Skip to main content

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

Champhai Tualchhung Chanchinthar

MYANMAR A HMEICHHE THAWN TUMTU TLANCHHUAK :

Bangladesh-a Rohingya raltlan hmunpui atanga
ruk chhuaha Myanmar lama hruai chhoh tur ni a rin Rohingya Muslim, kum 15 leh 16 bawr vela upa, hmeichhe 8 chu Thawhtanni khan Police te'n
Champhai district-a Dungtlang khuaah an chhanchhuak.
DIG (Northern Range) Lalbiakthanga Khiangte sawi danin he'ng an tleirawl chhanchhuahte hian Hindi leh tawng dang pawh an thiam lo va. Bangladesh atanga rawn ruk chhuah ngei an nih rin a ni a ti. Heng hmeichhe 8 te hi nimin khan Chief Judicial Magistrate hmaah hruai niin Child Protection Home, Champhai ah dah an ni. Heng hmeichhe tleirawl 8 te la chhawng tu tur Jonathan (23) s/o Thathawmliana, Khawthlir Myanmar leh Nguntindawnga (25) s/o Thabuantaia, Tahan Myanmar nia insawi te chu Saikhumphai man nghal an ni. Nguntindawnga chuan heng hmeichhia te hi Malaysia, Singapore leh Indonesia a hruai tur an nih thu a sawi a. Zokhawthar Gateah Mizo te anga hnamdang tan permit lak a theih loh avangin Saikhumphai lama inhlan chhawng tura an in biak thu a sawi. Mi pakhataj Rs 2500 zel a hlawh tur thu a sawi tel bawk.
Hetih lai hian Jonathana chuan a zu dah tur remchangah lain Sumo Hire nan Rs 30000 pe tura an tih thu leh Rs 500 hlawh tura an tirh thu a sawi thung.
Heng mi pahnihte hi Dungtlang Police te chuan Champhai Police Station an panpui laiin Khuangleng khaw bulah an kutkawl nen an tlanchhuak a. Chanchin buatsaih lai hian hmuh an la nilo a Police te chuan ngawrh takin an la zawng zel a ni.
Rohingya Muslim te hi Myanmar ram Rakhine State a cheng, tihduhdahna an tawrh avang leh helna avanga Bangladesh-a raltlan an ni hlawm a. India rama an luh hian thawnkir nghal zel turin Ministry of Home Affairs chuan state tin a hriattir chungin, India leh Myanmar ramin mi leh sa inthawn tawn theihna tura inremna (extradition treaty) an neih loh avangin Mizoram sorkarin harsatna a tawk mek a. Kumin April ni 25 a Vairengte Police check gate-a Mizoram
luh phalna nei lo va luh tum an hren Rohingya
hmeichhia 8 te pawh Social Welfare department
enkawl Women Protection Home-ah dah rih an la
ni. Myanmar hian India nen inremna pawh lo nei reng mah se Rohingya ho hi an ram khua leh tui-ah a pawm lo hrim hrim nia thudawn a ni.

THAWH SARIHNA:
Nimin chawhma dar 11:00 Economic Census thawh sarihna neih tur chungchangah Champhai DC Dr. Naveen Agarwal IAS, hoin Champhai DC Conference Hall, Keifangtlangah Meeting neih a ni.
He Meeting Champhai Bawrhsap Dr. Naveen Agarwal IAS, Kaihhruaiah hian Economic Census hi India ramah tum 6 hlawhtling taka buatsaih a nih tawh thu tarlan niin Mizoram erawhin chhiarpui vawi 3-na atangin chauhin a zawm ve a, Prime Minister-in Digital India Programme a hawn atangin Economic Census thawhsarihna Survey kalphung thlak danglam niin Mobile Application hman a ni tawh dawn a, Ministry of Statistics & Programme Implementation leh CSC-SPV (Commonb Service Centre Special Purpose Vehicle). e-governance Services India Limited, Ministry of Electronics and information Technology hnuaia din te nen tang hoin chhiarpui hi neih a nih tawh tur thu tarlan a ni bawk.
Economic Census thawh Sarihnaah hian in tina lut a hmaih awm miah lo va suvey neih tur a ni a, Economic activities awmn lohna in te pawh luhchhuah vek tur a ni dawn a ni. In tin luhchhuah vek tur a nih avang hian phungbawmah Village Council te sawm nise, Survey neih anih dawnah chhungkaw chanchin chipchiar taka hre tur pakhat tal ngen a tul tur thute tarlan a ni bawk.
Economic Census thawh sarihna neih tura hian Champhai District chu Block 4 ah then niin Champhai Block chu block 40 ah then leh niin Supervisor 5 leh Enumerators 15 ten an vil dawn a, Khawzawl Block chu Block 14 ah then niin Supervisor 1 leh Enumerators 5 ten an vil dawn a, Biate Block chu Block 7-ah then niin Supervisor 1 leh Enumerators 7 ten an vil dawn a. Khawhai Block chu Block 5 ah then niin Supervisor 1 leh Enumerators 7 ten an vil dawn bawk a ni.

PRESS TOUR :
I&PR Dept buatsaih nimin zing khan Champhai District MJA te chuan Ngopa tlangdung tlawhin an fehchhuah. 
Press Tour a kal te hi Mimbung kawng leimin in reilo te dang mahse JCB hmanga then fai a nih hnuah chawhnu dar 1 velah ke in an kal kai thei a ni. 
He Press Tour ah kal te hi vawiin khan Kawlbem Mini Hydel Project tlawhnghalin vawiin lamah Ngopa thingpui huan, NE Khawdungsei Water Supply Scheme leh Tuivai a Mizoram leh Manipur inrina an tlawh ang.
Ruahman dan chuan Zirtawpni hian Champhaiah rawn kir leh tura ruahman a ni. Press Tour chhung hian Champhai chanchinbu Print Media bik a chhuak lo ang. 
He Press Tour ah hian DIPRO Dr Lallawmkima leh I&PR Staff ten an kaihruai a ni. 

RUIHHLO MAN HNEM :
Champhai Excise & Narcotics Staff te chuan Heroine leh a neitu nia rin an man. 
Champhai Excise & Narcotics Staff te chuan vawiin chawhnu dar 1 khan Zokhawthar Hruaikawn pengah Lalchhanchhuaha (26) s/o Biakdinliana, Ruantlang khua nia i sawi hnen atangin Heroine 12.4 gram an man bakah Lalrinmawii (45) d/o Manthanga, Aizawl Bawngkawn nia insawi hnen atangin Heroine 12. 1 gram an man bawk. 
Champhai Excise & Narcotics Enforcement Staff te chuan ni 18.6.2019 (Thawhlehni) zan khan Myanmar atanga lakluh Heroine hawng 33 gram 477. 3 chu Mualkawi daiah motor pakhat atangin man a ni a. He ruihhlo phurtu Driver leh a Motor hi an man nghal bawk a ni. 
Pu B. Zoliana, Assistant Commissioner Champhai District Excise & Narcotics chuan Heroine phurhna Lirthei MZ 04 A 0939 hi Aizawl lam ta a nih thu leh lirthei khalhtu Lalthanliana s/o Khamzamunga (fam), Champhai Chhungte chuan Lirthei neituin a hriatpuina a ruihhlo chu phur an nih thu a sawi. 
Excise & Narcotics te chuan an chhuizui mek a. Lirthei khalhtu Lalthanliana chu ND&PS Act tlawhchhana thubuai siamsak niin nimin khan District Court ah hruai a nih hnuin District Jail ah dah luh a ni. 

NAKTUKAH FINAL :
CDBBA Season Opening 2019 khelh mek chu nizan khan Semi Final khelh zawh a ni. 
Nizan hmasa Quarterfinal match hnih khelhah khelh hmasa zawkah Chawnchhim Chempui leh Kahrawtian te inkhelin Kahrawtian BC te hian 100 - 70 a hnenna changin Semi Final an in hlangkaia inkhel thawhhnihnaah Freddy's Memorial leh Baby Ghost inkhelin Freddy's Memorial te hian 44 - 39 in hnehna an chang
Zaninah Semi Final zan hnihna khelh chhunzawm niin Minikins BC leh Boars One te inkhelin a thawhhnihnaah Kahrawtian BC leh Freddy's Memorial te an inkhel ang. Semi Final hi zaninah khelh zawh tura ruahman niin naktuk zanah Final khelh nghal tur a ni. 

VAIMIN EICHHETU ZIAAWM:
Vaimin hnah leh a kung eitu panngang chikhat Fall Army worms chuan ziaawm lam a pan zel a aanglai ai khan za zel a 33 in a tlahniam tawh. 
Joint Director Pu Lalsiamliana sawi danin pangngang puan nasat lai tak May thla bul leh a laihawl vel lai ai khan a tlahniam tawh hle a, vaimim hnah leh a kung a seh tam tak chu chhiat chin leh damdawi leitha  pek a zirin rawn tha chhuak leh thei tam tak an awm a. A tihchhiat hlutzawng hi chu a rah tak tak hunah bak a hriat theih dawnlo a ni. 
Avang laia vaimim chinna hmun za zela 63.48 lai a dap laiin tunah chuan za zela 35. 71 chiah a dap tawh a. Avaia a nghawng hi khaw 341a chhungkaw 10049 an tling tawh a ni. Fall Armyworms hi chuan thlai chi 80 chuan a ei thin nia sawi a ni a. Mahse Mizoram a a vawikhatna ah erawh vaimim chauh ala ei a, rannung thatna hlo hmanga theihtawpa tihrem tum a nih  bakah ruahtui a rawn tlak tak avangin a puang hi a ziaawm zel tura ngaih a ni. 

TUIALHTHEI 
Mizofed Pump 
MS : Free Sale 
HSD : Free Sale 
RC Filling Station 
MS : Free Sale
HSD : Free Sale
RD Filling Station 
MS : Free Sale
HSD : Free Sale






Comments