Skip to main content

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

Ruihhlo Rs. 7,597,000 man hal ral

Khawvel hmundang rualin nimin khan Champhai District Court tualah 'International Day against Drug Abuse and Illicit Trafficking' pualin Champhai District chhunga Mizoram Police in kum 2015-2018 chhunga ruihhlo an man, Court-in ND & PS dan hmanga a chinfel tawhte chu Additional Sessions and Special Judge R.Vanlalena'n a halral.
Champhai District Drugs Disposal Committee Chairman, Superintendent of Police (SP) Rex Zarzoliana Vanchhawng chuan Champhai District chu ruihhlo luhna kawngkapui a nih vangin, chhungtin min runchhe mektu ruihhlo dolet tur hian mi zawng zawng tanrual a tul thu leh he ruihhlo halral hun hmangtu sorkar mi pawimawh tak takte leh Media mite pawhin ruihhlo doletna kawngah theihtawp chhuah turin mawh kan phur a ni, a ti a. Nimina halral tak Heroin Kg 2.356 (Hawng 178) tualchhung hralhnaa chhut a, Rs. 70,80,000  man leh Ganja Kg 127, man tualchhung hralhnaa chhuta Rs. 5,17,000 man chu kum 2015-2018 chhunga man a nih tih a tarlang a. Champhai SP Rex Zarzoliana Vanchhawng chuan, heng ruihhlo kaihhnawiha ND&PS Act hmanga thubuai 49 te chu chinfel tawh a nih vanga halral a nih thu a sawi a. He Ni pual hian Champhai District chhunga Police Station hrang hrang: Khawzawl, Ngopa, Champhai leh Zokhawthar Police hmunah ruihhlo chungchanga zirtirna hun hman a ni tih a sawi bawk.
Ruihhlo halraltu Additional Sessions and Special Judge R.Vanlalena chuan, Ruihhlo hi mitin tichhetu, kan hmelma a nih vangin vawiinah kan inchhungkhur min tibuai rih lovin, him rih mah ila; theihtawpa tan la tlanga kan do loh chuan min luhkhung ni ala thleng lo vang tih a sawi theih loha. Ruihhlo laka chhungtin kan buai lohna turin mi tin-
ten theihtawp kan chhuah a tul tak zet a ni, a ti bawk.
Supreme Court of India-in ruihhlo man tawh tihral loha hunrei tak dah a nihin thil felhlel a awm theih vangin Ruihhlo man tawhte laka thubuai chinfel a nih veleh a rang thei ang bera ruihhlo tiral tura a tih laiin, Champhai District bikah kum 4 zet  chhunga  Mizoram Police-in ruihhlo a mante chu tihral lohin dah khawl a ni thung.
Champhai District Drugs Disposal Committee din a nih hnu-ah Media mite chuan Committee Chairman leh member dangte hnenah ruihhlo mante tiral tura an sawipui tawh thin chungin, nimin khan tihral
a ni ta chauh a. Media mite chuan nimin khan
Additional Sessions & Special Judge R.Vanlalena chu a Pisa-ah hmu-in, rim taka thawka ruihhlo mantute bakah thuhretu, khua-leh-tui thate rilru dam tlanna ngei turin ruihhlo-te chu a nihna ngaia a hma thei ang bera tihral ni thin se an duh thu an thlen a. R.Vanlalena chuan ruihhlo man tawhsate chu a hma thei ang bera tihral danngaihtuah


a nih tur thu a lo hrilh a ni.

Comments