theih nan MZP Hqrs Champhai chuan theihtawp a chhuah tur thu an tarlang a ni. Hei bakah hian tuna thawk lai mek College zirtirtu te pawh Transfer dil lo turin an ngen a, transfer dil an awm chuan a tawp

thlenga dan an tum thu an sawi bawk.

THLAIZAWNG HMUN ENKAWL :
Khawbung Higher Secondary School-a National Service Scheme (NSS) Unit te chuan nimin khan Mizo Hlakungpui Mual thlang tlâng bâwka Tlawizawng hmun (Cherry Park)-a an thing phunte enkawl zuiin a hmun an sam fai a, a bi âwl hnawh khatin tlaizawng tiak eng emaw zat an phun thar leh a ni. Khawbung HSS hian nikum hmasaa an tlaizawng hmun siam chu enkawl zuiin an sam fai a. A hmunhma hi tlâng char a nih avangin tlaizawng hi a tha chak lo va, khur mumal taka phun tha leh turin hma lak mek a. He tlaizawng hmun hi zin mite khawhawi tinuamtu mai ni lo, sava te pawhin an chaw zawnna leh riahbuk a nih theihna atan sava tlan, thing rah chi Chawmzil phun a ni bawk. Nimin vek khan Khawbung Branch YMA chuan Khawbung Swimming Pool tlang leh Mizo Hlakungpui Mualah YMA Day pualin thing tiak 150 chuang an phun bawk.

KELKANG BIAK IN HAWNG :
Nimin khan Kelkang Presbyterian Kohhran Biak In chu Rev.Lalhmingthanga, Synod Moderator chuan ahawng Kelkang Biak In tha thar hawn programe hi niminpiah atang khan hman tan niin hemi ni hian nilengin Bethelpui neih niin zanah Pathian biak inkhawm neih chhun zawm leh a ni. Nimin chawhma dar 10 khan Rev R. Lalhmingthanga, Synod Moderator chuan Biak In thar hi Thlarau Thianghlim zalenna hmun ni zel tur leh Kohhran ho te inpumkhat zelna hmun a nih theihna turin Biak In thar hi a hawng a ni. Biak In hawnna hun hman zawh a nih hnuah Rev. PC Malsawmtluanga, Bialtu Pastor kaihhruaiin Pathian Biak Inkhawm neih zui nghal niin Synod Moderator,Rev. R. Lalhmingthanga hnen atangin Pathian thuchah ngaihthlak niin Lalnuntluanga, Secretary,Building Committee hnen atangin Biak In sak a nih dan report ngaihthlak a ni a. Kohhran zaipawl zai
ngaihthlak a ni bawk a tlaiah Biak In thar lawmna ruai an kilho nghal a ni. Nizan khan Biak In thar lawmna inkhawm neih zui leh a ni.
Hetihlai hian vawiin hian Kelkang Presbyterian Kohhran in zantin chawl lova an inkhawm kum 6 na champha pualin nileng in hun hman chhunzawm a ni ang a, Pastor hrang hrangte hnen atangin thusawi ngaih thlak a ni ang a. Kohhran zaipawl, Bial zaipawl, The Leprosy Zaipawl te zai ngaihthlak a ni ang a, tlaiah Kum 6, a zawna zantin an inkhawm pual hian ruai an kilho dawn bawk.

SP OUT SP IN :
Champhai SP, Aizawl lamainsawn tur Lalthiamsanga Sailo chuan nimin khan Champhai chhuahsanin Aizawl apan ta a. Champhai SP thar tur Rex Vanchhawng pawhin nimin khan Champhai a rawn thleng fel ta bawk. Zarzoliana

KHAWZAWLAH THIANG PHUN :
Green Mizoram Day pualin niminkhan Khawzawl khaw chhungah pawh thingtiak 2000 chuang phun a ni a, he Ni puala hun hmanpui
berah chuan Environment, Forest and Climate Change Department, Khawzawl bultumin Khawzawl Mualvawm Tlangah thingphun hnatlang neih ni a, thing tiak 200 chuang phun a ni.

TUIALHTHEI
Mizofed :
MS : Sercive Tanky
HSD : Free Sale
RC Filling Stantion
MS : Service Tanky
HSD : Service Tanky

Comments