Skip to main content

Champhai Tualchhung Chanchinthar

TLEIRAWL 8 DUNGTLANG POLICE IN CHHANCHHUAK :  Bangladesh-a Rohingya raltlan hmunpui atanga ruk chhuaha Myanmar lama hruai chhoh tur ni a rin Rohingya Muslim, kum 15 leh 16 bawr vela upa, hmeichhe 8 chu niminpiah khan Police te'n Champhai district-a Dungtlang khuaah an chhanchhuak. DIG (Northern Range) Lalbiakthanga Khiangte sawi danin he'ng an tleirawl chhanchhuahte hian Hindi leh tawng dang pawh an thiam lo va. Bangladesh atanga rawn ruk chhuah ngei an nih rin a ni a,-Saikhumphai kaltlanga Myanmar rama luhpui tum an ni a, anmahni hruaitu tur hi Saikhumphai-ah a awm nia hriat a ni. Mizorama luh phalna nei lo he'ng hmeichhe 8-te hi nimin khan Champhai district Chief Judicial Magistrate hmaah hruai an ni a. Hmeichhe enkawlna Home lama dah rih an nih rin a ni.  Rohingya Muslim te hi Myanmar ram Rakhine State a cheng, tihduhdahna an tawrh avang leh helna avanga Bangladesh-a raltlan an ni hlawm a. India rama an luh hian thawnkir nghal zel turin Ministry of Home Affairs chuan s…

Champhai Tualchhung Chanchinthar

KUM 10 NIH LAWM :

Ni 5.6.2019 chawhnu hian school Education Minister Pu Lalchhandama Ralte chuan Khawbung Higher Secondary School Tin Jubilee leh HSSLC results 2019 lawmna Khawbung Community Hall a neih chu a hmanpui.
   Minister chuan he hunah hian thusawiin Khawbung khawtlangin an din Higher Secondary School-in kum 10 a tling ta chu lawmawm  a tih thu a sawi a. Zirlaite tum fel tak neia lehkha zir turin a fuih a, Nu leh pate chu an fate zirna ngaihvena, ngaihsan tur dik ngaihsantir a, an kalkawng tur kawhhmuh a, zirlaite kaihhruai a ngai a ti a. Tlawmngai pawl hrang hrangte pawhin anmahni khua theuha zirna in ngaihven a, zirtirtu an awm that leh that loh te leh school-in zirna a kalpui dan te lo bihchiang thin tur leh neitu nihna thinlung pua enkawltu ni turin a sawm bawk a ni.
   Minister chuan ram hmasawnna tluantling nei turin zirna a pawimawh thu a sawi a, sumdawnna leh eizawnna kawng hrang hrangah hnam thinlung pu chunga lehkha zir turin a chah a ni.
Pu Lalchhandama Ralte hian Khawbung a thlen hian kum 30 hma lama a lo awm tawhna khua anih avangin khawtlang mipuiten Zawlbuk kawt zawlah Khawbung tlangval Minister hmasa ber tiin amah lo hmuahna leh chawimawina hun an hmang bawk.
   Minister hian Farkawn atanga Khawbung a panna kawngah Vaphai Higher Secondary School building a hawng a, Minister chuan khawtlang nu leh paten Higher Secondary School an din chu an hahpui dawn tih inhre chunga kal turin a chah a. Minister hi Samthang khawtlangin hmuakin an lo dawngsawng bawk.
   Khualzahawm Pu Ramthanmawia MLA pawhin Khawbung HSS Tin Jubilee lawmnaah hian thusawiin Khawbung-in HSS atana an hmalakna chu fakawm a tih thu leh kum 10 chhunga an result chu chhuanawm a tih thu a sawi a, nu leh pate leh zirlaite zirnaah harh thar a ngai a ni a ti a. Eklavia school, Khawbung a din turin hma lak mek anih thu a sawi.
   Pu C.Lalmuanpuia MLA pawhin Khawbung khawtlangin HSS Tin Jubilee an lawm thei chu a lawmpui thu leh school tana an thawhrimnaah a fak a. Kan ram tan fa duhawm tak tak chherchhuak zel turin duhsakna a hlan a ni.
   Khawbung HSS-ah hian kum 10 chhungin zirlai 248-in HSSLC an exam tawh a, heng zinga 226 te chu an pass a, zaa 91.13 an pass a ni. Thawktu Principal leh lecturer 5, Peon cum chowkidar 1 an awm a ni.
     Khawbung HSS Tin jubilee leh HSSLC result 2019 lawmna hunah hian School Education Minister leh MLA pahnih te hi Pu K.Laldingliana School Education Additional Director, Pu Lalhmachhuana SPD SSA & RMSA, Pi Ethel Rothangpuii Project Director DRDA Champhai ten an tawiawm a. MNF General Hqrs Secretary leh Jt. Secretary ten an tawiawm bawk. Khawbung Community Hall-a lawmna hunah hian  Khawbung khawtlang mipuite, zirtirtute leh zirlai thahnem tak an kal khawm a ni.

LUIKAWRH TIHFAI RUNPUI :
YMA Sub-Hqrs Champhai leh UD&PA te la hmalakna-in nimin khan YMA Sub-Hqrs Champhai hnuaia-thuthmun Branch hrang hrang 25 te chuan lui hnar tihfai hnatlang runpui an nei.
Champhai chawmna atana tui lakna hmun hnar te chu bawlhhlawh leh plastic kaihhnawihin a tihbawlhhlawh nasat bakah a tihtawp nasat tawh avangin YMA Sub-Hqrs Champhai chuan UD&PA chu thawhpuiah sawmin lui hnar tihfai hnatlang
runpui hi nei turin hma an la a Nimin khan an hmalakna bawhzuiin Thuthmun Branch hrang hrang 25 te chuan anmahni huamchhung theuhah Champhai tui lakna luihnar pawhtu kawr te tifaiin hnatlang pui hi kaihhnawih hmuh tur a tam hle a, bawlhhlawh an hmuh ang ang te chu pâih fai nghal zelin tui luankawr hnawh khawpa bawlhhlawh lo tlingkhawm pawh hnatlanga thawkchhuak te hian an Polythyne leh plastic thianfai na  an nei a.  
Hnatlang pui neih taka bawlhhlawh an chhar te hi UD&PA chuan an motor in a  paih sak zel a, branch thenkhat chuan tui luankar mai bakah ko hnim zualte an sam fai nghal bawk a ni. Hnatlang a chhuak Branch te hi YMA Sub-Hqrs hruaitute
chuan kalchilhin an tlawh chhuak a, an ei leh in tur te an hlan a. Branch tin atangin member 100 bawr vel zet an thawk chhuak hlawma, hetianga hnatlang pui YMA in a kohah YMA member te thahnemngai taka an thawkchhuak chu lawmawm an tih thu sawiin, hnatlang an ko leh a nih pawha phur tak leh thatho taka thawkchhuak zel turin YMA Sub-Hqrs Champhai hruaitute chuan member te an ngen nghal bawk.

BEIHPUI THLAK ZEL :
Champhai District chhunga thlai eichhetu puang mek pangang chi khat Fall Army-worm (FAW) suat rem tura District Agriculture in beihpui athlakna kal mekah rannung thahna hlo hman anih bakah achi thlah pungtu Male Mothman turin Thang chi khat, Pheromone Trap kam mek a ni bawk.
Champhai District Agriculture Department hotute sawi danin, kumina thlai, a bikin Vaimim eichhetu pangang puang mek tihrem nan hlo tur leh hmanraw hrang hrang hman a ni a. He
pangang chikhat FAW puang mekin thlai a tih chhiat chu a zia-awm phah bakah fur ruahtui hmasa sur chuan pangang puang zel tur a tih ziaawm phah hle bawk. He -Thlai eichhetu pangang inthlah pung zel tur ven nan hian District Agriculture Staff te puibawmin, Leisenzo leh Sesih Branch YMA bakah Loneitute tangkawp chuan thlawhlai-ah Rim hmanga Lungphur-pa manna tur Ni 45 chhung hman theih tur thang chi khat Pheromone Trap 97 chu Vaimim kungah an kam a. He thang hmang hian Lungphur-pa eng emaw zat man a ni tawh. Thlai kungte hi a than chhoh zel avanga a eichhetu pangang hi thuk takah tanhmun a khuar tawh avangin pawnlam atanga thah hleih theiha ni tawh lo va, Lungphur nu rim hmanga pa that turin he thang chi khat, Pheromone Trap hi thlawhlai hmun hrang hrangah kam a, ngun taka vil ruk reng a niin, thlai eichhetu inthlah pung zel tur dan nana hmanraw tangkai tak a nih beisei a' ni.
Niminpiah khan District Agriculture dept hian an Conference hall-ah Score a card leh Fall Armyworm puanna hmun chhinchhiah chungchangah training an nei a,ATMAlam atangin mithiam te chuan zirtirna an pe a ni.

TAXI NEITUTE INHMUKHAWM :
Nimin khan Champhai Taxi Owners' Association (CTOA) chuan Kahrawt Community Hall ah members' meeting an nei. He meeting hi V.Laldinthara, CTOA President chuan kaihhruaiin member te infuihtharna hlimawm tak hman a ni a, member 130 chuang an kalkhawm a ni.

SOLAR CHUNGCHANG SAWIFIAHNA:
Vawiin chawhma dar 11:00 hian MJA Champhai District Press Club, Bethel Vengah Grid Connected Rooftop Solar PV System chungchang inhrilhfiahna hun hman a ni dawn -a
Hetiang lama tui mite tan he hun hi chhim theih a ni ang.

GRAM SABHA NEI :
Nimin zing khan Veng thenkhatah chuan Gram Sabha neih a ni.
Gram Sabha neihnaah hian kum 2019-2020 chhung atana Village Employment Committee (VEC) hruaitu turte chu kalkhawm mipuite'n an thlang chhuak a, VEC thlan chhuah te hian ni za inhlawhna an enkawl chhunzawm dawn a ni. Village Monitoring Committee member tur pawh thlan nghal a ni a, Village Monitoring Committee (VMC) in a tih tur leh a hnathawh tur te sawifiah leh inhrilhfiahna hun hman nghal a. VEC te'n work Order an hmuh apiangin VMC te hnenah hriattirna an pe ang a, VMC Chairman hian Work Order a chhuah thu an dawn apiangin Committee a ko ang a, VC te hnathawh reng reng a hmunah kal in an thawh dan a dik tawh em tih te, an pawisa hmuh mil in hna an thawk em tih te endik chu an tih tur pawimawh tak a ni a. An hnathawh endik si lova hming lo sign ve ringawt lo va, VC te hnathawh endik chat chat chu an tih tur pawimawh tak a nih thu te tarlan a ni a. VMC te'n VEC te hnathawh a tha a ni tih finfiahna atan lehkhaah an hming an ziahhnan hnuah VEC te hian mipui hnena sem tur ni za inhlawhna pawisa an draw thei chauh thin dawn a ni. 

BASKETBALL ACADEMY NAUPANG :
Lalhminghlua Khiangte, K.Ramdinzauva fapa,
Champhai Vengthlang chu Mizoram aiawhin
National Sub-Junior Under 14 khel turin a tling. Lalhminghlua Khiangte hi tuna Champhai Basketball Academy a zirlai niin, kar hmasa khan Aizawl-ah trial paltlangin Mizoram aiawha khel tura thlan a ni a. Champhai Basketball
Academy zirlai zingah hetiang dinhmun thleng
thei hmasa ber a ni.


TUIALHTHEI :
RC Filling Station 
MS : Free Sale


HSD : Free Sale

Comments